Zende koyikaramo

Zende koyikaramo

Nombangi daJehova

Horowora eraka Rukwangali

Mapuro gokutunda kovaresi

Mapuro gokutunda kovaresi

Vaisraeli ngava dipaga vakorokotji pokuvazenzeresa koyitji ndi?

Nomuhoko dononzi mosiruwo sanare ngadi dipaga vakorokotji vamwe pokuvazenzeresa koyitji. Varoma ngava manga ndi ngava pampara muntu gwangoso kositji, oku na kara pamwe mazuva gomanzi dogoro ta fu morwa kukora nenota nonzara. Varoma ngava tara kupampara muntu kositji ngositengekeso sokumufisa nomuga.

Nye ngapi kuhamena muhoko gwanare goVaisraeli? Awo ngava dipaga vakorotji pokuvazenzeresa koyitji ndi? Veta zaMosesa kwa tanta asi: “Nsene muntu ana tura nzo zokumudipagesa, nye kuna mu tulike kositji a zenzerere, simpu sendi sa ha kara ko dogoro mungura. Simpu sendi va si vhumbike ezuva lyoolyo ntani.” (Deut. 21:22, 23) Yosili, mosiruwo sina muntu ogu ngava tokwere nomfa pomuhowo ngava mu dipaga ntani vana kumuzenzeresa kositji.

Kuhamena yuma eyi, Levitikus 20:2 kwa tanta asi: “Nkenye ogu gomumweni ndi gomovanayirongo ava mwa tunga nawo, ogu ana kugava munwendi, a ruganene karunga gwaMoroki, yige kumudipaga nomamanya mbunga zeni nazinye.” Ava ngava ruganene kumwe “nonompepo dovafe” nawo ngava va dipaga. Monkedi musinke? ‘Pokuvadipaga nonomamanya.’—Lev. 20:27.

MwaDeuteronomium 22:23, 24, tatu resa asi: “Ano mugara gomositata nsene a rara nomukadona ogu va vandekera, navenye mouvali wawo va va pwagese mo mositata, makura va va dipage nomamanya. Mukadona ta fire morwakudira kutakuma, apa ka kara mositata, a gwane ekwafo. Ano mugara ta fire morwakurara nomukadona ogu ga vandekera Muisraeli. Ngesi yimo nye nomu yoworoka koudona wangoso.” MoVaisraeli kudipaga muntu nomamanya kwa kere nkedi ezi ngava dipagesa vakorokotji. *

Muntu ogu ngava tokwere nomfa pomuhowo ngava mu dipaga ntani vana kumuzenzeresa kositji

Deuteronomium 21:23 kutanta asi: ‘Kuzenzeresa kositji, kuninka asi efingiliro lyaKarunga.’ Simpu somuntu nsene si moneka kuna kuzenzerera kositji ngava si tara asi ‘efingiliro lyaKarunga.’ Ezenzereso lyangoso kwa kere erondoro kovantu wopeke.

^ para. 6 Valirongi wovanzi kwa yi kwatesa ko asi kuliza noVeta zaMosesa, mukorokotji va hepere kumudipaga ntani vana kuzenzeresa rutu rwendi kositji. Nye pwa kara umbangi asi posiruwo sina, Vajuda ngava zenzeresa koyitji vakorokotji vamwe awo simpe vazuni makura tava fu.