Zende koyikaramo

Zende koyikaramo

Nombangi daJehova

Horowora eraka Rukwangali

Hafera situmbukira soge sokurugana kumwe naJehova!

Hafera situmbukira soge sokurugana kumwe naJehova!

“Ose varugani kumwe naKarunga.”—1 KOL. 3:9.

1. Ngapi Jehova a lizuvhu kuhamena kurugana, ntani yisinke ga pa yisitwa yendi?

JEHOVA, murugani ogu a hafere nkenye eyi a rugana. (Epis. 135:6; Joh. 5:17) Mokuninka yisitwa yendi yonondunge yi gwane nayo ruhafo, Jehova kwa yi pa sirugana. Pasihonena, age kwa rugene kumwe noMbeli zendi mokusita yininke. (Resa Vakorosi 1:15, 16.) Bibeli kututantera asi komeho a wize pevhu, Jesus kwa kere ponyonga zaKarunga “ngonkurungu.”—Yis. 8:30.

2. Ngapi twa yi diva asi vaengeli kwa kere nkenye apa nosirugana somulyo?

2 MoBibeli kutundilira kwaGenesis dogoro kEhororo, kwa kara mo yihonena eyi ya likida asi Jehova nkenye apa nga gava sirugana kovaengeli. Konyima zapa ga zonene Adamu naEva nokuvatjida mo moParadisa, Karunga “makura koUpumezuva wosikunino saEdeni, ta tura ko vakerubi negonga lyomundiro lyokuvyuka-vyuka komaruha nagenye. Alyo lyokukonderesa nkenye ogu ana kuhara kuwiza kositji somwenyo.” (Gen. 3:24) Ntani Ehororo 22:6 kutanta asi Jehova “yige ana tumu muengeli gwendi, a ya likide vakereli vendi eyi nayi horoka usimbu.”

 NGAPI KUHAMENA VANTU?

3. Ngapi Jesus ga kweme sihonena soGuhwe apa ga kere pevhu?

3 Apa ga kere pevhu ngomuntu gokusikilira mo, Jesus nga rugana noruhafo sirugana esi ga mu pere Jehova. Pokukwama sihonena soGuhwe, Jesus nage kwa geve sirugana somulyo kovarongwa vendi. Pokuvatantera eyi ngava sikisa mo, age kwa tente asi: “Yosili nina kumutantera asi: ogu a pura nge, nage hena nga rugana eyi nina kurugana, nye nga rugana yoyinene ya pita eyi, yeeyi kwaTate nina kuza.” (Joh. 14:12) Pokunkondopeka mulyo gosirugana oso, age kwa tente asi: “Ose atu rugane yirugana yogu ga tuma nge, ago simpe mutenya. Masiku taga wiza, omu na dira kuvhura kurugana muntu.”—Joh. 9:4.

4-6. (a) Morwasinke natu pandwira Nowa naMosesa kweyi va sikisire mo sirugana esi ga va pere Jehova? (b) Ngapi ya lifana yirugana nayinye eyi a gava Karunga kovantu?

4 Komeho Jesus a wize pevhu, vantu kwa va pere sirugana esi va hepere kurugana. Nampili ngomu Adamu naEva va dilire kulimburukwa kosirugana esi ga va pere Karunga, nye vamwe va limburukwire. (Gen. 1:28) Nowa kwa mu pere mavyukiso gokulikarera omu na tunga emuwato yipo nga popere yinamwenyo kEkuruhanzo. Age kwa sikisire mo nayinye eyi ga mu tanterere Jehova. Morwa ulimburukwi wendi, nose yiyo tuna karere po naina.—Gen. 6:14-16, 22; 2 Pet. 2:5.

5 Mosesa kwa mu pere mavyukiso gokulikarera omu na tunga Nkongoronzugo nokuwapaika vapristeli, age kwa yi sikisire mo nayinye. (Ex. 39:32; 40:12-16) Ose kugwanena mo uwa moulimbukwi wendi. Monkedi musinke? Mupositoli Paurusa kwa fatwilire asi ruha oro roVeta kwa fanekesa ‘uwa wokomeho.’—Heb. 9:1-5, 9; 10:1.

6 Sirugana esi a gava Jehova Karunga kovakareli vendi kulisiga kuliza noyiruwo ngomu ana kusikisa mo sitambo sendi. Nye simpe sirugana oso kumuyererepeka ntani valimburukwi kugwanena mo uwa. Sirugana esi kwa likwatakana noyininke eyi ga rugene Jesus, apa ga kere meguru ntani napa ga kere pevhu. (Joh. 4:34; 17:4) Mokulifana, sirugana esi va tu pa naso kuyererepeka Jehova. (Mat. 5:16; resa 1 Vakolinte 15:58.) Morwasinke ya karera ngoso?

KARA NOMUTARO GOUHUNGA KOSIRUGANA

7, 8. (a) Singonona sirugana esi ava rugana Vakriste naina. (b) Ngapi natu tara mavyukiso gaJehova?

7 Nove no yi kwatesa ko asi aso situmbukira sosinene kweyi Karunga ga tu ninka tu kare varugani kumwe nendi. (1 Kol. 3:9) Ava ava tungu Yinyanga yoUhompa neyi yoYigongi ntani noNobeteli, sirugana sawo kwa lifana nesi saNowa ntani naMosesa. Nsene ove kuna kuwapukurura Sinyanga seni ndi kuna kutunga mberewa zonene koWarwick, moNew York, hafera sirugana soge. (Tara efano pepenuno 23.) Aso sirugana sokupongoka. Moyirongo nayinye, Vakriste kuna kuvazigida mokukalihameka mosirugana oso setungo. Aso kuyererepeka Jehova ntani valimburukwi kugwanena mo uwa. (Yirug. 13:47-49) Mavyukiso omu nava rugana sirugana esi kugagwana kupitira mombunga zaKarunga. Poyiruwo yimwe, kuvhura va ku rundwilire kosirugana sosipe.

8 Vakareli vaJehova wovalimburukwi awo nkenye apa kulimburukwa mavyukiso gombunga zendi. (Resa Vahebeli 13: 7, 17.) Pamwe kapi atu kwata egano nokonda deyi vana tu rundwilire kosirugana songandi. Nampili ngoso, ose tuna hara kutambura nkenye marunduruko aga a tura po Jehova.

9. Sihonena musinke sosiwa vakuronambunga va tulisa po mombungakriste?

9 Eharo lyokusikisa mo mpango zaJehova kulimonenena monkedi omu vakuronambunga ava pitisire mbungakriste. (2 Kol. 1:24; 1 Tes. 5:12, 13) Awo kulikida eharo lyokurugana unene ntani kutambura nkenye marunduruko. Awo va liwapaikira kutambura nonkedi donompe omu natu zuvhisa kuhamena Uhompa waKarunga. Nampili ngomu vamwe pomuhowo va kere nomasinganyeko kewapaiko lyokuzuvhisira kongodi, komazenga, ndi nkenye oku, nye va limonena yitundwamo yoyiwa. Pasihonena, vazuvhisi wokukarerera vane moNdovesiranda kwa tokwere kuzuvhisira momukunda gonongesefa omu ngava dili kuzuvhisira. Michael kwa tanta asi: “Ose kwa kere nowoma mokuzuvhisira monomukunda odo. Jehova ga yi dimbwilire, makura yipo ga tu vaterere yi tu tompoke. Ee, ruhafo musi twa kere naro rokukwama mavyukiso aga va tu pere mosimbapira soYirugana yetu yoUhompa ntani nokuhuguvara mevatero lyaJehova!” Kuvhura o heteke nonkedi edi donompe momukunda ogu o zuvhisire ndi?

10. Marunduruko musinke za tura po mbunga zaJehova momazuva getu?

10 Mombunga zaJehova poyiruwo yimwe kuhepa marunduruko. Monomvhura edi dantani, sinzi soNobeteli kwa di pakerera kumwe. Morwa marunduruko ogo, vanavazinyetu kuhepa kuvarundwilira koNobeteli dapeke va ka ruganene ko, nampili ngoso awo kugwanena mo mauwa. (Muud. 7:8) Ee, ruhafo musi ava gwanene mo varugani owo mokatji kovantu vaJehova!

11-13. Maudigu musinke ava ligwanekere nago vamwe morwa marunduruko gomombunga zaJehova?

11 Ose kuvhura kulirongera ko yoyinzi kowo ava dirura va ka lipakerere noNobeteli dononene. Vamwe kwa kere moNobeteli domosirongo sawo nomvhura dononzi. Valikwali ava va kere mepata lyoBeteli zonunu moCentral Amerika kwa va hundilire va ka lipakerere nepata lyenene lyoBeteli moMeksiko. Rogelio kwa tanta asi: “Ayo kapi ya kere ureru kusiga ekoro lyetu ntani vakaume.” Juan, munazinyetugara ogu va hundilire a dirukire moMeksiko, age kwa lizuvhire ngwendi kuna kutamekera ko eparu hena. Age kwa tanta asi: “Wa hepa kutulisa po vakaume wovape. Ayo kuhepa asi o lironge nompo donompe nokurundurura omu o gazara.”

12 Vabeteli vamwe womoyirongo yomoEuropa ava va rundwililire koBeteli zomoNdovesiranda nawo kwa ligwanekerere nomaudigu aga. Nkenye ogu ga hara nondundu ngayi kwatesa ko asi udigu kusiga Swisiranda sirongo sawo sonondundu. Ntani ava va tundilire koOstria ngava rongora mparukiso ezi ngava hafere mosirongo sawo.

13 Kwava ava dirukire kosirongo, awo kuhepa kukayika mparukiso zompe nokuruganena kumwe noVakriste vakwaawo womosirongo oso ntani nokulironga yirugana yapeke. Va hepa kukara mombungakriste zompe nomomukunda gomupe gokuzuvhisira ntani nokulironga eraka lyapeke. Kutura po marunduruko gangoso kapisi ureru. Nampili ngoso, Vabeteli wovanzi va yi tambura oyo. Morwasinke ava yi ruganene?

14, 15. (a) Ngapi wovanzi va yi likida asi awo kwa hafera situmbukira sawo sokurugana kumwe naJehova? (b) Sihonena musinke sosiwa va tu tulira po natuvenye?

 14 Grethel kwa tanta asi: “Ame kwa tambwire ezigido lyokudiruka morwa kulikida eharo lyange kwaJehova kupitakana sirongo ndi etungo ndi situmbukira songandi.” Dayska kwa tanta asi: “Apa na diworokere asi ezigido kwa tundire kwaJehova, ame kwa li tambwire noruhafo.” André naGabriela kwa yi kwatesa ko pokutanta asi: “Ose kwa gwene mpito nazopeke zokukarera Jehova pokutulira ntere yininke eyi twa hara. Ose kwa tokwere asi: ‘Nsene Jehova kuna kureta marunduruko meparu lyetu, ya wapa kugalimburukwa mevango lyokuganyokera po.’”

Situmbukira setu somulyo po, sokurugana sirugana saJehova!

15 Apa ava pakerere Nobeteli, vamwe kuvatuma mosirugana sokuzuvhisa. Eyi yiyo ya horokerere Vabeteli vamwe apa va pakererere Beteli zaDenemarke nezi zaNoroweyi ntani zaSweden mokutulisa po Beteli zaScandinavia. Florian naAnja nawo kuna kara vamwe ava va dirukire, awo kwa tente asi: “Ose kuna kuhafera sirugana setu sosipe. Ayo kutuhafesa mokuturuganesa Jehova nkenye oku. Ngesi kuvhura tu uyunge asi age kwa tu tungika unene!” Nampili ngomu sinzi setu twa dira kuligwanekera nomarunduruko gangoso, kuvhura tu honene eharo lyovanavazinyetu ava yipo tu ture sirugana soUhompa muhowo. (Jes. 6:8) Jehova kutungika ava ava hafere situmbukira sokurugana kumwe nendi, nkenye oku.

HAFERA SITUMBUKIRA SOGE SOKURUGANA KUMWE NAJEHOVA!

16. (a) Vagarata 6:4, yisinke azi tu tantere natu rugana? (b) Situmbukira musinke somulyo twa kara naso natuvenye?

16 Vantu wokudira kusikilira mo va kara nonkareso zokuliyereka novakwawo. Nye Nonkango daKarunga kutukorangeda asi tu demenene kweyi natu vhura kusikisa mo. (Resa Vagarata 6:4.) Sinzi setu kapi twa kara noyitumbukira mombunga zaJehova. Ntani kapisi natuvenye kuvhura tu kare vazuvhisi wokukarerera ndi vatumwa  ndi Vabeteli. Eyi kuna kara yitumbukira yomulyo! Nye twa hepa kudiworoka asi situmbukira somulyo twa kara naso natuvenye sokurugana kumwe naJehova mosirugana sokuzuvhisa. Esi kuna kara situmbukira natu vhura kuhafera!

17. Yisinke pamwe ngatu dira kuvhura kurugana mouzuni ou waSatana, nye morwasinke nayi dilira kutudompesa?

17 Siruwo esi tuna kara mouzuni waSatana, ose kapi ngatu vhura kurugana paapa twa hulira mokukarera Jehova. Morwa kapi ngatu vhura kupangera yitumbukira yetu yomomapata ndi ukanguki ndi maukaro gamwe ngoso. Nye ya ha tu dompesa oyo. Wa ha sensa evhuliko lyoge lyokurugana kumwe naKarunga pokugava umbangi kuhamena edina lyendi nokudivisa Uhompa wendi nkenye mpito ono gwana. Yomulyo po kuna kara asi ove kuna kurugana kumwe naJehova paapa wa hulira ntani kukanderera kwendi a tungike vanavazinyetu ava vana kurugana unene kukupitakana. Diworoka asi Jehova kuhafera navenye ava ava yererepeke edina lyendi!

18. Yininke musinke natu tulira ntere, ntani morwasinke?

18 Kugusa ko upirankondo wetu ntani ediro kusikilira mo, Jehova kumuhafesa kweyi twa kara varugani kumwe nendi. Tu hafereni situmbukira setu sokurugana kumwe naKarunga momazuva aga gopouhura! Tu kareni neharo lyokutulira ntere yinka yetu, pokudiva asi mouzuni wendi woupe, Jehova nga ka tu pulisira tu ka hafere “mwenyo gwanarunye gosili” moukaro wombili.—1 Tim. 6:18, 19.

Ove kuhafera situmbukira soge sokukarera Jehova ndi? (Tara paragarafu 16-18)

19. Yisinke ga tu wapaikira Jehova komeho?

19 Ngomu tuna kara pepi nouzuni woupe, tu gazadareni ko kweyi Mosesa ga tanterere Vaisraeli komeho tupu zokuhwilira moSirongo sEtumbwidiro asi: “HOMPA nga mu ragopeka mwanayinye eyi ngomu rugana.” (Deut. 30:9) Konyima zaHarumagedoni, navenye ava vana kurugana ngesi kumwe naKarunga ngava ka pinga sirongo esi ga va tumbwidira. Makura ngatu ka demenena kositumbukira sosipe sokukaninka evhu nalinye li ka kare paradisa!