Zende koyikaramo

Zende koyikaramo

Nombangi daJehova

Horowora eraka Rukwangali

Kara nehuguvaro—Jehova yige Mukwafi goge!

Kara nehuguvaro—Jehova yige Mukwafi goge!

‘Yipo nye natu uyungira nehuguvaro asi: “Karunga yige Mukwafi gwange.”’—HEB. 13:6.

1, 2. Maudigu musinke ava ligwanekere nago ava ava ka tengura kembo? (Tara efano.)

EDUARDO * kwa tanta asi: “Apa na ka ruganene kosirongo nasopeke, ame kwa gwene yirugana yoyiwa nokutambura yimaliwa yoyinzi. Nye apa na tamekere kulironga Bibeli noNombangi daJehova, ame na yi dimbwilire asi na kere nositumbukira somulyo unene, sokupakera mbili epata lyange pampepo nye kapisi panyama pwelike. Makura yipo na tengwira kembo.”—Efe. 6:4.

2 Eduardo ga yi divire asi kutengura kepata lyendi, ya hafesere Jehova. Ngwendi Marilyn va tumbwire mosirongwa sa ka pita, Eduardo ga hepere kutameka kuwapukurura elikwatakano nepata lyendi. Age ga ya ligwanekerere noudigu wokurera mukadendi novana vendi, morwa kapi ga kere noyimaliwa yokugwanena po. Ngapi omu na vhura kurera epata lyendi? Evatero musinke ga ndindilire ko kwava womombungakriste?

KUWAPUKURURA ELIKWATAKANO LYEPATA NTANI NAJEHOVA

3. Ngapi kudira kukara po komukurona aku kundama vanona?

3 Eduardo kwa tanta asi: “Ame na yi tambura asi na sigilire vana vange apa va hepere nge unene mokuvapa mavyukiso nokuvalikida eharo. Ame kapi na kere nawo mokuvaresera masimwititi  gomoBibeli nokukanderera kumwe nawo ntani nokudanauka nawo.” (Deut. 6:7) Mbeli zendi Anna ta diworoka asi: “Ame kwa lizuvhire kukora pamalizuvho morwa otate kapi va kere kumwe nose membo. Apa va ka tengwire, ose kwa va divire tupu kosipara ntani nekezwi. Apa va lidingilire nge, ame kwa lizuvhire ngwendi asi awo vageni.”

4. Nsene guhya kapi ga kara membo, ngapi ayi kundama upangeli wendi ngomutwe gepata?

4 Nsene guhya kapi ga kara membo, age kuzumbanesa upangeli wendi ngomutwe gepata. MukadaEduardo, Ruby, kwa faturura asi: “Na hepere kukara guhya nazinya, ntani na yikire kutulisa po matokoro mepata. Apa Eduardo ga ka tengwire kembo, na hepere kulironga kumulimburukwa nganturagumbo. Nampili ngesi, poyiruwo yimwe na hepa kulidiworokesa asi mugara gwange pweli.” (Efe. 5:22, 23) Eduardo ta gweda ko asi: “Vakadona va yikire kuza kwazinyawo mokukahundira epulisiro. Ngovakurona, twa yi dimbwilire asi twa hepere kulikida vana vetu asi ose kutulisa po matokoro kumwe.”

5. Yisinke ga rugene Eduardo mokuwapukurura elikwatakano nepata lyendi, ntani yitundwamo mo musinke?

5 Eduardo ga liwapaikilire kurugana nayinye mokuwapukurura elikwatakano lyendi nepata nokunkondopeka elikwatakano lyawo naJehova. Age kwa uyungire asi: “Sitambo sange kwa kere sokuronga vana vange usili kupitira mononkango nomosihonena, kapisi pokutanta tupu asi na hara Jehova nye nopokuyilikida moyirugana.” (1 Joh. 3:18) Jehova ga tungikire elituromo lyaEduardo ndi? Anna kwa limburura asi: “Mokumona elituromo lyawo lyokukara guyha gomuwa nokutura po elikwatakano kumwe nose, kwa retere marunduruko gomanene. Apa twa va mwene asi kuna kukondjera yitumbukira mombungakriste, ose kwa hefe. Uzuni kwa here kutugusa ko kwaJehova. Nye mokumona vakurona vetu omu vana kwaterere kousili, yipo twa hetekere ko kurugana yokulifana. Otate kwa tu tumbwidilire asi kapi ngava tu siga hena, ano awo kapi sili va tu sigire. Ngano va tu sigire hena, ngesi ame ngano kapi nina kara mombunga zaJehova.”

KUTAMBURA YITUMBUKIRA

6. Sirongwa musinke va lirongere vakurona vamwe posiruwo soyita?

6 Yihorokwa yimwe kwa likida asi apa mwa kere yita moBalkans, vana woNombangi daJehova kwa kere noruhafo nampili ngomu va kere nomaudigu. Morwasinke? Morwa vakurona kapi va vhulire kuza koyirugana, awo kwa kere pembo nokulironga nokuzogera ntani nokudanauka novana vawo. Yisinke natu lirongera ko? Kupitakana yimaliwa nomauhwi nepopero, vanona va hepa kukara novakurona vawo. Yosili, ngamoomu da yi likida nonkango daKarunga, vanona kugwanena mo uwa nsene vakurona va kara novana vawo nokuvadeura.—Yis. 22:6.

7, 8. (a) Epuko musinke ava tura vakurona ava ava tengura kembo? (b) Ngapi vakurona nava vatera vana vawo va funde po malizuvho gomadona?

7 Apa vakurona ava ka tengura kosirongo nasopeke, nokuyamona asi vana vawo kapi vana kuvatambura neharo, awo kuvhura va tante asi: “Ngapi omu nomu dira kulikida rupandu komalizambero nagenye aga na tulire po mwarweni?” Nye usili wou asi vanona kuna kara nomalizuvho gomadona morwa vakurona kwa va sigire. Yisinke mukurona na rugana mokukohonona po udigu wangoso?

8 Hundira Jehova a ku vatere mokukwata egano malizuvho ga va vemepata lyoge. Makura apa no uyunga nepata lyoge, yi tambura asi nove kwa retesa po udigu ou. Kuhundira egusiropo lyousili kuvhura kuvatera. Nsene epata lyoge li dimburura elituromo lyoge lyokuretesa po mbili, ngava yi tambura. Elididimiko nelituromo lyoge, ngayi ninkisa epata lyoge li ku hare nokukufumadeka.

 ‘KUPAKERA MBILI VEKORO LYOGE’

9. ‘Mokupakera mbili vekoro lyendi,’ morwasinke Mukriste na dilira kulipongaikira emona?

9 Mupositoli Paurusa kwa uyungire asi nsene Vakriste wovakurupe nokuvhura si kulipakera mbili vene, vana ndi vatekuru vawo va hepa ‘kurugwida kuwoko vakurona vawo.’ Nye Paurusa kwa korangedere Vakriste asi nsene va kara noyihepwa yankenye ezuva ngwendi nondya nomudwaro ntani mararo, ngano yi va gwanene po. Twa ha kondjera mparukiso zokuzeruka ndi kulipongaikira yimaliwa ngepopero lyokomeho. (Resa 1 Tim. 5:4, 8; 6:6-10.) ‘Mokupakera mbili ekoro lyendi,’ Mukriste kapi ga hepa kulipongaikira emona mouzuni ou una kuza kezonauko. (1 Joh. 2:15-17) Twa ha pulisira ‘ekumbagero lyemona’ ndi ‘yinka youzuni ou’ yi tu ninkise tu ture mosiponga “mwenyo gwanarunye gosili” gwepata lyetu mouzuni waKarunga woupe!—Mar. 4:19; Ruk. 21:34-36; 1 Tim. 6:19.

10. Ngapi natu likida unongo waKarunga kuhamena makongo?

10 Jehova ga yi diva asi twa hepa yimaliwa. Nye yimaliwa nokuvhura si kutupopera ngamoomu nau tu popera unongo waKarunga. (Ruk. 12:15) Rorunzi, vantu kusensa siponga sokudirukira mosirongo nasopeke mokukapapara yirugana, ntani kapi pwa kara ehuguvaro asi ngava ka gwana yimaliwa yoyinzi. Ediruko lyangoso kuvhura kukara siponga unene. Sinzi sava ava zi kosirongo nasopeke kukatengura nomakongo gomanzi. Mevango lyokukara noumanguruki wokukarera Karunga, awo kuyakarera vantu ava va korota makongo. (Resa Yisewe 22:7.) Kunyokera po makongo kuna kara sininke sounongo kurugana.

11. Ngapi kutjanga yihepwa eyi nava ka randa ayi vatera mapata koudigu woyimaliwa?

11 Eduardo ga yi divire asi pokumutompoka etokoro lyokukara nepata lyendi, ga hepere kuruganesa nawa yimaliwa. Age na mukadendi ngava tjanga yihepwa yawo eyi va hepere kukaranda. Yimo, kapi va vhulire kuranda nayinye eyi va here. Nye navenye kwa ruganene kumwe pokunyokera po kurandanga yininke ya ha na mulyo. * Eduardo kwa tanta asi: “Pasihonena, ame kwa gusire vana vange kosure zondiro nokukavatjangesa konosure depangero.” Age nepata lyendi kwa kanderere asi a gwane yirugana eyi nayi dira kudonganesa elikwamo lyawo lyokukarera Karunga. Ngapi omu Jehova ga limbwilire makanderero gawo?

12, 13. Nontambo musinke ga gusire guhya gumwe mokurera epata lyendi, ntani ngapi omu Jehova ga tungikire elituromo lyendi?

12 Eduardo kwa tanta asi: “Monomvhura mbali dokuhova, kapi twa kere noyimaliwa yokugwanena po. Na hepere kuruganesa yimaliwa eyi twa pungwire, ntani na rorokere unene parutu. Nye twa vhulire kuza komapongo nagenye nomoyirugana yokuzuvhisa ngepata.” Eduardo kwa tokwere asi age kapi ana kugazara kugusa sirugana esi ngasi mu gusa kepata lyendi ure womakwedi ndi wonomvhura. Age kwa tanta asi: “Nye ame na lironga kurugana yirugana yokulisiga-siga yipo asi nsene sirugana simwe sina pu, makura tani rugana nasopeke.”

Kuvhura o lironge kurugana yirugana yokulisiga-siga o pakere mbili epata lyoge ndi? (Tara paragarafu 12)

13 Morwa Eduardo ga hepere kufuta makongo gendi kanunu-kanunu, ga hepere hena kufuta nsonso koyimaliwa eyi ga korotere. Nye age ga yi tambwire mokufuta nsonso ozo sinene tupu kuna kukara kumwe nepata lyendi mwankenye eyi, ngamoomu ga yi harera Jehova. Eduardo kwa tanta asi: “Ame ngesi kutambura yimaliwa yoyisesu unene kupitakana eyi ngani tambura kosirongo nasopeke, nye nampili ngoso ose kapi tuna kufa nzara. ‘Jehova ga kara nononkondo dokukwafa.’ Ntani ose twa tokwere kurugana uzuvhisi wokukarerera. Mwaza siruwo, twa ya kere noyimaliwa yokugwanena po ntani ya ya kere ureru kwange mokupakera mbili yihepwa yepata lyange.”—Jes. 59:1.

 KULIDIDIMIKIRA MAKONDJESO GOVANEKORO

14, 15. Ngapi mapata naga lididimikira makondjeso gekoro gokutura yihepwa yopanyama muhowo kupitakana ukareli wawo kwaKarunga, ntani yitundwamo musinke nsene va tura po sihonena sosiwa?

14 Moyirongo yoyinzi, vantu kulizuvha asi va hepa kugava yimaliwa ndi mauhwi kovanekoro ntani kovakaume. Eduardo kwa faturura asi: “Ayo ruha rompo zetu, ano ose kuyihafera mokugava, nye pwa kara eyereko. Ame kufatwilira nombili vanekoro asi kuvhura ni gave nsene poyili, na hana kutura mosiponga ukareli Karunga wepata lyange.”

15 Apa muntu a ka tengura ndi a dili kuza kosirongo nasopeke morwa epata lyendi, kuvhura kunyegenyesa nokuhandukisa vanekoro ava va mu huguvarere mokuvarera. Vamwe kuvhura va va tare asi awo kwato sinka sekoro lyawo. (Yis. 19:6, 7) Anna, munwaEduardo, kwa tanta asi: “Apa atu nyoka kutura mosiponga ukareli wetu kwaKarunga mokukondjera emona, vamwe vekoro lyetu kuvhura va dimburure mulyo gweparu lyetu lyoSikriste. Nye ngapi omu ngava yi dimburura nsene tu rugana nkenye eyi vana kutupura?”—Hetakanesa 1 Peturusa 3:1, 2.

KULIKIDA EPURO MWAKARUNGA

16. (a) Ngapi omu muntu na ‘likumbagere mwene’ nonokonda depuko? (Jak. 1:22) (b) Matokoro musinke a tungike Jehova?

16 Munazinyetukadi gumwe ogu ga sigire epata lyendi a ka ruganene kosirongo nasopeke, kwa tanterere vakuronambunga womosirongo oso asi: “Ose kwa tura po malizambero gomanene yipo ni wize oku. Mugara gwange ga hepere kuhageka situmbukira sendi soukuronambunga. Nina huguvara asi Jehova nga tungika ediruko eli.” Jehova nkenye apa kutungika matokoro aga aga likida epuro mwendi, nye ngapi omu na tungika etokoro eli ali lilimbi nompango zendi, unene po nsene muna hamena nokonda depuko edi nadi hagekesa po yitumbukira yopampepo?—Resa Vahebeli 11:6; 1 Johanesa 5:13-15.

17. Morwasinke natu paparera evyukiso lyaJehova komeho zokutura po matokoro, ntani ngapi natu yi rugana?

17 Papara evyukiso lyaJehova komeho zokutura po matokoro, nye kapisi konyima. Hundira mpepo zokupongoka nounongo ntani mavyukiso gendi. (2 Tim. 1:7) Lipura asi: ‘Momaukaro musinke nina liwapaikire  mokulimburukwa Jehova? Nampili momahepeko ndi?’ Nsene yimo, ove ono liwapaikire mokumulimburukwa nampili moruhepo ndi? (Ruk. 14:33) Pura vakuronambunga va ku pe ko mavyukiso gomoMatjangwa, ntani likida epuro nokuhuguvara metumbwidiro lyaJehova lyokukuvatera nsene o kwama mapukururo gendi. Vakuronambunga kapi tava vhuru kukutokwera po, nye awo ngava ku vatera o ture po matokoro aga ngaga ku retera ruhafo meparu.—2 Kol. 1:24.

18. Wolye va kara nositumbikira sokupakera mbili epata, nye momaukaro musinke naga ninkisa wopeke va gave evatero?

18 Jehova kundindira ko kovanturagumbo va pakere mbili yihepwa yomapata gawo nkenye ezuva. Twa hepa kupandadeka nokukanderera po ava ava sikisa mo situmbukira sawo va hana kusiga valikwali ndi vana vawo, nampili va kare mekondjeso ndi meheteko lyokuyirugana oyo. Momaukaro gohararasi, ngwendi yimpagwa ndi siponga ndi mauvera, kugava nompito kwetu mokulikida eharo lyosili lyoSikriste kovakwetetu. (Gar. 6:2, 5; 1 Pet. 3:8) Ove kuvhura o gave yimaliwa moyimpagwa yohararasi ndi o vatere Mukriste mukweni a gwane yirugana momukunda ogu ga kara ndi? Nsene yimo, ove kuna kusesupika ekondjeso eli a ligwanekere nalyo lyokusiga epata a ka papare yirugana nakopeke.—Yis. 3:27, 28; 1 Joh. 3:17.

DIWOROKA ASI JEHOVA YIGE MUKWAFI GOGE!

19, 20. Morwasinke Vakriste nava karera nehuguvaro asi Jehova nga va kwafa?

19 Matjangwa kukorangeda asi: “Nyokeni edowo lyoyimaliva, yi mu gwanene yeeyi mwa kara nayo, yeeyi Karunga kwa tanta asi, ‘Ame kapi ngani ku zumba ndi ni ku sige.’ Yipo nye natu uyungira nehuguvaro asi: ‘Hompa yige Mukwafi gwange, yinke nani tjilira. Muntu a tompore nge yinke?’” (Heb. 13:5, 6) Ngapi omu atu yi tura pasirugana oyo?

20 Mukuronambunga gumwe gomosirongo soruhepo, kwa tanta asi: “Vantu rorunzi kupandadeka omu Nombangi daJehova da kara noruhafo. Awo va yi dimburura asi nampili Nombangi doruhepo awo nkenye apa kudwara nokumoneka nawa kupitakana nawopeke.” Eyi ya liza netumbwidiro lyaJesus eli ga tumbwidilire ava ava tura Uhompa muhowo. (Mat. 6:28-30, 33) Yosili, Guhyeni gemeguru, Jehova, ga mu hara ntani ana mu harere yoyiwa kumwe novana veni. “HOMPA yige a takamesa uzuni mudima, age kugava nonkondo kwanavenye ava ava hama kwendi nomutjima nagunye.” (2 Hist. 16:9) Age ga tu pa yipango yendi, kukwatera mo yemeparu lyemepata ntani nomu natu gwanena mo uwa. Apa atu yi kwama, ose kulikida asi twa mu hara nokumuhuguvara. “Eharo lyetu lyokuhara Karunga lyeli asi, ose atu sikise mo yipango yendi. Ano yipango yendi, kapi ya paka udigu.”—1 Joh. 5:3.

21, 22. Morwasinke ono tokomenene kulikida ehuguvaro mwaJehova?

21 Eduardo kwa tanta asi: “Nina yi diva asi siruwo esi na kere ure namukadange novana vange kapi tani vhuru kusitengwidira po, nye nampili ngoso ame nina liwapaikire kuruganena uwa epata lyange. Sinzi sava ngani rugana nawo ngesi nongawo, nye kapi vana hafa. Mapata gawo kuna kara nomaudigu gomanene. Nye, epata lyange lina hafa unene! Ntani ayo kuhafesa nge mokumona omu vanavazinyetu womosirongo esi, nampili woruhepo omu vana kutwikira kutura muhowo ukareli wawo kwaKarunga. Ose natuvenye kuna kulimonena usili wetumbwidiro lyaJesus.”—Resa Mateusa 6:33.

22 Kara nehuguvaro! Horowora mokulimburukwa Jehova nokuhuguvara mwendi. Ngano eharo lyoge lyokuhara Karunga nomulikwali goge ntani novana woge, li ku tumangede o sikise mo yitumbukira yoge yopampepo. Ngoyitundwamo, ove ngo ya yi limonena asi Jehova ‘yige mukwafi goge.’

^ para. 1 Madina kwa ga rundumuna.

^ para. 11 Tara sirongwa “Omu no ruganesa nawa yimaliwa” mosifo Awake! Sitarara 2011, moRuingilisa.