Zende koyikaramo

Zende koyikaramo

Nombangi daJehova

Horowora eraka Rukwangali

 ESIMWITITI

Kuhuguvara mwaJehova kureta mauwa

Kuhuguvara mwaJehova kureta mauwa

Kapi atu diva eyi nayi horoka meparu. Jehova kutungika tupu owo ava mu huguvara. Eyi yiyo twa limonena name namukadange meparu. Tanko tu simwitire eparu lyetu.

OTATE nonane kwa ligwene 1919 posigongi soyirongo soValirongi woBibeli sa karerere moCedar Point, moOhio moAmerika. Konyima zosiruwo yipo va likwere momvhura zoozo. Ame kwa hampuruka nge 1922, ano mumbyange Paul kwa ya mu hampurukire konyima zonomvhura mbali. Mukadange Grace kwa mu hampuruka 1930. Vakurona vaGrace, Roy naRuth Howell, kwa va rerere ngoValirongi woBibeli, ano ozinakuru nawo kwa kere Valirongi woBibeli ntani vakaume vamunazinyetugara Charles Taze Russell.

Ame kwa ligwene naGrace 1947, ano momazuva 16 Pembankuru 1949 yipo twa likwere. Komeho tu likware, ose kwa zogerere kuhamena meho zetu. Alyo kwa kere etokoro lyetu lyokulihameka mosirugana soUhompa sosiruwo nasinye ntani nokudira kukara novanona. Mezuva 1 Sikukutu 1950, yipo twa tamekere kurugana uzuvhisi wokukarerera. Makura 1952, kwa tu zigidire tu ka kare mosirugana soutareli.

SIRUGANA SOUTARELI NEDEURO LYOKOGILIYATA

Natuvenye kwa lizuvhire asi tuna hepa evatero lyenene mokusikisa mo sirugana setu sosipe. Nampili ngomu na lirongerere ko kovanavazinyetu ava va kura pampepo, na hepere hena evatero lyaGrace. Ame kwa hederere Marvin Holien, kaume ketu ogu ga kara noudivi mosirugana soutareli nokumupura asi: “Grace simpe munona ntani kwato udivi. Kuvhura o mu pe ko gumwe ogu na vhura kurugana nage yipo a gwane ko udivi ndi? Age kwa limbwilire asi “nawa tupu. Edna Winkle, muzuvhisi gokukarerera kuvhura a mu vatere.” Konyima, Grace kwa uyungire kuhamena Edna asi: “Age kwa vaterere nge ni dire kukara nowoma moyirugana yokuzuvhisa, ga divire omu na kohonona po marwaneso monkedi zongwa, ntani ga rongere nge kupurakena nawa kogu tuna kuzuvhisira yipo ni liwapaikire eyi nani uyunga. Age kwa pere nge evatero eli na hepere!”

Kutundilira korumoho: Nathan Knorr naMalcolm Allen naFred Rusk naLyle Reusch naAndrew Wagner

Name naGrace ngatu dingura maruha gavali gonomukunda mosirongo saIowa, kukwatera mo maruha gositata saMinnesota nesi saSouth Dakota.  Makura yipo va tu rundwililire koruha romoNew York, omu mwa hamenene nomukunda daBrooklyn nedi daQueens. Kapi ngatu divara omu twa lizuvhire mosirugana sina. Nomukunda odo kwa hamenene mo mbunga zaBrooklyn Heights, ezi azi pongere moSinyanga soUhompa somoBeteli ntani azo kwa kere novanavazinyetu wovanzi womoBeteli ava va kura pampepo. Apa na mene kugava siuyungwa sange sokuhova semepongo lyoyirugana mombungakriste ozo, munazinyetu Nathan Knorr yipo ga wizire kwange nokutantera nge nonkango edi asi: “Malcolm, ono tu pe mapukururo aga twa hepa kutura pasirugana, ntani ago gokuwapera. Diworoka asi nsene o dira kutupa mapukururo gomawa, ngano mbunga zaJehova kapi na zi kuruganesa unene. Twikira ngorooro kurugana yirugana yoyiwa.” Konyima zepongo, tani yi tantere Grace. Konyima, yipo twa zire monzugo zetu zomoBeteli. Ose kwa kere nosinka, makura tatu lili.

“Nsene o dira kutupa mapukururo gomawa, ngano mbunga zaJehova kapi nga zi kuruganesa unene. Twikira ngorooro kurugana yirugana yoyiwa”

Konyima zomakwedi gongandi, tatu gwana mbilive zokutuzigida kombunga 24 zoSikora zaGiliyata, ezi twa mene mwaMurongankuru 1955. Ose kwa tu divisire komeho zokuza kosikora asi edeuro lyetu kapisi lyokuyakara vatumwa, nye lyokutuvatera tu kare tuna wapere mosirugana soutareli. Kukara mosikora ozo kwa kere sininke sokutetukisa nye twa lirongerere ko elinunupiko.

Keguru: Fern naGeorge Couch name naGrace koSikora zaGiliyata 1954

Apa twa mene sikora ozo, kwa tu tumine mosirugana sokudingura. Sirugana setu sedinguro kwa kwaterere mo sitata saIndiana nesi saMichigan ntani saOhio. Twa hana kuyindindira, mwaSindimba 1955 yipo twa gwene mbilive zokutunda kwamunazinyetu Knorr ezi za tente asi: “Mwa hepa kumanguruka mokupwagesa malizuvho geni, ntani tantereni nge usili weni. Nsene asi muna hara kuwiza koBeteli nokuyakara ko . . . ndi nsene asi muna hara kukara vatumwa konyima zokuyakara karuwogona koBeteli, diviseni nge. Ano nsene muna hara sirugana soutareli nesi sokudingura, diviseni nge hena.” Ose kwa limbwilire asi nkenye sirugana esi nava tu pa natu si tambura. Konyima zokaruwogona, tava tu zigida tu ka lidivise koBeteli!

NOMVHURA DORUHAFO MOBETELI

Nomvhura dange doruhafo mosirugana soBeteli kwa kwaterere mo situmbukira sokuuyunga nokuronga moAmerika nazinye. Ame kwa lihamekere mokudeura nokuvatera vagara wovadinkantu ava va ya gwene yitumbukira yoyinene mombunga zaJehova. Ano konyima na ya kere hamutjanga gwamunazinyetu Knorr momberewa ezi ngazi gendesa sirugana sokuzuvhisa uzuni mudima.

Kuna kurugana moDepartemende zoYirugana yokuzuvhisa 1956

Ame kwa haferere nomvhura edi na rugene moDepartemende zoYirugana yokuzuvhisa.  MoDepartemende ozo na vhulire kurugana kumwe naT. J. (Bud) Sullivan. Age kwa kere mutareli godepartemende ozo nomvhura dononzi. Nye mwa kere vamwe hena oku na lirongerere yoyinzi. Gumwe gwawo kuna kara Fred Rusk, ogu va pere sirugana sokudeura nge. Neharo, ame tani diworoka apa na mu pulire asi: “Fred, morwasinke o tulire malitjindjo gomanzi monombilive dange dimwe? Age kwa zorere, makura ta uyunga asi: “Malcolm, nsene o uyunga yininke kuvhura kuyifaturura, nye pokutjanga unene po nsene tayi wiza oku, ya hepa kuzera nokuzuvhika.” Makura yipo ga uyungire asi: “Kara mukorangedi gomuwa, ove kwa kurugana nawa, mwaza siruwo ngo rugana kupita opo.”

Mwaza nomvhura, Grace kwa gwene yirugana yokulisiga-siga, kukwatera mo kuzeresa nokupakera mbili nonzugo. Age kwa haferere sirugana oso. Dogoro ngesi, apa atu ligwana poyiruwo yimwe novanavazinyetugara vamwe ava va kere vadinkantu moBeteli monomvhura dina, awo kutantera Grace nemenya-menyo asi: “Yosili wa ronga nge omu nani wapeka mbete, ntani tani ku tantere asi onane kugava rupandu kweyi wa rugana.” Grace nga hafere hena kurugana koDepartemende zoYifo nezi zokutjanga nombilive nokuditengwida nezi zokukwateka yikasete. Kurugana yirugana oyo yokulisiga-siga kwa mu vaterere a likide rupandu kwankenye sirugana ndi nkenye eyi mombunga. Age simpe kuna kara nomalizuvho ogo gorupandu.

MARUNDURUKO AGA TWA TULIRE PO

Koyiha yomvhura 1970, yipo twa tamekere kudimburura asi vakurona vetu wokukurupa vana hepa epakerombili lyetu. Makura twa hepere kutura po etokoro lyedigu. Kapi twa here kusiga Beteli novakareli vakwetu ava va ya kere vakaume vetu wovanene. Nye, simpe na lizuvhire asi aso kuna kara situmbukira sange sokupakera mbili vakurona vetu. Mwaza siruwo, yipo twa tundire moBeteli, negano asi nsene ukaro ngau ka runduruka, kuvhura ngatu ka tengure.

Mokugwana yimaliwa yokulireresa nyamwetu, yipo na tamekere kurugana koasuransi. Ame kudiworoka eyi ga tanterere nge mugendesi goasuransi apa ga dewire nge asi: “Ngesefa ezi kwa hamena mo kutoonena vantu ngodi kongurova. Ntani no vhura kugwana vantu. Kwato yimwe hena yomulyo kupitakana yokutoonena vantu ngodi kongurova.” Ame kwa limbwilire asi: “Ove kuna kuuyunga usili ou o ligwanekere nawo, name nani yi rugana. Nye na kara noyitumbukira yopampepo eyi na dira kuncenuna rumwe, ntani kapi nina kugazara kuyincenuna. Ngani toonena vantu ngodi kongurova, nye moUvali nomoUne kongurova, na hepa kuza komapongo gomulyo unene.” Yosili, Jehova ga tungika nge mokudira kudumwa komapongo morwa yirugana.

Apa va fire onane mwaPembankuru 1987, ose kwa kere konyonga zawo. Muhakuli gomukurona kwa wizire kwaGrace nokutanta asi: “Mugolikadi Allen, zende kembo o ka pwizumuke ko. Nkenye  gumwe ana yi diva asi ove kuna karere mo omu morwa ongumweyi zoge. Kara nomagazaro gomawa ntani nokulipakera mbili nyamoge.”

MwaSindimba 1987, yipo twa zwidire foroma zokukarugana hena koBeteli, evango eli twa hara. Nye konyima zomazuva gongandi, Grace kwa mu kwatekere kankera zomomuduku. Konyima zetauro, kwa mu tanterere asi ana veruka. Posiruwo oso yipo twa gwene mbilive zokutunda koBeteli asi tu twikire nosirugana setu mombungakriste zetu. Ose kwa tokomenene kurugana unene mosirugana soUhompa.

Mwaza siruwo, yipo na gwene yirugana modoropa zaTexas. Makura tatu tokora kuza modoropa ozo morwa ose kwa haferere mukarompepo gwamo. Modoropa ozo, ose kwa kara mo konyara nomvhura 25 kumwe novanavazinyetu ava vana ya kara ngesi vakaume vetu wovanene.

EYI TWA LIRONGERA KO

Grace kwa kere nokankera momuduku nopomuliu ano ngesi kuna kara nokankera zekevere. Kapi nga sivana kuhamena maudigu aga ga ligwanekera nago meparu ndi gokuhamena koupangeli wemepata. Age nkenye apa kumupura asi: “Yisinke ayi mu vatere mu kare noruhafo mononkwara deni?” Age kugava nokonda ne: “Ose vakaume wovanene. Ose kuuyungwa kumwe nkenye ezuva. Ose kulitulira po siruwo sokukara kumwe. Ntani kapi atu rara twa hana kukohonona po udigu nsene tuna lihandukire.” Poyiruwo yimwe apa atu kara nomadiro kulizuvha, ose kuligusira po nokuyidivara, ano ayo kutuvatera unene.

“Kuhuguvara mwaJehova nkenye apa nokutambura eyi ga pulisira”

Nampili ngomu twa ligwanekera nomaudigu gomanzi meparu, ose twa lirongera ko yoyinzi:

  1.  Kuhuguvara mwaJehova nkenye apa nokutambura eyi ga pulisira. Nokudira kuhama konondunge danyamwetu.—Yis. 3:5, 6; Jer. 17:7.

  2.  Kukwaterera komavyukiso gomoNonkango daJehova, yi kare asi maudigu musinke. Kulimburukwa kwaJehova nokonoveta dendi mulyo unene. Kwato kuhama kuvali, wa hepa kulimburukwa ndi hawe.—Rom. 6:16; Heb. 4:12.

  3.  Pwa kara sininke somulyo po meparu, kukara nedina lyewa kosipara saJehova. Kutura sirugana sendi muhowo, kapisi kukondjera emona.—Yis. 28:20; Muud. 7:1; Mat. 6:33, 34.

  4.  Kukanderera o kare nomupampi mosirugana saJehova. Kudemenena kweyi no vhura kurugana, kapisi kweyi no dira kuvhura.—Mat. 22:37; 2 Tim. 4:2.

  5.  Kudimburura asi kwato mbunga ezi a tungike Jehova nezi a hafere za hana asi mbunga zendi.—Joh. 6:68.

Name naGrace, nkenye gumwe gwetu kwa karera Jehova konyara nomvhura dokupitakana 75, ano ngovalikwali kwa mu karera konyara nomvhura 65. Yosili ose kwa hafera kukarera Jehova kumwe monomvhura nadinye odo. Tuna si huguvara asi vanavazinyetu navenye kuvhura va limonene mauwa meparu nsene va huguvara mwaJehova.