Zende koyikaramo

Zende koyikaramo

Nombangi daJehova

Horowora eraka Rukwangali

Tu lihengagwide-hengagwideni

Tu lihengagwide-hengagwideni

Ngovantu wokudira kusikilira mo, natuvenye kuvera, ano vamwe kuvera mauvera gomanene. Apa atu ligwanekere nomaudigu gangoso, ngapi natu ga lididimikira?

Eyi ayi tu vatere mokulididimikira kuna kara ehengagwido lyokutunda kekoro nokovakaume ntani kovapuli vakwetetu.

Nonkango donongwa deharo dovakaume kwa fana ngwendi usi, ano ado kuverura nokutupwizumukisa. (Yis. 16:24; 18:24; 25:11) Vakriste wousili kapi tupu ava kondjere kugwana ehengagwido. Awo kulitura mo va ‘hengagwide ava vana kara mwankenye udigu, kehengagwido eli ava hengagwidisa Karunga.’ (2 Kol. 1:4; Ruk. 6:31) Antonio mutareli gonomukunda moMeksiko, ya mu horokerere oyo.

Apa Antonio va mu kwatekere kankera zomohonde, ayo kwa mu pere sinka sosinene. Nampili ngomu ga guvire unene, ga hetekerere ko kupangera malizuvho gendi. Monkedi musinke? Nga diworoka nonsumo doUhompa nokudidimba nokuteda ko. Kukanderera unene nokuresa Bibeli nayo kwa kere ehengagwido lyenene kwendi.

Nampili ngoso, Antonio ga yi dimburura asi evatero lyenene kwa tundililire kovapuli vakwawo. Age kwa tanta asi: “Name namukadange apa twa dompere nomutjima, ngatu hundire mukuronambunga gekoro lyetu a wize nokuyakanderera kumwe nose. Eyi kwa tu hengagwidire nokutupa rufuwo.” Age kwa gwederera ko asi: “Tatu pandura kekwatesoko lyekoro lyetu neli lyovapuli vakwetetu, morwa twa vhulire kufunda po malizuvho gomadona.” Ee, ruhafo musi ga kere naro rokukara novakaume vangoso wovawa veharo!

Evatero limwe hena lyomosiruwo somaudigu kuna kara mpepo zokupongoka. Mupositoli Peturusa kwa tente asi mpepo zokupongoka zaKarunga “uhwi.” (Yirug. 2:38) Eyi ya lihorwere poPentekoste momvhura 33. Nampili ngomu Peturusa ga tembe kovagwavekwa, mpepo zokupongoka kuna kara uhwi wanatuvenye. Uhwi ou kuugwana nkenye apa, yipo nye twikira ngorooro kuhundira mpepo zokupongoka.—Jes. 40:28-31.

LIKIDA ELITUROMO LYENENE KOWO VANA KUHEPA

Mupositoli Paurusa kwa lididimikire maudigu gomanzi dogoro nkare a fe. (2 Kol. 1:8-10) Nampili ngoso, Paurusa kapi ga kere nosinka sosinene kuhamena kufa. Age ga gwene ehengagwido pokudiva asi ga kara nevatero lyaKarunga. Age kwa tjenge asi: ‘Tatu pandura Karunga, GuhyaHompa gwetu Jesus Kristusa. Age Guhya ga zura nkenda, age Karunga ogu a hengagwida nkenye apa. Age yige a tu hengagwida momaudigu getu nagenye.’ (2 Kol. 1:3, 4) Paurusa kapi ga pulisilire maudigu gendi ga mu dompese. Nye maudigu aga ga lididimikilire kwa mu vatererere a hare unene vapuli vakwawo, yipo nye nga hengagwida vakwawo ava va hepere ehengagwido.

Antonio, apa ga verukire kouvera vendi, ga tengwilire hena mosirugana sendi soutareli. Age nkenye apa vapuli vakwawo ngava mu likida elituromo, nye ngesi nage namukadendi kuna kulitura mo mokudingura nokukorangeda wokuvera. Pasihonena, konyima zokukadingura munazinyetu ogu ga lididimikilire uvera wounene, Antonio yipo ga yi dimbwilire asi munazinyetu ogo kapi ga hara kuza komapongo. Antonio kwa faturura asi: “Kapisi asi morwa kapi ga hara Jehova novapuli vakwawo, nye morwa uvera kwa mu pere malizuvho gokumuninkisa a lizuvhe asi age kwato mulyo.”

Monkedi zimwe omu Antonio ga korangedere munazinyetu ogo gokuvera kwa kere pokumupura a kanderere pepongasano. Nampili ngomu ga lizuvhire asi age kwato mulyo, munazinyetu ogo ga kandererere. Antonio kwa tanta asi: “Munazinyetu ogo kwa geve ekanderero lyewa, ano konyima ga lizuvhire mwapeke. Ga lizuvhire asi age mulyo.”

Natuvenye kuligwanekera nomaudigu gongandi. Ngwendi Paurusa, eyi kuvhura yi tu vatere tu hengagwide wopeke ava vana hepa ehengagwido. Yipo nye, tu litureni mo moVakriste vakwetetu ava vana kuhepa nokuhonena Karunga gwetu, Jehova, pokuhengagwida wopeke.