Zende koyikaramo

Zende koyikaramo

Nombangi daJehova

Horowora eraka Rukwangali

“Yilye nani mukareli gokulimburukwa gonondunge?”

“Yilye nani mukareli gokulimburukwa gonondunge?”

“Yilye nani mukareli gokulimburukwa gonondunge, ogu ga tumbire hekurwendi a kare mutunini govantu vendi?”—MAT. 24:45.

1, 2. Nkedi musinke ezi ana kuruganesa Jesus mokutupa nondya naina, ntani morwasinke ya karera nomulyo asi tu zi dive?

“VANAVAZINYETU, ame rorunzi kugwana yirongwa eyi ani hepa posiruwo seesi nina yi hepere.” Yimo ngoso munazinyetu gumwe ga pwagesere rupandu rwendi mombilive ezi ga tjangerere kovanavazinyetu ava ava rugana komberewa zetu zonene. Nove yimo o lizuvhu ngoso ndi? Sinzi setu yimo atu lizuvhu. Oyo kuvhura yi tu tetukise ndi? Hawe.

2 Nondya dopampepo edi atu gwana posiruwo sado kugava umbangi asi Jesus, Mutwe gombungakriste, kuna kusikisa mo etumbwidiro lyendi lyokutupa nondya. Kupitira mwalye ana kuyirugana eyi? Apa ga geve sidiviso sekaropo lyendi, Jesus kwa tente asi nga ruganesa “mukareli gokulimburukwa gonondunge” a pe vantu vendi “nondya posiruwo sado.” * (Resa Mateusa 24:45-47.) Mukareli gokulimburukwa yige ana kuruganesa Jesus mokupa nondya vasikuli vendi wousili posiruwo esi souhura. Ayo ya kara nomulyo asi tu dive mukareli gokulimburukwa. Ekuro lyetu lyopampepo nelikwatakano lyetu naKarunga kwa korera monkedi ezi.—Mat. 4:4; Joh. 17:3.

3. Yisinke yimbapiratjangwa yetu ya uyungire nare kuhamena sifanekeso somukareli gokulimburukwa?

3 Ngapi natu kwata egano sifanekeso saJesus somukareli gokulimburukwa? Pwanare, yimbapiratjangwa yetu kwa uyungire eyi yina kukwama ko: PoPentekoste momvhura 33, Jesus kwa tumbire mukareli gokulimburukwa a kare mutunini govantu vendi. Kutunda pena, mukareli kwa kwaterere mo Vakriste navenye wovagwavekwa pevhu ngombunga. Vantu kwa tembe hena kwankenye mugwavekwa pomundinda gwendi. Momvhura 1919, Jesus kwa tumbire mukareli gokulimburukwa “a kare mukungi gemona lyendi mudima,” kutanta asi yiruganeso yendi nayinye yoUhompa yepevhu. Nye mokuyikonakona momunene nokuteda ko, ayo kwa likida  asi ekwatogano lyetu lyononkango daJesus kuhamena mukareli gokulimburukwa gonondunge lya hepa kuliwapukurura. (Yis. 4:18) Tu konakoneni sifanekeso oso nomu twa hamena mo, yi kare asi twa kara nehuguvaro lyemeguru ndi lyepevhu.

SIRUWOKE SIFANEKESO ESI SA SIKILIRE MO?

4-6. Morwasinke natu vhulira kutanta asi sifanekeso saJesus somukareli gokulimburukwa kwa tamekere kusikilira mo tupu konyima 1914?

4 Yikaramo yosifanekeso somukareli gokulimburukwa gonondunge kulikida asi sa tameka kusikilira mo posiruwo esi souhura, kapisi poPentekoste momvhura 33. Tu tareni omu Matjangwa naga gava elimbururo.

5 Sifanekeso somukareli gokulimburukwa kuna kara ruha rouporofete waJesus kuhamena ‘sidiviso sewizo lyendi nesi souhura wouzuni.’ (Mat. 24:3) Ruha rokuhova rouporofete ou va tjanga mwaMateusa 24:4-22, kwa kara nomasikiliromo gavali, lyokuhova kwa tamekere momvhura 33 yi tware komvhura 70, ano lyauvali mosiruwo setu. Eyi ngoso kutanta asi nonkango daJesus kuhamena mukareli gokulimburukwa nado kwa kara nomasikiliromo gavali ndi? Hawe.

6 Kutameka nononkango domwaMateusa 24:29, Jesus kwa demenenene koyihorokwa eyi ngayi horoka mosiruwo setu. (Resa Mateusa 24:30, 42, 44.) Pokuuyunga kuhamena eyi ngayi horoka poudigu wounene, age kwa tente asi vantu ‘ngava mona MunwaMuntu, age ta wiza pomaremo geguru.’ Mokutamba kowo ngava paruka pomazuva gopouhura, age kwa va korangedere pokutanta asi: ‘Kapi mwa diva asi Hompa gweni ezuvake nga wiza.’ Ntani hena asi ‘MunwaMuntu nga wiza movili zohararasi.’ * Apa Jesus ga uyungire hena kuhamena yihorokwa eyi ngayi horoka pomazuva gopouhura, age kwa simwitilire sifanekeso somukareli gokulimburukwa. Yipo nye, kuvhura tu tante asi nonkango dendi dokuhamena mukareli gokulimburukwa kwa tamekere kusikilira mo tupu konyima zapa ga tamekere mazuva gopouhura 1914. Egano olyo lina zere. Morwasinke?

7. Epuro musinke lyomulyo lya kere ngomu siruwo somuzangu sa tamekere, ntani morwasinke?

7 Ngesi gazadara ko kuhamena epuro: “Yilye nani mukareli gokulimburukwa gonondunge?” Posiruwo sina, kapi ya kere ngano hepero kupura epuro lyangoso. Ngomu twa yi mwene mosirongwa sa ka pita, vapositoli ngava rugana yitetu nokugava uhwi wompepo zokupongoka mokulikida asi eyi kwa tunda kwaKarunga. (Yirug. 5:12) Makura kapi pwa kere hepero zokupura asi yilye ogu Kristusa ga horowere a pitisire. Momvhura 1914, ukaro wa rundurukire unene. Siruwo somuzangu kwa tamekere momvhura ozo. Siruwo sokuhangura mau koyilya sa sikire mo. (Mat. 13:36-43) Ngomu siruwo somuzangu sa tamekere, epuro lyomulyo kwa kere asi: Mokumona asi vanzi ava ava litumbura asi Vakriste, ngapi omu va vhulire kudimburura yilya ndi asi Vakriste wovagwavekwa? Sifanekeso somukareli gokulimburukwa kwa geve elimbururo. Vasikuli wovagwavekwa vaKristusa yiwo ngava gwana nkenye apa nondya dopampepo.

YILYE MUKARELI GOKULIMBURUKWA GONONDUNGE?

8. Morwasinke ya karera asi mukareli gokulimburukwa kuna kara womombunga zoVakriste wovagwavekwa?

8 Mukareli gokulimburukwa kuna kara vamwe womombunga zoVakriste wovagwavekwa apa pevhu. Awo kuvatumbura asi “mbunga zovapristeli zopasiuhompa” ntani kwa va pa sirugana ‘sokuudisa yitetu yendi.’ (1 Pet. 2:9) Yiyo ‘vapristeli wopasiuhompa’ ava lihamekere mosirugana sokuronga vapuli vakwaawo usili.—Mara. 2:7; Ehor. 12:17.

9. Vagwavekwa navenye apa pevhu kwa hamena mombunga zomukareli gokulimburukwa ndi? Faturura.

 9 Vagwavekwa navenye apa pevhu kwa hamena mombunga zomukareli gokulimburukwa ndi? Hawe. Usili kuna kara asi kapisi vagwavekwa navenye kulihameka mokugavera nondya dopampepo kovapuli vakwaawo mouzuni mudima. Moyilya kwa hamena mo vanavazinyetu wovagwavekwa ava vamwe va kara vakwafimbunga ndi vakuronambunga monombungakriste dawo. Awo kuronga tunda embo zende embo nomombungakriste ntani awo kukwatesa ko mavyukiso gokutunda komberewa zonene. Nye awo kapi ava lihameke mokugava nondya dopampepo mouzuni mudima kovanavazinyawo. Ntani hena mokatji kovagwavekwa kwa kara mo vanavazinyetukadi wokulinunupika, ava va dira kukara nositumbukira sokuronga mombungakriste.—1 Kol. 11:3; 14:34.

10. Yilye mukareli gokulimburukwa gonondunge?

10 Yilye mukareli gokulimburukwa gonondunge? Mokuliza nonkedi ezi a ruganesa Jesus mokukutika wovanzi kupitira mwava wovasesu, mukareli ogo kuna kara mbungagona zovanavazinyetu wovagwavekwa ava ava lihameke mokuwapaika nokugava nondya dopampepo posiruwo sekaropo lyaKristusa. Momazuva gopouhura, vanavazinyetu wovagwavekwa ava va hamena mombunga zomukareli gokulimburukwa navenye kwa kara komberewa zonene. Monomvhura edi, mukareli ogo kwa ya mu dimburura asi Mbungagendesi zoNombangi daJehova. Koneka asi nampili ngomu nkango “mukareli” za kara pasimwe nye mosifanekeso saJesus kwa tamba mbunga zomukareli. Yipo nye, Mbungagendesi kutulisa po matokoro kumwe.

WOLYE VANTU VENDI?

11, 12. (a) Yitumbukira musinke yivali ga gwana mukareli gokulimburukwa gonondunge? (b) Siruwo musinke Jesus ga tumbire mukareli gokulimburukwa a takamese vantu vendi, ntani wolye ga horowere?

11 Koneka asi mosifanekeso saJesus, mukareli gokulimburukwa kwa gwana yitumbukira yivali. Sokuhova sokukara mutunini govantu, ano sauvali sokukara mukungi gemona mudima lyahekurwendi. Mokumona asi sifanekeso kuna kusikilira mo tupu mosiruwo esi souhura, yitumbukira nayinye ngano ngava yi mu pa konyima zekaropo lyaJesus moUhompa 1914.

12 Siruwoke Jesus ga tumbire mukareli gokulimburukwa a kare mutunini govantu vendi? Mokugwana elimbururo twa hepa  kukonakona etameko lyosiruwo somuzangu momvhura 1914. Ngomu tuna yi lirongo nare, posiruwo sina nombunga nonzi edi ngadi litumbura asi Vakriste. Mombunga musinke nga horowora Jesus mukareli gokulimburukwa? Epuro olyo kwa li limbwilire konyima zapa Jesus noGuhwe va ya konakonene ntembeli zopampepo ndi ukareli wousili, kutundilira 1914 dogoro ketamekero 1919. * (Mara. 3:1) Awo kwa hefe apa va ya gwene kambunga koValirongi woBibeli wokulimburukwa kuna kukarera Jehova nokukwama Nonkango dendi. Nye va hepere kuvazeresa, ano nelinunupiko va tambwire ezereso olyo. (Mara. 3:2-4) Valirongi owo woBibeli yiwo va kere Vakriste wousili ndi yilya. Momvhura 1919, movanavazinyetu wovagwavekwa, Jesus kwa horowere mo vamwe va kare mukareli gokulimburukwa gonondunge nokumutumba a kare mutunini govantu vendi.

13. Wolye va hamena mo movantu, ntani morwasinke?

13 Wolye vantu? Awo kuna kara owo vana kupa nondya. Ketamekero lyomazuva gopouhura, vantu owo kwa kere tupu vagwavekwa velike. Konyima zosiruwo, vantu owo kwa ya kwaterere mo emukurumbunga lyononzwi dapeke. Nonzwi dapeke nado kwa ya kara ‘mosiunda simwe tupu’ esi sa kara mepitisiro lyaKristusa. (Joh. 10:16) Nombunga edi mbali nadinye kugwana nondya dopampepo dokulifana edi a gava mukareli gokulimburukwa. Ngapi kuhamena womoMbungagendesi ezi za kara asi mukareli gokulimburukwa gonondunge? Vanavazinyetu owo nawo va hepa nondya dopampepo. Yipo nye, awo kulinunupika pokulitara vene asi nawo vantu ngwendi vasikuli navenye wousili vaJesus.

Yi kare asi twa kara nehuguvaro lyemeguru ndi lyepevhu, natuvenye vantu vendi ntani twa hepa nondya dokulifana dopampepo posiruwo sado

14. (a) Situmbukira musinke va pa mukareli gokulimburukwa, ntani yisinke ya hamena mo? (b) Erondoro musinke ga geve Jesus komukareli gokulimburukwa gonondunge? (Tara kakende “Nye nsenesi mukareli ogo mudona . . . ”)

14 Jesus kwa pa situmbukira sosinene mukareli gokulimburukwa gonondunge. Moyiruwo yanare, mukareli ndi erenga lyokuhuguvara, kwa kere mugendesi gembo. (Ruk. 12:42) Mukareli gokulimburukwa gonondunge kuna kara ava va pa situmbukira sokugendesa embo lyopampepo. Situmbukira oso kwa hamena mo kugendesa emona nosirugana sokuzuvhisa nomalikwamo gopoyigongi ntani nokutjanga yimbapiratjangwa yoBibeli yokuruganesa moyirugana yokuzuvhisa nemelirongo lyanyamwetu neli lyombungakriste. Vantu kugwana mawapaiko nagenye gopampepo aga aga tundu kombunga zomukareli.

 SIRUWOKE NGAVA MU TUMBA A KARE MUKUNGI GEMONA MUDIMA LYAHEKURWENDI?

15, 16. Siruwoke Jesus nga tumba mukareli gokulimburukwa a kare mukungi gemona lyendi mudima?

15 Siruwoke Jesus nga gava situmbukira sauvali, ‘sokukunga emona lyendi mudima’? Jesus kwa tente asi: “Mukareli gwangesi erago, nsenesi a ya mu gwana hekurwendi, age ta ruganesa ngesi. Yosili nina kumutantera asi, gwangesi kumutumba, a kare mukungi gemona lyendi mudima.” (Mat. 24:46, 47) Koneka asi Jesus nga gava situmbukira sauvali konyima zapa nga wiza nokuyagwana mukareli ogo kuna ‘kurugana ngesi,’ kutanta asi kuna kugava nondya dopampepo. Eyi kulikida asi ngapa pita siruwo songandi mokugava yitumbukira oyo yivali. Mokukwata egano omu ntani nosiruwo Jesus nga tumba mukareli a kare mukungi gemona lyendi mudima, twa hepa kudiva yininke yivali: siruwo esi nga wiza ntani neyi lina kwatere mo emona lyendi.

16 Siruwoke nga wiza Jesus? Elimbururo kuligwana monovelise edi dina kukwama ko. Diworoka asi apa novelise dokuhova dina kuuyunga asi “nga wiza,” nkango kuna tamba kosiruwo apa nga ya pangura pouhura wouzuni. * (Mat. 24:30, 42, 44) Yipo nye, ‘ewizo’ lyaJesus va tumbura mosifanekeso somukareli gokulimburukwa ngali ka horoka posiruwo soudigu wounene.

17. Yisinke ya kwatera mo emona mudima lyaJesus?

17 Yisinke ya kwatera mo ‘emona mudima’ lyaJesus? Jesus kapi ga uyungire nkango “mudima” mokutamba tupu kemona lyendi lyepevhu. Age kwa tente asi: “Nonkondo nadinye demeguru, nedi depevhu nyame va di pa.” (Mat. 28:18; Efe. 1:20-23) Emona lyendi kwa kwatera mo Uhompa  woUmesiyasa, owo wa hamena kwendi kutundilira 1914 ntani ou nga ka pangera kumwe novasikuli vendi wovagwavekwa.—Ehor. 11:15.

18. Morwasinke Jesus nga hafera mokugava situmbukira sokukunga emona lyendi mudima?

18 Kuliza neyi tuna lirongo, ngapi tuna yi kwata egano? Apa Jesus nga wiza a ya pangure posiruwo soudigu wounene, nga ya gwana mukareli gokulimburukwa age kuna kugava nondya dopampepo kovantu. Jesus makura nga hafa mokugava situmbukira sauvali, sokukunga emona lyendi mudima. Mukareli gokulimburukwa ngava mu pa situmbukira esi apa nga gwana mfeto zendi zemeguru, zokukapangera kumwe naKristusa.

19. Mukareli gokulimburukwa nga gwana mfeto zonene kupitakana vagwavekwa navenye ndi? Faturura.

19 Mukareli gokulimburukwa nga gwana mfeto zonene kupitakana vagwavekwa navenye ndi? Hawe. Mfeto ezi va tumbwidira mbungagona ngava ka zi gwana kumwe novakwaawo. Pasihonena, koneka eyi ga tanterere Jesus vapositoli vendi 11 wovalimburukwi mesiku lina komeho zonomfa dendi. (Resa Rukasa 22:28-30.) Jesus kwa tumbwidilire mbungagona zina zovagara asi ngava ka gwana mfeto morwa ulimburukwi wawo. Ngava ka pangera kumwe nendi. Nye konyima zonomvhura dongandi, age ga yi likidire asi navenye 144 000 ngava ka hingira nendi kosipundi sendi souhompa. (Ehor. 1:1; 3:21) Mokulifana, ngomu va yi tumbura mwaMateusa 24:47, age kwa tumbwidilire asi mbungagona zovagara, vanavazinyetu wovagwavekwa wombunga zomukareli gokulimburukwa, ngava ka va tumba va kare mukungi gemona lyendi mudima. Kapisi velike, nye navenye 144 000 ngava ka gwana mfeto zokulifana.—Ehor. 20:4, 6.

Navenye 144 000 ngava ka pangera naJesus meguru (Tara paragarafu 19)

20. Morwasinke Jesus ga tumbira mukareli gokulimburukwa, ntani yisinke ono tokomene?

20 Kupitira momukareli gokulimburukwa gonondunge, Jesus kuna kukwama nkedi zokulifana nezi ga ruganesere mosiruwo sovapositoli mokukutika wovanzi kupitira mwava wovasesu. Jesus kwa tumba mukareli gokulimburukwa yipo vasikuli vendi wousili, va kare asi wovagwavekwa ndi nonzwi dapeke, va gwane nondya dopampepo posiruwo sado momazuva gopouhura. Tu tokomeneni kulikida rupandu rwetu pokukwatesa ko noulimburukwi vanavazinyetu wovagwavekwa wombunga zomukareli gokulimburukwa gonondunge.—Heb. 13:7, 17.

 

^ para. 2 Paragarafu 2: Jesus kwa simwitilire sifanekeso sokulifana omu ga tumbwire “mukareli” asi “erenga.”—Ruk. 12:42-44.

^ para. 6 Paragarafu 6: Ewizo lyaKristusa (Rugereka, erikomayi) kwa lisiga nekaropo lyendi (parousiya). Ekaropo lyendi lya tameka nare komeho nga wize a ya pangure.

^ para. 12 Paragarafu 12: Tara sirongwa “Tareni, ame neni ngani kara,” mosifo esi pepenuno 10-12, paragarafu 5-8.

^ para. 16 Paragarafu 16: Tara sirongwa “Tu tantera asi, ezuvake ngayi horoka yene eyi?” mosifo esi, pepenuno 7-8, paragarafu 14-18.