Zende koyikaramo

Zende koyikaramo

Nombangi daJehova

Horowora eraka Rukwangali

“O gazare nawa eyi ono kurugana” yipo ngayi ku tompoke

“O gazare nawa eyi ono kurugana” yipo ngayi ku tompoke

APA vantu vaJehova Karunga va tundire mo moBabironi momvhura 537 komeho zokuwiza Kristusa, age kwa litulire mo mokuvatantera nzira ezi nava genda. Age kwa va tanterere asi: “Wapaikeni nkungwasirongo; kombeni mo mamanya!” (Jes. 62:10) Gazara tupu omu Vajuda vamwe va tamekere kurugana oyo. Nombunga edi da pitire komeho nampo kwa zeresere nzira nokukomba mo yisindi. Mokurugana oyo ya vatere Vajuda vakwaawo mokugenda mo noureru pokutengura kosirongo sawo.

Nose naina kuvhura tu ruganese sihorokwa sina ngosifanekeso zokutwaredesa koyitambo yopampepo. Jehova kuna hara vakareli vendi navenye va sikise mo yitambo oyo pwa hana madonganeso. Nonkango dendi kutukorangeda asi: “O gazare nawa eyi ono kurugana, makura nayinye eyi ngo rugana tayi ku retere uwa.” (Yis. 4:26) Yi kare asi o mudinkantu ndi hawe, nonkango odo kuvhura kutuvatera natuvenye.

LIWAPAIKIRA NGESI MOKUTULISA PO MATOKORO GOMAWA

Nampo wa zuvha vantu vana kuuyunga kuhamena mudinkantu asi: ‘Age kuna kumutompoka sili’ ndi ‘age kuna kumugenda po nawa.’ Vadinkantu kwa kara noukanguki wouwa, kukwata usimbu yininke egano ntani kwa hara yi va tompoke. Bibeli kwa uyunga asi: ‘Nonkondo dovadinkantu kutetura.’ (Yis. 20:29) Mudinkantu ogu a ruganesa udivi nononkondo dendi mokukarera Jehova kusikisa mo yitambo yendi yopampepo nokugwana ruhafo rosili.

Naina, uzuni wa dimburura mulyo gononkondo dovadinkantu. Apa mudinkantu goMbangi a rugana nawa kosure, murongi ndi murongwa mukwawo kuvhura a mu kondjese a ze kelirongo lyokuzeruka morwa kwa pura asi ozo yizo nkedi zokumutompoka mouzuni ou. Ndi munazinyetugara ndi gomukadi ogu a rugana nawa momaudano gokuduka kuvhura vagavi yirugana va mu zede mokutambura  udano owo ngosirugana sendi. Wa kara rumwe moukaro wangoso ndi? Ndi wa diva ko gumwe ogu ana kuligwanekera nomakondjeso gangoso? Yisinke ngayi vatera Mukriste a ture po etokoro lyewa?

Marongo goBibeli kuvhura kuvatera muntu a liwapaikire mokugenda monzira zeparu. Muudisi 12:1 kutanta asi: “Diworoka musiti goge momazuva goge goudinkantu.” Ngapi omu ove ndi mudinkantu mukweni na ‘diworoka Musiti gwendi’?

Gazadara ko kweyi ya horokerere Eric * gokoUtokero waAfrika. Age kwa here kudana mbara. Apa ga ya kere nonomvhura 15, yipo va mu horowere a dane mosipana sosirongo. Eyi kwa tente asi age ngano vhulire kundindira yi mu rande yipana yoyinene yomoEuropa, nokukara mudani gomunene. Nye ngapi omu ga tulire pasirugana epukururo eli ‘lyokudiworoka musiti’? Nove novakaume woge wovadinkantu, yisinke nomu lirongera ko kosihorokwa esi?

Apa nga dimbi sure, Eric kwa varekere kulironga Bibeli kumwe noNombangi daJehova. Yipo ga lirongere asi Musiti gwendi nga ka kohonona po maudigu govantu. Eric ga ya dimbwilire mulyo gokuruganesa siruwo nononkondo dendi mokurugana mpango zaKarunga. Age kapi ga kondjerere sirugana sokukara mudani mbara gomunene, nye kwa gwene ekuho nokutura po ezokomeho lyewa lyopampepo. Mwaza siruwo, yipo ga kere mukwafimbunga ano konyima yipo va mu tambwire koSikora zoBibeli zoVagara woVadike.

Eric ngano kwa gusire yirugana youdano wokusanga mbara, ngano ga gwene efumano noungawo. Nye ga dimbwilire usili wompango zoBibeli ezi asi: “Vanangawo kuligazara asi emona lyawo yilyo ali va popere ngwendi ekuma lyere lya pama eli lya kundurukida sitata.” (Yis. 18:11) Yosili, muntu nokuvhura si kugwana epopero memona. Ntani hena, vantu ava ava papara ungawo ‘kulizweka vene momaruhodi gomanzi.’—1 Tim. 6:9, 10.

Vadinkantu wovanzi va gwana ruhafo ntani epopero lyosili pokurugana sirugana sosiruwo nasinye. Eric kwa tanta asi: “Ame kwa lipakerera kumwe ‘nombunga’ zonene zovakareli vaJehova wosiruwo nasinye. Ano ezi kuna kara mbunga zongwa nina hara kuhamena, tani pandura Jehova kweyi ga likida nge nzira zokutwaredesa koruhafo rosili ntani yi tompoke nge meparu.”

Ove ngapi? Mevango lyokukondjera yitambo yomouzuni ou, gazara nawa nsene kuvhura o lihameke mouzuvhisi wokukarerera.—Tara kakende “ Kugwana mauwa aga ava dili kugwana kounivesiti.”

KUNYOKERA PO YILIMBIKISO

Apa valikwali vamwe va ka dingwire mberewa zomutayi zomoAmerika, kwa ka mwene ruhafo roVabeteli. Konyima munazinyetukadi kwa tjenge asi: “Meparu lyetu ngatu rugana yininke yokulifana.” Valikwali owo yipo va tokwere kuruganesa nawa siruwo sawo, va vhure kutambura yitumbukira yopampepo.

Marunduruko aga va here kutura po valikwali ava kwa monekere ngwendi udigu. Nye ezuva limwe, awo kwa gazadarere ko ketjangwa lyezuva olyo. Alyo kwa kere etjangwa lyaJohanesa 8:31, omu atu resa nonkango daJesus edi asi: “One nsene mu kwaterera mononkango dange, sili-sili one ngano varongwa vange.” Nononkango odo, awo kwa uyungire asi: “Nkenye eyi natu rugana mokurerupika eparu lyetu mulyo.” Makura tava randesa embo lyawo lyenene, nokunyokera po madonganeso gamwe, ntani nokudirukira kombungakriste ezi za hepere evatero. Awo ngesi vazuvhisi wokukarerera, nye hena kuvatera mokutunga Yinyanga yoUhompa ntani nopoyigongi yomazuva gatatu. Ngapi omu vana kulizuvha ngesi? “Ose kututetukisa ruhafo oru tuna kara naro morwa kurerupika eparu lyetu, ntani ayo kutukorangeda sili mokurugana eyi zina tu harere mbunga zaJehova.”

KUTWIKIRA KUTURA PO EZOKOMEHO

Saromo kwa tjenge asi: “Meho goge aga vyukilire kutara kooko kounasili; wa ha zenzereka mutwe goge monomuga.” (Yis. 4:25) Ngwendi moomu musingi a vyukilire kutara komeho, nose twa hepa kunyokera po yilimbikiso eyi nayi tu donganesa mokulitulira po yitambo yopampepo nokuyisikisa mo.

Yitambo musinke yopampepo no litulira po nokuyisikisa mo? Sitambo simwe sosiwa kuna kara sokurugana  sirugana sosiruwo nasinye. Simwe kuna kara mokukavatera mbungakriste zopopepi ezi zina hepa vazuvhisi woudivi yipo va mane kuzuvhisira mukunda gwawo gomunene. Ndi mbungakriste zina kara novazuvhisi wovanzi wovawa, nye kapi zina kara novakuronambunga novakwafimbunga wokugwanena po. Kuvhura o vatere mononkedi dangesi ndi? Uyunga nomutareli gonombunga nsene kuvhura o vatere. Nsene ono hara kukazuvhisira koure, kuvhura o pure mauzera kuhamena nombungakriste dokoure edi dina hepa evatero. *

Tanko tu tengure kosihorokwa va singonona mwaJesaya 62:10. Vajuda vamwe va vhulire kurugana unene mokuzeresa nzira zokuvatwara kosirongo sawo yipo vantu vaKarunga va ka sike oku va tembe. Nsene ove kuna kurugana unene mokusikisa mo yitumbukira yoge mosirugana saKarunga, wa ha hageka. Nevatero lyaKarunga, nove kuvhura o ka sike koyitambo oyo. Twikira kuhundira Jehova a ku pe unongo ngomu ono kuhetekera ko kunyokera po yilimbikiso. Mwaza siruwo, ove ngo ya mona omu nga ku vatera yipo “o gazare nawa eyi ono kurugana.”—Yis. 4:26.

^ para. 8 Edina kwa li rundumuna

^ para. 18 Tara buke Organized to Do Jehovah’s Will, epenuno 111-112.