Zende koyikaramo

Zende koyikaramo

Nombangi daJehova

Horowora eraka Rukwangali

Ngapi no vatera vapuli vakweni ava va lizumba?

Ngapi no vatera vapuli vakweni ava va lizumba?

Nampo wa diva ko gumwe ndi wovanzi ava va lizumba. Eyi kulikida asi elizumbo lina vhuka. Pasihonena, ekonakono lyomoPoranda kwa likida asi sinzi sovalikwali wonomvhura 30 kulizumba konyima zokukara mononkwara nomvhura ntatu yi tware ntazimwe, ntani kapisi wonomvhura odo velike ava lizumbu.

Kuliza noMbunga zegendeso mapata moSipanye kwa divisa asi: “Sivaro sava ava likwara [moEuropa] kulikida asi harufa zawo kulizumba. Eyi kuhoroka nomoyirongo yimwe yokuzeruka.

KUKARA NOMALIZUVHO GOMADONA

Yisinke ya hamena mo momalizuvho gangoso? Mugavi magano gumwe gokoUpumezuva waEuropa kwa tanta asi: “Elizumbo kudivisa paveta elikwatakano eli lya teka po nare, eyi ayi reta kukora kokunene.” Age kwa gwederere ko asi: “Ayo kuretesa po hena eguwo lyenene, nehandu, nelivero nedompo mutjima nenyegenyo ntani nomuga.” Ano poyiruwo yimwe kuretesa po magazaro gokulidipaga. “Apa ava teza po nonkwara paveta, kuretesa po eyi yina kukwama ko. Kulizuvha ngwendi kwato mulyo ndi ngwendi ono zumbana, nokulipura asi: ‘Morwasinke yina kuhorokerera nge eyi? Yisinke sitambo sange meparu?’”

Pokudiworoka omu ga lizuvhire Ewa nomvhura dongandi da ka pita, age kwa tanta asi: “Konyima zapa twa lizumbire paveta, ame kwa lizuvhire nomuga dononene apa vamusinda novakaume ngava tumbura nge asi ‘mukadi ogu va zumba.’ Ame kwa handukire unene. Kwa sigilire nge vanona vavali, ntani na hepere kukara zinya naguhya.” * Adam, ogu ga kere nomvhura 12 moukuronambunga, kwa tanta asi: “Ame kulizuvha ngwendi kwato mulyo ano poyiruwo yimwe kuhanduka ntani kuninkisa nge ni hare kuligusa ko kovantu.”

KUKONDJA MOKUTENGWIDIRA PO MAGAZARO GOMAWA

Morwa kukara nosinka kuhamena meho, vamwe kwa kondja mokutengwidira po magazaro gomawa nampili pa pite nomvhura dononzi konyima zelizumbo. Awo kuvhura va tante asi kwato ogu ga va hara. Ntani hena, mukadi gumwe kwa tente asi awo ngesi va hepa “kurundurura nkareso zawo nokulironga kulididimikira maudigu gawo.”

Stanisław kwa uyunga asi: “Apa twa lizumbire, mukadange gwanare kwa nyokesere nge kukadingura vana vange vavali wovakadona. Eyi kwa ninkisire nge ni lizuvhe ngwendi kwato ogu ga hara  nge ntani asi Jehova a na sigilire nge. Ame kwa lizuvhire asi hansa kufa. Mwaza siruwo, na ya dimbwilire epuko lyokukara nomagazaro gangoso.” Morwa kukara nosinka kuhamena meho, Wanda ogu va zumba kwa tanta asi: “Ame kwa lizuvhire asi mwaza siruwo vantu kapi ngava tu likida eharo name novana vange, kukwatera mo vapuli vakwetetu. Nye, ame ngesi na limonena omu vanavazinyetu vana kara pepi nose nokuvatera nge ngomu nina kukondja mokurera vana vange va kare vakareli vaJehova.”

Yihorokwa eyi kulikida asi konyima zelizumbo vamwe kukara nomalizuvho gomadona. Awo kuvhura va litare asi kwato mulyo nokugazara asi kwato ogu ga va hara. Yitundwamo, awo kuhandukira vantu vemembo. Kuvhura va tameke kugazara asi womombungakriste kwato eharo. Yihorokwa yangoso, ngwendi saStanisław nesi saWanda kulikida asi ava ava zumbu kuyadimburura asi vapuli vakwawo kwa va hara. Vakriste vakweni kukupakera mbili, nye morwa malizuvho gomadona kuvhura o dire kuyidimburura.

KUKARA NOMALIZUVHO GOMADONA NTANI NOMUKUMA

Nampili tu liture mo unene, vapuli vakwetetu ava va zumba kuvhura simpe va lizuvhe mukuma poyiruwo noyiruwo. Vanavazinyetukadi ava va zumba kuvhura va lizuvhe asi kwato ga va hara. Alicja kwa tanta asi: “Ngesi pana piti nomvhura ntantatu kutunda apa va zumba nge. Nye simpe kulizuvha asi ame kwato mulyo. Poyiruwo yangoso, ame kuhara kuligusa ko kovakwetu nokulifira nyamwange nkenda nokulira unene.”

Nampili ngomu malizuvho aga vana singonona aga dili kuhorokera nkenye ogu ava zumbu, Bibeli kupukurura asi kapisi tu liguse ko kovakwetetu. Nsene tu ligusa ko kovakwetetu ose kuna ‘kunyoka eyi ya hungama.’ (Yis. 18:1) Ogu ana kulizuvha mukuma ga hepa kuyikwata egano asi ya wapa kunyokera po kupapara ehengagwido nkenye apa komuntu gumwe tupu. Nsene tu yi rugana ngoso, ngatu nyokera po malizuvho gokuliharesa.

Vapuli vakwetu ava va zumba kuvhura va kare nomalizuvho gomadona, ngwendi kukara nosinka kuhamena meho ntani kulizuvha mukuma ndi asi kwato ga va hara. Kudimburura malizuvho gangoso ureru, nye ayo udigu kugafunda po, yipo nye twa hepera kuhonena Jehova pokuvavatera. (Epis. 55:22; 1 Pet. 5:6, 7) Tu kareni nehuguvaro asi nkenye evatero tuna kugava kovantu vangoso ngava li hafera. Ntani asi ngava gwana evatero lyokutunda kovakaume vawo womombungakriste.—Yis. 17:17; 18:24.

^ para. 6 Madina gamwe kwa ga rundumuna.