Zende koyikaramo

Zende koyikaramo

Nombangi daJehova

Horowora eraka Rukwangali

Mufisayendi gomoSarefata kwa mu tungikire morwa epuro lyendi

Mufisayendi gomoSarefata kwa mu tungikire morwa epuro lyendi

MUFISAYENDI goruhepo ana lidingire munwendi gomumati, gelike a huru. Kapi ana kuyipura eyi ana kumona. Morwa karuwogona tupu kana piti po apa ka mu kwaterere momawoko gendi age ana fu. Ngesi kuna kutara munwendi ogu vana pindura koufe ana kumenya-menya. Mugenda gwendi tanta asi: “Tara, munoge gogu, nomwenyo ana kara!”

Sihorokwa oso kwa horokere konyara nomvhura 3 000 da ka pita. Kuvhura o rese sihorokwa esi 1 Vahompa egaununo 17. Mugenda ogu kuna kara muporofete gwaKarunga, Eliya. Yilye zinya? Age kuna kara mufisayendi va dira kutumbura kedina gomodoropa zaSarefata. Epinduro koufe lyamunwendi gomumati kwa nkondopekere unene epuro lyendi. Ngomu natu ka zogera mukadi ogu, natu ka lirongera ko yirongwa yomulyo.

ELIYA TA GWANA MUFISAYENDI GEPURO

Jehova kwa tokwere kureta ruteni mepangero lyaAhaba, hompa gomudona gwaIsraeli. Konyima zapa ga divisire ruteni, Karunga ta popere Eliya kwaAhaba nokumupa mboroto nonyama pasitetu ezi ngaga mu retere makorowa. Jehova ta tantere Eliya asi: “Katuka o ze kositata saSarefata, popepi naSidoni, o ka kare ko. Ame na tantere ko mufisayendi gumwe a ka ku rere.”—1 Vah. 17:1-9.

Apa Eliya ga ka sikire koSarefata ta mono mufisayendi goruhepo kuna kutjava yivagara. Eliya nampo ga lipulire asi ogu yige mukadi nga rera nge ndi? Mokumona asi age ruhepo, ngapi omu nga vhura kuyirugana eyi? Nampili ngomu Eliya ga kere nomasinganyeko, age ga uyungisire mukadi ogo. Age kwa tente asi: ‘Na kanderere, ka retere nge ko tumema ni ya nwe.’ Haga za mokugenda a ka tu rete, Eliya ta mu zigire asi: “Na kanderere, ka pitwire nge ko nokampambu komboroto.” (1 Vah. 17:10, 11) Kupa mema mugeni kapi ya kere udigu komufisayendi, nye yokumupa mboroto kwa kere udigu.

 Mufisayendi ta limburura asi: “Yosili, HOMPA goge gomwenyo nina kugana, kapi na kara nokamboroto. Eyi na kara nayo, rutambekera rokausura metenga notugadi mokandimbe. Apa ngesi tani tjavagura ko tuvagara tuvali, tu ka ka pake po namunwange, tu ka lye, makura tu fe.” (1 Vah. 17:12) Tu konakoneni eyi zina kulikida nzogera zawo.

Mufisayendi ga dimbwilire Eliya asi age Muisraeli ogu a limburukwa Karunga. Eyi kuyimonenena mononkango dendi edi asi: “Yosili, HOMPA goge gomwenyo nina kugana.” Ayo kulikida asi nampili ngomu ga kere nediwo kuhamena Karunga goVaisraeli, age kapi ga ruganesere nonkango “Karunga gwange” pokutamba Jehova. Age kwa tungire moSarefata, mositata saKanani mosirongo saSidoni. Mokadoropa oko kwa zulire mo vakareli vaBara. Nampili ngoso, Jehova ga mwene sininke sosiwa momufisayendi ogo.

Nampili ngomu mufisayendi gomoSarefata ga tungire mokatji kovakareli woyikarunga yoyimpempa, age kwa likidire epuro mwaKarunga. Jehova kwa tumine Eliya komufisayendi yipo navenye va paruke. Ano kuvhura tu lirongere ko sirongwa somulyo.

Kapisi navenye ava va tungire moSarefata kwa va kundamene ukareli woudona waBara. Pokutuma Eliya komufisayendi, kulikida asi Jehova kumona vantu wonomutjima donongwa ava vana hara kumukarera. Yosili, Jehova “mwankenye muhoko nkenye ogu a mu tjira, nye ta rugana youhunga, ta mu tambura.”—Yirug. 10:35.

Vantu vangapi va kara momukunda gweni va fana ngwendi mufisayendi gomoSarefata? Nampili ngomu ga va kundurukida maukarelikarunga goyimpempa, awo va kara neharo lyokudiva usili. Awo nampo kwa kara nediwo lyesesu ndi kapi va diva Jehova makura va hepa evatero mokutambura ukareli wousili. Ove kuna kupapara vantu vangoso nokuvavatera ndi?

“KA DUVIRE NGE PO TANKO MUHOWO KAMBOROTO”

Konakona eyi Eliya ga pulire mufisayendi a rugane. Mufisayendi ntani tupu ana kumana kutantera Eliya asi tava ka duva kamboroto namunwendi va ka lye makura va fe. Nye Eliya ta mu tantere asi: “Wa ha tjira. Zende o ka rugane moomu ono tanta. Nye ka duvire nge po tanko muhowo kamboroto o retere nge, ntani nye nomu paka po keni namunoge. Yeeyi HOMPA Karunga gwaIsraeli kuna tanta asi: ‘Kausura metenga kapi ngaka pwa mo, ano tu kare tugadi mokandimbe kapi ngatu sesupa mo, dogoro kezuva eli nga rokesera HOMPA mvhura kontunda zevhu.’”—1 Vah. 17:11-14.

Vamwe kuvhura va tante asi: ‘Ngapi omu natu ku pa nondya detu dokuhulilira?’ Nye mufisayendi kapi ga lizuvhire ngoso. Nampili ngomu ga dilire kudiva nawa Jehova, ga pulire nonkango daEliya nokurugana eyi ga mu tanterere. Ee, sihorokwa musi sokuheteka epuro, ntani etokoro musi kouwa ga tulire po!

Epuro lyomufisayendi mwaKarunga gwaEliya, Jehova, kwa mu parwire namunwendi

Karunga kapi ga sigilire mufisayendi gwina goruhepo. Ngamoomu ga tumbwidilire Eliya, Jehova kwa vhukisire kausura notugadi yipo Eliya nomufisayendi namunwendi va paruke dogoro noku rwa ya hege ruteni. Yosili, “usura metenga kapi ngau pu mo, ano tugadi mokandimbe kapi ngatu sesupa mo, moomu tupu ga tanterere HOMPA Eliya.”  (1 Vah. 17:16; 18:1) Ngano mufisayendi gwina kapi ga pulire eyi ga mu tanterere Eliya kuhamena mboroto zina ga duvire, ngano usura wendi wa pwire. Nye age ga kere nepuro nokuhuguvara Jehova nokupa nondya muhowo Eliya.

Eyi natu lirongera ko kuna kara asi Karunga kutungika ava ava likida epuro mwendi. Apa o ligwanekere nomaheteko nsene o likida epuro, Jehova nga ku vatera. Age nga kara Mugavi noMupopeli ntani Kaume, mokukuvatera o pite momaheteko.—Ex. 3:13-15.

Momvhura 1898, Zion’s Watch Tower kwa tumbwire sihorokwa esi somufisayendi asi: “Ngomu mukadi ga kere nepuro lyokulimburukwa, age ga waperere kukara muvateli gomuporofete; ngano kapi ga likidire epuro, ngano va gwene ko mufisayendi gwapeke mokuvatera muporofete. Yipo nye, ngomu tuna kugenda monzira zeparu, Hompa nga pulisira yininke eyi ngayi heteka epuro lyetu. Nsene tu likida epuro ngatu ka gwana matungiko; nye nsene kapisi ngoso, kapi nga tu ga gwana.”

Nsene tatu ligwanekere nomaudigu, twa hepa kupapara mavyukiso gaKarunga kupitira moMatjangwa nomoyimbapiratjangwa yoBibeli. Makura twa hepa kukwama mavyukiso gaJehova nampili yi kare asi udigu kugasikisa mo. Age ngatu tungika nsene tu kwama nonkango dounongo edi asi: “Huguvara HOMPA nomutjima goge nagunye. Wa ha hama konondunge danyamoge. O diworoke HOMPA mwanayinye eyi ono kurugana, makura age ta ku likida nzira zouhunga.”—Yis. 3:5, 6.

‘OVE KWA WIZIRA O YA DIPAGESE MUNWANGE?’

Epuro lyomufisayendi apa kwa lihetekere hena. Bibeli kwa tanta asi: “Kutunda poyo, makura muna gomugara gogo mukadi mwenyaembo, ta u mu gwana uvera, uvera kwa mu kwete unene dogoro tagu dinduruka mo.” Morwa kudira kudiva ntundiliro zoudigu ou, zinya goruguwo kwa pulire Eliya asi: “Ove muntu gwaKarunga, yisinke yokuruganena nge ngesi? Ove kwa wizira o ya diworokese Karunga nonzo dange, o dipagese munwange?” (1 Vah. 17:17, 18) Yisinke adi tanta nonkango odo donondona?

Mukadi kwa diworokere nonzo dendi ndi? Age ga gazarere asi nomfa damunwendi kwa kere ngefutiso lyokutunda kwaKarunga ntani Karunga yige ga tumine Eliya a ya dipage munwendi ndi? Bibeli kwato eyi za uyunga ko, nye ayo ya zere asi: Mufisayendi kapi ga pere Karunga usima kweyi ya horokere.

Eliya nampo da mu tetwire nomfa domunona ntani nonkango domufisayendi ogo. Konyima zokugusa munona nokumutwara konzugo zendi zekeguru, Eliya ta ziguruka kukanderera asi: “HOMPA Karunga gwange, kuna reta hena udigu kogu mufisayendi nina kulisukira pokudipaga munwendi ndi?” Muporofete kapi ga here nomfa damunwa mufisayendi di retere eswau edina lyaKarunga nsene a pulisilira mukadi ogu gomuwa a hepe hena unene. Makura Eliya yipo ga likwamberere asi: “HOMPA Karunga gwange, na ku kanderere, tengwidira mo mwenyo gogu munona.”—1 Vah. 17:20, 21.

“TARA, MUNOGE GOGU, NOMWENYO ANA KARA”

Jehova ga limbwilire ekanderero. Mufisayendi kwa pakerere mbili muporofete ntani ga likidire epuro. Karunga kwa pulisilire nomfa domumati gwina di horoke mokulikida asi ngaku ka kara evhumbuko ntani alyo kwa li tjanga moMatjangwa yipo li gave ehuguvaro kwetu. Apa Eliya ga likwamberere Jehova, Jehova ga pindwire munona koufe. Gazara tupu omu mufisayendi gwina ga hefe apa Eliya ga tente asi: “Tara, munoge gogu, nomwenyo ana kara.” Makura mufisayendi ta tantere Eliya asi: “Ntaantani na diva asi ove muntu gwaKarunga, nononkango daKarunga domokana koge nado dosili!”—1 Vah. 17:22-24.

Egaununo 17 lyomo-1 Vahompa kwato hena eyi lya uyunga ko kuhamena mukadi ogo. Mokumona asi Jesus ga uyungire yoyiwa kumuhamena, nampo nage ga ya kere mukareli gwaJehova gokulimburukwa. (Ruk. 4:25, 26) Esimwititi lyendi kuturonga asi Karunga kutungika ava ava ruganene uwa vakareli vendi. (Mat. 25:34-40) Ayo kulikida asi Karunga kuvatera vakareli vendi nampili momaukaro goudigu. (Mat. 6:25-34) Sihorokwa esi hena kugava umbangi asi Jehova ga kara neharo nononkondo dokuvhumbura vantu. (Yirug. 24:15) Ee, konda musi zongwa twa kara nazo zokudiworoka mufisayendi gomoSarefata!