Zende koyikaramo

Zende koyikaramo

Nombangi daJehova

Horowora eraka Rukwangali

Likida rupandu kougavi nokougomoki waJehova

Likida rupandu kougavi nokougomoki waJehova

“Age kuwapeka nkenye ogu, age kuzaverera nkenye aka ga rugana.”—EPIS. 145:9.

1, 2. Mpito musinke ngava ka gwana vakaume vaJehova?

MUKRISTE gedina Monika kwa tanta asi: “Ose ngesi tuna kara mononkwa konyara nomvhura 35. Name namugara gwange kulizuvha asi twa lidiva nawa. Nye nampili ngoso, konyima zonomvhura nadinye odo, ose simpe kuna kulironga yikara yankenye gumwe gwetu eyi twa dira kudiva!” Yosili, eyi yiyo ayi horoka mononkwara dononzi nomoukaume.

2 Ose kuhafera mokulidiva nawa nava twa hara. Ukaume ou atu tulisa po naJehova mulyo unene kupitana nkenye ukaume. Kapi ngatu diva nayinye yokumuhamena. (Rom. 11:33) Apa ngatu ka paruka narunye ngatu ka gwana mpito zokukalironga yikara yaJehova nokukankondopeka rupandu rwetu kwayo.—Muud. 3:11.

3. Yisinke natu ka konakona mosirongwa esi?

3 Mosirongwa sa ka pita twa lirongere omu natu nkondopeke rupandu rwetu koyikara yaJehova, ureru kumuhedera ntani kudira mpongo. Ngesi tatu ka konakona yikara yimwe yivali yaJehova, ugavi nougomoki. Pokurugana ngoso, tatu ka dimburura momunene asi Jehova ‘kuwapeka ndi muwa kwankenye ogu.’—Epis. 145:9.

JEHOVA UGAVI

4. Yisinke au tanta ugavi?

4 Yisinke au tanta ugavi? Nonkango daJesus domoYirugana 20:35 kutuvatera tu gwane elimbururo, ado kutanta asi: “Kugava kwa kara nerago, kwa pitakana kutambura.” Muntu gougavi kugava siruwo nononkondo noyiweka yendi noruhafo yipo wopeke va gwanene mo uwa. Yosili, ugavi kapi wa korera asi uhwi wokuhura kupi no gava nye kwa korera  kositambo somugavi. (Resa 2 Vakolinte 9:7.) Kwato gumwe ogu ga kara nougavi kupitakana Karunga gwetu goruhafo, Jehova.

5. Mononkedi musinke Jehova a likida ugavi?

5 Ngapi omu Jehova a likida ugavi? Bibeli kutanta asi Jehova ‘kuwapeka nkenye ogu.’ Age kupa vantu navenye yihepwa yawo, kukwatera mo nava ava dili kumukarera. Age “kupumisira ezuva vadona novawa, age hena kurokesera mvhura vahungami novanzoni.” (Mat. 5:45) Eyi yiyo mupositoli Paurusa pokuuyungisa vahapuli ga tente asi Jehova “pokurugana yoyiwa, pokumurokesera mvhura, ta mu pe ewogo nonondya, nomutjima deni di hafe.” (Yirug. 14:17) Yosili, Jehova kugava kovantu navenye.—Ruk. 6:35.

6, 7. (a) Wolye a hafere Jehova kupa evatero? (b) Gava sihonena omu Jehova a gava kovakareli vendi wovalimburukwi.

6 Jehova kuhafa mokugava eyi va hepa vakareli vendi wovalimburukwi. Hompa Ndafita kwa tente asi: “Ntaantani nina kurupa, na kere ni mumati, nye simpe kapi na mona rumwe muhungami asi va mu zumbe, ndi asi vana vendi va hehere nondya.” (Epis. 37:25) Vakriste wovalimburukwi wovanzi kwa limonena ugavi waJehova.

7 Pasihonena, monomvhura dongandi da ka pita, muzuvhisi gosiruwo nasinye gedina Nancy kwa ligwanekerere noudigu. Nancy kwa tanta asi: “Ezuva lyokukwama ko na hepere kufuta yimaliwa yokusika N$570 yonzugo ezi ngani rara. Kapi na divire oku nani gwana yimaliwa oyo. Yipo na kanderere kuhamena udigu owo, makura tani zi koyirugana yange yomorestauranda. Ngurova ozo kapi nayi ndindire asi varandi nava pa nge ko yimaliwa yokupandura nge morwa ezuva olyo kapi lya kere lyoyiviyauka unene. Na hana kuyindindira, varandi wovanzi kwa wizire ngurova ozo morestauranda. Apa na dumbukire tani varura yimaliwa oyo na gwene tayi ka sika N$570.” Nancy kwa yi pulire asi Jehova kwa mu pere eyi ga hepere posiruwo souhunga.—Mat. 6:33.

8. Uhwi musinke womulyo po ga gava Jehova?

8 Uhwi womulyo po ou ga gava Jehova kugava mpito kwankenye ogu. Uhwi musinke owo? Nzambo zaMunwendi zosizoweseso. Jesus kwa tente asi: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” (Joh. 3:16) “Uzuni” apa kwa tamba kovantu navenye. Uhwi womulyo ou ga gava Jehova kwa mangurukira navenye ava ava u tambura. Ava ava likida epuro mwaJesus ngava ka gwana mwenyo gwanarunye. (Joh. 10:10) Umbangi musi wounene ou au likida asi Jehova ugavi!

 HONENA UGAVI WAJEHOVA

Vaisraeli kwa va korangedere va honene ugavi waJehova (Tara paragarafu 9)

9. Ngapi natu honena ugavi waJehova?

 9 Ngapi natu honena ugavi waJehova? Jehova ‘kutupa yininke yoyinzi yokutuhafesa,’ nose tuna hara tu ‘kare nougavi’ kwava wopeke, pokugwederera koruhafo rwawo. (1 Tim. 6:17-19) Ose tuna hafa pokuruganesa yiweka yetu mokugava mauhwi kwava twa hara nokuvatera ava vana hepa ekwafo. (Resa Deuteronomium 15:7.) Yisinke nayi tu vatera tu kare nougavi? Vakriste vamwe kutura pasirugana eyi: Nkenye apa ava gwana uhwi, awo kupapara mpito va pe ko gumwe uhwi. Mbungakriste kwa kara novanavazinyetu wovanzi ava va tunga po nkareso zokugava.

10. Nkedi musinke zimwe zongwa po zokugava?

10 Nkedi zimwe zongwa po zokugava kuna kara pokuruganesa siruwo nononkondo detu tu vatere wopeke nokuvakorangeda. (Gar. 6:10) Mokulikonakona moyuma eyi, twa hepa kulipura asi: ‘Wopeke va dimburura asi ame na kara neharo lyokulizambera nokupurakena koyinka yawo ndi? Nsene gumwe ana pura nge ni mu vatere mosirugana, ame kutambura ehundiro olyo ndi? Siruwoke na hura kupandadeka gemepata ndi mupuli mukwetu?’ Apa atu ‘gava,’ ose kuhedera pepi naJehova ntani novakaume vetu.—Ruk. 6:38; Yis. 19:17.

11. Nonkedi musinke dimwe natu vhura kugava kwaJehova?

 11 Ose kuvhura hena tu gave kwaJehova. Matjangwa kukorangeda asi: “O fumadeke HOMPA pokumupa nzambo zeyi yoyiwa po.” (Yis. 3:9) ‘Nzambo zeyi yoyiwa po,’ kwa kwatera mo siruwo nononkondo noyiweka yetu, eyi natu vhura kuruganesa mosirugana sendi. Nampili vanonagona kuvhura kulironga kugava kwaJehova. Guhya gedina Jason kwa  tanta asi: “Apa epata lyetu ali gava yigava koSinyanga soUhompa, ose kupulisira vana vetu va ture vene yimaliwa mosikesa soyigava. Ngomu vana kutura mo, awo kuyihafera morwa kuna ‘kugava kwaJehova.’” Vanona ava ava limonene ruhafo rokugava kwaJehova kutundilira kounona, nampili moukondi awo kutwikira kugava.—Yis. 22:6.

JEHOVA MUGOMOKI

12. Yisinke au tanta ugomoki?

12 Sikara simwe saJehova sosiwa kuna kara ugomoki. Yisinke au tanta ugomoki? (Tit. 3:1, 2) Muntu gomugomoki ga kara neharo lyokugazadara kuliza noukaro. Age nkenye apa kapi a demenene tupu konoveta. Nye, age kutekura vantu monkedi zongwa ntani kuhetekera ko kukwata egano maukaro gawo. Age ga kara neharo lyokupurakena kovakwawo, ano nsene hepero, age kurundurura magano gendi nokurugana eyi vana hara.

13, 14. (a) Ngapi Jehova a likida ugomoki? (b) Yisinke natu lirongera ko kougomoki waKarunga omu ga ruganenene kumwe naRoto?

13 Ngapi Jehova a likida ugomoki? Age kugazadara ko komalizuvho govakareli vendi ntani age pamwe kutambura mahundiro gawo. Pasihonena, gazara omu Jehova ga ruganene kumwe nomugara gomuhungami Roto. Apa Jehova ga tokwere asi ta zonagura po sitata Sodoma naGomora, age ga geve evyukiso kwaRoto a dukire konondundu. Morwa konda zongandi, Roto kwa likwamberere Jehova a mu pulisire yipo a dukire mokatatagona aka ka kere pepi. Gazara tupu, Roto kwa pulire Jehova a rundurure mavyukiso gendi.—Resa Genesis 19:17-20.

14 Pokuresa esimwititi lyaRoto, kuvhura o gazare asi epuro lyendi kwa sesupire ndi kapi ga limburukwire. Ga yi divire asi Jehova ta mu parura, ngano kapi ya kere hepero kwaRoto a kare nowoma. Nampili ngoso, age ga kere nowoma yipo ga pwagesere malizuvho gendi, ano Jehova ga gazadarere ko kuliza noukaro wendi. Jehova ga pulisilire Roto a dukire mositata esi nkare a zonagure po. (Resa Genesis 19:21, 22.) Yosili, Jehova ga kara neharo lyokugazadara ko kuliza noukaro ntani ga gomoka.

15, 16. Ngapi omu Veta zaMosesa azi likida ugomoki waJehova? (Tara efano pepenuno 12)

15 Gazara sihonena simwe saJehova sougomoki ngomu va yi likidire moVeta zaMosesa. Nsene Muisraeli ruhepo mokugava nzambo zonzwi ndi zosikombo, Jehova nga tambura nampili nomputukuwa mbali ndi nonkutji mbali. Nye ngapi nsene Muisraeli ruhepo unene kapi ta vhuru kugava nonkutji mbali? Monkedi zangesi, Jehova ga pulisilire Vaisraeli woruhepo unene va gave usura woununu. Nampili ngoso, koneka sininke esi somulyo: Awo kapi wa kere tupu nkenye usura, nye ‘usura wokunakuka,’ ou ngava ruganesa kovagenda wokulikarera. (Gen. 18:6) Ngapi sihonena esi asi likida asi Jehova mugomoki?—Resa Levitikus 5:7, 11.

16 Gazara asi ove Muisraeli goruhepo. Ngomu ono kusika posizambera nokausura koge kokanunu kokugava ngonzambo, to dimburura asi Vaisraeli wonongawo kuna kureta yimuna kosizambero. Kuvhura o life nomuga konzambo zoge zonunu zousura. Nye to diworoka asi kosipara saJehova, nzambo zoge mulyo. Morwasinke? Morwa Jehova kwa hepere usura u kare wokunakuka. Ayo kwa kere ngwendi Jehova kwa uyungire koVaisraeli woruhepo asi: ‘Nayi diva asi kapi to mu vhuru kugava yoyinzi ngwendi vakweneni, nye kuvhura mu pe nge yoyiwa po.’ Yosili, Jehova kulikida ugomoki pokugazadara ko maupirankondo  nomaukaro govakareli vendi.—Epis. 103:14.

17. Sirugana musinke a tambura Jehova?

 17 Kuvhura tu gwane ehengagwido pokudiva asi mougomoki wendi, Jehova kutambura sirugana setu somutjima nagunye. (Koros. 3:23) Munazinyetukadi gomukurupe goMuitalia gedina Constance kwa tanta asi: “Kuuyunga nava wopeke kuhamena Musiti gwange kuna kara sininke na hara unene. Eyi yiyo nina kutwikilira kuzuvhisa nokurugana malirongo goBibeli. Poyiruwo yimwe ame kulivera asi kapi ani vhuru kurugana yoyinzi morwa udigu woukanguki wange. Nye na yi diva asi Jehova ga diva upirankondo wange ntani ga hara nge nokuhafera eyi ani vhuru kurugana.”

HONENA UGOMOKI WAJEHOVA

18. Monkedi musinke vakurona nava temwinina sihonena saJehova?

18 Ngapi natu honena ugomoki waJehova? Gazara hena omu Jehova ga ruganene kumwe naRoto. Jehova yige ga kara nononkondo; nye morwa nkenda age ga purakenene ngomu Roto ga pwagesere malizuvho gendi. Ntani Karunga ga tambwire ehundiro lyaRoto. Nsene ove o mukurona, kuvhura o temwinine sihonena saJehova ndi? Kuvhura o purakene komahundiro govana woge, ano nsene hepero, kuvhura o rugane eyi vana hara ndi? Kuhamena egano eli, Ruhungu 1 Sitarara 2007 kwa tumbura asi vakurona vamwe kuzogera kumwe novana vawo nsene kuna kutura po noveta demembo. Pasihonena, vakurona kuvhura va tulise po noveta kuhamena asi siruwo musinke vanona va hepa kuyasika membo ngurova. Nampili ngoso, vakurona woVakriste kuvhura kupurakena komagano govana vawo pokutulisa po siruwo. Poyiruwo yimwe, vakurona kuvhura va ture po marunduruko kuhamena siruwo, sinene tupu kapi yina kulilimba nonompango doBibeli. Vakurona va yi dimburura asi apa ava purakene komagano govana vawo kuhamena noveta demembo, vanona kudikwata egano nokudilimburukwa.

19. Ngapi omu vakuronambunga nava kondjera kuhonena ugomoki waJehova?

19 Vakuronambunga va hepa kukondjera kuhonena ugomoki waJehova pokugazadara ko komaukaro govapuli vakwaawo. Diworoka asi nampili nonzambo dononunu edi va zembe Vaisraeli wovahepwe, Jehova kwa di tere asi mulyo. Mokulifana, novili dononunu edi ava rapota vanavazinyetu wokuvera ndi wokukurupa simpe mulyo kwaJehova. Ngapi nsene vanavazinyetu owo kuna dompo nomutjima morwa maupirankondo gawo? Vakuronambunga kuvhura va va vatere va dimburure asi Jehova ga va hara unene mokumupa eyi ava vhuru kusikisa mo.—Mar. 12:41-44.

20. Kukara nougomoki kutanta asi kudira kulitura mo unene mosirugana saKarunga ndi? Faturura.

20 Nampili ngoso, kukara nougomoki kapi aku tanta asi kudira kulitura mo unene mosirugana saKarunga morwa kulifira nkenda nyamwetu. (Mat. 16:22) Nye kapisi tu litware mo mokudira kurugana unene. Natuvenye twa hepa ‘kukondja’ unene mokukwatesa ko yirugana yoUhompa. (Ruk. 13:24) Yosili, ose kuna kukondja mokukara nougomoki. Ntani ose kuna kukondja unene mosirugana saKarunga, nye twa hepa kudiworoka asi Jehova kapi a tu pura yoyinzi kupitakana eyi natu vhura. Apa atu mu pe yoyiwa po, kuvhura tu kare nehuguvaro asi kumuhafesa. Ose kuhafera kukarera Karunga gorupandu ntani gomugomoki. Mosirongwa sokukwama ko, ngatu ka zogera yikara yivali yaJehova yoyiwa.—Epis. 73:28.

“O fumadeke HOMPA pokumupa nzambo zeyi yoyiwa po.”—Yis. 3:9 (Tara paragarafu 11)

“Nkenye eyi omu rugana, omu yi rugane nomutjima nagunye.”—Koros. 3:23 (Tara paragarafu 17)