Zende koyikaramo

Zende koyikaramo

Nombangi daJehova

Horowora eraka Rukwangali

Omu natu vatera ava vana hepa ekwafo

Omu natu vatera ava vana hepa ekwafo

FRANÇOIS, mukuronambunga gomosirongo simwe kwa tanta asi: “Posiruwo sehoroworo lyovampitisili wonombunga politika kwa horokere po nyanya zonene ezi za tumangedere Nombangi daJehova mayovi va tjwayuke momambo gawo. Nondya nonomutji kwa sesupire ntani kwa kere ndiro unene. Nombanga kwa pete, ano yimaliwa kwa pwire.”

Vanavazinyetu wokomberewa zomutayi kwa genderere kugava evatero lyoyimaliwa nayimwe koNombangi edi da tjwayukire nokukakara poYinyanga yoUhompa yomosirongo oso. Nonkore kwa konderere vantu nomatuwa mositaura, nye va yi divire asi Nombangi kapi adi lihameke moyita, yipo nye va dilire kusilika matuwa gomberewa zomutayi ga pite mositaura.

François kwa tanta asi: “Monzira zetu zokuza koSinyanga simwe zoUhompa, vakwayita kwa royere komeho zetu. Nye yikutji kwa ya tu pitire pokatji ketu. Apa twa mwene mukwayita kuna kuduka a wize kwetu nouta mokuwoko kwendi yipo twa pirwire usimbu-simbu etuwa nokutengura komberewa. Ose kwa pandwire Jehova kweyi twa kere simpe vazuni. Ezuva lyokukwama ko, vanavazinyetu wokusika 130 ava va vende moSinyanga zoUhompa kwa tundire mo nokuza kevango lyapeke. Vamwe kwa wizire komberewa zomutayi, oku twa ya va pakerere mbili pampepo nopanyama dogoro paapa sa pitire siruwo soudigu.”

François kwa tanta asi: “Mberewa zomutayi konyima kwa gwene nombilive dorupandu dononzi dokutunda kovanavazinyetu. Pokulimonena omu va geve evatero kovanavazinyawo ava va kere moudigu, eyi kwa nkondopekere ehuguvaro lyawo mwaJehova.”

Pokuligwanekera noyimpagwa ndi noukorokotji ou ava retesa po vantu, ose kapi atu tanterere vanavazinyetu asi ‘zendeni nombili mu ka livive, one hena mu ka kute.’ (Jak. 2:15, 16) Nye ose kupapara nompito dokuvapa eyi vana hepa. Mokulifana, momazuva govapositoli, konyima zokugwana erondoro lyokuhamena erumbu, ‘varongwa kwa tokwere asi nkenye ogu a gave yuma paapa ga hulira yi ka kwafe vapuli vakwaawo ava va kere moJudeya.’—Yirug. 11:28-30.

Ngovakareli vaJehova, ose twa kara neharo lyokugava yihepwa yopanyama kwava vana kuhepa. Nye hena, vantu va hepa yihepwa yopampepo. (Mat. 5:3, NW) Mokuvavatera va dimburure asi va hepa yihepwa yopampepo, Jesus kwa pangerere vasikuli vendi va ninke varongwa. (Mat. 28:19, 20) Ose kuruganesa siruwo setu sosinzi nononkondo noyiweka yetu mokusikisa mo sirugana oso. Ngombunga zaJehova, ose kuruganesa yigava yimwe mokugava evatero lyoyihepwa yopanyama, nye yigava unene po kuyiruganesa mokutwara komeho sirugana soUhompa nokuhanesa mbudi zongwa. Monkedi zangoso, ose kulikida eharo kwaKarunga nokovakwetetu.—Mat. 22:37-39.

Ava ava kwatesa ko sirugana souzuni mudima soNombangi daJehova va kara nehuguvaro asi yigava yawo kuyiruganesa monkedi zongwa ntani nositambo souhunga. Kuvhura o vatere vanavazinyetu ava vana hepa ekwafo ndi? Ono hara kukwatesa ko sirugana sokuninka varongwa ndi? Nsene yimo, ‘ruganena vanaruhepo uwa, nsene kuvhura kuyirugana.’—Yis. 3:27.