Zende koyikaramo

Zende koyikaramo

Nombangi daJehova

Horowora eraka Rukwangali

 ESIMWITITI

Eyi eparu lyetu lina karere nositambo

Eyi eparu lyetu lina karere nositambo

TUPU na hampurukire munwange gomumati Gary momvhura 1958, yipo na yi dimbwilire asi koyili eyi yina dili kuwapa. Nye kwa gusire makwedi murongo kovadokotora va kwateke uvera wendi ntani kwa pitire po nomvhura ntano komeho vadivi uhaku womoLondon va ka u gwane. Ame kwa guvire unene apa munwange gomukadona Louise ogu na hampurukire konyima zonomvhura ntane dehampuruko lyaGary, ga likidire yidimbwiliso youvera owo kupitakana Gary.

Vandokotora kwa tanterere nge asi: “vana woge navenye vana kara nouvera ava tumbura asi Laurence-Moon-Bardet-Biedl, * wa hepa kuyitambura.” Posiruwo oso, kapi va divire ko yoyinzi kuhamena uvera wendi. Uvera wawo kwa kwaterere mo udigu wokumona ou wa ya twaredesere koutwiku, kuneta unene, yimbandya, kukura kuliwora, kudira kupangera maruha gorutu, uvera wosuka, uvera wokukora-kora yisupa ntani uvera wonongera. Yipo nye, kupakera mbili vana vange kwa kere sininke sosidigu unene. Ekonakono lyantaantani kwa likida asi movantu 125 000 moBritania gumwe kuvhura a hepe kouvera ou.

HOMPA YIGE “SIHORAMENO” SETU

Ame kwa uyungire nomukadi gumwe goNombangi daJehova konyima zapa na kwere, poopo tani dimburura asi awo kuronga usili kuhamena Bibeli. Nye mugara gwange kapi ga yi haferere. Morwa yirugana yendi, nkenye apa ngatu dirauka, kapi ngani vhuru kuponga nombungakriste. Nampili ngoso, ngani twikire kuresa Bibeli nokukanderera kwaJehova. Ayo ya hengagwidire nge mokudiva asi “HOMPA yige sihorameno sava vana kuhepeka, age evango lyeyoworokero mosiruwo soudigu,” ntani age ‘kapi a zumbu ava ava mu papara.’—Epis. 9:9, 10.

Gary kwa kere noudigu wokumona, apa ga kere nonomvhura ntazimwe, kwa mu tumine kosure zovatwiku kohostera koMbindakano zaIngiranda. Age nkenye apa nga toonene nge ngodi mokutantera nge nkenye sinka ga kere naso, kupitira koterefona ame ngani mu vatere a kwate egano nompango doBibeli. Nomvhura dongandi konyima zokuhampuruka Louise ame kwa verere, kwa kwatekere nge uvera wouruvi ntani wokukora moyisupa. Gary kwa ka tengwire kembo age nomvhura dendi 16. Nye udigu wendi womeho kwa didire, momvhura 1975 makura ta ya kara mutwiku. Momvhura 1977 mugara gwange yipo ga tjwayukire a sige nge novana vange.

Apa ga ka tengwire Gary, ga ya tu gwene ose kwa kulihameka unene moyirugana yomombungakriste, ano 1974 yipo na gwene ekuho. Ame kwa lizuvhire ruhafo apa mukuronambunga nga vatere Gary a lididimikire udigu ou ga kere nawo. Nombangi dimwe kwa vaterere nge noyirugana yemembo ano konyima Nombangi odo kwa di kutire epangero mokuvatera nge. Eli kwa kara etungiko lyenene kwange.

Gary kwa twikilire kutura po ezokomeho mousili ano 1982 yipo ga gwene ekuho. Age morwa kwa here uzuvhisi wokuvatera, name yipo na tokwere kumuvatera mosirugana oso nokutwikira kusirugana nomvhura dononzi. Gary kwa hefe apa  konyima mutareli gonombunga ga mu pulire asi: “Morwasinke ono kudilira kukara muzuvhisi gokukarerera?” Olyo yilyo tupu ekorangedo ga hepere Gary, ano 1990 yipo ga kere muzuvhisi gokukarerera.

Gary nonyonga dendi mbali nadinye kwa di pinganesera nedi doyivera, zokuhova kwa zi mu tulire 1999 ano zauvali kwa zi mu tulire 2008, nye uvera waLouise kwa dida unene. Age kwa mu hampuruka mutwiku apa na mwene kahuruzara kountazimwe konompadi dendi yipo na dimbwilire ame nage ga kara nouvera ava tumbura asi Laurence-Moon-Bardet-Biedl. Makonakono kwa likida asi maruha gemezimo ga zonauka. Nomvhura nadinye edi kwa mu rugana matauro gomanene kukwatera mo matauro gatano gonongera dendi. Ngwendi Gary, nage kwa kara nouvera wosuka.

Morwa ga diva udigu ou wa hamena metauro, age kutantera vatauli novanersa asi age kapi a tambura honde ndi uhaku omu mwa hamena maruha gohonde. Morwa eyi, age ga kara nelikwatakano lyewa nowo ava mu pe uhaku.

EPARU LYETU LYA KARA NOSITAMBO

Ose kurugana unene mokukarera Jehova. Ame ngani ruganesa novili dononzi mokuresera Gary naLouise komeho tu ya kare noyiruganeso yokomarutjeno. Ngesi tuna kara nonosidi nonodividi nomakwateko aga atu gwana ko-www.jw.org. Ayo kutuvatera tu hafere elikwamo lyElirongo lyoBibeli poyiruwo yokulisiga-siga nokugava malimbururo komapongo goSikriste.

Ee, ruhafo musi tuna kara naro komausili gomawa goNonkango daJehova!

Gary poyiruwo yimwe kukwata malimbururo momutwe, ano nsene ana kara nosiuyungwa mosikora zoukareli, age kusigava mononkango damwene. Momvhura 1995 yipo ga gwene situmbukira soukwafimbunga ntani age kurugana unene koSinyanga soUhompa, nokutambura vantu mombungakriste nokuvatera koyikwamazwi.

Nombangi nonkwetu nado kuza naGary mokuzuvhisa pokumusindika posipundi sendi sourema. Munazinyetu gumwe kwa vaterere Gary a rugane elirongo lyoBibeli nomuntu ga likidire elituromo. Gary nage kwa korangedere hena munazinyetukadi ogu ga hagekere kuzuvhisa nomvhura 25. Ngesi navenye kuna kuza komapongo.

Ponomvhura ntane, Louise kwa lironga kutunga nongodi kozinakuru wovakadi noku kwagumwe ogu a mu pakere mbili ano kwange kwa lirongera ko kuhonza. Morwa age kuhafera unene sirugana sokuhonza, age kutunga nonsali domaruvara dovakeke nedi dovakurupe. Age hena kurugana yikarata yokutjanga makundo. Yikarata oyo mulyo kwava ava yi gwana. Kutunda kounona wendi, age ga lironga kutopa-topa. Nevatero lyokompiuta zokuyunga, age kuuyunga novakaume kupitira moInterneta. Louise kwa gwene ekuho age nomvhura dendi 17. Posiruwo sehaneso lyokulikarera ose kuhafera kurugana uzuvhisi wokuvatera kumwe. Ngwendi Gary, Louise nage kukwata momutwe matjangwa mokulikida epuro lyendi momatumbwidiro gaKarunga gouzuni woupe omu “vatwiku ngava vhura kumona” ntani “nagumwe si gomosirongo esi twa kara nga sivana asi ‘tani vere.’”—Jes. 33:24; 35:5.

Ee, ruhafo musi tuna kara naro komausili gomawa goNonkango daJehova! Nomutjima detu dina zura rupandu kekwatesoko lyeharo lyombungakriste zetu, morwa pwa hana azo ngano yirugana yetu kapi ayi tu tompoka. Unene po morwa evatero lyaJehova, eparu lyetu lina kara nositambo.

^ para. 5 Edina lyouvera owo kwa tundilira komadina govandokotora vane ava va u gwene. Naina kuutumbura asi Bardet-Biedl syndrome. Kapi wa kara nouhaku.