Zende koyikaramo

Zende koyikaramo

Nombangi daJehova

Horowora eraka Rukwangali

Awo kwa ligeve vene moPhilippines

Awo kwa ligeve vene moPhilippines

KONYARA nomvhura murongo da ka pita, Gregorio naMarilou, valikwali wonomvhura dokoyiha 30 kwa zuvhisira moManila ngovazuvhisi wokukarerera oku kuna kurugana. Ayo kwa va digoperere, nye ya va tompokere. Konyima Marilou tava ya mu zerura a kare mugendesi gombanga omu nga rugana. Age kwa tanta asi: “Yirugana yetu yoyiwa kwa tu pere mpito zokuhafera eparu lyewa.” Awo kwa kere noyimaliwa yipo va tokwere kutungisa embo morukanda roruwa konyara nokilometa 19 koUpumezuva waManila. Awo kwa hundilire kampani zi va tungire nokutura po mawapaiko gokuzifuta monomvhura murongo.

“AME KWA LIZUVHIRE ASI KUNA KUFUKIRA JEHOVA”

Marilou kwa tanta asi: “Yirugana yange yoyipe kwa hepere ko kwange siruwo nononkondo dange nadinye, eyi ya kundamene upampi wange womoyirugana yokuzuvhisa. Ame kwa lizuvhire asi kuna kufukira Jehova.” Age kwa faturura asi: “Ame kapi ngani vhuru kugava kwaJehova siruwo sange ngomu na mu tumbwidilire.” Morwa kudira kuhafera ukaro ou, Gregorio naMarilou kwa hingilire nokuzogera ukaro weparu lyawo. Gregorio kwa tanta asi: “Ose kwa here kutura po malitjindjo nye kapi twa divire omu natu yi rugana. Mokumona asi kapi twa kere novanona,  makura yipo twa zogerere omu natu ruganesa eparu lyetu mosirugana saJehova. Yipo twa hundilire Jehova mavyukiso.”

Posiruwo oso, awo ngava zuvhu yiuyungwa kuhamena kukazuvhisira oku kuna hepa vazuvhisi woUhompa. Gregorio kwa tanta asi: “Ose kwa lizuvhire asi yiuyungwa eyi kwa kere ngelimbururo lyaJehova komakanderero getu.” Valikwali ava kwa kanderere va kare nepuro lyenene yipo va gwane uradi wokutura po matokoro gouhunga. Silimbikiso simwe sosinene kwa kere kuhamena nzugo zawo ezi va tungisire. Apa ngesi awo nare vana futu ko nomvhura ntatu. Yisinke va hepere kurugana? Marilou kwa tanta asi: “Ose kwa lizuvhire asi nsene natu hagekesa etungo olyo, ngano ngatu zumbanesa yimaliwa yoyinzi. Nye ose kwa yi tere asi alyo etokoro lyokutura muhowo mpango zaJehova ndi mauwa getu.” Pokudiworoka nonkango domupositoli Paurusa kuhamena ‘kuyokeka nayinye,’ yipo va hagekesere etungo olyo nokuhageka yirugana yawo nokurandesa sinzi soyiweka yawo, makura tava dirukire komukunda goposirudi saPalawan ogu gwa kara konyara nokilometa 480 koMbindakano saManila.—Fil. 3:8.

AWO KWA ‘LIYIKISA YIKARA NAYINYE’

Komeho zokudiruka, Gregorio naMarilou kwa hetekerere ko kuliwapaikira kurerupika eparu lyawo, nye kapi va divire omu mparukiso zawo zompe nazi ka kara dogoro paapa va ka sikire komukunda gwina. Marilou kwa tanta asi: “Ayo kwa tu tetukisire. Kwato rutjeno, ntani kwato eyi ya tu rerupilire. Mevango lyokutereka kesuga, ose ngatu tjava yitare nokutereka pomundiro. Ame kwa rongwere kuza koyitora nokukarandanga nondya ntani neparu lyomositata.” Simpe, valikwali kwa lidiworokesere vene eyi va dirukilire, ano konyima sosiruwo va tulire po marunduruko. Marilou kwa tanta asi: “Ngesi ame kuna kuhafera uwa wounsitwe, kukwatera mo epaimo lyonombungururu masiku. Unene po, ayo kuhafesa mokumona vantu omu vana hafa apa atu va zuvhisire. Pokuzuvhisira omu, ose kwa ‘liyikisa yikara nayinye’ omu nayi tu gwanena po.”—Fil. 4:12.

Gregorio naMarilou kwa tanta asi: “Ayo kutuhafesa sili mokumona omu wovape vana kuyakara ruha rombungakriste. Ose ngesi kuna kulizuvha asi tuna gwana ruhafo meparu”

Gregorio kwa simwitira asi: “Apa twa ya sikire momukunda ogu, amo kwa kere mo tupu Nombangi ne. Awo kwa hefe unene apa na tamekere kugava siuyungwa sanavenye nkenye sivike nokusika sikitara sange posiruwo sokudimba nonsumo doUhompa. Momvhura zoozo, valikwali kwa ya limonena omu mbungagona zina kuligwederera nokuyakara mbunga zovazuvhisi 24. Gregorio kwa tanta asi: “Eharo eli ava tu likida vanavazinyetu mombungakriste ezi, kutukundama unene.” Nomvhura nadinye ntazimwe edi va zuvhisira momukunda ogo, awo kwa tanta asi: “Ayo kutuhafesa sili mokumona omu wovape vana kuyakara ruha rombungakriste. Ose ngesi kuna kulizuvha asi tuna gwana ruhafo meparu.”

 “AME KWA ‘HETEKA HOMPA NI TARE OMU GA WAPA’!”

MoPhilippines, konyara vanavazinyetu 3 000 kwa dirukira monomukunda edi dina hepa vazuvhisi woUhompa. Mowo vanavazinyetu kwa kara mo vanavazinyetukadi wovadike wokusika konyara 500. Tu tareni sihonena saKaren.

Karen

Karen, ogu ngesi ana kara koyiha yonomvhura 20, kwa kulira modoropa zaBaggao momukunda gwaCagayan. Apa ga kere mudinkantugona, age nkenye apa nga gazara kuhamena kutamununa sirugana sendi sokuzuvhisa. Age kwa simwitira asi: “Pokudiva asi siruwo sina hupu ko sisupi ntani asi vantu navenye vana hepa kuzuvha mbudi zoUhompa, ame kwa kere neharo lyokukazuvhisira oku kuna hepa vazuvhisi.” Nampili ngomu vemepata lyawo va mu korangedere a kondjere erongo lyokuzeruka mevango lyokudirukira komukunda gwapeke a ka zuvhisire ko, Karen kwa hundilire Jehova evyukiso. Age kwa uyungire kumwe nowo ngava zuvhisire konomukunda dokoure. Apa ga kere nonomvhura 18, age kwa dirukilire komukunda gonokilometa konyara 64.

Kambunga aka ga ka vaterere Karen kwa kara momukunda gonondundu pepi nononterefuta daPacific. Karen kwa tanta asi: “Kutundilira modoropa zaBaggao tu ze kombunga zompe, ose kwa gendere po mazuva gatatu nokupita monondundu nokuruta nomukuro yikando yokupitakana 30.” Age kwa gwederera ko asi: “Mokukasika kovarongwa vamwe woBibeli, ame ngani gendi novili ntazimwe nokukarara kembo lyomurongwa, ano ezuva lyokukwama ko tani gendi hena novili ntazimwe ni tengure kembo.” Ngapi ga lizuvhire pokutura po malizambero gangoso? Noruhafo, Karen kwa gwederera ko asi: “Poyiruwo yimwe maguru gange ngaga koro, nye ame ngani rugana malirongo goBibeli 18. Ame kwa ‘heteka HOMPA ni tare omu ga wapa’!”—Epis. 34:8.

“NA LIRONGERE KUHUGUVARA MWAJEHOVA”

Sukhi

Yisinke ya tumangeda Sukhi, munazinyetukadi gomudike gokoyiha yonomvhura 40 ogu ga tungire moAmerika, a dirukire moPhilippines? Momvhura 2011, age kwa kere posigongi somazuva gavali esi va ka puragerere valikwali. Awo kwa simwitilire omu va randesere yiweka yawo nokudirukira koMeksiko va ka vatere mokuzuvhisa. Sukhi kwa tanta asi: “Epuragero lina, kwa ninkisire nge ni tameke kugazara yitambo eyi na dilire kugazara rumwe.” Apa ga dimbwilire asi Vapunjabi womoPhilippines va hepa kuzuvha mbudi zongwa, yipo ga tokwere kuza. Ga ligwanekerere noyilimbikiso ndi?

Sukhi kwa tanta asi: “Mokutokora yininke eyi nani kara nayo neyi nani randesa kwa kere sininke soudigu kwange. Ntani hena konyima zokuparuka eparu lyewa nomvhura 13 membo lyanyamwange, kudiruka ni ka kare nepata eli lya dilire kukara nonzugo zongwa kwa digoperere nge. Nye azo kwa kere nkedi zongwa zokurerupika eparu lyange.” Maudigu  musinke ga ka ligwanekerere nago konyima zokudirukira moPhilippines? Age kwa tanta asi: “Woma nokurongora kembo kwa kere maudigu gange gomanene po. Ame na lirongere kuhuguvara mwaJehova kupitakana pwanare!” Ngapi ga lizuvhire pokutura po malizambero gangoso? Noruhafo, Sukhi kwa tanta asi: “Jehova kwa tu tantera asi ‘hetekeni nge, ngomu mone tani mu tjukumwine yoyinzi yoyiwa yomarudi nagenye.’ Nonkango odo kwa di limonene meparu lyange apa mukadi ogu na zuvhisilire ga pulire nge asi: ‘Siruwoke ngo ka tengwira ko hena? Nina kara nomapuro gomanzi.’ Ayo kuhafesa nge unene mokuvatera vantu ava vana hara kulironga kuhamena Jehova!” (Mara. 3:10) Sukhi kwa gwederera ko asi: “Kutura po etokoro lyokudiruka kwa kere sininke sosidigu unene. Konyima zapa nayi rugene, ayo kwa tetukisire nge mokumona omu Jehova ana ku vatera nge.”

“NA FUNDIRE PO WOMA”

Sime, munazinyetugara gokukwara gokoyiha yonomvhura 30, kwa tundire moPhilippines a ka ruganene mosirongo soVaarabi. Apa ga ka kere mosirongo sina, makorangedo ga gwene komutareli gonombungakriste ntani siuyungwa esi ga geve gumwe gomombungagendesi kwa mu tumangedere a ture Jehova muhowo meparu lyendi. Sime kwa tanta asi: “Nye kugazara kusiga yirugana yange kwa pere nge sinka.” Nye nampili ngoso, age ga sigire yirugana yendi nokutengura koPhilippines. Naina, Sime namukadendi Haidee, kuna kuzuvhisira moDavao del Sur korwaMbindakano zosirongo, oku vana hepa vazuvhisi woUhompa. Sime kwa tanta asi: “Ayo kuhafesa nge kweyi na fundire po woma wokuzumbanesa yirugana yange nokutura Jehova muhowo. Kwato yimwe yokuvhura kureta ruhafo meparu ya hana asi yokukarera Jehova!”

Sime naHaidee

“AYO KUTUHAFESA UNENE!”

Apa Ramilo naJuliet, valikwali wovazuvhisi wokukarerera va dimbwilire asi mbungakriste zoure wonokilometa 30 zina hepa evatero lyovazuvhisi, yipo va lizamberere va ka vatere. Nkenye sivike yi kare asi mukarompepo gomuwa ndi gomudona, Ramilo naJuliet kuza nkenye apa nomoto zawo komapongo nokulihameka moyirugana yokuzuvhisa. Nampili ngomu yitaura eyi ava gendi makombombo ntani nozangata kapi da wapa, awo vana hafa mokutamununa sirugana sawo sokuzuvhisa. Ramilo kwa tanta asi: “Name namukadange kulironga Bibeli novantu 11! Kuzuvhisira oku kuna hepa vazuvhisi kwa kwatera mo malizambero, nye ayo kutuhafesa unene!”—1 Kol. 15:58.

Juliet naRamilo

Ono hara kudiva oku kuna hepa vazuvhisi woUhompa mosirongo seni ndi koyirongo yapeke ndi? Nsene yimo, uyunga nomutareli gonombungakriste, ntani resa sirongwa “Kuvhura o ‘rute moMakedoniya ndi’?” mosimbapira soYirugana yetu yoUhompa somwaSiwogedi 2011.