Zende koyikaramo

Zende koyikaramo

Nombangi daJehova

Horowora eraka Rukwangali

Fumadeka edina lyenene Jehova

Fumadeka edina lyenene Jehova

“Ame kuna hara ni ku fumadeke nokuhamberera edina lyoge.”—JES. 25:1.

1, 2. Mokulisiga nonongereka, ngapi Nombangi daJehova adi tara edina lyaKarunga?

NONGEREKA kwa nyokesa kuruganesa edina lyaKarunga. Pasihonena, etwaromo lyoBibeli zoRevised Standard Version kwa tanta asi nongereka “kapi va di pulisira” kutumbura Karunga kedina.

2 Mokulisiga, Nombangi daJehova kuhafera kuvatumbwisa kedina lyaKarunga nokulifumadeka. (Resa Jesaya 25:1; 43:10.) Ntani hena ose kulizuvha mfumwa mokukwata egano eyi ali tanta edina lyaKarunga nokudiva eyi ya karera nomulyo kulipongora. (Mat. 6:9) Mokutuvatera tu dire kudivara mfumwa zokudiva Jehova, tu konakoneni mapuro gatatu gomulyo: Yisinke ayi tanta kudiva edina lyaKarunga? Ngapi omu Jehova ga yi likida asi edina lyendi lya mu fira? Ngapi omu natu genda medina lyaKarunga?

EYI AYI TANTA KUDIVA EDINA LYAKARUNGA

3. Yisinke ayi tanta kudiva edina lyaKarunga?

3 Kudiva edina lyaKarunga kwa hamena mo yoyinzi kupitakana kudiva tupu nkango “Jehova.” Kwa hamena mo kudiva asi Jehova muntu musinke, ngwendi yikara nositambo noyirugana yendi, unene po omu nga ruganene kumwe novakareli vendi. Ngomu Jehova ana kusikisa mo sitambo sendi, kanunu-kanunu age kulihorora asi Karunga musinke. (Yis. 4:18) Jehova kwa horwere edina lyendi kovantu wokuhova; morwa Eva kwa li ruganesere apa ga hampurukire Kaini. (Gen. 4:1) Vakareli vaJehova wovalimburukwi, Nowa naAbirahamu naIsaka naJakopo va divire edina lyaKarunga. Ngomu ga va tungikire nokuvapakera mbili nokuvahorwera sitambo sendi, awo va lirongere asi age Karunga musinke.  Konyima, Karunga ga ya horwere kwaMosesa eyi ali tanta edina lyendi.

Mosesa ga divire eyi ali tanta edina lyaKarunga ntani ya nkondopekere epuro lyendi

4. Morwasinke Mosesa ga pulilire Karunga edina lyendi, ntani morwasinke ga harerere kuhuguvaresa Vaisraeli asi Karunga nga va zowora?

4 Resa Exodus 3:10-15. Apa ga kere Mosesa nonomvhura 80, Karunga kwa geve mpangera kwendi asi: “Ka guse mo mbunga zange zaIsraeli moEgipite.” Makura Mosesa yipo ga pulire Karunga epuro eli lyomulyo asi: ‘Nsene nava ka pura nge asi edina lyendi yige yilye, ame omu nani ka va limburura ngapi?’ Mokumona asi vantu vaKarunga va divire edina lyaKarunga, morwasinke Mosesa ga pulilire epuro olyo? Mosesa ga here kudiva ko yoyinzi asi Jehova Karunga musinke, ntani ga here kuhuguvaresa Vaisraeli asi Karunga nga va zowora. Vaisraeli kwa kere vapika siruwo sosire ntani va kere nomasinganyeko nsene asi Jehova kuvhura a va vatere. Vaisraeli vamwe nampo va tamekere kukarera yikarunga yoVaegipite.—Hes. 20:7, 8.

5. Yisinke ga horwere Jehova kwaMosesa kuhamena edina lyendi?

5 Ngapi omu Jehova ga limbwilire epuro lyaMosesa? Age kwa tente asi: “Yimo nye no ka limburura Vaisraeli ngesi asi: AME NYAME yige ana tumu nge kweni.” Makura ta gwederere ko asi Jehova “Karunga gozinyakurweni . . . yige ana tumu nge kweni.” Karunga kwa horwere asi age nga kara nkenye eyi ya hepa po mokusikisa mo sitambo sendi, ntani asi nkenye apa kusikisa mo nonkango dendi. Movelise 15 tatu resa asi Jehova mwene kwa tente asi: “Eli yilyo edina lyange lyanarunye, alyo yilyo sidiworokeso sange somaruvharo geni nagenye.” Nonkango edi da kundamene Mosesa nokunkondopeka epuro lyendi!

JEHOVA LYA MU FIRA EDINA LYENDI

6, 7. Ngapi omu Jehova ga sikisire mo matumbwidiro gendi?

6 Konyima tupu zokuuyunga naMosesa, Jehova kwa sikisire mo eyi ga tumbwidilire yokuzowora Vaisraeli. Age kwa tengekere Vaegipite nomahepeko murongo mokulikida asi Farawo novakarunga vaEgipite kapi va paka nonkondo. (Ex. 12:12) Makura Jehova ta tepana Efuta lyEgeha pokatji yipo Vaisraeli va tavakane nokudipaga Farawo novakwayita vendi. (Epis. 136:13-15) Momburundu, Jehova kwa parwire mamiliyona goVaisraeli pokuvapa nondya nomema. Yidwara noyicamakaku yawo kapi ya kurupire. (Deut. 1:19;  29:5) Nayinye eyi kulikida asi kwato yokukondera Jehova mokusikisa mo matumbwidiro gendi. Konyima kwa ya tanterere Jesaya asi: “Ame nyamelike HOMPA anihuru gokukukwafa.”—Jes. 43:11.

7 Josuwa ogu ga ya kweme Mosesa, nage kwa mwene yirugana yononkondo yaJehova eyi ga rugene moEgipite nomomburundu. Komeho a ka fe, Josuwa kwa tanterere Vaisraeli asi: “Nkenye ogu ana diva momutjima gwendi nomomwenyo gwendi asi, HOMPA Karunga gweni ana mu pe yininke nayinye yoyiwa, eyi ga mu tumbwidira. Matumbwidiro nagenye gana siki mo; nalimwe si lya hupa ko.” (Jos. 23:14) Jehova kwa sikisire mo matumbwidiro gendi.

8. Ngapi omu Jehova ana kusikisa mo matumbwidiro gendi?

8 Mokulifana nanaina, Jehova kuna kusikisa mo matumbwidiro gendi. Kupitira mwaMunwendi, age kwa pumbire asi pomazuva gopouhura mbudi zoUhompa ngava zi divisa ‘mwaza uzuni mudima.’ (Mat. 24:14) Jehova gelike gokuvhura kupumba sirugana esi ntani nokuruganesa “vantuuntu tupu” yipo va si sikise mo. (Yirug. 4:13) Yipo nye, apa atu zuvhisa mbudi zongwa, ose kusikisa mo uporofete woBibeli. Ose kufumadeka Guhyetu nokulikida asi ose kusikisa mo eyi atu tanta pokukanderera asi: ‘Edina lyoge ava li pongore. Uhompa woge au wize. Mpango zoge ava zi sikise mo pevhu ngwendi meguru.’—Mat. 6:9, 10.

EDINA LYENDI ENENE

Farawo kwa nyokere kudimburura asi Jehova yige Karunga Munankondo

9, 10. Yisinke natu lirongera ko konkedi omu Jehova ga tekwire Vaisraeli?

9 Konyima zapa Vaisraeli va tundire moEgipite, Jehova kwa lihorwere kwawo monkedi zokulikarera. Kupitira moVeta zegwanekero, Jehova kwa kere ngwendi ‘mugara gwawo’ pokuvapakera mbili. Vaisraeli kwa fene ngwendi mukadaJehova morwa ngava va tumbwisa kedina lyendi. (Jes. 54:5, 6) Ngano va limburukwire ngorooro konompangera dendi, age ngano ga va tungikire nokuvapopera nokuvapa mbili. (Num. 6:22-27) Nomuhoko nadinye ngano ngadi diva asi kutupu Karunga ogu ga fana Jehova. (Resa Deuteronomium 4:5-8; Episarome 86:7-10.) Apa va kere Vaisraeli vantu vaKarunga, vanayirongo wovanzi kwa ya lipakerere koukareli wousili. Awo kwa rugene yokulifana ngwendi Rutu goMumowaba, ogu ga tanterere Naomi asi: “Mbunga zoge, name zange ngazi kara, ano Karunga  goge, name Karunga gwange nga kara.”—Rutu 1:16.

10 Konyara nomvhura 1 500, monkedi omu Jehova ga tekwire Vaisraeli kwa horwere yikara yendi. Age kwa va likidire ‘nkenda nokulididimikira,’ nampili ngomu va dilire kumulimburukwa. (Ex. 34:5-7) Apa Vaisraeli va nyokere Jesus nokumudipaga, Jehova kapi ga va lididimikilire hena. (Mat. 23:37, 38) Kapi hena ngava va tumbwisa kedina lyaKarunga. Ntani awo kwa ya fene ngwendi sitji sosikukutu. (Ruk. 23:31) Ngapi omu Vaisraeli va ya tere edina lyaKarunga?

11. Morwasinke Vaisraeli va hagekere kuruganesa edina lyaKarunga?

11 Konyima zosiruwo, Vaisraeli kwa ya kere nomutaro gepuko kedina lyaKarunga, kwa ya li tere asi nokulitumbagura si. (Ex. 20:7) Ngoyitundwamo, va ya hagekere kuruganesa edina lyaKarunga. Jehova ya mu koresere pokumona asi edina lyendi kapi vana kulifumadeka hena. (Epis. 78:40, 41) Edina lyaKarunga mulyo kwendi unene, morwa Bibeli kwa tanta asi ‘edina lyendi yilyo “Esupa.”’ (Ex. 34:14) Eyi kuturonga asi ya kara nomulyo kufumadeka edina lyoMusiti gwetu.

MBUNGA ZOMPE KUZITUMBWISA KEDINA LYAKARUNGA

12. Wolye va ya kara vantu ava ava zigidisa kedina lyaKarunga?

12 Kupitira mwaJeremiya, Jehova kwa tumbwidilire asi nga tulisa po “egwanenekero lyepe” nombunga zompe. Vahamenimo navenye “kutunda komunona dogoro komukurona,” ngava “diva” Jehova. (Jer. 31:31, 33, 34) Uporofete owo kwa ya tamekere kusikilira mo poPentekoste momvhura 33. Karunga kwa tulisire po egwanekero lyepe. Jehova kwa tanta asi mbunga ozo zompe ndi ‘muhoko ogo,’ omu mwa hamena Vajuda novapagani ‘navenye ngava va zigidisa kedina lyendi.’—Gar. 6:16; resa Yirugana 15:14-17; Mat. 21:43.

13. (a) Vakriste womosiruwo saPeturusa ngava ruganesa edina lyaKarunga ndi? Faturura. (b) Ngapi o lizuvhu kuhamena kuruganesa edina lyaKarunga mokuzuvhisa?

13 ‘Ngovantu ava ava zigidisa kedina lyaKarunga,’ ava va hamenene mombunga ozo zompe, awo ngava ruganesa edina lyaKarunga, unene po apa ngava temwinine Matjangwa goRuhebeli. * Apa mupositoli Peturusa ga uyungisire mbunga zonene zoVajuda nava va rundurukilire koukareli woVajuda poPentekoste momvhura 33, age kwa ruganesere edina lyaKarunga yikando yongandi. (Yirug. 2:14, 20, 21, 25, 34) Morwa Vakriste womosiruwo saPeturusa kwa fumadekere Jehova, yipo ga tungikire sirugana sawo sokuzuvhisa. Naina, apa atu tanterere wopeke edina lyendi, Jehova kutungika sirugana setu. Ose kuvavatera va dive Karunga gosili. Ee, mfumwa musi kwawo noku kwetu! Owo ava ya diva Jehova Karunga, kutameka kutulisa po ukaume wouwa nendi ou ngau ya kura nokukara po dogoro narunye.

14, 15. Ngapi omu twa yi diva asi Jehova ga popera edina lyendi?

14 Konyima, unene po apa va fire vapositoli, vamwe va tamekere kupukisa mbungakriste nomarongo goyimpempa. (2 Tes. 2:3-7) Varongi owo woyimpempa kwa ya kweme mpo zoVajuda zokudira kuruganesa edina lyaKarunga. Jehova ga pulisire edina lyendi li dongonokerere po ndi? Hawe! Nampili  ngomu twa dira kudiva nawa-nawa omu edina lyaKarunga ngava li tumbura nye simpe kapi lya dongonoka po. Monomvhura mafere, edina lyaKarunga kwa moneka momatoroko gomanzi goBibeli nomomatjango govalirongi woBibeli. Pasihonena, momvhura 1757 Charles Peters kwa tjenge asi tanto zedina lyaKarunga kusingonona nawa Karunga Jehova kupitakana nontumbwisiso. Mobuke zomo-1797 zokuhamena kukarera Karunga, Hopton Haynes kwa tjenge asi Jehova edina lyaKarunga ogu “ngava karere Vajuda ngomu ga yi rugene Kristusa novaposistoli vendi.” Henry Grew (1781-1862) kapi ga ruganesere tupu edina nye hena ga kwete egano asi edina lyaKarunga kapi vana kulifumadeka, ano va hepa kulipongora. Mokulifana, George Storrs (1796-1879) naCharles T. Russell ava va rugene kumwe, nawo kwa ruganesere edina lyaKarunga.

15 Mvhura 1931 kwa kere zomulyo kovantu vaKarunga morwa mvhura ozo ava ngava tumbura asi Valirongi woBibeli kwa tambwire edina, Nombangi daJehova. (Jes. 43:10-12) Yipo va lidivisire vene asi awo vana hafa kukara vakareli vaKarunga gosili gelike, pokuvatumbwisa ‘kedina lyendi’ nokuliyererepeka. (Yirug. 15:14) Apa atu gazara omu Jehova ga popera edina lyendi, kutudiworokesa nonkango dendi domwaMarakiya 1:11, NW asi: “Kutundilira koupumezuva dogoro koutokero edina lyange ngali fumana mokatji konomuhoko.”

GENDA MEDINA LYAKARUNGA

16. Morwasinke natu lizuvhira mfumwa kugenda medina lyaKarunga?

16 Muporofete Marakiya kwa tjenge asi: “Nkenye muhoko kutongamena tagu limburukwa karunga gwago, nye ose ngatu tongamena, tatu limburukwa [ndi tatu gendi medina lyaJehova, NW] Karunga gwetu narunye nanarunye.” (Mika 4:5) Vantu vaKarunga kapi tupu ya kere mfumwa kwawo mokuvatumbwisa kedina lyendi nye hena kwa lizuvhire asi Karunga ana va hafere. (Resa Marakiya 3:16-18.) Nove yimo ngoso o lizuvhu ndi? Ove kuna kukondja kugenda medina lyaKarunga ndi?

17. Yisinke ya hamena mo mokugenda medina lyaKarunga?

17 Kugenda medina lyaKarunga kwa hamena mo yininke yitatu. Sokuhova, twa hepa kudivisa edina olyo kwava wopeke, morwa woowo ‘tupu ava kugu edina lyaKarunga yiwo ngava paruka.’ (Rom. 10:13) Sauvali, twa hepa kulikida yikara yaJehova, unene po eharo lyendi. (1 Joh. 4:8) Sautatu, twa hepa kulimburukwa noveta daKarunga, ano monkedi zangoso tatu fumadeke edina lyaGuhyetu. (1 Joh. 5:3) Ono tokomene ‘kugenda medina lyaJehova Karunga gwetu narunye nanarunye ndi’?

18. Yisinke vana kundindira nononkondo navenye ava ava fumadeke edina lyenene Jehova?

18 Navenye ava ava ncenuna nokurwanesa Jehova, ntaantani ngava mu dive asi yige yilye. (Hes. 38:23) Awo kwa fana ngwendi Farawo ogu ga tente asi: “Eraka lyahompa ke eli nani purakena ame”? Farawo ya mu sininikire a dive unene waKarunga Jehova. (Ex. 5:1, 2; 9:16; 12:29) Nye ose twa kara neharo lyokudiva Jehova. Ose tuna hafa mokutuzigida kedina lyendi nokukara vantu wendi wovalimburukwi. Ntani kuna kundindira nononkondo etumbwidiro lyemEpisarome 9:10 eli asi: ‘Ava va diva edina lyoge, kwa ku huguvara, yeeyi ove HOMPA, kapi o zumbu ava ava ku papara.’

^ para. 13 Edina lyaKarunga kwa kere momatjangwa goRuhebeli aga ngava ruganesa Vakriste. Ntani hena lya kere metjango lyoSeptuagente, etoroko lyoRugereka eli va gusire moMatjangwa goRuhebeli.