Zende koyikaramo

Zende koyikaramo

Nombangi daJehova

Horowora eraka Rukwangali

Ruganesa Nonkango daKarunga—Ado kwa kara nomwenyo!

Ruganesa Nonkango daKarunga—Ado kwa kara nomwenyo!

“Nonkango daKarunga kwa kara nomwenyo nononkondo.”—HEB. 4:12.

1, 2. Sirugana musinke Jehova ga pere Mosesa, ntani ehuguvaro musinke ga mu pere?

NGAPI no lizuvha nsene o ka sikama komeho zomupangeli gononkondo mokukauyungira po vantu vaJehova? Yosili, ove no kara nosinka ntani nowoma. Ngapi omu no liwapaikira eyi no ka uyunga? Ntani yisinke no rugana yipo nonkango doge di kare nononkondo ngomu ono ka karera po Karunga munankondo nadinye?

2 Moses kwa kere moukaro wangoso. Jehova kwa tanterere “mugara gomulinunupiki kupitakana navenye vepevhu” asi ta mu tumu kwaFarawo a ka zowore vantu vaKarunga koruhepo ntani nokoupika woVaegipite. (Num. 12:3) Farawo kwa kere mugara gokulinenekepa ntani gokudira efumadeko. (Ex. 5:1, 2) Nye Jehova kwa here Mosesa a ka tantere Farawo asi a mangurure vapika wokusika komamiliyona va tunde mosirongo sendi! Eyi yiyo ya ninkisire Mosesa a pure Jehova asi: “Nyame yilye ni ka ze kwaFarawo asi ni ka guse mo Vaisraeli moEgipite?” Mosesa kwa kere nosinka ntani nowoma. Nye Karunga kwa mu pere ehuguvaro eli asi kapi nga mu siga. Jehova kwa tente asi: “Ame ngani kara noge.”—Ex. 3:9-12.

3, 4. (a) Yisinke ga tjilire Mosesa? (b) Udigu ou o ligwanekere nawo mokuzuvhisa, ngapi wa lifana nou waMosesa?

 3 Yisinke ga tjilire Mosesa? Age kwa tjilire asi Farawo kapi na ka yi pura asi age kuna mu tumu ngomukarelipo gwaJehova Karunga. Mosesa kwa tjilire hena asi Vaisraeli kapi ngava ka yi pura asi Jehova yige ga mu howorora mokuvapitisira va tunde mo moEgipite. Eyi yiyo Mosesa ga tanterere Jehova asi: “Nsene va nyoka kuyipura, va nyoke kupura yange, va tante asi HOMPA kapi ga monekera nge?”—Ex. 3:15-18; 4:1.

4 Elimbururo lyaJehova kwaMosesa ntani noyihorokwa eyi ya kweme ko, kuvhura kuturonga sirongwa somulyo. Nampo ove kapi ngo hepa kuuyunga komeho zomupangeli gononkondo. Nye wa ligwanekera rumwe noudigu apa o uyunga novantu kuhamena Karunga noUhompa wendi ndi? Nsene yimo, kuvhura o lirongere ko kosihorokwa saMosesa.

‘YINKE OYO MOKUWOKO KOGE?’

5. Yisinke Jehova ga tulire mokuwoko kwaMosesa, ntani ngapi ya mu vaterere a guse po utjirwe? (Tara efano pepenuno 11.)

5 Apa Mosesa ga tanterere Jehova asi ana kara noutjirwe asi vantu kapi ngava ka yi pura, Karunga kwa mu wapaikilire eyi ya kere komeho. Bibeli kwa tanta asi: “HOMPA makura ta mu pura asi: ‘Yinke oyo mokuwoko koge?’ Gwina asi: ‘Siuro.’ HOMPA ta mu tantere asi: ‘Si zugumina pevhu!’ Eyi ga si zugumina pevhu, tasi lisitunuka ezoka. Mosesa makura ta ka tembarara kwi. HOMPA ta tantere Mosesa asi: ‘Li kwata komusira!’ Mosesa ta li kwata, ga liharuka ko siuro sina kara mokuwoko kwendi. HOMPA ta mu tantere asi: ‘Opo yipo nye nava ka ku pulira asi HOMPA, Karunga . . . yige ana ku horokere.’” (Ex. 4:2-5) Nononkondo daKarunga, siuro kwa lisitunukire ezoka mokuwoko kwaMosesa! Sitetu esi kwa likidire asi Mosesa Karunga ga mu tumine ntani yige ga mu pere nonkondo. Yipo Jehova ga tantere Mosesa asi: “Gusa nye ezi mpango mokuwoko koge, nkumwe ngo ka rugenese ko yitetu.” (Ex. 4:17) Eyi ya pere Mosesa ehuguvaro lyokuza a ka uyunge naFarawo ntani novantu vaKarunga.—Ex. 4:29-31; 7:8-13.

6. (a) Yisinke ayi kara mokuwoko kwetu apa atu zuvhisa, ntani morwasinke? (b) Faturura omu ‘nonkango daKarunga da kara nomwenyo nononkondo.’

6 Apa atu zuvhisire vantu mbudi zaKarunga: “Yisinke ayi kara mokuwoko kwetu?” Amo kukara mo Bibeli, ntani ose twa hara kuziruganesa. Nampili ngomu vamwe nava dira kumona mulyo goBibeli, Jehova kutuuyungisa kupitira moNonkango dendi, Bibeli. (2 Pet. 1:21) Amo kwa kara mo matumbwidiro gaKarunga ntani kututantera eyi ngau ka rugana Uhompa wendi. Mupositoli Paurusa kwa tjenge asi: “Nonkango daKarunga kwa kara nomwenyo nononkondo.” (Resa Vahebeli 4:12.) Matumbwidiro nagenye gaJehova kwa kara nononkondo, morwa ngaga ka sikilira mo. (Jes. 46:10; 55:11) Apa muntu a kwata egano Nonkango daJehova, eyi a resa moBibeli kuvhura kurundurura eparu lyendi.

7. Ngapi omu natu “toona nawa nonkango daKarunga dousili”?

7 Jehova kwa tu pa Nonkango dendi, Bibeli, edi adi likida asi eyi atu uyunga kuvhura kuyihuguvara ntani kwa tunda kwendi. Konyima zapa ga tjangerere Vahebeli, Paurusa kwa korangedere mukwawo zendi Timoteusa a ‘kondje nokutoona nawa nonkango daKarunga dousili.’ (2 Tim. 2:15) Ngapi omu natu sikisa mo epukururo lyaPaurusa? Pokuresa nawa matjangwa aga va horowora, kuvhura kuguma nomutjima dava vana kutupurakena. Yitratate eyi va pwagesere 2013 kwa yi wapaikira mokutuvatera tu rugane oyo.

 RESA MATJANGWA AGA VA HOROWORA

8. Yisinke ga uyunga ko mutareli gumwe goyirugana yokuzuvhisa kuhamena yitratate yoyipe?

8 Yitratate nayinye yoyipe kwa yi wapaika monkedi zokulifana. Nsene twa diva omu natu ruganesa simwe, ose ngoso kuvhura tu ruganese nayinye. Mutareli gumwe goyirugana yokuzuvhisa moHawaii, moAmerika, kwa tjanga asi: “Kapi twa dimbwilire omu yiruganeso eyi yoyipe ya kara nomulyo mokuyiruganesa pokuzuvhisa tunda embo zende embo ntani mokuzuvhisira mononzira.” Ayo ureru kuyiruganesa, morwa mapuro ntani nomalimbururo aga va tura kontunda sositratate. Ogu ono kuzuvhisira kapi ta kara nosinka sokugazara asi kuvhura a gave elimbururo lyepuko. Age kwa tanta asi monkedi omu va tjanga yitratate, kuninkisa vantu wovanzi va lihameke mo monzogera.

9, 10. (a) Ngapi yitratate yetu nayi tu vatera tu ruganese Bibeli? (b) Yitratate musinke ayi kurerupire kuruganesa, ntani morwasinke?

9 Nkenye sitratate kwa kara mo etjangwa eli natu resera ogu tuna kuzuvhisira. Pasihonena, tara sitratate Ruhepo ngaru haga po ndi? Yi kare asi ta limburura asi “nhi” ndi “hawe” ndi “walye,” penuna monda zositratate nokuuyunga asi ‘eyi yiyo azi uyunga Bibeli.’ Makura resa Ehororo 21:3, 4.

10 Mokulifana, nsene to ruganesa sitratate Yisinke Bibeli? yi kare asi elimbururo musinke ana horowora pogo gatatu, penuna monda zositratate nokuuyunga asi: “Bibeli kutanta asi ‘nkenye etjangwa kwa li retesa po mpepo zaKarunga.’” Kuvhura o gwederere ko asi: “Etjangwa eli kwa uyunga ko yoyinzi.” Makura penuna Bibeli ntani resa 2 Timoteusa 3:16, 17.

11, 12. (a) Nkedi musinke no vhura kuruganesa yitratate mokuzuvhisa? (b) Ngapi omu yitratate nayi ku vatera o rugane matengwiropo?

11 Omu na kumburura ko ogu ono kuzuvhisira nayi kulikida nsene asi kuvhura o twikire nzogera ndi hawe. Yi kare asi monkedi musinke ogu ono kuzuvhisira a tara mbudi zetu, ove no gwana mpito zokumuresera velise zimwe ndi mbali, eyi ngayi vhura kukupa mpito zokukatengwira ko nokuyatwikira nzogera.

12 Konyima zositratate kwa kara siparatjangwagona “Gazadara ko” ntani matjangwa aga ngo vhura kuyazogera petengwiroko. Sitratate Ngapi ngali ka kara eparu komeho? sa kara nepuro eli asi: “Ngapi  Karunga nga wapukurura uzuni?” Kwa tumbura Mateusa 6:9, 10 ntani Ndaniyera 2:44. Ano sitratate Vafe ngava ka paruka hena ndi? sa kara nepuro eli asi: “Morwasinke atu kurupire nokufa?” Ano kwa tumbura Genesis 3:17-19 ntani Varoma 5:12.

13. Faturura omu natu ruganesa yitratate mokutameka malirongo goBibeli.

13 Kuruganesa yitratate kutuvatera tu tameke malirongo goBibeli. Nsene muntu a faneka kadiviso aka ka kara konyima zositratate, ayo ngayi mu twara koIntaneta zetu eyi ngayi vhura kumukorangeda a lironge Bibeli. Yitratate kwa nkondopeka sifo Mbudi zongwa zokutunda kwaKarunga! ntani kutwaredesa kosirongwa sa kara mosifo oso. Pasihonena, sitratate Yilye ana kupangera uzuni? aso kutwaredesa kosirongwa 5. Sitratate Yisinke ayi reta ruhafo mepata? kutwaredesa kosirongwa 9. Pokuruganesa yitratate monkedi zongwa, ngayi tu vatera tu ruganese Bibeli posikando sokuhova ntani petengwiropo. Monkedi ezi, ose ngatu gwana mpito zokulironga novantu wovanzi. Yisinke hena no rugana yipo o ruganese nawa Nonkango daKarunga mokuzuvhisa?

ZOGERA SIRONGWA ESI NAVA HAFERA VANTU

14, 15. Ngapi natu honena nkareso zaPaurusa mokuzuvhisa?

14 Paurusa kwa kere neharo lyokuzuvhisira ‘vantu wovanzi paapa ga hulira.’ (Resa 1 Vakolinte 9:19-23.) Morwasinke? Sitambo sendi kwa kere ‘sokukongwera po Vajuda, nava va kara moVeta, nava va pira Veta ntani ava va pira nonkondo mepuro.’ Paurusa kwa here ‘kuliza nanavenye moyikara yawo nayinye, a kongwere po nampili vamwe tupu.’ (Yirug. 20:21) Ngapi natu honena nkareso zaPaurusa ngomu tuna kuliwapaikira mokuzuvhisira mbudi zongwa ‘kovantu navenye’ momukunda gwetu?—1 Tim. 2:3, 4.

15 Nkenye kwedi, mosimbapira soYirugana yetu yoUhompa kupwagesa mo magano aga natu ruganesa mokuzuvhisa. Hetekera ko kugaruganesa. Nye ngapi nsene vantu womomukunda gweni kuna kara nosinka kuhamena yininke nayopeke? Liwapaikira mokuzogera sirongwa esi nava hafera. Gazadara ko kuhamena mukunda gweni novantu ava va tunga mo, ntani noyinka eyi yina va kundama unene. Makura gazara ko kuhamena etjangwa lya zogera yihepwa yawo. Mutareli gonombunga namukadendi kwa faturura omu ngava ruganesa Bibeli mokuzuvhisa asi: “Sinzi sava atu zuvhisire kutupulisira tu rese velise zimwe nsene tuna vyukilire positwa ntani nokusupipika nzogera zetu. Konyima tupu zokulikunda, makura tatu va resere etjangwa.” Monoparagarafu dokukwama ko, konakona yirongwa nomapuro ntani nomatjangwa gamwe aga no vhura kuruganesa moyirugana yokuzuvhisa momukunda gweni.

Ove kuna kuruganesa nawa Bibelinoyitratate mokuzuvhisa ndi? (Tara paragarafu 8-13)

16. Faturura omu no vhura kuruganesa Jesaya 14:7 mokuzuvhisa.

16 Nsene kwa tunga momukunda omu mwa kara ukorokotji nonyanya, kuvhura o tantere muntu asi: “Gazara asi ove kuna kupurakena koradio makura to zuvhu mbudi ezi asi: ‘Ntaantani uzuni mudima kuna kara mepwizumuko nomompora, navenye kuna kudimba yoruhafo.’ Eyi yiyo azi uyunga Bibeli mwaJesaya 14:7. MoBibeli kwa kara mo hena matumbwidiro gomanzi kuhamena mbili ezi zina kara komeho.” Makura resa limwe lyomatumbwidiro ogo moBibeli.

17. Ngapi no ruganesa Rukasa 11:28 monzogera?

17 Ayo kudigopera sinzi sovagara momukunda gweni mokugwana yirugana ndi? Nsene yimo, kuvhura o tameke nzogera pokupura asi: “Yimaliwa yokuhura kupi ga hepa kutambura mugara nkenye kwedi yipo epata lyendi li gwane ruhafo?” Konyima  zelimbururo lyendi uyunga asi: “Koveli vagara wovanzi ava tambura yimaliwa yokuhura opo, nye mapata gawo simpe kapi gana kara noruhafo. Yisinke nawa-nawa ayi reta ruhafo? Makura resa Rukasa 11:28 ntani tulisa po elirongo lyoBibeli.

18. Ngapi no vhura kuruganesa Jeremiya 29:11 mokukorangeda wopeke?

18 Vantu womomukunda gweni kuna kuhepa morwa simpagwa esi ka si horokere ndi? Kuvhura o tameke pokutanta asi: “Ame kuna wiza kweni mokuyagava ekorangedo. (Resa Jeremiya 29:11.) Muna dimburura yininke yivali eyi ana tu harere Karunga metjangwa eli ndi? Kwa tumbura mo ‘erago’ ntani ‘eyi tuna kundindira komeho.’ Ayo kuhafesa mokudiva asi Karunga kuna tu harere tu kare neparu lyewa, ndi ngapi? Ngapi omu ngayi sika mo?” Makura mu likida sirongwa sina kuliza nonzogera zeni mosifo Mbudi zongwa.

19. Faturura omu no vhura kuruganesa Ehororo 14:6, 7 kovantu ava ava zi kongereka.

19 Ove kwa tunga momukunda omu vantu va hara kuza kongereka ndi? Nsene yimo, kuvhura o tameke nzogera pokuvapura asi: “Ngano muengeli ana kukuuyungisa, no purakena kweyi ana kuuyunga ndi? (Resa Ehororo 14:6, 7.) Mokumona asi muengeli ogu kuna kutanta asi ‘tjira Karunga,’ ngano kapi nayi kara nomulyo koge mokudiva Karunga ogo ndi? Muengeli kwa uyunga kuhamena Karunga ‘ogu ga sita eguru nevhu.’ Yilye edina lyendi?” Makura resa Episarome 124:8, NW ezi za tanta asi: “Ekwafo lyetu kwa kara medina Jehova, Musiti geguru nevhu.” Makura mu pura nsene ana hara kudiva ko yoyinzi kuhamena Jehova Karunga.

20. (a) Ngapi no vhura kuruganesa Yisewe 30:4 mokuronga edina lyaKarunga? (b) Etjangwa musinke wa ruganesa mokuzuvhisa eli lya ku tompoka?

20 Kuvhura o tameke nzogera nomudinkantu pokuuyunga asi: “Ame nina hara kukuresera etjangwa eli lya pura epuro lyomulyo. (Resa Yisewe 30:4.) Kwato muntu na vhura kurugana eyi vana singonona movelise ezi, yipo nye asi azo kwa zogera Musiti gwetu. * Ngapi omu natu diva edina lyendi? Nina hara ni li ku likide moBibeli.”

NONKONDO DONONKANGO DAKARUNGA

21, 22. (a) Ngapi etjangwa eli va horowora nali vhura kurundurura eparu lyomuntu? (b) Yisinke ono tokomene kurugana ngomu ono kutwikira mosirugana sokuzuvhisa?

21 Etjangwa eli va horowora kuvhura kukundama vantu. Pasihonena, Nombangi mbali moAustralia kwa zuvhisilire mudinkantukadi. Gumwe gwawo ta mu pura asi: “Wa diva edina lyaKarunga ndi?” Makura ta mu resere Episarome 83:18. Mudinkantukadi kwa tanta asi: “Ayo kwa tetukisire nge! Konyima zapa va zire, tani singi ure wonokilometa 56 mokukapapara sitora sonobuke ni ka tare mo edina lyaKarunga momatoroko nagopeke goBibeli ntani nomonobukenkango. Apa na ya dimbwilire asi edina lyaKarunga yilyo Jehova, ame kwa lipulire asi nani yinzi na dira kudiva.” Konyima, nage namugara gwendi kwa ya tamekere kulironga Bibeli nokuyagwana ekuho.

22 Nonkango daJehova Karunga kurundurura eparu lyowo ava di resa yipo va ture epuro momatumbwidiro gendi. (Resa 1 Vatesaronika 2:13.) Mbudi zomoBibeli kwa kara nononkondo unene kupitakana nkenye eyi natu vhura kuuyunga mokuguma mutjima gomuntu ogu tuna kuzuvhisira. Eyi yiyo ya karera nomulyo kuruganesa Nonkango daKarunga nkenye apa. Ado kwa kara nomwenyo!

^ para. 20 Tara “Mapuro gokutunda kovaresi” moRuhungu 15 Pembankuru 1987, epenuno 31.