Zende koyikaramo

Zende koyikaramo

Nombangi daJehova

Horowora eraka Rukwangali

Jehova—Mugavi noMupopeli gwetu

Jehova—Mugavi noMupopeli gwetu

“Ame kwa hara kuparura ava va hara nge, ame kwa hara kupopera ava va diva nge.”—EPIS. 91:14.

1, 2. Elisigo musinke lya kara momaukaro gomapata nomonkedi omu twa gwana usili?

JEHOVA yige ga tulisa po mapata nagenye pontunda zevhu. (Efe. 3:14, 15) Nampili tu kare asi ose vepata limwe, yikara nomaukaro gomapata getu kwa lisiga. Ove nampo kwa paruka novakurona woge dogoro moukondi. Vamwe nampo kwa zumbanesa vakurona vawo morwa nomfa ndi uvera ndi yimpagwa. Ano vamwe kapi va diva vakurona vawo.

2 Ngovahameni vemepata lyovakareli vaJehova, nonkedi omu twa gwana usili kwa lisiga. Nampo ove kwa ku rera vakurona ava va ku ‘rongere’ o paruke kuliza nonompango doBibeli. (Deut. 6:6, 7) Ndi ove gumwe gowo va lironga usili kupitira mosirugana sokuzuvhisa esi ava rugana vakareli vaJehova.—Rom. 10:13-15; 1 Tim. 2:3, 4.

3. Sininke musinke esi sa tu kundama natuvenye?

3 Nampili ngomu da lisiga nontundiliro detu, kosili sininke esi sa tu kundama natuvenye. Ose natuvenye kuhepa nokufa morwa nzo ezi twa pinga kwaAdamu. (Rom. 5:12) Nampili ngoso, ngovakareli wousili, ose kutumbura Jehova asi “Guhyetu.” Mosiruwo sanare, vantu ava ga horowere Karunga kwa uyungire nonkango edi domwaJesaya 64:8 asi: “Ove nyove guhyetu,  HOMPA.” Ntani hena, Jesus kwa tamekere ekanderero lyendi lyosihonena nononkango edi asi: “Guhyetu gemeguru. Edina lyoge ava li pongore.”—Mat. 6:9.

4, 5. Ngomu natu ka konakona rupandu rwetu kwaGuhyetu, Jehova, yisinke twa hepa kuteda ko?

4 Guhyetu gemeguru kugava ekwafo ntani epopero kovantu ava ava zigida edina lyendi mepuro. Muepisarome kwa mu temwinina pokutanta asi: “Ame kwa hara kuparura [vakareli wousili] ava va hara nge, ame kwa hara kupopera ava va diva nge.” (Epis. 91:14) Yosili, Jehova Karunga geharo kuparura vantu vendi navenye nokuvapopera kononkore dawo, yipo asi va ha va zonagwilira po.

5 Mokunkondopeka rupandu rwetu kwaGuhyetu gemeguru, Jehova, tu konakoneni yitwa yitatu: (1) Guhyetu age Mugavi. (2) Jehova Mupopeli gwetu. (3) Ntani Karunga Kaume gwetu gomuwa po. Ngomu natu ka konakona yitwa eyi, ayo nayi ka tu vatera mokuteda ko kelikwatakano lyetu naKarunga ntani nomu natu mu fumadeka ngaGuhyetu. Ntani ya wapa hena mokugazadara ko komatungiko aga a gava Jehova kovantu ava ava mu hedere pepi.—Jak. 4:8.

JEHOVA, MUGAVI GOMUNENE

6. Ngapi omu Jehova ga yi likida asi age Mugavi ‘gwankenye uhwi wouwa’?

6 Murongwa Jakopo kwa tjenge asi: “Nkenye uhwi wouwa nosigava esi sa sikilira mo, kutunda meguru, kwaGuhyetu, musiti gomauzera.” (Jak. 1:17) Eparu kuna kara uhwi wouwa wokutunda kwaJehova. (Epis. 36:9) Pokuruganesa eparu lyetu tu rugane mpango zaKarunga, ngatu limonena matungiko gomanzi ngesi ntani ngatu kara nehuguvaro lyomwenyo gwanarunye mouzuni woupe. (Yis. 10:22; 2 Pet. 3:13) Nye ngapi ngayi vhura kuhoroka eyi mokumona asi natuvenye kwa pinga nzo zaAdamu?

7. Ngapi Karunga ga tu pa mpito zokukara nelikwatakano lyewa nendi?

7 Yosili, Jehova Mugavi goMunene mononkedi dokulisiga-siga. Pasihonena, nkenda zendi kumutumangeda a tu parure. Yosili, ose natuvenye kwa zona ntani twa pinga kudira kusikilira mo kwaAdamu. (Rom. 3:23) Nye morwa Jehova kwa tu hara, yiyo ga tu pa mpito zokukara nelikwatakano lyewa nendi. Mupositoli Johanesa kwa tjanga asi: “Karunga omu ga tu horwera eharo lyendi, mokututumina Munwendi thi asi tu parukire mwendi. Eharo lyeli asi, kapisi asi nyose twa here Karunga, hawe, Karunga yige ga tu hara, yiyo ga tuma Munwendi a ya kare nzambo zokugusisa po nonzo detu.”—1 Joh. 4:9, 10.

8, 9. Ngapi Jehova ga kere Mugavi goMunene mosiruwo saAbirahamu naIsaka? (Tara efano pepenuno 16.)

8 Koyiha yomvhura 1893 komeho zokuwiza Kristusa, sihorokwa saAbrahamu kwa likidire omu Jehova nga ka gava mwenyo gwanarunye kovantu navenye wovalimburukwi. Vahebeli 11:17-19 kufaturura asi: “Epuro yilyo lya ninkisire Abirahamu asi a ka zambe munwendi Isaka, apa ga mu hetekere Karunga. Nhi, ogu ga gwene matumbwidiro, kwa ninkire asi a zambe Munwendi thi. Age yige ga uyunga Karunga asi, ‘MwaIsaka yimo ngava ka tundira wohonde zoge.’ Abirahamu kwa gazarere asi, Karunga kwa kara nononkondo dokuvhumbura nokoufe kooku – tu tante tupu asi Abirahamu ngwendi gogu asi kwa mu vhumbwilire Isaka a tunde koufe.” Ngwendi moomu Abirahamu ga kere neharo lyokuzamba munwendi Isaka, yimo Jehova ga zembe Munwendi, Jesus Kristusa, mokuparura vantu.—Resa Johanesa 3:16, 36.

9 Gazara tupu omu Isaka ga lizuvhire apa ga yi dimbwilire asi kapi ga hepere  kufa! Yosili, Isaka ga hefe kweyi Karunga ga geve nzwi zongara mevango lyokuzamba eparu lyendi. (Gen. 22:10-13) Eyi yiyo evega olyo ga lirukilire Abirahamu asi: “Karunga kugava.”—Gen. 22:14.

SIGAVA SEKWATAKANESO

10, 11. Wolye vana kurugana ‘sirugana sokukwatakanesa’ vantu naKarunga, ntani ngapi vana kuyirugana oyo?

10 Ngomu tuna kuteda omu Jehova ga likida asi age Mugavi goMunene, ose kuna kuyidimburura asi pwa hana nzambo zaJesus, ngano kapi twa kara nelikwatakano naKarunga. Mupositoli Paurusa kwa tjanga asi: “Moomu twa kwata egano eyi asi: muntu gumwe ga fira navenye, kuninka asi vantu mudima kwa fa kumwe nendi. Kristusa kwa fira navenye, asi ava va kara nomwenyo, kapisi va kerere po hena mwavene, nye va kerere po googu ga fa, yiyo ga vhumbuka mwarwawo.”—2 Kol. 5:14, 15.

11 Morwa eharo eli va kere nalyo kwaKarunga nokulikida rupandu kositumbukira sawo sokumukarera, Vakriste wokuhova kwa tambwire noruhafo ‘sirugana sokuvakwatakanesa naKarunga.’ Sirugana sawo sokuzuvhisa nokuninka varongwa kwa geve mpito kovantu wonomutjima donongwa va kare nombili naKarunga, nokuhafera ukaume kumwe nendi ntani nokuyakara vana vendi wopampepo. Naina, vakareli vaJehova wovagwavekwa kuna kurugana yokulifana. Eyi ava rugana ngovatumwa vaKarunga naKristusa kuvatera vantu wonomutjima donongwa va hedere pepi naJehova nokukara vapuli.—Resa 2 Vakolinte 5:18-20; Joh. 6:44; Yirug. 13:48.

12, 13. Ngapi natu likida rupandu komawapaiko gaJehova?

12 Mokulikida rupandu kwaJehova ngoMugavi goMunene, Vakriste navenye ava va kara nehuguvaro lyepevhu kulihameka mokuzuvhisa mbudi zoUhompa kumwe novagwavekwa. Mosirugana esi ose kuruganesa Bibeli, ngosigava simwe sosiwa saKarunga. (2 Tim. 3:16, 17) Mokuruganesa nawa Nonkango daKarunga mokuzuvhisa, ose kugava mpito kwava wopeke mokugwana mwenyo gwanarunye. Mokutuvatera mosirugana esi, nkenye gumwe gwetu kuhuguvara mosigava hena simwe saJehova, mpepo zendi zokupongoka. (Sak. 4:6; Ruk. 11:13) Yitundwamo kutetukisa, ngamoomu va yi likida monoYearbook of Jehovah’s Witnesses. Azo mfumwa zonene kwetu mokulihameka mo mosirugana esi sokuyererepeka Guhyetu noMugavi gwetu!

13 Mokumona asi Karunga yige mugavi, twa hepa kulipura asi: ‘Ame kuna kurugana unene mosirugana sange sokuzuvhisa mokulikida rupandu komawapaiko gaJehova ndi? Mononkedi musinke nani wapukurura sirugana sange sokuzuvhisa nokukara muzuvhisi gomuwa gombudi zongwa?’ Ose kuvhura kulikida rupandu rwetu komawapaiko gaKarunga pokutura muhowo sirugana soUhompa meparu lyetu. Nsene tu rugana ngoso, Jehova nga tu pa nkenye apa yihepwa yetu. (Mat. 6:25-33) Morwa eharo lyaKarunga, tuna hara kurugana nkenye apa yokumuhafesa nokuhafesa mutjima gwendi.—Yis. 27:11.

14. Ngapi omu Jehova a parura vantu vendi?

14 Muepisarome Ndafita kwa tanta asi: “Ame na pili nonkondo, kutupu sikwafa, nye ove HOMPA kugazara nge. Ove nyove mukwafi gwange noMuparuli gwange.” (Epis. 40:17) Rorunzi Jehova nga parura vantu vendi ngombunga, unene po apa ngava ligwanekere nomakwamakwamo nomahepeko gokutunda kononkore dawo. Ee, rupandu musi tuna kara naro morwa Karunga kutupopera nokutupa nkenye apa yihepwa yetu poyiruwo yomaudigu!

 JEHOVA KUPOPERA

15. Simwitira omu guhya geharo ga poperere munwendi.

15 Guhya geharo kapi tupu a gava yihepwa yovana vendi nye hena kuvapopera. Age kuhetekera ko kuvapopera nsene mosiponga vana kara. Munazinyetugara gumwe kudiworoka apa oguhwe va mu poperere apa ga kere mumatigona. Nage noguhwe kwa kere monzira zokuza kembo va tunde moyirugana yokuzuvhisa makura tava rutu kamuramba komema. Ngurangura ozo mvhura zonene kwa rokere makura taka hanzere unene. Nkedi za kere po mokuruta ntudi pokulyata pomamanya gomanene. Morwa munona kwa pitire komeho, makura mpadi zendi tazi sekuna pemanya nokugwira momema aga ga pupire nononkondo nokuminangana rukando ruvali. Ee, omu tupu ga hefe apa oguhwe va genderere kumukwata mewoko nokumupopera! Mokulifana, Guhyetu gemeguru kutupopera koyiponga mouzuni ou woudona nokomupangeli gwawo, Satana. Jehova yige Mupopeli gomuwa po ogu twa hepa.—Mat. 6:13; 1 Joh. 5:19.

16, 17. Ngapi Jehova ga vaterere nokupopera Vaisraeli apa va rwire noVaamareki?

16 Jehova kwa poperere vantu vendi momvhura 1513 komeho zokuwiza Kristusa. Age kwa parwire Vaisraeli moupika nokuvapopera va vindakane Efuta lyEgeha. Konyima zokutavakana mburundu va vyuke koNdundu zaSinayi, makura tava ka sika poRafidimu.

17 Mokumona asi uporofete womwaGenesis 3:15 kapi wa sikilire mo posiruwo sina, Satana yipo ga paparere nompito dokuhomokera Vaisraeli ava va monekere ngwendi kwato epopero. Age kwa yi rugene eyi, pokuruganesa Vaamareki ava va kere nonkore dovantu vaKarunga.  (Num. 24:20) Ngapi omu Jehova ga poperere vantu vendi kononkore odo kupitira mwaJosuwa naMosesa naArona ntani naHuru? Josuwa novantu vendi kwa rwanesere Vaamareki, pepi nondundu ezi ga kere Mosesa naArona ntani naHuru. Sinene tupu Mosesa ana zerura kuwoko kwendi, Vaisraeli tava fundu nonkore dawo. Apa Mosesa ga rorokere, Arona naHuru yipo va mu vaterere pokuzerura mawoko gendi. Nevatero lyaJehova, “Josuwa makura ta fundu Vaamareki nuunu.” (Ex. 17:8-13) Mosesa yipo ga tungire po sizambero, makura ta ruku po asi: “HOMPA yige efundo lyange.”—Resa Exodus 17:14, 15.

KWA VA POPERERE KOMAHOMOKERO GASATANA

18, 19. Epopero musinke Karunga a gava kovakareli vendi mosiruwo setu?

18 Jehova kupopera ava va mu hara nokumulimburukwa. Ngwendi Vaisraeli poRafidimu, ose kuhuguvara mwaKarunga mokutupopera kononkore detu. Jehova rorunzi kutupopera ngombunga, ntani kutugamena komahomokero goMuzonaguli. Pasihonena, Karunga kugamena vanavazinyetu ava ava hepeke morwa upirambinga wawo. Eyi kwa horokere moNdovesiranda nomoyirongo yimwe apa epangero lyaNazi lya pangerere. Apa atu resa nokuteda ko komasimwititi nokoyihorokwa yomoYearbook kuhamena omu Karunga ga popera vantu vendi moyiruwo yoyidigu, kunkondopeka ehuguvaro lyetu mwendi ngoMugameni gwetu.—Epis. 91:2.

Jehova kuvhura kuruganesa vapuli vakwetetu mokutuvatera tu kwaterere koulimburukwi wetu mosiruwo soudigu (Tara paragarafu 18-20)

19 Kupitira mombunga zaJehova ntani noyimbapiratjangwa, ose kugwana madiworokeso omu Karunga a tu popere. Gazadara ko omu twa gwanena mo uwa momadiworokeso ogo. Ngomu uzuni ou una kuligwederera kudonapa mokudowokera ruhonda nounkorwe nomafano goruhonda, Jehova kutupa madiworokeso gomawa mokutuvatera konomukaro donondona dangoso. Pasihonena, ntaantani tupu ka tu gwene mapukururo gokunyokera po ukaume woudona kupitira koInterneta. *1 Kol. 15:33.

20. Epopero negameno musinke atu gwana kupitira mombungakriste?

20 Ngapi omu natu yi likida asi ose kuna ‘kuturonga’ Jehova? Pokulimburukwa konompangera dendi. (Jes. 54:13) Nombungakriste detu kuna kara mavango oku atu gwana epopero negameno, oko yiko atu gwana evatero lyovakuronambunga nomapukururo gokutunda moBibeli. (Gar. 6:1) Jehova kuruganesa ‘vantu owo ga pa mauhwi’ mokutupakera mbili. (Efe. 4:7, 8) Yisinke twa hepa kurugana nsene va tu pa mapukururo? Twa hepa kulimburukwa, makura Karunga nga tu tungika.—Heb. 13:17.

21. (a) Yisinke twa hepa kutokomena kurugana? (b) Yisinke ngatu ka demenena mosirongwa sokukwama ko?

21 Tu tokomeneni kupulisira mpepo zokupongoka zi tu pitisire nokutambura mavyukiso gokutunda kwaGuhyetu gemeguru. Twa hepa kuteda ko keparu lyaMunwendi, Jesus Kristusa, nokukwama sihonena sendi sosiwa. Age kwa gwene mfeto zonene morwa ‘kulimburukwa dogoro konomfa.’ (Fil. 2:5-11) Ngwendi Jesus, ose ngava tu tungika nsene tu huguvara Jehova nomutjima gwetu nagunye. (Yis. 3:5, 6) Tu huguvareni mwaJehova nkenye apa ngoMugavi noMupopeli gwetu kupitakana nkenye muntu. Ee, ruhafo musi rokukarera Jehova! Eharo lyetu ngali nkondopara ngomu tuna kugazadara Guhyetu asi age Kaume gomuwa po. Sirongwa sokukwama ko ngatu ka demenena omu Jehova ga kara Kaume gomuwa po.

^ para. 19 Yihonena yomadiworokeso gangoso kuyigwana moyirongwa “Kuruganesa Interneta monkedi zongwa” moRuhungu,15 Siwogedi 2011, epenuno 3-5 ntani “Takamesa yiraha yaSatana!” ntani “Nyokera po yiraha yaSatana!” moRuhungu,15 Siwogedi 2012, epenuno 20-29.