Zende koyikaramo

Zende koyikaramo

Nombangi daJehova

Horowora eraka Rukwangali

Awo kwa ligeve vene—moTaiwani

Awo kwa ligeve vene—moTaiwani

NOMVHURA ntano da ka pita, Choong Keon naJulie, valikwali wonomvhura dokoyiha 35, kwa kara vazuvhisi wokukarerera modoropa Sydney, mosirongo saAustralia. Choong Keon kwa tanta asi: “Ose ngatu rugana ntani ngatu paruka eparu lyewa. Oku twa tungire mukarompepo muwa ntani ngatu hafere unene eparu.” Nampili ngoso, Choong Keon naJulie, ezwi lyawo lyokomutjima ngali va zogerere. Morwasinke? Morwa va yi divire asi ukaro wawo kuvhura u va pulisire va rugane unene mosirugana saJehova nye ngava likata-kata kutura po marunduruko.

Posigongi somo-2009, awo kwa ka zuvhire siuyungwa esi sa va twire komutjima. Nonkango domuuyungi kwa demenene kwava vana hara kurugana unene mokuzuvhisa. Age kwa tente asi: “Gazadareni eyi: Nsene etuwa kuna kugenda, musingi kuvhura tupu a pirwire etuwa lyendi korulyo ndi korumoho. Mokulifana, Jesus nage kuvhura a tu vyukise nsene tu litura mo unene mosirugana sokuzuvhisa.” * Valikwali kwa lizuvhire ngwendi asi muuyungi yiwo ana tamba. Posigongi oso, vatumwa hena wovalikwali ava va tumine koTaiwani kwa va puragerere. Awo kwa simwitilire ruhafo oru ava gwana mosirugana sokuzuvhisa ntani asi simpe vana hepa vazuvhisi wovanzi. Choong Keon naJulie simpe kwa lizuvhire ngwendi asi nonkango odo kwawo dina tamba.

Julie kwa tente asi: “Konyima zosigongi oso, yipo twa kanderere kwaJehova a tu pe uradi wokutokora kudirukira koTaiwani, nye twa kere nowoma. Ose kwa kere nomasinganyeko gokudirukira kosirongo sapeke sikando sokuhova.” Etjangwa eli lya va vaterere va dire kukara nomasinganyeko kuna kara Muudisi 11:4, eli ali tanta asi: “Nsene o ndindira asi tanko mpepo nomaremo yi zire mo, narumwe si asi ngo kune ndi asi ngo teze yuma.” Choong Keon kwa tanta asi: “Ose twa tokwere kudira ‘kundindira’ nye twa ‘kunine’ ndi asi twa rugene ko yuma.” Awo ngava kanderere unene nokuresa masimwititi kuhamena vatumwa ntani ngava litumine nombudi  nava va dirukilire koTaiwani, yipo va randesere matuwa noyikwapundi yawo, ano konyima zomakwedi gatatu tava dirukire koTaiwani.

KUGWANA RUHAFO MOKUZUVHISA

Vanavazinyetugara nava wovakadi wokupitakana 100 wokoyirongo yapeke kuna kuzuvhisira moTaiwani momukunda omu vana hepa vazuvhisi woUhompa. Awo kwa tunda koBritania, Kanada, Fransa, Japani, Koreya, Sipanye ntani Amerika, ano nomvhura dawo da lisiga, kutamekera 21 yi tware dogoro 73 ngoso. Vanavazinyetukadi wokupitakana 50, vadike. Yisinke ya vatera vanavazinyetu ava womupampi va ya zuvhisire mosirongo sapeke? Tu yi konakoneni.

Laura

Laura, munazinyetukadi gomudike ga tunda koKanada, age ngesi muzuvhisi gokukarerera moTaiwani. Nomvhura murongo dina ka pita, kapi nga hafere yirugana yokuzuvhisa. Age kwa tanta asi: “Morwa kapi ngani kara mosirugana sokuzuvhisa siruwo sosire yiyo ngani dili kusihafera.” Makura vakaume vendi wokoKanada yipo va mu pulire a ze nawo koMeksiko a ka zuvhise nawo ure wokwedi. Age kwa tente asi: “Aso kwa kere sikando sange sokuhova na rugene unene mokuzuvhisa ntani nayi haferere sili.”

Sihorokwa oso sosiwa sa ninkisire Laura a gazadare ko kudirukira kombungakriste ezi azi uyunga eraka lyapeke moKanada. Age kwa litjangesere mosikora zokuronga eraka lyoRutjina nokuzuvhisa nokambunga koRutjina, ano mwaSitarara 2008 yipo ga tokwere kudirukira koTaiwani. Laura kwa tanta asi: “Ayo kwa gusire nge mvhura mokuyika kukara moTaiwani, nye ngesi kapi hena nina kugazara kutengura koKanada.” Ngapi ana kulizuvha kuhamena sirugana sokuzuvhisa? Age kwa tanta asi: “Ame kuna kusihafera unene. Ayo kuhafesa nge pokumona omu varongwa vange woBibeli vana kutura po marunduruko meparu lyawo ngomu vana kudiva Jehova.” Kuzuvhisira moTaiwani ya ninkisa nge ni twikire kukara noruhafo.”

 UDIGU WOKULIRONGA ERAKA

Brian naMichelle

Brian naMichelle, valikwali wonomvhura dokoyiha 34 womoAmerika ava va dirukira moTaiwani ure wonomvhura ntantatu, pomuhowo awo kwa lizuvhire asi kapi vana kulihameka unene mosirugana sokuzuvhisa. Nye mutumwa ga kara nediwo kwa va tanterere asi: “Nampili nsene o gava tupu sitratate simwe komuntu, diworoka asi aso kuna kara sikando sokuhova muntu ana kugwana mbudi zokutunda kwaJehova. Pokurugana ngoso ove kuna kulihameka mosirugana somulyo!” Makorangedo ogo kwa vaterere unene Brian naMichelle mokutwikira kulironga eraka. Munazinyetu gumwe kwa va tanterere asi: “Mokunyokera po kudompa mutjima, koneka omu ono kutura po ezokomeho mokulironga Rutjina kapisi nkenye ezuva nye pwankenye sigongi.” Awo va tura po ezokomeho, ngesi kuna kara vazuvhisi wovawa wokukarerera.

Yisinke nayi ku tumangeda o lironge eraka lyapeke? Heteka kudingura sirongo esi ono hara kukazuvhisira. Zende komapongo nokukalipakerera novanavazinyetu ntani nokupwaga kumwe nawo mokuzuvhisa. Brian kwa tanta asi: “Konyima zokumona omu wovanzi vana kutambura mbudi zoUhompa ntani neharo lyovanavazinyetu, ayo ngayi kutumangeda o hare kuzuvhisira mosirongo sapeke.”

NGAPI KUHAMENA YIRUGANA?

Kristin naMichelle

Vazuvhisi vamwe moTaiwani kulirera vene ngovazuvhisi wokukarerera pokuronga Ruingilisa. Kristin naMichelle ngava randesa nondya demefuta. Kristin kwa tanta asi: “Kapi na rugana rumwe yirugana eyi, nye ayo kuvatera nge yipo ni kare mosirongo.” Mwaza siruwo, Kristin kwa ya gwene ko varandi. Yirugana eyi kumuvatera a lirerese ko namukadendi ntani kuvapa siruwo sokuzuvhisa.

“KUHAFERA SIRUGANA SOKUZUVHISA”

William naJennifer, valikwali va tunda koAmerika kwa kara moTaiwani ure wonomvhura ntambali. William kwa tanta asi: “Kulironga eraka nokurugana uzuvhisi wokukarerera nokupakera mbili mbungakriste ntani nokurugana mokugwana yimaliwa yokulireresa, poyiruwo yimwe udigu.” Yisinke ya va vatera yipo yi va tompoke nokutwikira kukara noruhafo? Awo kulitulira po yitambo eyi nava sikisa mo. Pasihonena, apa va lirongere Rutjina kapi va ndindilire asi tava diva usimbu eraka, ano eyi ya va vaterere va dire kudompa mutjima nampili ngomu va dilire kutura po ezokomeho usimbu.

William naJennifer

William ta diworoka asi siruwo simwe mutareli gonombunga kwa mu tanterere asi: “Hafera sirugana sokuzuvhisa.” Eyi kutanta asi konyima zokutura po yitambo yopampepo, wa hepa kuhafera marunduruko aga ono kutura po. Pokusikisa mo epukururo olyo, ayo ya vatera William namukadendi va tambure mapukururo kovanavazinyetu nokurundurura nkedi zawo zokurugana yininke mokuhafera sirugana sawo. Age kwa gweda ko hena asi: “Ayo ya tu vatera hena tu hafere unsitwe momukunda ogu a tu zuvhisire.”

Ngwendi William naJennifer, munazinyetukadi gomudike gomuzuvhisi gokukarerera gedina Megan, gomoAmerika, age kuhafera sirugana sendi sokuzuvhisa ngomu ana kulironga Rutjina. Nkenye sikondovike age kulipakerera nokambunga kovazuvhisi aka aka zuvhisire momukunda gomuwa, gwedina Kaohsiung, ezenga lyenene moTaiwani. Megan ya mu tompoka kuzuvhisira mbudi zongwa tunda sikepa zende sikepa ntani vakwati nomfi moBangladesh, India, Indonesiya, Filipine, Tairanda, ntani Vanuatu. Megan kwa tanta asi: “Mokumona asi vakwati nomfi kuwiza tupu kezenga karuwogona, ose kutameka elirongo lyoBibeli paapa tupu atu va gwana. Mokutompoka nge, ame kulironga novantu vane ndi vatano posikando simwe.” Ngapi ayi mu tompoka kulironga Rutjina? Age kwa tanta asi: “Ame kulizuvha ngwendi ni dive usimbu eraka  nye ame kudiworoka eyi ga tanterere nge munazinyetugara gumwe asi: ‘Rugana paapa wa hulira, ano Jehova nga ku vatera.’”

Megan

KURERUPIKA EPARU NOKUHAFERA KUZUVHISA

Komeho Cathy, gomoBritania a dirukire kosirongo sapeke, age kwa hovere kurugana epaparo kuhamena mukunda gomuwa nava vhura kuzuvhisira vanavazinyetukadi wovadike. Age ga tumbwire sinka sendi mekanderero kwaJehova ntani nokutjangera nombilive koNobeteli dokulisiga-siga mokupura nsene nomukunda dimwe da wapa kuzuvhisira mo vakadi wovadike. Apa ga gwene malimbururo konombilive dendi yipo ga dimbwilire asi Taiwani kwa kere sirongo sosiwa kwendi kuzuvhisira.

Cathy kwa dirukilire koTaiwani 2004, age nomvhura dendi 31, age ga rerupika eparu lyendi. Age kwa tanta asi: “Ame kwa pulire vanavazinyetu kuhamena mavango gomawa kuranda enyango noyikwahidi yombiliha. Mapukururo gawo gomawa kwa vatera nge yipo yimaliwa yange yi dire kupwa usimbu.” Yisinke ya mu vaterere a rerupike eparu lyendi? Cathy kwa tanta asi: “Ame ngani kanderere kwaJehova a vatere nge ni hafere nondya noyidwara yombiliha eyi ngani randa. Ame kulizuvha asi Jehova ga limburura makanderero gange pokuvatera nge ni lizuvhe asi ya gwanena nge po eyi na kara nayo, nampili ngomu na dira kukara nanayinye eyi na hara.” Age kwa gwederera ko asi: “Ame kuhafera kuparuka eparu lyoureru morwa kuvatera nge ni demenene kelikwatakano lyange naJehova.”

Cathy

Eparu lyaCathy kapisi ereru tupu nye hena lyoruhafo. Age kwa faturura konda zeyi asi: “Ame kuzuvhisira konomukunda oku vantu wovanzi ava purakene kombudi zongwa. Ayo kuhafesa nge sili unene!” Apa ga ka sikire moTaiwani, amo kwa kere mo nombungakriste mbali tupu doRutjina mositata omu nga zuvhisire ngomuzuvhisi gokukarerera, nye naina kuna kara mo nombungakriste ntambali. Cathy kwa tanta hena asi: “Ayo kuhafesa nge pokumona ekuro lyokutetukisa lyangoso ntani ame kulitura mo unene mokuzuvhisa.”

“NAME KWA HEPERE NGE!”

Yisinke ya horokerere Choong Keon naJulie ava vana tumbura ketameko lyosirongwa? Choong Keon pomuhowo kwa lizuvhire asi morwa kapi ga diva nawa Rutjina, age kapi ta vhuru kuvatera nawa mbungakriste. Nye vanavazinyetu womomukunda kapi va lizuvhire ngoso. Choong Keon kwa tente asi: “Apa mbungakriste zetu va zi gawinine monombungakriste mbali, ame kwa pere nge ko yitumbukira yimwe morwa mukwafimbunga na kere. Ame kwa lizuvhire asi kuna kuzuvhisira oku kuna hepa vazuvhisi, ano ayo kwa hafesere nge sili unene.” Ta gweda ko hena asi: “Name kwa hepere nge!” Naina age kuna kara mukuronambunga. Ano Julie ta gweda ko asi: “Ose kuhafera eyi twa tompora ntani kuna kulizuvha ruhafo oru twa dira kulizuvha rumwe. Ose kwa wiza nositambo sokuyavatera, nye ya ya tu vatera tu kare noruhafo. Ose kupandura Jehova kweyi ga tu pulisira tu ya zuvhisire oku!”

Moyirongo yoyinzi simpe muna kara hepero zonene zovazuvhisi woUhompa. Ove kuna kumanesa sure ntani kuna kulipura eyi ngo rugana neparu lyoge ndi? Ove mudike ntani ono hara mbunga zaJehova zi ku ruganese momunene ndi? Ono hara epata lyoge li kare noruhafo rokukarera Jehova ndi? Ove wa hageka yirugana morwa nomvhura doge ntani ono hara kulihameka mokuzuvhisa ndi? Jehova nga ku tungika nsene o tamununa sirugana soge sokuzuvhisa pokukazuvhisira oku kuna hepa vazuvhisi woUhompa.

^ para. 3 Tara mobuke “Bearing Thorough Witness” About God’s Kingdom, egaununo 16, paragarafu 5-6.