Zende koyikaramo

Zende koyikaramo

Nombangi daJehova

Horowora eraka Rukwangali

Uzuvhisi wokukarerera kupameka elikwatakano naKarunga

Uzuvhisi wokukarerera kupameka elikwatakano naKarunga

“Yiwa yokudimba tu hamberere Karunga gwetu.”—EPIS. 147:1.

1, 2. (a) Yitundwamo musinke ngatu gwana pokugazara nokuuyunga kuhamena ogu twa hara? (Tara efano.) (b) Mapuro musinke natu ka konakona?

APA atu gazara nokuuyunga kuhamena ogu twa hara, elikwatakano lyetu nendi kunkondopara. Eyi kwa lifana nelikwatakano lyetu naJehova Karunga. Ngomusita, Ndafita masiku nga tara keguru nokuteda kweyi ga rugana Musiti. Age kwa tjenge asi: “Nsene ni tara eguru, yirugana yomawoko goge, kwedi nonombungururu edi wa wapaikira pomavango gayo – muntu ngano yinke nye, o ka mu gazare, ndi munwamuntu o ka mu dingure?” (Epis. 8:3, 4) Ntani konyima zokugazadara ko omu sitambo saJehova sokuhamena Vaisraeli wopampepo sa sikilira mo monkedi zokutetukisa, mupositoli Paurusa kwa tente asi: “Ee, ugawo waKarunga kounzi! Ukonentu wendi nediwo lyendi unzigona!”—Rom. 11:17-26, 33.

2 Apa atu kara moyirugana yokuzuvhisa, ose kugazara nokuuyunga kuhamena Jehova. Oyo kutukundama monaruwa. Wovanzi ava ava lihameke mosirugana sosiruwo nasinye kwa yi dimburura asi azo kuna kara mpito zokunkondopeka eharo lyawo kwaKarunga. Yi kare asi mosirugana oso wa kara ndi kuna kara nositambo sangoso, gazadara ko kweyi: Ngapi omu sirugana sosiruwo nasinye nasi nkondopeka elikwatakano lyoge naJehova? Nsene ove muzuvhisi gokukarerera, lipura asi: ‘Yisinke nayi vatera nge ni twikire mosirugana esi sosiwa?’ Nsene simpe, lipura asi: ‘Marunduruko musinke nani tura po yipo ni tameke sirugana esi?’ Tu konakoneni nonkedi omu sirugana esi nasi nkondopeka elikwatakano lyetu naKarunga.

 SIRUGANA SOSIRUWO NASINYE NELIKWATAKANO LYETU NAKARUNGA

3. Ngapi nayi tu kundama pokuzogera kuhamena matungiko goUhompa mokuzuvhisa?

3 Kuzogera matungiko gokomeho goUhompa nava wopeke kutuhedesera pepi naJehova. Etjangwa musinke wa hara kuruganesa apa o zuvhisa tunda embo zende embo? Episarome 37:10, 11 ndi Ndaniyera 2:44 ndi Johanesa 5:28, 29 ndi Ehororo 21:3, 4? Nkenye apa atu zogere matumbwidiro ogo nava wopeke, ose kudiworoka asi Karunga gwetu gougavi, kwendi yiko aku tundu “nkenye uhwi wouwa nosigava esi sa sikilira mo.” Eyi kutuhedesera pepi nendi.—Jak. 1:17.

4. Morwasinke aru nkondoparere rupandu rwetu kouwa waKarunga apa atu mono ukaro wava atu zuvhisire?

4 Kudiva ukaro wowo atu zuvhisire kunkondopeka rupandu rwetu kousili. Vantu womouzuni kapi va kara nomavyukiso gokuhuguvara aga naga vhura kuvavatera yi va tompoke ntani va kare noruhafo. Sinzi sawo kukara nosinka kuhamena meho ntani kwato ehuguvaro. Awo kupapara sitambo separu. Nampili ava va kara monongereka nawo kwato ediwo lyoMatjangwa. Awo kuna lifana tupu noVaninivhe vanare. (Resa Jona 4:11.) Apa atu lihameke unene mokuzuvhisa, ose kudimburura malisigo pokatji koukaro wava atu zuvhisire ntani novantu vaJehova. (Jes. 65:13) Ose hena kutudiworokesa uwa waJehova wokutupa yoyinzi, ntani age kuna kuzigida navenye va ya gwane rufuwo nehuguvaro lyosili.—Ehor. 22:17.

5. Ngapi kuvatera wopeke pampepo nayi tu ninkisa tu lizuvhe kuhamena maudigu getu?

5 Kuvatera wopeke pampepo kutupa mpito tu nyokere po kukara nosinka sosinene komaudigu getu. Trisha, muzuvhisi gokukarerera, kwa limonena usili wononkango edi apa vakurona vendi va lizumbire. Age kwa simwitira asi: “Aso kwa kere siruwo soruguwo unene meparu lyange.” Ezuva limwe apa ga guvire unene nokulizuvha asi ta kara membo, nampili ngoso age kwa zire a ka rugane elirongo lyoBibeli novanona vatatu ava va kere noudigu wounene membo. Guhyawo kwa va siga ntani mukurwawo gomugara nga va tekura momudona. Trisha kwa tanta asi: “Awo kwa kere noudigu nokukora kokunene kupitakana udigu wange. Eyi twa lirongere nawo, vanona kwa yi tere noruhafo ntani nokuzoragana. Vanona owo kwa kere ngwendi uhwi ou ga pere nge Jehova, unene po mezuva olyo.”

6, 7. (a) Ngapi epuro lyetu ali nkondopara apa atu rongo mausili goBibeli? (b) Ngapi ayi kundama rupandu rwetu kounongo waKarunga apa varongwa woBibeli ava tura po marunduruko?

6 Kuronga mausili goBibeli kunkondopeka epuro lyetu. Mupositoli Paurusa kwa tjangerere Vajuda vamwe womomazuva gendi ava ngava dili kusikisa mo eyi ngava zuvhisa asi: “Ngapi nye o rongo vantu, wa hana kulironga nyamoge?” (Rom. 2:21) Ee, omu tupu yina lisigi novazuvhisi wokukarerera naina! Awo kwa kara nonompito dononzi dokuronga wopeke usili nokurugana malirongo goBibeli. Mokuvatompoka oyo, va hepa kuliwapaikira nkenye elirongo nokurugana mapaparo mokukalimburura mapuro. Muzuvhisi gokukarerera gedina Janeen, kwa faturura asi: “Nkenye apa ani gwana mpito zokuronga wopeke usili, ayo kunkondopeka mausilli ogo ga kakatere momutjima nomonondunge dange. Ngoyitundwamo, epuro lyange kuna kutwikira kunkondopara.”

7 Apa varongwa woBibeli ava tura po marunduruko pokusikisa mo nompango doBibeli kunkondopeka rupandu rwetu kounongo waKarunga. (Jes. 48:17, 18) Eyi kutuvatera tu kare netokomeno lyokutwikira kusikisa mo nompango odo meparu lyetu. Adrianna, muzuvhisi gokukarerera, kwa tanta asi: “Eparu lyovantu kuyipa apa ava huguvara mounongo wavene. Nye apa ava tameke kuhuguvara mounongo waJehova, awo kugwanena  mo mauwa.” Mokulifana, Phil kwa tanta asi: “Ose kumona omu Jehova ana kuvatera vantu va rundurure eparu lyawo ava ya dilire kutompoka pwavene.”

8. Ngapi kurugana kumwe novakwetetu mokuzuvhisa aku tu kundama?

8 Kurugana kumwe novakwetetu mokuzuvhisa kupameka elikwatakano lyetu naJehova. (Yis. 13:20) Sinzi sovazuvhisi wokukarerera kukara siruwo sosire mokuzuvhisa novazuvhisi vakwaawo. Eyi kugava nompito dononzi ‘dokulikwafa-kwafa.’ (Rom. 1:12; resa Yisewe 27:17.) Muzuvhisi gokukarerera gedina Lisa kwa tanta asi: “Koyirugana, kwa kara ko nkareso zomarumbasano nomfundu. Nkenye ezuva tava ku gamba nokuuyunga nonkango donondona. . . . Poyiruwo yimwe, tava ku swaura nokukuuyungira momudona morwa nkareso zoge zoSikriste. Nye, kurugana yirugana yokuzuvhisa noVakriste vakweni kunkondopeka. Kehagero lyezuva, ame kulizuvha rufuwo, yi kare asi ngapi omu nina roroka.”

9. Ngapi kurugana uzuvhisi wokukarerera nomulikwali goge ayi kundama nonkwara?

9 Kurugana uzuvhisi wokukarerera nomulikwali goge kupameka nonkwara. (Muud. 4:12) Madeline ogu a zuvhisa namugara gwendi kwa faturura asi: “Mokuzuvhisa, name namugara gwange twa kara nosiruwo sokuuyunga ndi kuzogera yininke eyi tuna resa mereso lyetu lyoBibeli eyi natu sikisa mo mosirugana sokuzuvhisa. Kurugana uzuvhisi wokukarerera kumwe kwa kupameka nonkwara detu.” Mokulifana, Trisha kwa tanta asi: “Name namugara gwange kukondja mokudira kukara nomakongo, makura kapi atu litangwisire yimaliwa. Ose kwa kara nelikwamo lyokulifana eli ali tu ninkisa tu liture mo unene movarongwa vetu woBibeli, ano eyi kutuvatera tu nkondopare pampepo.”

Kulihameka unene mosirugana sosiruwo nasinye kureta ruhafo meparu (Tara paragarafu 9)

10. Apa atu tura Uhompa muhowo nokulimonena evatero lyaJehova Karunga, ngapi omu ayi kundama ehuguvaro lyetu mwendi?

 10 Ehuguvaro lyetu mwaJehova kunkondopara ngomu tuna kutura muhowo Uhompa nokulimonena evatero lyendi nomu ana kulimburura makanderero getu. Eyi yiyo ava limonene Vakriste navenye wovalimburukwi. Nye ava va kara mosirugana sosiruwo nasinye va yi dimburura asi kuhuguvara mwaJehova kuvavatera va twikire nosirugana oso. (Resa Mateusa 6:30-34.) Curt, ogu ya tompoka mokukara muzuvhisi gokukarerera nomukwatelimo gomutareli gonombunga, kwa mu hundilire a ka dingure mbungakriste ezi azi gusa ure wonovili mbali mokukasika ko. Nage namukadendi awo vazuvhisi wokukarerera, awo kwa kere tupu nomaholi gokuzisa nye gokukatengwidisa kapi va kere nago, ntani kwa hupire ko sivike komeho a ka tambure yimaliwa. Curt kwa tanta asi: “Ame kwa tamekere kulipura nsene na tulire po etokoro lyewa.” Konyima zokukanderera, awo kwa tokwere kutambura situmbukira oso, nokuhuguvara asi Karunga nga pakera mbili yihepwa yawo. Komeho va katuke, munazinyetukadi gumwe kwa va toonene ngodi nokuvatantera asi ana kara nouhwi wawo. Ayo kwa kere yimaliwa eyi va hepere mokuza nokukatengura. Curt kwa tanta asi: “Nsene to ligwanekere noyihorokwa yangesi, ayo ureru kunongonona evatero lyaJehova.”

11. Matungiko musinke gamwe ava gwana vazuvhisi wokukarerera?

11 Vazuvhisi wokukarerera kwa yi dimburura asi apa ava litura mo unene mosirugana saJehova nokutura po ukaume nendi, awo kugwana “matungiko” gomanzi. (Deut. 28:2) Nampili ngoso, vazuvhisi owo simpe kuligwanekera nomaudigu. Vakareli vaKarunga nawo kuvakundama maudigu aga wa retesa po urwanesi waAdamu. Nampili ngomu vamwe wovazuvhisi owo ava hageke kurugana uzuvhisi wokukarerera poyiruwo yimwe, maudigu kuvhura kugalididimikira ndi kuganyokera po. Yisinke nayi vatera vazuvhisi wokukarerera va hafere sirugana sawo?

TWIKIRA MOSIRUGANA SOSIRUWO NASINYE

12, 13. (a) Yisinke ga hepa kurugana muzuvhisi gokukarerera nsene kapi ana kusikisa mo novili dendi? (b) Morwasinke ya karera nomulyo kukara nelikwamo lyokuresa Bibeli nkenye ezuva nokuzilironga nokuteda ko?

12 Sinzi sovazuvhisi wokukarerera kwa kara nelikwamo lyoyirugana yoyinzi. Ayo kuvhura kudigopa mokuyisikisa mo nayinye, yipo nye, kukara nelikwamo lyewa mulyo. (1 Kol. 14:33, 40) Nsene muzuvhisi gokukarerera kapi ana kusikisa mo novili dendi, ga hepa kulikonakona omu a ruganesa siruwo sendi. (Efe. 5:15, 16) Kuvhura a lipure asi: ‘Siruwo sokuhura kupi nina kuruganesa koyilihafeso ndi koyininke yopanyama? Nina hepa kutura po elipangero ndi? Kuvhura ni rundurure elikwamo lyange lyokoyirugana ndi?’ Nkenye Mukriste kuvhura a yi kwatese ko asi ureru kugwederera ko yininke yapeke kelikwamo lyendi, nye ava va kara mosirugana sosiruwo nasinye va hepa kukonakona elikwamo lyawo nkenye apa.

13 Ruha rwelikwamo romuzuvhisi gokukarerera kuna kara kuresa Bibeli nkenye ezuva nokuzilironga nokuteda ko. Muzuvhisi gokukarerera ga hepa kulipangera yipo yininke yokudira mulyo yi dire kudonganesa siruwo sendi esi ga litulira po koyininke yomulyo. (Fil. 1:10) Pasihonena, gazara asi age kuna kutunda mokuzuvhisa a wize kembo. Age kuna kara nositambo sokuruganesa ngurova ozo mokuliwapaikira yekepongo. Nye pomuhowo, ta resa nombudi dendi. Makura ta paturura kompiuta zendi, ta tameke kuresa nokulimburura nombudi. Ta zi koInterneta a tare nsene ndando zoyininke eyi ana hara kuranda zina gurumuka. Komeho a ka yi dimburure, age ana ruganesa nare novili mbali ga hana simpe kutameka nositambo sendi sokuliwapaikira yekepongo. Morwasinke oyo yina karere udigu wounene? Muduki gomuwa  ga hepa kuyomberesa rutu rwendi mokuninka asi a twikire nosirugana sendi souduki. Mokulifana, vazuvhisi wokukarerera va hepa kukara nelikwamo lyokulironga Bibeli nkenye apa mokulinkondopeka vene pampepo nsene vana hara kutwikira mosirugana sawo.—1 Tim. 4:16.

14, 15. (a) Morwasinke vazuvhisi wokukarerera va hepera kurerupika eparu lyawo? (b) Yisinke ga hepa kurugana muzuvhisi gokukarerera nsene kuna kuligwanekera nomaudigu?

14 Vazuvhisi wokukarerera wovawa kukondja mokurerupika eparu lyawo. Jesus kwa korangedere varongwa vendi va kare nomeho gokukanguka. (Mat. 6:22) Age kwa rerupikire eparu lyendi yipo a sikise mo sirugana sendi sokuzuvhisa ga hana madonganeso. Yiyo ga uyungilire asi: “Vambanze nomakero gawo, yi kare yidira nayo noyikorogo yayo, nye MunwaMuntu kapi ga paka oku na sateka mutwe gwendi.” (Mat. 8:20) Mokulirongera ko kosihonena saJesus, ya wapa komuzuvhisi gokukarerera a diworoke asi nsene a kara noyininke yoyinzi, yimo hena na hepa kuyipakera mbili.

15 Vazuvhisi wokukarerera va yi dimburura asi sirugana esi kapi va si gwanena morwa yirugana yawo yoyiwa, nye morwa nkenda zaKarunga. Yipo nye, mokutwikira ngomuzuvhisi gokukarerera, nkenye gumwe ga hepa kuhuguvara mwaJehova. (Fil. 4:13) Ngava ligwanekera nomaudigu. (Epis. 34:19) Nye nampili ngoso, va hepa kuhundira evatero kwaJehova mevango lyokuhageka sirugana sawo. (Resa Episarome 37:5.) Ngomu vana kulimonena evatero lyaKarunga, awo ngava hedera pepi nendi ngaGuhyawo gemeguru geharo.—Jes. 41:10.

KUVHURA O KARE MUZUVHISI GOKUKARERERA NDI?

16. Yisinke wa hepa kurugana nsene ono hara kurugana uzuvhisi wokukarerera?

16 Nsene ono hara kulimonena matungiko aga vana kuhafera ava va kara mosirugana sosiruwo nasinye, yi tantera Jehova mekanderero. (1 Joh. 5:14, 15) Uyungisa ava va kara mosirugana oso. Litulira po sitambo sokukara mosirugana oso. Oyo yiyo ga rugene Keith naErika. Ngwendi valikwali womapupi gawo, nawo ngava rugana yirugana yopanyama, ano konyima tupu zapa va likwere yipo va rende embo netuwa lyepe. Awo kwa tanta asi: “Ose kwa gazarere asi yininke eyi ngayi tu retera ruhafo, nye kapi twa gwene ruhafo.” Apa Keith ga sigire yirugana, age kwa rugene uzuvhisi wokuvatera. Age kwa tanta asi: “Uzuvhisi owo kwa diworokesere nge ruhafo oru aru tundu mokuzuvhisa.” Awo kwa tulire po ukaume novalikwali wovazuvhisi wokukarerera ava va va vaterere va dimburure ruhafo oru aru tundu mokurerupika eparu nokukara muzuvhisi gokukarerera. Yisinke ga rugene Keith naErika? Awo kwa tanta asi: “Ose kwa tjenge elikwamo lyoyitambo yetu yopampepo, nokulitura poeyisikasi zetu ntani nokutara nkenye sitambo ngomu tuna kusisikisa mo.” Ano konyima, va ya tamekere nouzuvhisi wokukarerera.

17. Morwasinke ya karera nomulyo kutura po marunduruko melikwamo ndi momparukiso zoge yipo o rugane uzuvhisi wokukarerera?

17 Kuvhura o kare muzuvhisi gokukarerera ndi? Nsene kapi yina kukutompoka mokukara muzuvhisi gokukarerera, kondja unene mokupameka elikwatakano lyoge naJehova pokulihameka mo unene mokuzuvhisa. Konyima zokukonakona ukaro woge, kuvhura o dimburure asi wa hepa kutura po marunduruko melikwamo lyoge ndi momparukiso zoge yipo o kare muzuvhisi gokukarerera. Nsene o rugana uzuvhisi wokukarerera, ruhafo oru ngo gwana ngaru pitakana nkenye malizambero aga ngo tura po. Ntani ove ngo limonena ruhafo rorunene oru aru tundu mokutura muhowo Uhompa. (Mat. 6:33) Ngo gwana hena ruhafo oru aru tundu mokugava kwava wopeke. Ntani hena, ngo gwana nompito dononzi dokugazara nokuuyunga kuhamena Jehova, ano eyi ngayi nkondopeka eharo lyoge kwendi nokumuhafesa.