Zende koyikaramo

Zende koyikaramo

Nombangi daJehova

Horowora eraka Rukwangali

Vakuronambunga, ngomu tendeka ava “vana kara moudigu” ndi?

Vakuronambunga, ngomu tendeka ava “vana kara moudigu” ndi?

Munazinyetukadi gomudike Angela * gonomvhura dokoyiha 30 kuna kara nowoma. Age kuna kundindira vakuronambunga. Yisinke nava ya mu uyungisa? Age kudumwa komapongo gamwe morwa konyima zokurugana ezuva mudima mokuvatera vakurupe age kulizuvha eroroko. Ntani hena ana kara nosinka souvera wozina.

Ngano nyove ono ka mu dingura, ngapi no vhura kukorangeda Angela ogu ‘ana kara moudigu’? (Jer. 31:25) Ngapi omu no vhura kuliwapaikira yipo edinguro lyekorangedo li ka kare lyokutendeka?

GAZADARA KO UKARO WAMUNAZINYETU

Poyiruwo yimwe, natuvenye kuroroka morwa yirugana yopanyama ndi yitumbukira yomombunga. Pasihonena, muporofete Ndaniyera “kwa kere moruhodi rorunene” apa ga gwene emoneko eli ga dilire kukwata egano. (Ndan. 8:27) Yisinke ya mu vaterere? Karunga kwa tumine muengeli Ngabiliyera a ya fatwilire Ndaniyera yininke nokumutantera asi Jehova ga zuvha makanderero gendi, ntani nokuyamutantera hena asi Jehova “kwa ku hara.” (Ndan. 9:21-23) Konyima, muengeli gumwe kwa monekerere Ndaniyera nokumukorangeda nononkango dokulifana.—Ndan. 10:19.

Komeho zokukadingura, gazadara ko kuhamena ukaro wendi

Mokulifana, komeho o ka dingure mupuli mukweni ogu ana roroka ndi ana dompo mutjima, pomuhowo gazadara ko kuhamena ukaro wendi. Maudigu musinke ana kuligwanekera nago? Ngapi maudigu ogo gana kumurorora? Yikara musinke yoyiwa a likida? Richard, ogu ga kara  mukuronambunga nomvhura dokupitakana 20, kwa tanta asi: “Edemeneno lyange kuna kara lyokunkondopeka vanavazinyetu.” Age kwa gwederera ko asi: “Mokugazadara ko maukaro gawo komeho ni ka va dingure, ayo kuvatera nge ni gave makorangedo aga vana hepa.” Nsene nove nomukuronambunga gumwe kuna hara kukandingura gumwe, ngano nayi wapa mouvali weni mu zogere kuhamena ukaro wendi komeho mu ka mu dingure.

NINKA MUNAZINYETU A LIZUVHE EMANGURUKO

Munazinyetu kuvhura a lizuvhe nomuga kuuyunga malizuvho gendi komukuronambunga. Ngapi omu no vatera munazinyetu a lizuvhe emanguruko? Ayo ya wapa mokumenya-menya nokuuyunga nonkango donongwa komeho zokuuyunga eyi ono wizire. Michael, ogu ga kara mukuronambunga nomvhura dokupitakana 40, age nkenye apa kutameka nedinguro lyendi nononkango edi asi: “Situmbukira sosiwa po somukuronambunga kuna kara sokudingura vanavazinyetu momambo gawo nokuvadiva nawa. Yipo nye ame nina hafa mokuyamudingura naina.”

Medinguro lyoge, pomuhowo kuvhura o kanderere kumwe nogu ono ya dingura. Mekanderero lyendi, mupositoli Paurusa kwa tumbwire epuro neharo nelididimikiro lyovanavazina. (1 Tes. 1:2, 3) Pokupwagesa malizuvho goge kuhamena yikara yoyiwa yamunanyoko, ove ngo mu vatera a kare nomutaro gouhunga kedinguro. Ngoyitundwamo, nonkango doge ngadi kara dekorangedo. Ray, mukuronambunga, kwa tanta asi: “Poyiruwo yimwe, natuvenye kudivara yininke yoyiwa eyi atu tompora. Nsene gumwe a yi tu diworokesa, ayo kutendeka nomwenyo detu.”

RUGANESA BIBELI MOKUKORANGEDA

Ngwendi Paurusa, kuvhura o gave ‘uhwi wopampepo’ pokuzogera egano lyemEtjangwa, nampili velise zimwe. (Rom. 1:11) Pasihonena, munazinyetugara ana dompo  mutjima kuvhura a lizuvhe asi age kwato mulyo, ngwendi muepisarome ogu ga lihetakanesere mwene ‘kompunda zomorusi’ zokusuva. (Epis. 119:83, 176) Konyima zokugava efatururo lyonkango ezi neyi ngazi tanta mosiruwo sanare, kuvhura o tantere munanyoko asi ‘kapi ga divara’ nompangera daKarunga.

Ngapi no ruganesa Bibeli o korangede munazinyetukadi ogu ana zumbanesa upampi wendi mosirugana saKarunga? Nampo sifanekeso sokuhamena simaliwa sokuzumbana kuvhura si mu korangede. (Ruk. 15:8-10) Simaliwa sina mulyo ngwendi yimaliwa yikwawo. Pokuzogera sifanekeso esi, kuvhura o vatere munanyoko ogo a dimburure asi nage mulyo mombungakriste. Kuvhura o mu vatere a dimburure asi nage gumwe gononzwi daJehova edi ga hara unene.

Vapuli vakwetetu kuhafera kupwagesa magano gawo kuhamena Matjangwa aga ava resa. Makura ya ha kara asi nyovelike ono kuuyunga siruwo nasinye. Konyima zokuresa velise namunanyoko, kuvhura o horowore nonkango dongandi nokumupura a kumburure ko. Pasihonena, konyima zokuresa 2 Vakolinte 4:16, mukuronambunga kuvhura a pure asi: “Kuvhura o gazadare ko nonkedi omu Jehova ga ninka ‘mwenyo goge gu kare gomupe,’ ndi omu ga ku nkondopeka ndi?” Epuro lyangesi kuvhura kutwaredesa konzogera ezi nazi mu korangeda namuvenye.—Rom. 1:12.

Vapuli vakwetetu kuhafera kupwagesa magano gawo kuhamena Matjangwa aga ava resa

Kuvhura hena kukorangeda munanyoko pokusimwitira gumwe gomoBibeli ogu ga kere noukaro wokulifana. Gumwe ogu ana dompo mutjima kuvhura a lizuvhe ngwendi moomu ga lizuvhire Hana naEpafuraditusa. Poyiruwo yimwe, nawo kwa dompere mutjima nye Jehova simpe ga va tere asi mulyo. (1 Sam. 1:9-11, 20; Fil. 2:25-30) Pwa kara yihonena yoyiwa yoyinzi moBibeli eyi no vhura kuruganesa.

TWIKIRA KULIKIDA ELITUROMO

Konyima zedinguro, twikira kulikida elituromo kogu wa ka dingwire. (Yirug. 15:36) Pasihonena, konyima zokudingura kuvhura o ture po ewapaiko lyokurugana kumwe nendi mokuzuvhisa. Apa mukuronambunga Bernard a ligwana nogu ga ka dingwire, age pamwe kumupura kuhamena evyukiso eli ga mu pere pokutanta asi: “Lya ku vatera ndi?” Pokulikida elituromo lyangoso, ngo diva nsene simpe ana hepa hena evatero lyoge.

Unene po, vanavanziyetu va hepa kulizuvha asi ove kuvapakera mbili, kuvakwata egano, ntani wa va hara. (1 Tes. 5:11) Yipo nye, komeho zokukadingura munanyoko, gazadara ko kuhamena ukaro wendi. Yi tumbura mekanderero. Horowora matjangwa aga no ka ruganesa. Makura ngo gwana nonkango douhunga dokutendeka ava “vana kara moudigu”!

^ para. 2 Madina kwa ga rundumuna.