Zende koyikaramo

Zende koyikaramo

Nombangi daJehova

Horowora eraka Rukwangali

“Nokulivinduka si kulimbilirwa”!

“Nokulivinduka si kulimbilirwa”!

“Vakwetu, nokulivinduka si kulimbilirwa.”—2 TES. 2:1, 2.

1, 2. Morwasinke yimpempa yina lihanene naina, ntani monkedi musinke vana kuyihanesa? (Tara efano.)

YINEYA nepukiso noyimpempa yina lihana mouzuni ou woudona. Eyi kapisi yi tu tetukise. Bibeli za yi zeresa asi Satana Muzonaguli yige mupukisi, ntani mupangeli gouzuni ou. (1 Tim. 2:14; 1 Joh. 5:19) Ngomu tuna kuhedera pepi nouhura wouzuni ou, Satana ana handuka unene morwa ana diva asi ‘siruwo esi sina hupu ko, sisupi.’ (Ehor. 12:12) Yipo nye, ava ava kwatesa ko ukareli wousili va hepa kundindira epukiso lyokutunda kwava ga pukisa Muzonaguli.

2 Nombudi doyimpempa kuhamena vakareli vaJehova nepuliro lyawo, poyiruwo yimwe kudihanesa kupitira koyikwambudi. Nosaitunga nomalikwamo gokotivi ntani Interneta kuyiruganesa mokuhanesa yimpempa. Ngoyitundwamo, vantu vamwe kuyapura yimpempa oyo nokunyoka kutambura usili.

3. Yisinke nayi tu vatera tu nyokere po yimpempa?

3 Mokunyokera po yimpempa yonkore zetu, ose tuna hafa mokudiva asi twa kara noNonkango daKarunga edi da kara ‘nomulyo gokupukurura.’ (2 Tim. 3:16) Ayo kwa kara nomulyo asi tu lirongere ko kweyi ga tjanga mupositoli Paurusa asi Vakriste vamwe womoTesaronika kwa va pukisire pokutambura marongo goyimpempa. Age kwa va pukwilire asi: “Nokulivinduka si kulimbilirwa.” (2 Tes. 2:1, 2) Yisinke natu lirongera ko kepukururo lyaPaurusa, ntani ngapi omu natu li tura pasirugana?

MARONDORO GOKUWAPERA

4. Ngapi Vakriste womoTesaronika va va rondwere kewizo ‘lyezuva’ lyaJehova, ntani ngapi vana kuturondora nose naina?

4 Mombilive zendi zokuhova kombungakriste zoVatesaronika, Paurusa kwa demenene kewizo ‘lyezuva’  lyaJehova. Age kapi ga here vapuli vakwawo li ya va gwane va hana kuliwapaikira. Nye, age kwa va korangedere va kare ‘vantu ava va hamena kouzera’ yipo va vhure ‘kuvangarara, va kare vandjewa-ndjewa.’ (Resa 1 Vatesaronika 5:1-6.) Naina, ose kuna kundindira ezonauko lyoBabironi Zonene, maukarelikarunga goyimpempa. Eyi ngayi likida etameko lyezuva lyaJehova lyenene. Yosili, ose twa kwata egano esikiliromo lyositambo saJehova. Ntani hena, kupitira mombungakriste, ose kugwana nkenye siruwo madiworokeso aga aga tu vatere tu kare tuna vangarara. Kukoneka marondoro ogo kuvhura kunkondopeka etokomeno lyetu ‘lyokuruganena Karunga monkedi zokuzira mo.’—Rom. 12:1.

Paurusa kwa tjenge nombilive edi da gava marondoro gokuwapera koVakriste (Tara paragarafu 4, 5)

5, 6. (a) Mombilive zendi zauvali koVatesaronika, kosinke ga demenene Paurusa? (b) Yisinke na ka rugana ntaantani Karunga kupitira mwaJesus, ntani yisinke twa hepa kulipura?

5 Konyima tupu zokutuma mbilive zendi zokuhova koVakriste womoTesaronika, Paurusa kwa ya va tuminine hena zauvali. Mombilive zauvali, age kwa demenenene koudigu ou ngau wiza apa Hompa Jesus nga ya futisa ‘ava va dira kudiva Karunga nava ava dili kulimburukwa kombudi zongwa.’ (2 Tes. 1:6-8) Egaununo 2 lyombilive ozo kwa likida asi vamwe mombungakriste ngava ‘piyagana’ kuhamena ezuva lyaJehova pokugazara asi lina siki. (Resa 2 Vatesaronika 2:1, 2.) Vakriste wokuhova kapi va kwete egano esikiliromo lyositambo saJehova, nampili ngomu Paurusa ga ya va tanterere konyima kuhamena uporofete ou asi: “Ose kwa diva ruha rumwe tupu, ose hena kuudisa yoruha rumwe tupu. Nye yokusikilira mo nsene ngayi wiza, eyi yoruha rumwe makura tayi dongonoka po.” (1 Kol. 13:9, 10) Nye marondoro aga ga tjenge Paurusa nomupositoli Peturusa ntani navamwe wovagwavekwa womosiruwo sina, kwa va vaterere va kwaterere kepuro lyawo.

6 Mokuvyukisa yininke, Paurusa megendeso lyompepo zokupongoka kwa fatwilire asi varwanesi usili ntani ‘novantu wovadona’ ngava horoka komeho li wize ezuva lyaJehova. * Konyima zoyo,  Hompa Jesus nga ‘zonagura’ navenye ava va pukisa kuliza nosiruwo sendi. Mupositoli kwa likida konda zeyi ngava ya va pangwira asi awo ‘kapi va tambura usili va u hare.’ (2 Tes. 2:3, 8-10) Ya wapa mokulipura asi: ‘Ngapi omu na hara usili? Ame kukulika ediwo lyange pokukwata egano eyi ani lirongo mosifo esi nomoyimbapiratjangwa yimwe yoBibeli eyi ava gava monombungakriste mouzuni mudima ndi?’

HOROWORA NAWA VAKAUME

7, 8. (a) Yiponga musinke yimwe va ligwanekerere nayo Vakriste wokuhova? (b) Siponga musinke va hepa kunyokera po Vakriste wousili naina?

7 Marongo govarwanesi usili kapisi yiyo yelike ya ya kere siponga koVakriste. Paurusa kwa tjangerere Timoteusa asi “edowo lyokudowokera emona, yilyo ntundiliro zomaudona nagenye.” Mupositoli kwa yi likidire asi ‘vamwe ava va li dowokera, kwa va gusa mo mepuro, makura va lizweka nye momaruhodi gomanzi.’ (1 Tim. 6:10) “Yirugana yorutu” nayo siponga unene.—Gar. 5:19-21.

8 Kuvhura o kwate egano eyi Paurusa ga rondwerere Vatesaronika kuhamena siponga sosinene esi va retesere po vantu ava ga tumbwire asi “vapositoli woyimpempa.” Mokatji kawo kwa kere mo “vamwe ava ngava uyunga yininke yoyimpempa, asi ngava gwane ko varongwa.” (2 Kol. 11:4, 13; Yirug. 20:30) Konyima Jesus ga ya pandadekere mbungakriste zoVaefeso morwa kapi ngava “tarerere vadona.” Vaefeso owo kwa ‘hetekere’ ava ngava litumbura asi vapositoli, nye va hana asi yiwo. (Ehor. 2:2) Mombilive zendi zauvali koVatesaronika, Paurusa kwa geve epukururo eli asi: “Tatu mu pamperekedere, vakwetu, medina lyaHompa gwetu Jesus Kristusa asi, walye omu kara sinanga novakwetetu navenye, ava va piyauka va dwapa.” Makura yipo ga tumbwire Vakriste ava ngava ‘dili kuhara kurugana.’ (2 Tes. 3:6, 10) Nye nsene asi Vakriste owo kwa piyaukire, ngapi nye kuhamena ava va ya kere varwanesi usili? Kukara ukaume novantu vangoso kwa kere siponga ntani va hepere kuvanyokera po, ano yina lifana nanaina.—Yis. 13:20.

9. Morwasinke natu takamesera kononzogera dokuuyunga wopeke momudona nokupangura?

9 Ose kuna kara pepi netameko lyoudigu wounene ntani nouhura wouzuni ou, yipo nye, marondoro aga va pere Vakriste wokuhova kuna kara nomulyo kwetu. Yosili, kapi tuna hara ‘kuhepeka nkenda zaKarunga mawoko-woko’ nokuzumbanesa etumbwidiro lyomwenyo gwanarunye, gu kare asi gwemeguru ndi gwepevhu. (2 Kol. 6:1) Nsene gumwe kepongo a tu zeda tu lihameke mononzogera dokuuyunga momudona wopeke nokuvapangura, twa hepa kutakamesa.—2 Tes. 3:13-15.

‘KORENI MWEYI MWA LIRONGA’

10. Yisinke va va korangedere Vakriste womoTesaronika?

10 Paurusa kwa korangedere vanavazina womoTesaronika va ‘kore’ nokukwaterera kweyi va lirongere. (Resa 2 Vatesaronika 2:15.) Yisinke eyi va lirongere? Yosili, awo kapi va lirongere yimpempa yomaukarelikarunga eyi ya monekere ngwendi kwa tundilira moMatjangwa. Nye Paurusa kwa tembe komarongo aga va gwene kwaJesus ntani naga ga tjenge mwene Paurusa aga ga ya kara ruha roMatjangwa aga za retesa po mpepo. Paurusa kwa pandadekere vanavazina womombungakriste zomoKolinte ngomu ga tjenge asi: “One kudiworoka nge moyininke nayinye,  yiyo omu kara momarongo moomu na ga mu ronga.” (1 Kol. 11:2) Marongo ogo kwa kere gousili ntani gokuhuguvara.

11. Ngapi omu vamwe ayi va kundama yimpempa?

11 Apa ga tjangerere Vahebeli, Paurusa kwa demenene kononkedi mbali omu Mukriste na zumbanesa epuro. (Resa Vahebeli 2:1; 3:12.) Age kwa uyungire ‘kuzaaza nompepo’ ntani ‘kuzumba.’ Ngwendi wato wokupupa, pomuhowo nokuvhura si kuudimburura. Kanunu-kanunu tau tameke kuza ure. Mokulisiga, muntu ogu a sindike wato wendi utunde kezenga, mwene au gusa ko. Nayinye eyi kufanekesa ukaro wa vamwe ava ayi kundama yimpempa, nokupulisira ehuguvaro lyawo mousili li tengure monyima.

12. Yininke musinke naina nayi vhura kumana siruwo setu?

12 Eyi nampo yiyo ya horokerere Vatesaronika vamwe. Ngapi naina? Yininke yokumana siruwo yina vhuka unene. Gazara kuhamena novili dononzi edi atu ruganesa koInterneta nokuresa nombudi koselefoni nokudilimburura nokulitura mo unene momaudano aga twa hara nokupapara nombudi domaudano ogo. Yininke eyi kuvhura kudonganesa Mukriste yipo a zumbanese upampi wendi. Ngoyitundwamo? Kuvhura a hageke kukanderera, kulironga Nonkango daKarunga, kuza komapongo ntani kuzuvhisa mbudi zongwa. Yisinke natu rugana tu dire kulivinduka kulimbilirwa?

EPOPERO MOKUDIRA KULIMBILIRWA

13. Ngomu va yi pumba, nkareso musinke vana kara nazo wovanzi, ntani yisinke ngayi tu vatera tu kare nepuro lyokupama?

13 Sininke simwe esi twa hepa kurugana kuna kara sokudimburura siruwo esi tuna kuparuka ntani udona wokukara novakaume ava va dira kuyitambura asi aga ‘mazuva gopouhura.’ Mupositoli Peturusa kwa tjenge kuhamena siruwo esi asi: “Pomazuva gouhura ngapa horoka vadinikarunga vamwe woukaro ou aga pangere madowo gavene. Ngava mu zora, tava tanta asi: ‘Kwa va tumbwidira asi nga wiza, gupi nye? Gupi po apa? Ozinyakurwetu va fa nare, nye nayinye ha ya kerera moomu ya kere pesito lyouzuni.’” (2 Pet. 3:3, 4) Kuresa Nonkango daKarunga nkenye ezuva ngayi tu vatera tu dimburure siruwo esi tuna kuparuka nokutuninkisa tu vangarare asi aga kuna kara ‘mazuva gopouhura.’ Varwanesi usili ava va pumba va lihorora nare ntani nomomazuva getu. ‘Vantu wovadona’ ngava twikira kukara po nokurwanesa vakareli vaKarunga. Twa hepa kuvangarara unene ngomu ezuva lyaJehova lina kuhedera pepi.—Sef. 1:7.

Eliwapaikiro lyewa nokulihameka mokuzuvhisa kutuvatera tu dire ‘kulivinduka kulimbilirwa’ (Tara paragarafu 14, 15)

14. Ngapi kulitura mo mosirugana sokuzuvhisa ya kara epopero?

14 Ayo ya lihorora asi nkedi zongwa zokukara ono vangarara nokunyokera po kudira kulimbilirwa kuna kara pokulihameka unene mokuzuvhisa mbudi zongwa zoUhompa. Apa Jesus Kristusa, Mutwe gombungakriste, ga pangerere vasikuli vendi va ninke varongwa monomuhoko nadinye nokuvaronga va limburukwe nayinye eyi ga va tanterere, age kwa geve evyukiso eli ngali va popera. (Mat. 28:19, 20) Mokusikisa mo mpangera zendi, twa hepa kukara nouradi mokuzuvhisa. Vanavazinyetu womoTesaronika kapi tupu ya va gwanene po yokuzuvhisa nokuronga. Nye koneka nonkango edi ga va tanterere Paurusa asi: “Walye omu donganesa Mpepo zoKupongoka, walye  omu paya yiuyungisiso yaKarunga.” (1 Tes. 5:19, 20) Ee, mauporofete musi gomawa atu lirongo nokutantera ko wopeke!

15. Yisinke nomu vhura kuzogera moukareli weni wepata?

15 Yosili, tuna hara kuvatera vemepata lyetu va kare nediwo mosirugana sokuzuvhisa. Vanavazinyetu wovanzi kwa dimburura asi nkedi zimwe mokuyisikisa mo oyo kuna kara pokuzogera sirugana sokuzuvhisa moukareli wawo wepata. Kuvhura yi ku vatere pokuzogera omu vemepata nava rugana matengwiropo kwava va likidire elituromo. Yisinke ngava ka uyunga petengwiropo? Yirongwa musinke nayi vhura kupindura elituromo lyowo vana ka dingura? Siruwo musinke sosiwa sokurugana matengwiropo? Wovanzi kuruganesa siruwo sawo simwe soukareli wepata mokuliwapaikira yokomapongo yipo va dive eyi ngayi ka hameka mo. Kuvhura o liwapaike nawa yipo o ka lihameke mo ndi? Elihamekomo lyoge ngali nkondopeka epuro lyoge ntani ngali ku vatera o dire kulimbilirwa. (Epis. 35:18) Yosili, kurugana ukareli wepata ngayi ku vatera o dire kukara nomasinganyeko.

16. Ehuguvaro musinke va kara nalyo Vakriste wovagwavekwa?

16 Apa atu gazadara ko omu Jehova ga tungika vantu vendi monomvhura da ka pita nokuvavatera va kwate egano uporofete woBibeli, ose kukara norupandu komauwa gokomeho. Vagwavekwa va kara nehuguvaro lyokukapangera naKristusa meguru. Ee, etumangedo musi lyononkondo va kara nalyo! Kuvhura tu yi kwatese ko asi nonkango daPaurusa edi ga tjangerere Vatesaronika kwa tamba kwawo. Age kwa tjenge asi: “Nye nyose kupandura Karunga nkenye apa mwarweni, one vakwetetu ava ga hara Hompa. Yeeyi Karunga kwa mu horowera eparu kutunda ketameko. Mpepo ga mu pongwesesa Karunga, mu pure usili.”—2 Tes. 2:13.

17. Makorangedo musinke atu gwana 2 Vatesaronika 3:1-5?

17 Ava va kara nehuguvaro lyomwenyo gwanarunye apa pevhu nawo va hepa kukondja mokudira kulivinduka kulimbilirwa. Nsene wa kara nehuguvaro lyepevhu, limburukwa komakorangedo gaPaurusa aga ga tjangerere vagwavekwa vakwawo womoTesaronika. (Resa 2 Vatesaronika 3:1-5.) Nkenye gumwe gwetu ga hepa kutambura makorangedo ogo. Yosili, nombilive dokoVatesaroninka kugava marondoro gomulyo kuhamena kukara nomasinganyeko ndi nomagano gepuko. Ngomu tuna kuparuka momazuva gopouhura, aga kuna kara marondoro gomulyo kwetu naina.

^ para. 6 Ngomu natu yi resa moYirugana 20:29, 30, Paurusa kwa yi zeresa asi nomonombungakriste namo “ngamu kara vamwe ava ngava uyunga yininke yoyimpempa, asi ngava gwane ko varongwa.” Ngomu sa pitire siruwo malisigo kwa ya monekere monombungakriste. Konyima zonomvhura 200, kwa ya lihorwere asi nombunga dovampitisili womaukarelikarunga goyimpempa yiwo ‘vantu wovadona.’—Tara Ruhungu 1 Murongankuru 1990, epenuno 10-14.