Zende koyikaramo

Zende koyikaramo

Nombangi daJehova

Horowora eraka Rukwangali

Karera Jehova komeho mazuva gomadona ga wize

Karera Jehova komeho mazuva gomadona ga wize

“Diworoka musiti goge.”—MUUD. 12:1.

1, 2. (a) Epukururo musinke ga tjenge Saromo kuhamena vadinkantu? (b) Morwasinke epukururo lyaSaromo lya karera nomulyo koVakriste wonomvhura 50 ndi vakurupe?

JEHOVA kwa gendesere hompa Saromo a tjangere vadinkantu nonkango edi asi: “Diworoka musiti goge momazuva goge goudinkantu, ago mazuva gomadona nonomvhura simpe kapi dina wiza.” Yisinke ‘mazuva gomadona’? Saromo kwa ruganesere nonkango dokuseweka pokusingonona mazuva goukurupe asi: mawoko nomaguru kukankama, kuzumbanesa mazego, kudira kumona nawa, matwi nokuzuvha ko si nawa, kukara nonomvhi ntani kudira kuvyukilira kugenda. Eyi yiyo Saromo ga tu korangedera mokudiworoka Musiti gwetu momazuva goudinkantu.—Resa Muudisi 12:1-5.

2 Vakriste wovanzi kukara simpe nononkondo nampili ponomvhura 50 ndi moukurupe. Awo kuvhura va kare nonomvhi, nye pamwe kapi va kara nomaudigu aga ga singonona Saromo. Kuvhura Vakriste owo va gwanene mo uwa mepukururo eli asi “diworoka musiti goge momazuva goge goudinkantu” eli ga tanterere  Saromo vadinkantu. Yisinke ali tanta epukururo olyo?

3. Yisinke ya hamena mo mokudiworoka Musiti gwetu?

3 Nampili ngomu twa karera Jehova nomvhura dononzi, poyiruwo noyiruwo ya wapa tu gazadare ko omu Musiti gwetu ga nenepa. Eparu kuna kara uhwi wokutetukisa. Muntu nokuvhura si kukwata egano omu va sita eparu. Monkedi omu Jehova ga sita yininke kutuninkisa tu hafere eparu mononkedi dokulisiga-siga. Apa atu gazadara ko eyi ga sita Jehova, ayo ngayi nkondopeka rupandu rwetu keharo nokounongo nokononkondo dendi. (Epis. 143:5) Kudiworoka Musiti gwetu kwa hamena mo hena kugazadara eyi ga hepa ko kwetu. Kuteda ko koyininke nayinye eyi, ngayi tu tumangeda tu likide rupandu koMusiti gwetu pokumukarera nomutjima nagunye.—Muud. 12:13.

NOMPITO DOKULIKARERA MOMAZUVA GOUKURUPE

4. Epuro musinke nava lipura Vakriste va kura pampepo, ntani morwasinke?

4 Nsene ove wa karera Jehova nomvhura dononzi, lipura asi: ‘Yisinke nani ruganesa eparu lyange ngesi, ngomu nina kara simpe nononkondo?’ NgoMukriste ogu wa kura pampepo, wa kara nonompito edi va dira kukara nado vamwe. Pasihonena, ove kuvhura o ronge vadinkandu eyi wa lironga kwaJehova. Kuvhura o nkondopeke wopeke pokuvasimwitira yilimonena eyi wa hafera mokukarera Karunga. Hompa Ndafita kwa kanderere kuhamena nompito dangoso. Age kwa tjenge kuhamena Karunga asi: “Nyove wa ronga nge kutunda kounona wange. . . . Ano ntaantani ame na kurupa, nohuki dange vau, wa ha zumba nge, Karunga! Kara pwange apa ngani udisa nonkondo noupenda woge kwava ngava ka kara ko.”—Epis. 71:17, 18.

5. Ngapi omu Vakriste va kura pampepo nava tantera ko wopeke unongo ou va lironga?

5 Ngapi omu no ligawinina nava wopeke unongo ou wa gwana monomvhura dononzi da ka pita? Kuvhura o zigide vadinkantu kembo lyoge o ya zogere nawo nonzogera dokulikorangeda ndi? Kuvhura o ture po mawapaiko mokuzuvhisa kumwe nawo yipo va mone ruhafo oru o gwana mokukarera Jehova ndi? Elihu gomosiruwo sanare, kwa tente asi: ‘Vakurona va hepa kuuyunga, nokuligawinina unongo.’ (Joba 32:7) Mupositoli Paurusa kwa tanterere Vakriste wovakadi asi va korangede vakwaawo kupitira mononkango nomosihonena. Age kwa tjenge asi: “Vakuronakadi, . . . va kare varongi veyi yoyiwa.”—Tit. 2:3.

EYI NO RUGANA MOKUVATERA WOPEKE

6. Morwasinke Mukriste ga kura pampepo na dilira kulizuvha asi kapi ta vhuru kuvatera wopeke?

6 Nsene asi ove Mukriste ogu wa kura pampepo, kuvhura o vatere wopeke. Gazadara ko yininke eyi wa kwata egano, eyi wa dilire kudiva monomvhura 30 ndi 40 da ka pita. Ove wa diva omu no ruganesa nompango doBibeli momaukaro gokulisiga-siga meparu. Yosili, wa kara nediwo lyokuguma nomutjima dava wopeke. Nsene ove mukuronambunga, wa diva omu no vatera vanavazinyetu ava vana lipuka. (Gar. 6:1) Nampo wa lironga omu no gendesa yirugana yomombungakriste noyigongi ndi kutunga Yinyanga yoUhompa. Nampo wa diva omu no korangeda vandokotora va ruganese nongendeseso dokudira kuruganesa honde. Nampili ntani tupu ko gwene ekuho, wa kara nediwo meparu. Pasihonena, nsene ove kwa rera vanona, wa kara nediwo lyomulyo. Vakriste wovakurupe va kara nediwo lyokukorangeda vakareli vakwawo pokuvaronga nokuvapitisira ntani nokuvankondopeka.—Resa Joba 12:12-13.

7. Edeuro musinke Vakriste wovakurupe nava vhura kugava kovadinkantu?

7 Ngapi no vhura kuruganesa ediwo lyoge momunene? Nampo kuvhura o vatere vadinkantu  omu nava tameka kurugana elirongo lyoBibeli. Nsene asi ove munazinyetukadi, kuvhura o gave magano kovazinya wovadinkantu omu nava kara nelikwamo lyeyi yopampepo oku kuna kupakera mbili vana vawo. Nsene asi ove munazinyetugara, kuvhura o ronge vanazinyetugara omu nava gava yiuyungwa nomukumo nokukara vazuvhisi wovawa wombudi zongwa. Ntani hena kuvhura o va likide omu o dingura vanavazinyetu wovakurupe nokuvakorangeda pampepo. Nampili kapi ono kara nononkondo ngwendi nare, wa kara nompito zokudeura vadinkantu. Nonkango daKarunga kutanta asi: “Ose kututetura nonkondo dovadinkantu, tatu fumadeke nohuki donomvhi dovakurupe.”—Yis. 20:29.

KUZUVHISIRA OKU KUNA HEPA VAZUVHISI

8. Ngapi mupositoli Paurusa ga ruganesere eparu lyendi moukurupe?

8 Apa mupositoli Paurusa ga ya kurupire, age simpe ga ruganesere ediwo lyendi mokukarera Karunga momunene. Apa va mu pwagesere modorongo moRoma momvhura 61, age kwa lididimikilire nomvhura dononzi mosirugana soutumwa. Nampili ngomu ga vhulire kuzuvhisira tupu moRoma, nye age ga zire hena komavango gapeke. (2 Kol. 11:23-27) Vanavazina womositata oso sosinene ngano va haferere unene ekwafo lyendi. Nye Paurusa ga dimbwilire asi koyirongo yimwe kwa hepere vazuvhisi. Makura nage naTimoteusa ntani naTitusa yipo va zire koEfeso nokoKereta morugendo routumwa, ano konyima nampo koMakedoniya. (1 Tim. 1:3; Tit. 1:5) Kapi tuna diva nsene ga ka dingwire moSipanye nye ga kere nositambo sangoso.—Rom. 15:24, 28.

9. Siruwoke nampo Peturusa ga zire oku kwa hepere vazuvhisi? (Tara efano pepenuno 22.)

9 Mupositoli Peturusa nampo kwa kere nonomvhura dokupitakana 50 apa ga dirukilire oku kwa hepere vazuvhisi. Ngapi twa yi diva eyi? Nsene asi kwa kere nonomvhura ngwendi daJesus ndi nampo kumupita, age nampo kwa kere nonomvhura dokoyiha 50 apa ga ligwene novapositoli vakwawo moJerusarema momvhura 49. (Yirug. 15:7) Konyima zepongo lina, Peturusa kwa zire koBabironi, mokukazuvhisira muhoko goVajuda mosirongo sina. (Gar. 2:9) Apa ga tjenge mbilive zendi zokuhova momvhura 62, age kwa kere moBabironi. (1 Pet. 5:13) Kukatunga mosirongo sapeke kapisi ureru, nye Peturusa kapi ga pulisilire ukurupe wendi u mu ninkise a zumbanese ruhafo rokukarera Jehova nomutjima nagunye.

10, 11. Simwitira sihonena sagumwe ogu moukurupe wendi ga dirukilire oku kwa hepere vazuvhisi.

10 Naina, Vakriste wovanzi wonomvhura 50 ndi kupita opo kudimburura asi ukaro wawo una runduruka ntani asi kuvhura va zuvhise mononkedi dimwe dapeke. Vamwe kwa dirukira oku kuna hepa vazuvhisi. Pasihonena, Robert kwa tjanga asi: “Ame namukadange apa twa kere nonomvhura dokoyiha 55 kwa dimbwilire nompito dononzi dokukarera Jehova. Apa munwetu gomugara ga tundire membo, kapi twa kere novakurona wokukurupa ava twa pakerere mbili ntani twa gwene upingwa woununu woyimaliwa kovakondi vetu. Apa na varwire ndando zonzugo zetu tani dimburura asi nsene tu zi randesa po nokufuta makongo gazo ngatu gwana yimaliwa yokulireresa dogoro ngani ka gwane youkurupe. Ose kwa zuvhire asi vantu wovanzi womoBolivia kutambura elirongo lyoBibeli ntani eparu lyamo ereru. Makura yipo twa tokwere kudirukira mo. Kukara nembo lyepe kapi ya kere ureru. Mparukiso kwa lisigire unene nezi twa yikire koMuzogo gwaAmerika. Nye Jehova ga tungikire elituromo lyetu.”

11 Robert kwa gweda ko asi: “Eparu lyetu ngesi kuna demenene koyirugana yomombungakriste. Vantu vamwe ava twa rongere Bibeli va gwana ekuho. Epata limwe twa rongere Bibeli kwa tunga momukunda goruhepo ogu gwa kara ure. Nye nkenye sivike,  epata eli kugenda sinano nokuwiza modoropa komapongo. Gazara tupu ruhafo oru ngatu lizuvhu pokumona epata eli omu lina kutura po ezokomeho ntani mumati gumwe gemepata olyo kwa ya kere muzuvhisi gokukarerera?”

HEPERO ZOVAZUVHISI MOMARAKA GAPEKE

12, 13. Simwitira sihonena samunazinyetu ogu ga tamekere kukarera Jehova konyima zokuhageka yirugana.

12 Nombungakriste notumbungagona tomaraka gapeke kuvhura kugwanena mo uwa mosihonena sovanavazinyetu wovakurona. Ntani nomukunda dangoso nongwa kuzuvhisira. Pasihonena, Brian kwa tjanga asi: “Name namukadange kwa kere tuna manguruka koyitumbukira yokurera vanona apa twa kere nonomvhura 65 edi ava hageke vantu yirugana moBritania. Vana vetu va kulire nokutunda membo ntani kapi ngatu gwana vantu va kere neharo lyokulironga Bibeli. Ano konyima yipo na ligwene nomudinkantugara goMutjina ogu nga rugana epaparo pounivesiti zomomukunda gwetu. Age ga tambwire ezigido lyokuwiza komapongo ntani nokutameka kulironga Bibeli. Konyima zoyivike yongandi yipo ga ka retere ko mukwawo gumwe goMutjina. Ano konyima zoyivike yivali, ta ka reta ko gwautatu ntani gwaune.

13 “Ano apa na gwene ko Mutjina gwautano ogu ga pulire elirongo lyoBibeli makura yipo na gazarere asi: ‘Nampili ngomu na kara nonomvhura 65 kapi yina kutanta asi kapi tani twikire kukarera Jehova.’ Makura yipo na pulire mukadange ogu ga kere munona kwange nonomvhura mbali nsene ana hara kulironga Rutjina. Ngatu lirongo pokupurakena koRutjina va kwateka. Eyi kwa horokere nomvhura murongo dina ka pita. Kuzuvhisira momukunda omu ava uyunga eraka lyapeke kwa tu ninkisire tu lizuvhe ngwendi tu vanona hena. Ose kwa lironga Bibeli noVatjina 112! Sinzi sawo kuwiza komapongo. Gumwe gwawo ngesi kuna kuzuvhisa nose ngomuzuvhisi gokukarerera.”

Ove kuvhura simpe o tamunune sirugana soge sokuzuvhisa (Tara paragarafu 12, 13)

HAFERA EYI ONO KUVHURA KURUGANA

14. Yisinke nava hafera Vakriste wovakurona, ntani ngapi sihonena saPaurusa nasi va korangeda?

14 Nampili ngomu Vakriste wovanzi wonomvhura dokoyiha 50 va kara nonompito  dokukarera Jehova, nye kapisi navenye kuvatompoka. Vamwe va kara noudigu woukanguki ano vamwe kupakera mbili vakurona vawo wokukurupa ndi kurera vanona. Ayo kuvhura yi ku hafese mokudiva asi Jehova kuhafera eyi omu ruganene kuliza noukaro woge. Mevango lyokunyegenya kweyi ono kudira kuvhura kurugana, hafera eyi ono kuvhura kurugana. Gazadara ko kosihonena somupositoli Paurusa. Nomvhura nonomvhura age kwa kere mounkwate wokukara monzugo makura kapi nga vhuru kurugana sirugana sendi soutumwa. Nye apa ngava mu dingura vantu, nga uyunga nawo yomoMatjangwa nokuvankondopeka mepuro.—Yirug. 28:16, 30, 31.

15. Morwasinke ava va haferere Vakriste wovakurupe?

15 Jehova nage kuhafera eyi ava rugana Vakriste wovakurupe mosirugana sendi. Nampili ngomu Saromo ga tumbwire asi mazuva gomadona nonomvhura doukurupe kapisi siruwo sosiwa meparu, nye Jehova kuhafera eyi ava sikisa mo Vakriste wovakurupe mokumuhamberera. (Ruk. 21:2-4) Nombungakriste kuhafera sihonena sovakareli wovalimburukwi ava va karera Jehova siruwo sosire.

16. Situmbukira musinke ga haferere Ana gomukurupe, nye yisinke ga rugene mokukarera Karunga?

16 Bibeli kutanta asi mukadi gumwe gomukurona gedina Ana kwa karerere Jehova dogoro moukurupe wendi. Apa va mu hampurukire Jesus, age mufisayendi gonomvhura 84. Nye kapi ga parukire siruwo sosire nokukara musikuli gwaJesus, va mu gwaveke nompepo zokupongoka ndi a hafere kuzuvhisa mbudi zongwa zoUhompa. Nampili ngoso, Ana ga haferere eyi ga vhulire kurugana. “Age kapi nga tundu mo montembeli, nye nga kerere Karunga masiku nomutenya.” (Ruk. 2:36, 37) Ngomu mupristeli nga zamba nonzambo kontembeli nkenye ngurangura nongurova, Ana nage nga kara mokatji kovantu ava ngava kara pontembeli nokukanderera, nampo ure wovili ngoso. Apa ga mwene Jesus ngomukeke, yipo ga tamekere kuuyunga “yokuhamena munona ogu kwanavenye ava va ndindira ezoworo lyaJerusarema.”—Ruk. 2:38.

17. Ngapi omu natu vatera Vakriste wovakurupe nava wokuvera-vera va lihameke moukareli wousili?

17 Naina, twa hepa kuvangarara mokuvatera Vakriste wovakurupe ndi wokuvera-vera. Vamwe wovanzi kuhara kukara nose komapongo ndi koyigongi nye kapi ayi va vhulika. Komavango gamwe, nombungakriste kutulisa po mawapaiko kovantu vangoso yipo va vhure kupurakena yokomapongo kupitira motelefona. Ano komavango gamwe, eyi kuvhura yi dire kuvhulika. Nampili ngoso, Vakriste ava ayi dili kuvhulika kuza komapongo kuvhura kukwatesa ko ukareli wousili. Pasihonena, awo kuvhura va kanderere po mbungakriste yipo yi zi tompoke.—Resa Episarome 92:13, 14.

18, 19. (a) Morwasinke Vakriste wovakurupe pamwe ava dili kudimburura omu sihonena sawo asi korangeda wopeke? (b) Wolye nava tura pasirugana epukururo eli: “Diworoka musiti goge”?

18 Vakriste wovakurupe kuvhura va dire pamwe kuyidimburura omu sihonena sawo asi korangeda wopeke. Pasihonena, nampili ngomu Ana ga kere noulimburukwi monomvhura nadinye edi ga kere pontembeli, age kapi ga yi dimbwilire omu sihonena sendi sa korangedere wopeke. Eharo lyaAna lyokuhara Jehova kwa li tjanga moMatjangwa. Yosili, eharo lyeni kwaKarunga kwa li tjanga monomutjima dovakareli vakweneni. Eyi yiyo Nonkango daKarunga adi tantere asi: “Mwenyo gomure mfeto zouhungami; ano nomvhi nkata zefumano.”—Yis. 16:31.

19 Twa kara neyi natu vhura kurugana mosirugana saJehova. Ngano natuvenye ava tuna kara simpe nononkondo tu ture pasirugana nonkango edi asi: “Diworoka musiti goge . . . , ago mazuva gomadona nonomvhura simpe kapi dina wiza.”—Muud. 12:1.