Zende koyikaramo

Zende koyikaramo

Nombangi daJehova

Horowora eraka Rukwangali

Veta zaJehova azo usili

Veta zaJehova azo usili

‘Veta zaHOMPA zosili, azo kugava nondunge kovantu vangoso- ngoso.’—EPIS. 19:7.

1. Yirongwa musinke vantu vaKarunga ava rugurura kuzogera, ntani ngapi natu gwanena mo uwa?

APA o liwapaikire Elirongo lyoRuhungu, pamwe kulipura asi: ‘Esi sirongwa ngwendi twa si lirongere nare?’ Nsene ove kuza komapongo goNombangi daJehova, nampo wa yi dimburura asi yirongwa yimwe kuyirugurura kuyizogera. Kulironga kuhamena Uhompa waKarunga nosizoweseso nosirugana sokuzuvhisa ntani noyikara yimwe ngwendi eharo nepuro kuna kara ruha ronondya detu dopampepo dankenye apa. Kulironga nkenye apa yirongwa eyi kunkondopeka epuro lyetu nokutuvatera tu ‘kare vasikisimo wononkango, nye kapisi vapurakeni tupu.’—Jak. 1:22.

2. (a) Kosinke za tamba nkango zoRuheveli “madiworokeso”? (b) Ngapi omu noveta daKarunga da lisiga nedi dovantu?

2 Nkangodina zoRuhebeli “madiworokeso” rorunzi kwa zi toroka asi “veta” ano kuvhura kutamba hena konompangera nokoyipango nokomavyukiso aga a gava Karunga kovantu vendi. Noveta daJehova kwa lisiga unene nonoveta dovantu, edi ava rundurura nkenye apa ntani kapi da sikilira mo. Noveta daKarunga kwa sikilira mo, ntani nsene tu di limburukwa ngatu gwanena mo mauwa. Noveta dimwe edi ga geve Karunga nare kovantu vendi, kapi hena tuna kudikwama naina, nye kapi yina kutanta asi noveta odo kwato mulyo. Muepisarome kwa tanta asi: “Mavyukiso goge kwa hungama narunye.”—Epis. 119:144.

3, 4. (a) Yisinke da kwatera mo noveta daJehova poyiruwo yimwe? (b) Ngapi Vaisraeli ngano va gwanene mo uwa?

3 Poyiruwo yimwe noveta daJehova kwa kwatera mo marondoro. Muhoko goVaisraeli ngagu gwana nkenye apa marondoro kupitira movaporofete vaKarunga. Pasihonena, komeho tupu Vaisraeli va hwilire moSirongo sEtumbwidiro, Mosesa kwa va rondwere asi: “Nokulisigilira si nyamweni va mu pukise, asi mu zumbe HOMPA, mu tongamene oku tomu kerere vakarunga peke. Nsene mu yi rugana, HOMPA ngano nga  mu handukira.” (Deut. 11:16, 17) Bibeli kulikida asi Karunga kwa pere vantu vendi nompangera dononzi domulyo.

4 Jehova, yikando yoyinzi nga korangeda Vaisraeli va mu tjire nokupurakena kezwi lyendi ntani nokupongora edina lyendi. (Deut. 4:29-31; 5:28, 29) Ngano kwa limburukwire konompangera odo, awo ngano va gwene matungiko gomanzi.—Lev. 26:3-6; Deut. 28:1-4.

OMU VAISRAELI VA TERE NOMPAGERA DAJEHOVA

5. Morwasinke Karunga ga rwililire po hompa Hisikiya?

5 Mehistoli nalinye lyoVaisraeli, Karunga nga sikisa mo matumbwidiro gendi kwawo. Pasihonena, apa hompa gwaAsiliya Senakelibu ga umbilikidire Juda nokutjilisa hompa Hisikiya, Jehova kwa tumine muengeli a ya vatere vantu vendi. Mesiku limwe tupu, muengeli gwaKarunga kwa zonagwire po vakwayita woVaasiliya, ano eyi kwa ninkisire Senakelibu a tengure kembo nerengwe. (2 Hist. 32:21; 2 Vah. 19:35) Morwasinke Karunga ga rwililire po hompa Hisikiya? Morwa Hisikiya “nga limburukwa mwaHOMPA, kapi nga mu sidopa, nye nga sikisa mo nawa-nawa nompangera.”—2 Vah. 18:1, 5, 6.

Nompangera daJehova kwa tumangedere Josiya a popere ukareli wousili (Tara paragarafu 6)

6. Ngapi omu hompa Josiya ga likidire ehuguvaro mwaJehova?

6 Sihonena simwe sogu ga limburukwire nompangera daJehova kuna kara hompa Josiya. Apa ga kere nonomvhura ntano-nantatu, age “nga rugana yoyiwa momeho gaHOMPA, . . . nga limburukwa konoveta nadinye daKarunga.” (2 Hist. 34:1, 2) Josiya kwa likidire ehuguvaro lyendi mwaJehova pokuzeresa sirongo koyikarunga yoyimpempa nokutengwidira po ukareli wousili. Mokurugana ngoso, Josiya kwa reterere matungiko muhoko nagunye.—Resa 2 Histoli 34:31-33.

7. Yitundwamo musinke ya kere apa Vaisraeli va dilire kuhuguvara monompangera daJehova?

7 Nampili ngoso, vantu vaKarunga kapi va twikilire kulikida ehuguvaro lyawo monompangera daJehova. Awo ngava sidopa Jehova yikando yoyinzi. Apa va dilire kupama mepuro, ‘mpepo zomarongo govantu woyimpempa, kwa va pukisire.’ (Efe. 4:13, 14) Ngwendi moomu ga va rondwere Karunga, apa va dilire kuhuguvara monompangera dendi, awo kwa ya hepere.—Lev. 26:23-25; Jer. 5:23-25.

8. Monkedi musinke ukaro wetu una lifana nou woVaisraeli?

8 Monkedi musinke ukaro wetu una lifana  nou woVaisraeli? Naina, vantu vaKarunga kugwana mapukururo nepisuro, ngwendi Vaisraeli. (2 Pet. 1:12) Ose kulidiworokesa nompangera daKarunga nkenye apa atu resa moBibeli. Jehova kwa tu pa umanguruki wokuhorowora nsene tuna hara kumulimburukwa ndi hawe. (Yis. 14:12) Ngesi tatu ka zogera eyi twa hepera kuhuguvara monompangera daJehova nomu natu gwanena mo uwa pokudikwama.

LIMBURUKWA KARUNGA, NGO PARUKE

9. Apa Vaisraeli va kere momburundu, ngapi omu Jehova ga yi likidire asi kwa va pakerere mbili?

9 Apa Vaisraeli va tamekere rugendo rwawo ronomvhura 40 momburundu “zonene zondigu,” Jehova kapi ga va pere mauzera nagenye omu nga va vyukisa nokuvapopera nokuvapakera mbili. Nye ga yi likidire mononkedi dokulisiga-siga asi ngava gwanena mo uwa nsene ngava mu huguvara nokukwama mavyukiso gendi. Apa Jehova ga pitisilire Vaisraeli nongudi zeremo mutenya nomasiku, age kwa yi likidire asi nga va pakera mbili morungedo rwawo roudigu. (Deut. 1:19; Ex. 40:36-38) Age kwa va pere yihepwa yawo nayinye. ‘Yikoverero yawo kapi ya kurupire, ano nompadi dawo kapi da dundire ndi di kore.’ Yosili, kwa va pere ‘nayinye eyi va hepere.’—Neh. 9:19-21.

10. Ngapi omu Jehova ana kupitisira vantu vendi naina?

10 Vakareli vaKarunga, pepi nouzuni woupe vana kara. Ose twa huguvara asi Jehova nga tu pa eyi twa hepa yipo tu ka paruke “udigu wounene” ndi? (Mat. 24:21, 22; Epis. 119:40, 41) Yosili, Jehova mokutupitisira mouzuni woupe kapi ana kuruganesa ngundi zeremo. Nye kuna kuruganesa mbunga zendi zi tu pe mavyukiso. Pasihonena, ose kutukorangeda nkenye apa mokunkondopeka elikwatakano lyetu naJehova pokuresa Bibeli nokukara noUkareli wEpata nokuza komapongo nomoyirugana yokuzuvhisa. Ose twa tura po mawapukururo meparu lyetu yipo tu kwame mavyukiso ogo ndi? Kurugana ngoso, ngayi tu vatera tu tunge po epuro eli twa hepa yipo tu ka hwilire mouzuni woupe.

Kupurakena konompangera daJehova kutuvatera tu pakere mbili Sinyanga setu soUhompa (Tara paragarafu 11)

11. Mononkedi musinke Karunga a yi likida asi kutupakera mbili?

11 Ntani hena, mbunga zaJehova kutupa mavyukiso aga aga tu vatere tu ture po matokoro gomawa meparu. Eyi kwa kwatera mo kukara nomutaro gomuwa koyihepwa yopanyama nokurerupika eparu yipo tu dire kukara nosinka. Ose kwa gwana hena mavyukiso gokuhamena maliwapaiko nondwareso nehoroworo lyetu lyoyilihafeso nerongo eli twa hepa. Ntani gazara mavyukiso aga atu gwana yipo mambo noYinyanga yoUhompa nomatuwa getu yi kare ya ndjewa-ndjewa nokukara tuna liwapaikire yimpagwa. Mavyukiso gangoso kulikida asi Jehova kutupakera mbili.

MAVYUKISO KWA VATERERE VAKRISTE WOKUHOVA VA LIMBURUKWE

12. (a) Sirongwa musinke Jesus ga rugurukire kutantera varongwa vendi? (b) Sirugana musinke selinunupiko sa kundamene Peturusa, ntani ngapi nose sina kutukundama?

12 Mosiruwo saJesus, vantu vaKarunga ngava gwana nkenye apa mavyukiso. Jesus kwa rugurukire kutantera varongwa vendi kuhamena mulyo gokukara nelinunupiko. Age kwa rugene yoyinzi kupitakana tupu kutantera varongwa vendi eyi ali tanta elinunupiko. Mesiku lyokuhulilira apa pevhu, Jesus kwa lire kumwe Paska novapositoli vendi. Apa va lire vapositoli vendi, age ta katuka po pompanda, makura ta kuhu nompadi dawo, sirugana esi sa fira mukareli. (Joh. 13:1-17)  Eyi ga rugene Jesus kwa kundamene unene vapositoli vendi. Konyima zonomvhura 30, mupositoli Peturusa ogu nage ga kere posilika sina, kwa ya pere vapuli vakwawo mapukururo kuhamena elinunupiko. (1 Pet. 5:5) Ngano sihonena saJesus si tu tumangede tu linunupike monkedi omu atu tekura vakwetetu!—Fil. 2:5-8.

13. Sikara musinke somulyo ga rongere Jesus varongwa vendi?

13 Kukara nepuro lyokupama naso kwa kere sirongwa esi Jesus ga zogerere novarongwa vendi. Apa varongwa ya va vhulire kuverura mumati gompepo zondona, awo kwa pulire Jesus asi: “Ose yinke za tu vhulilire kuzitjida mo?” Jesus kwa va limbwilire asi: “Morwaununu wepuro lyeni. Yeeyi yosili nina kumutantera asi, nsenesi epuro lyeni li hura pombuto zomositareta, . . . one ngano nayimwe si yeeyi ngayi mu tjindira.” (Mat. 17:14-20) Mezuvhiso lyendi, Jesus kwa rongere varongwa vendi asi kukara nepuro mulyo unene. (Resa Mateusa 21:18-22.) Ose kuza koyigongi nayinye nokomapongo yipo tu nkondopeke epuro lyetu ndi? Yilika oyo kapi ayi reta tupu ruhafo, nye ayo kutupa hena mpito zokulikida ehuguvaro lyetu mwaJehova.

14. Morwasinke ya karera nomulyo kutunga po sikara seharo?

14 Matjangwa goRugereka kwa kara mo nompangera dononzi mokutulikida omu natu lihara-hara. Jesus kwa uyungire asi sauvali koyipango yoyinene po yiso esi asi: “Ano a kare mukweni, o mu hare moomu wa lihara nyamoge.” (Mat. 22:39) Mokulifana, mumbyagona gwaJesus, Jakopo, kwa tumbwire eharo ‘ngoveta zoUntungi waKarunga.’ (Jak. 2:8) Ntani mupositoli Johanesa kwa tjenge asi: “Vakwetu ava na hara, kapisi asi sipango sosipe nina kumutjangera, nye sipango sosikuru-kuru oso, seesi mwa zuvha nakwanare.” (1 Joh. 2:7, 8) Yisinke ga tembe Johanesa apa ga tente asi “sipango sosikuru-kuru”? Age kwa tembe kosipango seharo. Sipango esi kwa kere ‘sikuru-kuru’ morwa Jesus kwa si geve ‘nare.’ Ntani hena sipango esi kwa kere ‘sipe’ morwa varongwa va ya hepere kulikida eharo lyosili momaukaro gomape. Naina, ose kuhafa mokugwana marondoro aga naga tu vatera tu dire kukara nonkareso zokuligazara tupu nyamwetu ngwendi vanauzuni, nye tu likide eharo lyosili.

15. Sitambo musinke ga wizilire Jesus pevhu?

15 Jesus kwa likidire eharo kovantu. Age kwa yi likidire eyi pokuverura vaveli nokuvhumbura vafe. Nampili ngoso, oso kapisi yiso sitambo sendi ga wizilire pevhu. Sitambo sendi kwa kere sokuzuvhisa  nokuronga, ano eyi kwa vaterere unene vantu. Monkedi musinke? Pasihonena, navenye ava ga verwire nava ga vhumbwire koufe konyima va ya fire, nye ava va tambwire mbudi ezi ga zuvhisire kwa gwene mpito zokukagwana mwenyo gwanarunye.—Joh. 11:25, 26.

16. Ngapi omu Nombangi dina kulimburukwa mpango zaJesus zokuninka varongwa?

16 Sirugana sokuzuvhisa esi ga tamekere Jesus, kuna kusirugana momunene naina. Jesus kwa pangerere varongwa vendi asi: “Yipo nye nomu zira konomuhoko nadinye, mu ka di ninke di kare varongwa vange”. (Mat. 28:19) Awo kwa rugene sirugana esi, nose ngosikwawo! Konyara Nombangi dokupitakana pomamiliyona ntambali kuna kutantera ko wopeke kuhamena Uhompa waKarunga moyirongo yokupitakana 230, ntani kuna kulironga Bibeli nomamiliyona govantu nkenye apa. Ezuvhiso eli kuna kugava umbangi asi ose kuna kuparuka pomazuva gopouhura.

HUGUVARA MWAJEHOVA

17. Epukururo musinke Paurusa naPeturusa va geve koVakriste wokuhova?

17 Nompangera kwa vaterere Vakriste wokuhova va nkondopeke epuro lyawo. Pasihonena, apa Paurusa ga kere modorongo moRoma, age kwa tanterere Timoteusa asi: “O kwame sihonena sononkango donongwa edi wa zuvha kwange.” (2 Tim. 1:13) Konyima zokukorangeda Vakriste vakwawo va tunge po yikara ngwendi edidimiko neharo lyosiumumbya nomalipangero, mupositoli Peturusa kwa tente asi: “Ngani mu diworokesa nkenye apa nampili ngomu mwa yi diva nanare, yiyo mwa pama mousili.”—2 Pet. 1:5-8, 12.

18. Ngapi omu Vakriste wokuhova va tere mavyukiso?

18 Yosili, eyi Paurusa naPeturusa va tjangerere nombungakriste kwa lifana ‘nononkango edi va uyungire nare-nare vaporofete wokupongoka.’ (2 Pet. 3:2) Vakriste wokuhova va nyokere kutambura mavyukiso ogo ndi? Hawe, morwa alyo kwa kere eharo lyaKarunga kwawo nokuvavatera va ‘kure ngorooro monkenda nomokudiva Hompa Muzowoli gwetu Jesus Kristusa.’—2 Pet. 3:18.

19, 20. Morwasinke twa hepera kuhuguvara monompangera daJehova, ntani ngapi omu natu gwanena mo uwa?

19 Naina tuna kara nonokonda dononzi deyi natu huguvarera momavyukiso gaJehova aga atu gwana moNonkango dendi, Bibeli. (Resa Josuwa 23:14.) Ado kututantera omu Karunga ga ruganenene kumwe novantu wokudira kusikilira mo monomvhura mayovi da ka pita. Eyi kwa yi tjangera asi yi tu ronge. (Rom. 15:4; 1 Kol. 10:11) Ntani ose kuna kumona omu mauporofete goBibeli gana kusikilira mo naina. Mauporofete kwa fana ngwendi marondoro aga ava gava komeho zosiruwo. Pasihonena, mamiliyona govantu kwa ya kara vakareli vaJehova, ngomu va yi pumbire asi eyi ngayi horoka “momazuva aga” gopouhura. (Jes. 2:2, 3) Uzuni ou una kudonapa unene, nawo kuna kusikisa mo uporofete woBibeli. Ntani ngomu tuna yi zogere nare, sirugana sokuzuvhisa mouzuni mudima kuna kusikisa mo nonkango daJesus.—Mat. 24:14.

20 Musiti gwetu ga yi likida moBibeli asi kuvhura tu mu huguvare. Ose twa mu huguvara ndi? Twa hepa kulikida epuro monompangera dendi. Eyi yiyo Rosellen ga rugene. Age kwa tanta asi: “Ngomu na tamekere kuhuguvara unene mwaJehova, yipo na tamekere kumona eharo lyendi lyokunkondopeka nge.” Ngano nose tu gwanene mo uwa pokuhuguvara monompangera daJehova.