Zende koyikaramo

Zende koyikaramo

Nombangi daJehova

Horowora eraka Rukwangali

Nomvhura 100 doupangeli woUhompa—Ngapi omu da ku kundama?

Nomvhura 100 doupangeli woUhompa—Ngapi omu da ku kundama?

“Yirugana yoge yinene, ayo hena kutetura, ove Hompa Karunga . . . gonomuhoko nadinye!”—EHOR. 15:3.

1, 2. Yisinke ngau sikisa mo Uhompa waKarunga, ntani morwasinke natu karera nehuguvaro asi ngau wiza?

PEPI nondundu zaKaperenaumu momvhura 31, Jesus Kristusa kwa rongere vasikuli vendi va kanderere asi: “Uhompa woge au wize.” (Mat. 6:10) Naina, sinzi sovantu kapi va yi pura asi Uhompa ngau wiza. Nye ose twa kara nehuguvaro asi makanderero getu kuhamena Uhompa waKarunga ngava ga limburura.

2 Jehova nga ruganesa Uhompa mokutulisa po uumwe mepata lyendi lyemeguru neli lyepevhu. Ano sitambo sendi ngasi ka sika mo. (Jes. 55:10, 11) Yosili, Jehova ana kara nare Hompa momazuva getu! Yihorokwa yokutetukisa eyi ya horoka nomvhura 100 da ka pita, kugava umbangi weyi. Karunga kuna kurugana yirugana yoyinene yokutetura komamiliyona govakareli vendi wokulimburukwa. (Sak. 14:9; Ehor. 15:3) Jehova mokukara Hompa, kwa lisiga newizo lyoUhompa waKarunga ou ga tu rongere Jesus natu kanderera. Ngapi omu yihorokwa eyi ya lisiga, ntani ngapi omu nayi tu kundama?

HOMPA GA HOROWORA JEHOVA TA RUGANA KO YUMA

3. (a) Siruwoke va mu tulire Jesus a kare Hompa, ntani kupi? (b) Ngapi omu no vhura kuyilikida asi Uhompa kwa u tulire po momvhura 1914? (Tara nonkango dokonhi.)

3 Konyara nomvhura 20 komeho zomvhura 1900, vakareli vaKarunga  kwa tamekere kukwata egano uporofete ou ga tjenge Ndaniyera nomvhura 2 500 da ka pita asi: “Posiruwo sohompa owo Karunga gemeguru nga dika sirongo esi ngasi kererera narunye.” (Ndan. 2:44) Valirongi woBibeli kwa va gusire nomvhura dononzi mokulikida asi Uhompa ngau tameka kupangera meguru 1914. Vantu wovanzi posiruwo sina kwa kwatesere ko mutjangi ogu ga tjenge asi: “Mvhura 1914 kwa kere zomandindiro goyininke yoyiwa.” Nye momvhura zoozo, Yita yoPomuhowo yoUzuni yipo ya horokere eyi ya sikisire mo uporofete woBibeli. Erumbu nomakankamo gevhu nomauvera ntani esikomo lyomauporofete gamwe goBibeli kwa likidire asi Jesus Kristusa ga tamekere kupangera meguru 1914 ngaHompa goUhompa. * Pokutura Munwendi a kare Hompa goUmesiyasa, Jehova ga ya kere hompa monkedi zapeke!

4. Sirugana musinke sokuhova ga rugene Hompa gomupe, ntani yisinke hena ga rugene konyima zoyo?

4 Sirugana sokuhova saHompa gomupe ogu ga tulisire po Karunga, kwa kere sokurwa yita nonkore zonene zoGuhwe, Satana. Jesus novaengeli vendi kwa zugumine Muzonaguli novaengeli vendi va tunde mo meguru. Eyi kwa retere ruhafo rorunene meguru nye kwa reta ehudi pontunda zevhu. (Resa Ehororo 12:7-9, 12.) Konyima zoyo, Hompa kwa tamekere kuwapukurura nokuronga nokuwapaika vakareli vendi va rugane mpango zaKarunga. Tu konakoneni omu ulimburukwi wawo komavyukiso gaJesus wa kara sihonena sosiwa kwetu.

HOMPA GOUMESIYASA TA ZERESA VAKARELI VENDI

5. Ezereso musinke lya horokere 1914 dogoro ketamekero 1919?

5 Konyima zapa Jesus ga zugumine mo Satana nonompepo dendi donondona, Jehova kwa pitisilire Jesus a wapukurure ukaro wopampepo wovasikuli vendi pevhu. Muporofete Marakiya kwa yi fatwilire asi alyo kwa kere ezereso lyopampepo. (Mara. 3:1-3) Ehistoli kulikida asi eyi kwa horokere 1914 dogoro ketamekero 1919. * Mokukara ruha rwepata lyaJehova, twa hepa kukara tuna kuhuka ndi tuna pongoka. (1 Pet. 1:15, 16) Twa hepa kunyokera po nkenye mapukiso goukarelikarunga woyimpempa ndi maupolitika gouzuni ou.

6. Ngapi omu ava di gava nondya dopampepo, ntani morwasinke da karera nomulyo?

6 Jesus yipo nye ga ruganesere nonkondo dendi dosiuhompa mokutumba “mukareli gokulimburukwa gonondunge.” Mukareli ogu nga gave nkenye apa nondya dopampepo kwanavenye ava va kara ruha ‘rosiunda simwe tupu’ mepitisiro lyaJesus. (Mat. 24:45-47; Joh. 10:16) Kutundilira 1919, mukareli ogu gokulimburukwa gonondunge kwa sikisa mo situmbukira sendi noulimburukwi sokugava nondya ‘kovantu.’ Nondya edi atu gwana kupitira momukareli kutuvatera tu kure mepuro. Ado kunkondopeka etokomeno lyetu lyokukara tuna kuhuka pampepo nopamukaro nopanandunge noparutu. Nondya edi dopampepo hena kuturonga nokutuvatera tu sikise mo sirugana somulyo esi vana kurugana uzuni mudima. Ove kuna kuruganesa nawa mawapaiko aga ndi?

HOMPA KURONGA VASIKULI VENDI VA ZUVHISE UZUNI MUDIMA

7. Sirugana musinke somulyo ga tamekere Jesus pevhu, ntani ngasi twikira dogoro siruwoke?

7 Apa Jesus ga tamekere nosirugana sendi sokuzuvhisa pevhu, age kwa tente asi: “Ame nyame tupu kukaudisira hena moyitata peke Mbudi zoNgwa zoUntungi waKarunga,  yeeyi yiyo va tumina nge.” (Ruk. 4:43) Nomvhura ntatu noukahe, Jesus kwa demenene kosirugana esi meparu lyendi nalinye. Age kwa pangerere varongwa vendi asi: “Zendeni mu ka udise asi, ‘Untungi waKarunga pepi una kara.’” (Mat. 10:7) Konyima zevhumbuko lyendi, Jesus kwa pumbire asi vasikuli vendi ngava zuvhisa mbudi ezi “dogoro nokooku wa ka twa uzuni.” (Yirug. 1:8) Age kwa va tumbwidilire asi nage nga lihameka mo mosirugana esi somulyo dogoro momazuva getu.—Mat. 28:19, 20.

8. Ngapi omu Hompa ga pindwire elituromo lyokuzuvhisa lyovakareli vendi vepevhu?

8 Momvhura 1919 ‘mombudi zongwa ezi zoUntungi’ kwa ya hamenene mo yoyinzi. (Mat. 24:14) Hompa ga tamekere kupangera meguru nokupongaika kambungagona kovasikuli vendi pevhu. Awo kwa limburukwire neharo kompangera zaJesus zokuzuvhisa mbudi zongwa zoUhompa waKarunga uzuni mudima. (Yirug. 10:42) Pasihonena, mwaSitarara 1922 vazuvhisi woUhompa wokusika koyiha 20 000 kwa pongere posigongi soyirongo esi sa karerere modoropa zaCedar Point moOhio, moAmerika. Gazara tupu omu va hefe apa munazinyetu Rutherford ga geve siuyungwa sosiparatjangwa “Uhompa” nokudivisa asi: “Konekeni asi Hompa kuna kupangera! One nyone vakarelipo vendi. Yipo nye, diviseni, diviseni, diviseni, Hompa nouhompa wendi.” Ezuva lyokukwama ko mayovi gavali govakalipo posigongi oso kwa lihamekere mosirugana sokuzuvhisa nokugenda sinano sonokilometa 72 kutundilira kevango oku sa karerere sigongi. Noruhafo, munazinyetu gumwe kwa tente asi: “Kapi ngani divara ezuvhiso lyokudivisa Uhompa ntani upampi wovantu va kere posigongi sina!” Ano age kapisi gelike ga lizuvhire ngoso.

9, 10. (a) Mawapaiko musinke va tulisa po mokudeura vazuvhisi woUhompa? (b) Ngapi omu wa gwanena mo uwa medeuro eli?

9 Momvhura 1922, vazuvhisi woUhompa wokupitakana 17 000 kwa zuvhisire moyirongo 58 uzuni mudima. Nye va hepere edeuro. Mosiruwo soVakriste wokuhova, Hompa ogu ga tura po Jehova kwa pere varongwa vendi mavyukiso kuhamena eyi nava zuvhisa, noku nava zuvhisira nomu nava zuvhisa. (Mat. 10:5-7; Ruk. 9:1-6; 10:1-11) Mokulifana nanaina, Jesus kudivilisa asi vazuvhisi navenye va gwane mavyukiso noyiruganeso yipo va zuvhise nawa. (2 Tim. 3:17) Jesus kuruganesa mbungakriste zi deure vasikuli vendi mokuzuvhisa. Edeuro eli kuligava kupitira moSikora zoUkareli, monombungakriste dokupitakana 111 000 mouzuni mudima. Sikora ezi kwa vatera vazuvhisi wokupitakana pomamiliyona ntambali va dive kuzuvhisa nokuronga yipo va vatere vantu “navenye.”—Resa 1 Vakolinte 9:20-23.

10 Pwa kara hena nosikora doBibeli edi  adi deura vakuronambunga novazuvhisi wokukarerera novagara wovadike novalikwali nava va hamena moKomitiye zomutayi novakadi vawo novatareli wokudingura novakadi vawo ntani novatumwa. * Murongwa gumwe goSikora zoBibeli zovalikwali kwa pwagesere rupandu rwendi pokutanta asi: “Edeuro eli twa gwene kwa nkondopekere eharo lyetu kwaJehova nokutuwapaika tu wape kuvatera wopeke.”

11. Ngapi vazuvhisi woUhompa va twikira kuzuvhisa nampili momahomokero gaSatana?

11 Nkore Satana kumona elituromo eli lyokudeura vazuvhisi wombudi zoUhompa. Age ana hara kuhagekesa sirugana sokuzuvhisa ntani kuna kuruganesa nkenye eyi mokuhomokera mbudi zoUhompa nava ava zi zuvhisa. Nye mahomono gonkore kapi ngaga tompoka. Jehova kwa tura Munwendi ‘a kare mutwe gomapangero nagenye nononkondo nadinye.’ (Koros. 2:10) NgaHompa, Jesus kuruganesa nonkondo dendi mokupopera ntani kuvyukisa varongwa vendi yipo va sikise mo mpango zoGuhwe. * Mbudi zongwa kuna kuzizuvhisa, ano mamiliyona govantu wonomutjima donongwa kuna kuvaronga va karere Jehova. Azo mfumwa kwetu mokulihameka mo mosirugana esi sosinene!

HOMPA TA WAPAIKE VASIKULI VENDI KOSIRUGANA SOSINENE

12. Faturura omu va wapukurura epitisiro mombunga zaJehova kutunda 1914.

12 Kutundilira apa va tulisire po Uhompa 1914, Hompa kwa wapukwilire nkedi omu vakareli vaKarunga va va wapaika mokurugana mpango zoGuhwe. (Resa Jesaya 60:17.) Momvhura 1919, mugendesi goyirugana yokuzuvhisa kwa mu horowere mwankenye mbungakriste a pitisire mokuzuvhisa. Yirugana ya tunda embo zende embo kwa yi wapaikire 1927. Momvhura 1931, vakwatesiko woUhompa kwa va nkondopekere mokurugana unene apa va tambwire edina lyomoMatjangwa Nombangi daJehova. (Jes. 43:10-12) Ehoroworo lyovapitisili womombungakriste lyopaudemokrasi kwa li hagekesere po 1938, makura yipo va tamekere kugava yitumbukira kuliza noyihepwa yomoMatjangwa. Momvhura 1972, yipo epitisiro lyombungakriste va ligeve kombunga zovakuronambunga nye kapisi komupitisili gumwe tupu. Ano vagara navenye ava va sikisire mo yihepwa kwa va korangedere va kare ‘vasita wosiunda saKarunga esi ga va pa.’ (1 Pet. 5:2) Ano 1976, Mbungagendesi kwa zi wapaikire monokomitiye ntazimwe mokugendesa sirugana sokuzuvhisa uzuni mudima. Kutunda opo, Jesus kwa twikira kuwapaika vasikuli vendi va twikire kurugana yininke kuliza nompango zaKarunga.

13. Eyi wa tompora Uhompa monomvhura 100 edi dokuhova, ngapi omu ya kundama eparu lyoge?

 13 Gazara eyi Hompa goUmesiyasa ga tompora monomvhura 100 edi dokuhova depangero lyendi. Age kwa kuhura mbunga zovantu ava va karera po Jehova. Age kwa gendesa sirugana sokuzuvhisa mbudi zongwa moyirongo 239 nokuronga mamiliyona govantu va karerere Jehova. Age kwa reta kumwe vantu wovalimburukwi wokupitakana mamiliyona ntambali, ano nkenye gumwe gwawo kwa ligava mwene mokurugana mpango zoGuhwe. (Epis. 110:3) Yosili, Jehova kwa ruganesa Uhompa woUmesiyasa mokusikisa mo yininke yoyinene yokutetukisa. Ano komeho, yokutetukisa nye unene!

MATUNGIKO GOKOMEHO GOUHOMPA WOUMESIYASA

14. (a) Yisinke atu hundire Karunga apa atu kanderere asi: “Uhompa woge au wize”? (b) Yisinke etjangwa lyetu lyomomvhura ezi 2014, ntani morwasinke lina lizire?

14 Nampili ngomu Jehova ga tura Munwendi, Jesus Kristusa a kare Hompa goUmesiyasa 1914, nye eyi kapi ya sikisilira mo ekanderero eli asi: “Uhompa woge au wize.” (Mat. 6:10) Ayo kwa yi pumbire moBibeli asi Jesus nga ‘pangera mokatji kononkore dendi.’ (Epis. 110:2) Mapangero govantu mepitisiro lyaSatana simpe kuna kurwanesa Uhompa. Apa atu kanderere asi Uhompa waKarunga au wize, ose kuhundira Karunga asi Hompa goUmesiyasa nava nga pangera nawo meguru va ya guse po mapangero govantu nava ava rwanesa Uhompa wendi. Eyi ngayi sikisa mo nonkango domwaNdaniyera 2:44 asi Uhompa waKarunga ngau “hanagura yirongo oyo nayinye.” Awo ngau gusa po vanapolitika ava va kara nonkore doUhompa. (Ehor. 6:1, 2; 13:1-18; 19:11-21) Ano eyi ntaantani yi ka horoke. Ayo yina lizi netjangwa lyetu lyomvhura 2014 va gusa mwaMateusa 6:10 asi: “Uhompa woge au wize,” ano ngesi Uhompa waKarunga una kara nonomvhura 100 kutunda apa va u tulisa po.

Etjangwa lyetu lyomvhura 2014: “Uhompa woge au wize.”—Mateusa 6:10

15, 16. (a) Yihorokwa musinke ngayi horoka mEpangero lyaKristusa lyoNomumvho Eyovi? (b) Sininke musinke sokuhulilira nga rugana Jesus ngaHompa goUmesiyasa, ntani yisinke ngayi tanta kositambo saJehova?

15 Konyima zapa Hompa goUmesiyasa nga zonagura po nonkore daKarunga, makura nga zugumina Satana novaengeli vendi mosirongo sokonhi. (Ehor. 20:1-3) Apa ngava mu gusa po Satana, Uhompa waKarunga ngau reta mauwa kupitira monzambo zaJesus zosizoweseso nokugusa po yitundwamo yononzo daAdamu. Hompa nga vhumbura mamiliyona govantu ava va fa ntani nye nga wapaika elirongo lyokuvaronga kuhamena Jehova. (Ehor. 20:12, 13) Evhu nalinye ngali ka kara paradisa ngwendi sikunino saEdeni. Vantu navenye wovalimburukwi ngava ka sikilira mo.

16 Kehagero lyEpangero lyaKristusa lyoNomumvho Eyovi, Uhompa woUmesiyasa ngau ka sikisa mo sitambo saJehova kevhu. Makura Jesus nga ka gava Uhompa koGuhwe. (Resa 1 Vakolinte 15:24-28.) Kutunda opo kapi ngatu ka hepa hena mugwanekedesi pokatji kwetu naJehova. Vana vaKarunga navenye vemeguru nava vepevhu ngava ka kara mouumwe naGuhyawo gemeguru ngepata lyoyisitwa nayinye.

17. Yisinke ono tokomene kurugana kuhamena Uhompa?

17 Yihorokwa yokutetukisa eyi ya sikilira mo monomvhura 100 kutulikida asi Jehova kuna kupangera ntani sitambo sendi kevhu ngasi ka sika mo. Tu twikireni nye mokumukarera noulimburukwi nokudivisa Hompa noUhompa wendi. Tuna kara nehuguvaro lyokupama asi Jehova ntaantani nga limburure ekanderero lyetu eli asi: “Uhompa woge au wize”!

^ para. 10 Tara Ruhungu 15 Sitarara 2012, pepenuno 13-17 siparatjangwa “Nosikora doUkareli—Kulikida eharo lyaJehova.”

^ para. 11 Tara yihonena yomafundo gopaveta moyirongo yokulisiga-siga moRuhungu 15 Siwogedi 2013, epenuno 30.