Zende koyikaramo

Zende koyikaramo

Nombangi daJehova

Horowora eraka Rukwangali

“Ngomu kare nombangi dange”

“Ngomu kare nombangi dange”

‘Jesus ta va tantere asi: “Ngomu kare nombangi dange, . . . dogoro nokooku wa ka twa uzuni.”’—YIRUG. 1:7, 8.

1, 2. (a) Yilye ndipo zonene po zaJehova? (b) Yisinke ali tanta edina Jesus, ntani ngapi MunwaKarunga ga sikisire mo ntanto zedina lyendi?

“EYI yiyo va hampurukira nge yiyo na wizira mouzuni, asi ni ya gave undipo wokuhamena kousili.” (Resa Johanesa 18:33-37.) Jesus kwa uyungire nonkango edi komupangeli gwaRoma gomoJudeya, apa va mu pangwire. Jesus kwa litumbwire mwene asi hompa. Konyima zonomvhura dongandi, mupositoli Paurusa kwa ruganesere sihonena saJesus souradi, pokutanta asi: “Ogu ga gavere undipo wouwa kosipara saPontiusi Piratusa.” (1 Tim. 6:13) Yosili, ayo kuhepa uradi wounene mokukara ‘ndipo zokulimburukwa zosili’ mouzuni ou woudona waSatana.—Ehor. 3:14.

2 Jesus kwa mu reterere momuhoko goVajuda ogu gwa kere nare nombangi daJehova. (Jes. 43:10) Age kwa ya kere mbangi zonene po monombangi nadinye daKarunga edi adi gava umbangi wedina lyendi. Jesus kwa tere ntanto zedina eli ga mu pa Karunga asi mulyo unene. Apa muengeli ga tanterere Josefa ogu ga rerere Jesus asi eyi yina kara mwaMariya kwa tunda kompepo zokupongoka, makura ta gweda ko asi: “Ano age nga hampuruka muna gomugara, ogu ngo ruka edina Jesus, yeeyi yige nga zowora muhoko gwendi kononzo dago.” (Mat. 1:20, 21) Vakonakoni woBibeli va yi kwatesa ko asi edina  Jesus kulitumbura moRuhebeli asi Jeshua, eli ali tanta asi “Jehova Muzowoli,” eli lya tunda kesupipiko lyedina Jehova. Jesus kwa sikisire mo ntanto zedina lyendi, apa ga ya vaterere ‘nonzwi edi da zumbana domomuhoko gwaIsraeli’ di litezurure kononzo dado yipo Jehova a di tambure. (Mat. 10:6; 15:24; Ruk. 19:10) Jesus kwa geve umbangi kuhamena Uhompa waKarunga dogoro konomfa dendi. Mutjangi gEvangeli Marukusa kwa tjanga asi: “Yipo ga wizire Jesus moGalireya, a ya udise Mbudi zoNgwa, ezi za tunda kwaKarunga, pokutanta asi: ‘Ruveze rwene-rwene runa sikilire mo nye, untungi waKarunga una tu hedere. Litezurureni, mu pure Mbudi zoNgwa.’” (Mar. 1:14, 15) Nouradi, Jesus kwa tulire poruzera uyilipaki wovampitisili womaukarelikarunga goVajuda, ano eyi yiyo yimwe ya twaredesere va ka mu pampare kositji.—Mar. 11:17, 18; 15:1-15.

“YIRUGANA YOYINENE YAKARUNGA”

3. Yisinke ya horokere mezuva lyautatu konyima zonomfa daJesus?

3 Mezuva lyautatu konyima zonomfa dendi, Jehova kwa vhumbwire Jesus pampepo kapisi panyama. (1 Pet. 3:18) Konyima zapa ga vhumbukire, age kwa gusire rutu ropanyama nokumonekera vantu mokuvalikida asi ana pinduka koufe. Ezuva eli ga vhumbukire, age kwa monekerere varongwa vendi wokulisiga-siga konyara yikando yitano.—Mat. 28:8-10; Ruk. 24:13-16, 30-36; Joh. 20:11-18.

4. Yisinke Jesus ga rongere vapositoli vendi apa ga va monekerere sikando sautano, ntani yisinke ga va tanterere nava rugana?

4 Sikando sautano, Jesus kwa monekerere vapositoli vendi navamwe ava va pongere kumwe nawo. Posihorokwa oso, age kwa va rongere Matjangwa. “Age makura ta mahura nondunge dawo va zuvhe matjangwa.” Yipo va ya kwete egano nomfa dendi nevhumbuko lyendi asi kwa yi pumbwire moMatjangwa. Kehagero lyepongo olyo, Jesus ga yi likidire kovapurakeni vendi eyi va hepere kurugana. Age kwa va tanterere asi: “Elitezururo nedongonono lyononzo ngava li udisire medina lyendi nomuhoko nadinye, kutundilira moJerusarema nokomeho.” Ta gweda ko hena asi: ‘One nyone nondipo deyi.’Ruk. 24:44-48.

5, 6. (a) Morwasinke Jesus ga uyungilire asi: ‘Ngomu kare nombangi dange’? (b) Sininke musinke somulyo va hepere kuudisa varongwa vaJesus?

5 Ano konyima zomazuva 40, pemoneko lyendi lyokuhulilira, vapositoli vendi va vhulire kukwata egano eyi ga tembe apa ga va pangerere asi: “Ngomu kare nombangi dange moJerusarema nomoJudeya nazinye nomoSamaliya, dogoro nokooku wa ka twa uzuni.” (Yirug. 1:8) Morwasinke Jesus ga uyungilire asi: ‘Ngomu kare nombangi dange,’ nye kapisi daJehova? Morwa Vaisraeli ava ga uyungisire kwa kere nare nombangi daJehova.

Ngovarongwa vaJesus, ose kutwikira kudivisa sitambo saJehova seyi nga ka rugana komeho (Tara paragarafu 5, 6)

6 Varongwa vaJesus va hepere kuudisa sininke somulyo unene kupitakana ezoworo lyoupika womoEgipite nounkwate womoBabironi. Ano sininke oso kuna kara nomfa nevhumbuko lyaJesus Kristusa eli lya ya mangurura vantu koupika wononzo nonomfa. PoPentekoste 33, varongwa wovape wovagwavekwa vaJesus kwa divisire vantu “yirugana yoyinene yaKarunga,” ano wovanzi ava va yi zuvhire kwa yi tambwire. Kutundilira meguru, Jesus kwa mwene mulyo gwedina lyendi apa vantu mayovi va litezwilire nokutura epuro mwendi ngoMuzowoli.—Yirug. 2:5, 11, 37-41.

 “SIZOWESESO SOVANZI”

7. Yisinke ya likidire eyi ya horokere mezuva lyoPentekoste 33?

7 Eyi ya horokere mezuva lyoPentekoste 33, kwa likidire asi Jehova ga tambwire mulyo gonzambo zaJesus pokudongonona po nonzo dovantu. (Heb. 9:11, 12, 24) Ngamoomu ga yi fatwilire Jesus, age “kapi ga wizira asi va ya mu kerere, age kwa wizira a ya kerere, a ya gave mwenyo gwendi, gu kare sizoweseso sovanzi.” (Mat. 20:28) ‘Wovanzi’ kapisi Vajuda velike, nye vantu navenye ava ava litezurura. Kupitira mosizoweseso ‘esi asi gusa po nonzo douzuni,’ Karunga kwa hara asi ‘vantu navenye ngava paruke.’—1 Tim. 2:4-6; Joh. 1:29.

8. Kupi lya ka sikire eudiso lyovarongwa vaJesus, ntani ngapi omu ya va tompokere?

8 Varongwa owo vaJesus va kere nouradi wokutwikira kugava umbangi kumuhamena ndi? Yimo, nye kapisi mononkondo davene. Jehova kwa va nkondopekere kupitira mompepo zendi zokupongoka va twikire kugava umbangi. (Resa Yirugana 5:31, 32.) Konyima zonomvhura 27 kutundilira poPentekoste 33, “mbudi zongwa zosili” kwa zi udisilire Vajuda ntani ‘nkenye sisitwa somouzuni.’—Koros. 1:5, 23.

9. Yisinke ga pumbire Jesus eyi ya horokerere mbungakriste zokuhova?

9 Nampili ngoso, mbungakriste zokuhova kwa tamekere kuzipukisa kanunu-kanunu. (Yirug. 20:29, 30; 2 Pet. 2:2, 3; Juda 3, 4) Jesus kwa pumbire asi varwanesi usili ngava twikira kupukisa Vakriste wousili dogoro ‘pouhura wouzuni.’ (Mat. 13:37-43) Makura Jehova nga tumba Jesus a kare Hompa gouzuni mudima. Eyi kwa horokere mwaSikukutu 1914, apa ga tamekere ‘mazuva gopouhura’ gouzuni waSatana.—2 Tim. 3:1.

10. (a) Kwedi musinke komulyo va pumbire Vakriste wovagwavekwa womomazuva getu? (b) Yisinke ya horokere mwaSikukutu 1914, ntani ngapi ya ya divikwire kovantu?

10 Vakriste wovagwavekwa womomazuva getu kwa pumbire asi kwedi kwaSikukutu 1914 ngaku kara komulyo. Awo kwa kweme uporofete waNdaniyera ou wa uyunga kuhamena eteto lyositji esi sa ya kulire hena konyima ‘zonomvhura ntano-nambali.’ (Ndan. 4:16) Mouporofete  wendi kuhamena ekaropo lyendi ntani ‘nouhura wouzuni,’ Jesus nage kwa tembe kosiruwo sokulifana nesi ‘sovapagani.’ Kutundilira 1914, ‘sidiviso sewizo’ ndi sekaropo lyaKristusa ngaHompa gouzuni mudima kwa ya divikwire kovantu. (Mat. 24:3, 7, 14; Ruk. 21:24) Kutundilira pena, “yirugana yoyinene yaKarunga” kwa kwaterere mo etumbo lyaJesus ngaHompa mouzuni mudima.

11, 12. (a) Yisinke ga tamekere kurugana hompa gomupe konyima zoyita 1919? (b) Yisinke ya ya divikwire kutundilira 1930? (Tara efano pepenuno 28.)

11 NgaHompa gomupe, Jesus Kristusa kwa tamekere kuzowora vagwavekwa vendi kounkwate ‘woBabironi zonene.’ (Ehor. 18:2, 4) Konyima zoyita eyi ya horokere 1919, mpito zokugava umbangi wokuhamena Uhompa waKarunga ntani sizoweseso kwa monekere. Vakriste wovagwavekwa kwa ruganesere nawa mpito ezi mokugava umbangi, ano ngoyitundwamo vagwavekwa mayovi kwa ya lipakerere kumwe nawo va kare vapingwa naJesus.

12 Kutundilira 1930, kwa ya divikwire asi Kristusa ga tamekere kupongaika mamiliyona ‘gononzwi dapeke,’ ava ngava tulisa po “emukurumbunga.” Mepitisiro lyovagwavekwa, emukurumbunga nalyo kukwama sihonena saJesus souradi nokudivisa asi ezoworo lyawo kwa tunda kwaKarunga naKristusa. Pokulididimika mosirugana esi sokugava umbangi ntani nokutwikira kulikida epuro mosizoweseso saKristusa, emukurumbunga ngali ka paruka ‘pomahepeko gomanene,’ aga ngaga twaredesa uzuni waSatana kehagero.—Joh. 10:16; Ehor. 7:9, 10, 14.

‘KWA TU KOREKERE, TU SANSEKE MBUDI ZONGWA ZAKARUNGA’

13. NgoNombangi daJehova, yisinke tuna tokomene kurugana, ntani yisinke natu rugana yi tu tompoke?

13 Tu twikireni kuhafera situmbukira setu sokugava umbangi ‘woyirugana yoyinene yaKarunga’ eyi ga rugana Jehova ntani neyi ga tumbwidira kukarugana komeho. Yosili, kugava umbangi wangesi kapisi ureru. Sinzi sovanavazinyetu kuzuvhisira monomukunda omu ava ligwanekere nomarwaneso nomahepeko. Nose kuna kurugana ngamoomu ga rugene mupositoli Paurusa novakwawo. Paurusa kwa tente asi: “Nye Karunga ga tu korekere, tu vhure kuyamusansekera Mbudi zoNgwa zaKarunga, nampili ngomu pwa kere malilimbo gomanene.” (1 Tes. 2:2) Ngano kapisi tu hageke. Nye tu tokomeneni kusikisa mo eligawo lyetu ngomu ngau zonauke po uzuni waSatana.  (Jes. 6:11) Kapi tatu vhuru kuyisikisa mo mononkondo danyamwetu, nye tu kwameni sihonena soVakriste wokuhova, pokukanderera asi Jehova a tu pe “nonkondo edi dononene” kupitira mompepo zendi.—Resa 2 Vakolinte 4:1, 7; Rukasa 11:13.

14, 15. (a) Ngapi va va tere Vakriste womosiruwo sovapositoli, ntani yisinke ga uyungire mupositoli Peturusa kuvahamena? (b) Ngapi omu atu lizuvhu apa ava tu rwanesa morwa kukara Nombangi daJehova?

14 Naina, vantu mamiliyona kulitumbura asi Vakriste, ntani “awo kulikoreka asi va diva Karunga, nye awo kumupatana moyirugana yawo. Yeeyi awo vadona, awo kapi ava zuvhu, kapi ava vhuru kurugana yuma yoyiwa.” (Tit. 1:16) Ayo ya wapa kwetu mokudiworoka asi mosiruwo sovapositoli, Vakriste wousili kwa va nyengere vantu wovanzi. Yipo mupositoli Peturusa ga va tjangerere asi: ‘Nsene asi tava mu swawire edina lyaKristusa, one vanerago, yeeyi . . . mpepo zaKarunga zina mu hegumukire.’—1 Pet. 4:14.

15 Nombangi daJehova ‘kudiswawira edina lyaKristusa’ naina ndi? Yimo, morwa kapi atu zuvhisa tupu edina Jehova nye hena kuzuvhisa asi Jesus Hompa. Jesus nage kwa hepekere morwa kugava umbangi kuhamena Jehova. Age kwa tanterere varwanesi vendi asi: “Ame kwa wiza medina lyaTate, nye one kapi muna kutambura nge.” (Joh. 5:43) Nsene ngo ligwanekera nomarwaneso mokuzuvhisa, kwata mutjima. Marwaneso ogo kulikida asi Karunga kwa ku hara ntani mpepo zaKarunga ‘zina ku hegumukire.’

16, 17. (a) Yisinke vana kuligwanekera nayo vantu vaJehova moyirongo yoyinzi? (b) Yisinke ono tokomene kurugana?

16 Ya wapa kudiworoka asi yirugana yetu yoyiwa kwa kuza komeho moyirongo yoyinzi. Nampili monomukunda edi va zuvhisira nare, ose simpe kugwana mo vantu ava vana kupurakena kombudi zetu zongwa zezoworo. Tu twikireni ngorooro kutengwira ko kowo vana kulikida elituromo nokulironga nawo Bibeli ntani nokuvavatera dogoro ngava gwane ekuho. Nove ngo gwana ruhafo ngwendi rwaSarie gomoAfrika Mbindakano ogu ga zuvhisa nomvhura dokupitakana 60. Age kwa tanta asi: “Ame kuna kupandura konzambo zaJesus Kristusa zosizoweseso ezi za ninkisa nge ni kare nelikwatakano lyewa naJehova Mupangeli gouzuni, ntani nina hafa mokudivisa uyerere wedina lyendi.” Nage namugara gwendi Martinus, kwa vatera vantu wovanzi va lironge usili, kukwatera mo vana vawo vatatu. Sarie kwa gweda ko asi: “Kwato sirugana nasopeke esi asi reta ruhafo rorunene, ano kupitira mpepo zokupongoka, Jehova kutupa nonkondo edi twa hepa yipo tu twikire kurugana sirugana sokuparura vantu.”

17 Yi kare asi twa gwana nare ekuho ndi kuna kukondja tu ka li gwane, twa hepa kupandura Jehova kositumbukira esi twa kara naso sokuhama kombungakriste zoNombangi daJehova uzuni mudima. Yipo nye, tu twikireni kugava umbangi ntani nokuligusa ko kouzuni waSatana. Pokurugana ngoso, ngayi retera mfumwa Guhyetu gemeguru gedina eli twa simba.