Zende koyikaramo

Zende koyikaramo

Nombangi daJehova

Horowora eraka Rukwangali

“Tareni, ame neni ngani kara”

“Tareni, ame neni ngani kara”

“Tareni, ame neni ngani kara dogoro nokouhura wouzuni.”—MAT. 28:20.

1. (a) Simwitira sifanekeso soyilya nomau. (b) Ngapi omu Jesus ga fatwilire etanto lyaso?

SIFANEKESO simwe soyifanekeso yaJesus kusingonona mukuni ogu ga kunine mbuto zongwa zoyilya ano gonkore ta ya kunu mo mau. Mau kwa kulire unene kupitakana yilya, nye mukuni ta tantere vakareli vendi asi “yi sigeni tupu, yi kulire simwe dogoro nokokuteza-teza.” Posiruwo somuzangu, mau ngava ga zonagura ano yilya ngava yi pongaika. Jesus ga fatwilire eyi asi tanta sifanekeso esi. (Resa Mateusa 13:24-30, 37-43.) Yisinke asi horora sifanekeso esi? (Tara kakarata “Yilya nomau.”)

2. (a) Yisinke ayi likida yihorokwa eyi ya horokere mepya lyomukuni? (b) Ruha musinke rosifanekeso natu ka demenena?

2 Yihorokwa eyi ya horokere mepya lyomukuni kulikida asi ngapi ntani siruwoke Jesus nga pongaika vantu wombunga zoyilya, Vakriste wovagwavekwa ava ngava ka pangera kumwe nendi moUhompa wendi. Ekuno kwa tamekere poPentekoste momvhura 33. Epongaiko ngali pwa apa vagwavekwa ava vana kuparuka ngesi pouhura wouzuni ngava va tura sinongweneso sokuhulilira nokuvatwara meguru. (Mat. 24:31; Ehor. 7:1-4) Ngwendi moomu ndungu zondundu azi vatere muntu ogu ana rondo ko a mone eyi ya kara koure, sifanekeso esi naso kutuvatera tu kwate egano yihorokwa eyi yina kuhoroka monomvhura 2 000. Yihorokwa musinke ya likwatakana noUhompa? Sifanekeso kwa tumbura siruwo sokukuna nesi sekuro ntani somuzangu. Mosirongwa esi tatu ka demenena unene po kosiruwo somuzangu. *

MEPAKERO MBILI LYAJESUS

3. (a) Mukaro musinke gwa tamekere konyima zonomvhura 100 konyima zonomfa daJesus? (b) Kuliza naMateusa 13:28, epuro musinke va pulire, ntani wolye va lipulire? (Tara hena mauzera gamwe.)

3 Konyima zonomvhura 100 konyima zonomfa daJesus, ‘mau kwa monekere’ apa Vakriste woyimpempa  va tamekere kumoneka mouzuni. (Mat. 13:26) Konyima zonomvhura 300, Vakriste wokufana gwendi mau kwa vhukire unene kupitakana Vakriste wovagwavekwa. Diworoka asi mosifanekeso, vakareli kwa pulire nturangumbo a va pulisire va dure mo mau. * (Mat. 13:28) Ngapi omu nturangumbo ga limbwilire?

4. (a) Elimbururo lyanturangumbo, Jesus, yisinke ali horora? (b) Siruwoke Vakriste wokufana yilya va ya monekere?

4 Pokuuyunga kuhamena yilya nomau, Jesus kwa tente asi: “Yi sigeni tupu, yi kulire simwe dogoro nokokuteza-teza.” Mpango ezi kulikida asi kutundilira mosiruwo sovapositoli dogoro ngesi kwa kara po nkenye apa Vakriste vamwe wovagwavekwa apa pevhu wokufana yilya. Nonkango odo kwa di pameka kweyi ga tanterere Jesus varongwa vendi asi: “Ame neni ngani kara dogoro nokouhura wouzuni.” (Mat. 28:20) Yipo nye Vakriste wovagwavekwa Jesus nga va popera nkenye apa dogoro kouhura wouzuni. Mokumona asi Vakriste wokufana mau kwa kura unene, kapi tuna diva asi wolye va hamenene kombunga zoyilya monomvhura odo. Konyara nomvhura 30 komeho siruwo sokuteza-teza si tameke, mbunga zoyilya kwa ya monekere. Ngapi ya horokere eyi?

NTUMI KWA ‘WAPEKERE NZIRA’

5. Ngapi omu uporofete waMarakiya wa sikilire mo momazuva gaJesus?

 5 Komeho Jesus a ya gave sifanekeso soyilya nomau, Jehova kupitira momuporofete gwendi Marakiya kwa pumbire yihorokwa eyi ga temwininine Jesus mosifanekeso sendi. (Resa Marakiya 3:1-4.) Johanesa Mukuhwi yige ga kere ‘ntumi ogu ga wapekere nzira.’ (Mat. 11:10, 11) Momvhura 29, siruwo sokupangura muhoko gwaIsraeli kwa hederere pepi. Jesus yige ga kere ntumi zauvali. Age kwa zeresere  ntembeli moJerusarema yikando yivali, sikando sokuhova ketamekero lyosirugana sendi sokuzuvhisa ano sauvali kehagero. (Mat. 21:12, 13; Joh. 2:14-17) Yipo nye, sirugana saJesus sokuzeresa ntembeli kwa hamenene mo siruwo songandi.

6. (a) Siruwoke uporofete waMarakiya wa sikilire mo momunene? (b) Siruwoke Jesus ga ya konakonene ntembeli zopampepo? (Tara hena mauzera gamwe.)

 6 Siruwoke uporofete waMarakiya wa sikilire mo momunene? Monomvhura edi da twaredesere komvhura 1914, C. T. Russell novakwawo kwa rugene sirugana sokufana ngwendi saJohanesa Mukuhwi. Sirugana oso somulyo kwa hamenene mo kuwapukurura mausili goBibeli. Valirongi woBibeli kwa rongere usili wonzambo zaKristusa zosizoweseso, nokutura poruzera erongo lyomundiro gwanarunye ntani nokudivisa ehagero lyosiruwo soVapagani. Nampili ngoso, pwa kere nombunga dononzi donongereka edi ngadi litumbura asi vasikuli vaKristusa. Yipo nye epuro lyomulyo va hepere kulimburura lyeeli asi: Wolye monombunga odo va kere yilya? Mokulimburura epuro olyo, Jesus yipo ga tamekere kukonakona ntembeli zopampepo 1914. Ekonakono olyo nosirugana sokuzeresa ntembeli kwa hamenene mo siruwo songandi, kutundilira 1914 dogoro ketamekero 1919. *

NOMVHURA DOKUKONAKONA NOKUZERESA

7. Apa Jesus ga tamekere ekonakono lyendi 1914, yisinke ga ya gwene?

7 Apa Jesus ga tamekere ekonakono lyendi, yisinke ga ya gwene? Mbungagona zomupampi zoValirongi woBibeli ava va ruganesere nonkondo noyimaliwa yawo mokuhanesa mbudi zongwa monomvhura dokupitakana 30. * Ee, ruhafo musi ga kere naro Jesus novaengeli mokuyagwana asi  mbunga ozo zoyilya kapi za senya komau gaSatana! Nye simpe pwa kere hepero ‘zokukuhura vapristeli,’ vagwavekwa. (Mara. 3:2, 3; 1 Pet. 4:17) Morwasinke?

8. Yihorokwa musinke ya horokere konyima 1914?

8 Kouhura womvhura 1914, Valirongi vamwe woBibeli kwa dompere mutjima morwa kudira kuza meguru posiruwo sina. Momvhura 1915 ntani 1916, marwaneso gokutundilira ponze zombunga zaJehova kwa tengwidisire monyima sirugana sokuzuvhisa. Konyima zonomfa damunazinyetu Russell mwaSikukutu 1916, marwaneso gokutundilira mombunga zaJehova kwa tamekere. Vane wovagendesi woWatch Tower Bible and Tract Society kwa rwanesere etokoro lyamunazinyetu Rutherford lyokupitisira mbunga. Awo kwa hetekererere ko kuretesa po maligaunuko movanavazinyetu, nye mwaSiwogedi 1917 yipo va tundire mo moBeteli. Eli kwa kere ezereso lyenene sili! Ntani hena Valirongi vamwe woBibeli kwa tjilire vantu. Nye ava va kere neharo lyokutambura sirugana saJesus sokuzeresa va tulire po marunduruko aga ga hepere po. Jesus kwa tambwire Vakriste vena wousili ngoyilya, nye ga nyokere Vakriste woyimpempa nonongereka dawo. (Mara. 3:5; 2 Tim. 2:19) Yisinke ya kweme ko? Mokukayidiva, tu tarurureni hena sifanekeso soyilya nomau.

YISINKE YA HOROKERE KONYIMA ZAPA SA TAMEKERE SIRUWO SOMUZANGU?

9, 10. (a) Yisinke natu ka zogera kuhamena siruwo somuzangu? (b) Yisinke ya horokere pomuhowo posiruwo somuzangu?

9 Jesus kwa tente asi: “Muzangu uhura wouzuni.” (Mat. 13:39) Siruwo oso somuzangu kwa tamekere 1914. Tatu ka zogera yihorokwa yitano eyi ga pumbire Jesus posiruwo sina.

10 Sokuhova, kupongaika mau. Jesus kwa tente asi: “Ngani tantera vatezi asi, Hoveni tanko kupongaika mau, mu ga mangaike yitungu.” Konyima zomvhura 1914, vaengeli kwa tamekere “kupongaika” Vakriste wokufana mau pokuvahangura ko kovagwavekwa “ava va hamena Untungi weguru.”—Mat. 13:30, 38, 41.

11. Yisinke ya ninkisa Vakriste wousili va lisige nava woyimpempa nampili momazuva getu?

11 Ngomu sirugana sokupongaika sa twikilire, malisigo pokatji konombunga mbali kwa lilikidire. (Ehor. 18:1, 4) Koyiha 1919, ayo kwa lilikidire nawa-nawa asi Babironi Zonene zina gu. Yisinke ya ninkisire Vakriste wousili va lisige nava woyimpempa? Sirugana sokuzuvhisa. Ava va pitisilire mokatji koValirongi woBibeli kwa tamekere kunkondopeka mulyo gokulihameka mo nkenye gumwe mosirugana sokuzuvhisa Uhompa. Pasihonena, kabuke va pwagesere 1919 kosiparatjangwa To Whom the Work Is Entrusted, kwa korangedere Vakriste navenye wovagwavekwa va zuvhise tunda embo zende embo. Ako kwa tente asi: “Sirugana kumoneka asi sinene, nye aso saHompa, ano mononkondo dendi ose ngatu si sikisa mo. Nove ono kara nositumbukira sokulihameka mo.” Ngapi omu ya va kundamene? Kutundilira mosiruwo sina yi tware komeho, mo-1922 Ruhungu kwa divisire asi Valirongi woBibeli kwa litulire mo unene mosirugana sawo sokuzuvhisa. Kutunda pena, kuzuvhisa tunda embo zende embo kwa ya kara sidimbwiliso soVakriste wovalimburukwi dogoro nomomazuva getu.

12. Kutundilira siruwoke mbunga zoyilya va zi pongaika?

12 Sauvali, kupongaika yilya. Jesus kwa tanterere vaengeli vendi asi: “Yilya nkumwe mu yi tware koutara wange.” (Mat. 13:30) Kutundilira 1919, vagwavekwa kwa va pongaika mokutengwidira po mbungakriste zousili. Nye, Vakriste wovagwavekwa ava ngava kara simpe vazuni pouhura wouzuni, epongaiko lyawo lyokuhulilira ngali horoka apa ngava  gwana mfeto zawo zemeguru.—Ndan. 7:18, 22, 27.

13. Yisinke ali horora Ehororo 18:7 kuhamena nkareso zohondedi ndi zoBabironi Zonene naina, kukwatera mo nongereka?

13 Sautatu, siliro nomalikwetjo. Konyima zapa vaengeli ngava mangaika mau yitungu, yisinke ngayi horoka? Pokuuyunga kuhamena mbunga zomau, Jesus kwa tente asi: “Ngamu kara siliro nomalikwetjo gomazego.” (Mat. 13:42) Eyi kuna kuhoroka ngesi ndi? Hawe. Naina, nongereka ngoruha rohondedi, simpe kuna kulikanganga zene asi: “Ame kuna hingire ngwendi hompa gomukadi! Ame kapisi ni mufisayendi. Ame hena narumwe si asi ngali gwane nge eguwo!” (Ehor. 18:7) Nongereka kulizuvha asi yido dina kupangera, nokulitanga asi ‘kuna hingire ngwendi hompa gomukadi’ keguru lyombunga zovampitisili woupolitika. Ngesi ava va karera po mau kuna kulitanga kapi vana kulira. Nye ntaantani yi ka runduruke.

Ukwawo wonongereka novampitisili woupolitika ntaantani ngau ka hage po (Tara paragarafu 13)

14. (a) Siruwo musinke Vakriste woyimpempa ngava ‘likwetja mazego gawo,’ ntani morwasinke? (b) Ngapi omu ewapukururo lyekwatogano lyetu Mateusa 13:42 lya liza negano lyomEpisarome 112:10? (Tara mauzera gamwe.)

14 Poudigu wounene, konyima zokuzonagura po maukarelikarunga nagenye goyimpempa, vakwatesiko vago ngava duka va ka vande nye kapi ngava gwana uvando. (Ruk. 23:30; Ehor. 6:15-17) Makura apa ngava yi dimburura asi kwato kokuhendukira ezonauko, awo ngava lira ‘nokulikwetja mazego gawo’ morwa ehandu. Ngomu Jesus ga yi pumbire mouporofete wendi wokuhamena udigu wounene, posiruwo sosidigu oso “ngava kara mononkali.” *Mat. 24:30; Ehor. 1:7.

15. Yisinke ngayi horokera mau, ntani siruwoke ngayi horoka oyo?

15 Saune, kuzugumina mEndiro. Yisinke ngayi horokera yitungu yomau? Vaengeli ‘ngava yi zugumina mEndiro.’ (Mat. 13:42) Eyi kutanta asi ezonauko lyanarunye. Vakwatesiko wonombunga doukarelikarunga woyimpempa ngava va zonagura kehagero lyoudigu wounene, poHarumagedoni.—Mara. 4:1.

16, 17. (a) Sihorokwa musinke sokuhulilira ga tumbura Jesus mosifanekeso sendi? (b) Morwasinke natu tantera asi esikiliromo lyosihorokwa oso simpe komeho?

16 Sautano, kupaima. Jesus kwa hulisire uporofete wendi pokutanta asi: “Makura vahungami ngava paime ngwendi ezuva moUntungi waGuhyawo.” (Mat. 13:43) Siruwoke ntani kupi ngayi ka horokera eyi? Nonkango odo simpe ngadi ka sikilira mo komeho. Jesus kapi ga pumbire sirugana esi sina kuhoroka ngesi pevhu, nye sokomeho esi ngasi ka horoka meguru. * Tu konakoneni nokonda mbali.

17 Zokuhova, “siruwoke.” Jesus kwa tente asi: ‘Makura vahungami ngava paima.’  Nkango “makura” kwa tamba konyima zosiruwo ‘sokuzugumina mau mEndiro.’ Eyi ngayi ka horoka moruha rokuhulilira roudigu wounene. Yipo nye ‘epaimo’ lyovagwavekwa nalyo ngali ka horoka mosiruwo sokomeho. Zauvali, “kupi.” Jesus kwa tente asi vahungami ngava ‘paima moUntungi.’ Yisinke yina kutanta eyi? Eyi kutanta asi apa ruha rokuhova roudigu wounene ngaru pita, vagwavekwa navenye wovalimburukwi ava vana kara ngesi simpe pevhu awo nare vana va tura sinongweneso sawo sokuhulilira. Ngomu va yi likida mouporofete waJesus wokuhamena udigu wounene, awo ngava va pongaikira meguru. (Mat. 24:31) Omo awo ngava ka paima “moUntungi waGuhyawo,” ano konyima tupu zoyita yaHarumagedoni, awo ngava ka kara ngomufuko gwaJesus goruhafo ‘mekwareko lyoNzwigona.’—Ehor. 19:6-9.

OMU NATU GWANENA MO UWA

18, 19. Mononkedi musinke natu gwanena mo uwa mokukwata egano sifanekeso saJesus soyilya nomau?

18 Ngapi omu natu gwanena mo uwa mekwatogano lyetu lyosifanekeso esi? Tu tarurureni nonkedi ntatu. Zokuhova, kukulika ediwo lyetu. Sifanekeso kwa horora konda zomulyo zeyi Jehova ga pulisilira udinikarunga. Age kwa ‘lididimikira yipako yemehandu’ yipo a wapaike ‘yipako eyi ga zaverera,’ ndi yilya. * (Rom. 9:22-24) Zauvali, kupameka ehuguvaro lyetu. Ngomu una kuhedera uhura pepi, nonkore detu ngadi handuka unene di tu rwise, ‘nye kapi ngadi tu vhura.’ (Resa Jeremiya 1:19.) Moomu Jehova ga popera mbunga zoyilya monomvhura nadinye edi, yipo nye Guhyetu gemeguru kupitira mwaJesus nomovaengeli nga kara nose dogoro ‘kouhura wouzuni.’Mat. 28:20.

19 Zautatu, sifanekeso kutuvatera tu dimburure mbunga zoyilya. Morwasinke eyi yina karere nomulyo? Pokudiva Vakriste wombunga zoyilya ayo mulyo mokugwana elimbururo kepuro eli ga pulire Jesus mouporofete wendi wokuhamena mazuva gopouhura. Age kwa pulire asi: “Yilye nani mukareli gokulimburukwa gonondunge?” (Mat. 24:45) Yirongwa yivali eyi ngayi kwama ko ngayi ka limburura epuro eli.

 

^ para. 2 Paragarafu 2: Mokulironga yininke yoyipe kuhamena eyi aga tanta maruha gamwe gosifanekeso, kuna kukukorangeda o rese sirongwa “Vahungami ngava paima ngwendi ezuva” moRuhungu 1 Nsinano 2010.

^ para. 3 Paragarafu 3: Mokumona asi vapositoli vaJesus kwa fire, vagwavekwa ava va hupire po kwa fanekesere yilya kapisi vakareli, ano vakareli owo kwa fanekesa vaengeli. Mosifanekeso oso, ava va pongaikire mau kwa va tumbura asi vaengeli.—Mat. 13:39.

^ para. 6 Paragarafu 6: Eli kuna kara ewapukururo lyekwatogano lyetu. Pwanare, ose kwa gazarere asi ekonakono lyaJesus kwa horokere 1918.

^ para. 7 Paragarafu 7: Kutundilira 1910 dogoro 1914, Valirongi woBibeli kwa hanesere nobuke konyara 4 000 000 ano yitratate noyifo yokupitakana 200 000 000.

^ para. 14 Paragarafu 14: Eli kuna kara ewapukururo lyekwatogano lyetu Mateusa 13:42. Pwanare, yimbapiratjangwa yetu kwa tente asi Vakriste woyimpempa kwa tameka nare ‘kulira nokulikwetja mazego gawo,’ nokuguva morwa ‘ava va hamena koUntungi weguru’ kwa tura poruzera ‘ava va hamena koMudona.’ (Mat. 13:38) Konekeni asi egano lyokulikwetja mazego kwa likwatakana nezonauko.—Epis. 112:10.

^ para. 16 Paragarafu 16: Ndaniyera 12:3 kwa tanta asi “vagendesi wonondunge [Vakriste wovagwavekwa] ngava ka paima ngwendi uzera weguru.” Posiruwo esi vana kara simpe pevhu, awo kupaima morwa kulihameka mosirugana sokuzuvhisa. Nye Mateusa 13:43 kulikida kosiruwo esi ngava ka paima moUntungi weguru. Pwanare, ose kwa gazarere asi matjangwa nagenye ogo kwa tembe kosirugana sokulifana, sokuzuvhisa.

^ para. 18 Paragarafu 18: Tara buke Draw Close to Jehovah, pepenuno 288-289.