Zende koyikaramo

Zende koyikaramo

Nombangi daJehova

Horowora eraka Rukwangali

Ove kuhafera upingwa wetu wopampepo ndi?

Ove kuhafera upingwa wetu wopampepo ndi?

‘Karunga kwa paparera edina lyendi mbunga movapagani.’—YIRUG. 15:14.

1, 2. (a) Yisinke “nzugo zaNdafita,” ntani ngapi omu va zi tungwilire? (b) Wolye va lipakerera ngovakareli vaJehova naina?

POSIGONGI sombungagendesi moJerusarema momvhura 49, Jakopo kwa tente asi: “Simoni [Peturusa] ntaantani tupu ana kusanseka apa, omu ga tameka Karunga kupaparera edina lyendi mbunga movapagani. Eyi kuna ligu nononkango dovaporofete, edi va tjanga asi, ‘Ngani ninka tani tengura ni ya tungurure nzugo zaNdafita ezi za zunguruka; eyi va zungurura yiyo ngani tunga ni yi wapeke. Vantu wokuhupa ko, kuninka asi vapagani navenye ava va zigidira edina lyange va papare Hompa,’ yimo ana kutanta Hompa ogu ga rugana nayinye eyi. Yirugana yaKarunga kwa yi divikisa kutunda kwanare.”—Yirug. 15:13-18.

2 “Nzugo zaNdafita” kwa tamba kovahompa ava va tundilire moruvharo rwaNdafita. Azo kwa zungurukire apa hompa Sedekiya va mu gusire posipundi souhompa. (Amosa 9:11) Nampili ngoso, “nzugo” ozo kwa ya zi tungwilire apa mutekurwaNdafita Jesus ga ya kara hompa. (Hes. 21:27; Yirug. 2:29-36) Jakopo kwa likidire asi uporofete ou kwa pumbire hena asi Vajuda noVapagani ngava va gwavekwa va ka kare vahompa kumwe naJesus meguru. Yihupwa oyo yovagwavekwa nomamiliyona ‘gononzwi dapeke’ daJesus kwa lipakerera mokuzuvhisa usili woBibeli ngovakareli vaJehova.—Joh. 10:16.

VAJUDA KWA VA TWERE MOUNKWATE

3, 4. Yisinke ya vaterere Vajuda womoBabironi va hedere pepi naJehova?

3 Apa Vajuda va va twere kounkwate moBabironiya,  ayo kwa likidire asi “nzugo zaNdafita” kwa zi zungwilire. Mokumona asi Vababironi ngava rugana ukarelikarunga woyimpempa, ngapi omu vantu vaKarunga va vhulire kukwaterera kousili monomvhura 70 domounkwate moBabironi? Ngwendi moomu vantu vaJehova ava kwaterere kousili mouzuni ou waSatana. (1 Joh. 5:19) Vakareli vaJehova kwa kara noupingwa wokulikarera ou au va vatere va kwaterere kousili.

4 Naina, ose twa kara noBibeli nazinye ngoupingwa wetu. Vajuda ava va kere mounkwate waBabironiya kapi va kere noBibeli nazinye, nye va divire Veta zaMosesa noYipango yazo Murongo. Awo kwa divire ‘marusumo gokuhamena Siyoni,’ noyisewe yoyinzi noyihonena yovakareli vaJehova vanare wovalimburukwi. Vajuda kwa lilire morwa kwa here kutengura kosirongo sawo ntani kapi va divarere Jehova. (Resa Episarome 137:1-6.) Oyo yiyo ya va vaterere va hedere pepi naJehova nampili ngomu ga va kundurukidire marongo goyimpempa goVababironi.

ERONGO LYAKARUNGA MUTATU-GUMWE KAPISI EPE

5. Moyikarunga yitatu musinke va pulire Vababironi noVaegipite?

5 Karunga mutatu-gumwe, yilyo erongo lya fumanene unene moukarelikarunga woVababironi. Pasihonena, karunga mutatu gumwe ogu ngava karere Vababironi kwa kere sikarunga sokwedi nesi sezuva nesi nosikarungakadi soruvharo noyita. Vaegipite ngava karere mapata goyikarunga yitatu, guhya nazinya namunwa. Nampili ngomu ya kere yikarunga yitatu, awo kapi va yi tere asi kwa hetakana. Karunga mutatu-gumwe goVaegipite kwa kere sikarunga Osiris nosikarungakadi Isis namunwawo Horus.

6. Yisinke Karunga mutatu-gumwe, ntani morwasinke vantu vaJehova va dira kupura merongo olyo?

6 Nongereka danaina nado kuronga asi pwa kara Karunga mutatu-gumwe, ogu ava tumbura asi karunga guhwe nakarunga munwa nakarunga mpepo zokupongoka. Nye erongo eli kuninkisa Jehova a moneke ngwendi pwagelike kwato nonkondo. Vantu vaJehova kwa va popera kerongo eli lyoyimpempa. Ose twa lironga asi: “Purakena Israeli! HOMPA gwetu a huru yige gelike HOMPA.” (Deut. 6:4) Jesus kwa rugwilire nonkango odo, ano Vakriste wousili nawo kwa kwatesa ko nonkango odo daJesus.—Mar. 12:29.

7. Komeho muntu a gwane ekuho ngoMukriste gousili, yisinke ga hepa kupura kuhamena Karunga?

7 Jesus kwa tanterere vasikuli vendi asi zendeni “konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyoMpepo zoKupongoka.” (Mat. 28:19) Eyi kutanta asi muntu ogu ana hara va mu kuhwe a kare Mukriste gousili ndi Mbangi zaJehova ga hepa kupura asi Guhwe, Jehova, ga kara nononkondo kupita Jesus, ano Jesus MunwaKarunga, ogu ga ya geve sizoweseso. Muntu ogo ga hepa kuyipura asi mpepo zokupongoka nonkondo daKarunga, kapisi ruha rwaKarunga mutatu-gumwe. (Gen. 1:2) Aro kuna kara ruha roupingwa wetu rokudiva asi erongo lyaKarunga mutatu-gumwe kuswawisisa Karunga ntani kapisi usili.

 UMPURE!

8. Yisinke va pulire Vababironi kuhamena yikarunga nonompepo donondona?

8 Vantu womoBabironi kapi tupu va pulire moyikarunga yoyimpempa nye hena nomonompepo donondona nomoumpure. The International Standard Bible Encyclopaedia kwa tanta asi Vababironi kwa pulire asi nompepo donondona kuvhura kuninkisa muntu a vere. Vantu ngava kanderere koyikarunga yawo asi yi va popere konompepo donondona.

9. (a) Ngapi omu Vajuda wovanzi va lirongere magano gepuko kuhamena nompepo donondona? (b) Ngapi omu va tu popera kosiponga sonompepo donondona?

9 Apa va kere moBabironi, Vajuda wovanzi kwa lironge magano gepuko. Konyima, awo kwa tamekere kupura megano lyoVagereka eli asi nompepo donondona nongwa. Nye Karunga kututantera asi umpure ndi kulikwatakana nonompepo donondona, siponga ntani epuko. Usili ou kuna kara ruha roupingwa wetu wokulikarera. (Jes. 47:1, 12-15) Ose kwa tu popera morwa twa nyokera po umpure ngomu a yi tu tantere Jehova.—Resa Deuteronomium 18:10-12; Ehororo 21:8.

10. Yisinke Babironi zonene, ntani kupi ga tundilira magano gepuko noumpure womomaukarelikarunga goyimpempa?

10 Mokulifana, wovanzi naina ava va hamena koukarelikarunga woyimpempa kulihameka moumpure ngwendi vantu womoBabironi zanare. Eyi yiyo Bibeli azi tumbwire maukarelikarunga nagenye goyimpempa asi Babironi zonene. (Ehor. 18:21-24) Maukarelikarunga aga kwa fana ngwendi ukarelikarunga womoBabironi zanare morwa yiko ga tundilira magano gepuko noumpure. Babironi zonene ntaantani ngava zi zonagure po morwa kulihameka moumpure nokukarera yikarunga yoyimpempa nononzo dimwe.—Resa Ehororo 18:1-5.

11. Marondoro musinke ya gava yimbapiratjangwa yetu kuhamena umpure?

11 Jehova kwa tente asi: “Walye omu rugana nkenye tupu eyi ya hamena koumpure.” (Lev. 19:26) Koyiha yomvhura 1800, vantu wovanzi ngava lihameke moumpure. Zion’s Watch Tower zaKudumonkuru 1885 kwa zogerere yuma oyo. Azo kwa tente asi maukarelikarunga ganare ngaga rongo asi vafe kuparuka ntani erongo eli kwa tundilira kegano eli asi vafe kuza kosirongo sapeke. Ntani kwa tente asi nompepo donondona kulininkisa di kare ngwendi vafe nokuhetekera ko kuuyunga novanamwenyo, ano ngoyitundwamo ado kwa pukisa nondunge dovantu wovanzi. Sifo What Say the Scriptures About Spiritism? kwa geve marondoro gokulifana ngwendi yomoyimbapiratjangwa yetu yanaina.

VAFE KUNA KUHEPA MOSIRONGO SAPEKE NDI?

12. Yisinke ga uyungire ko Saromo kuhamena ukaro wovafe?

12 “Navenye ava va diva usili” kuvhura va limburure epuro olyo. (2 Joh. 1) Yosili, ose kukwatesa ko nonkango daSaromo edi asi: “Mbwa zonzuni za pitakana nyime gokufa. Nhi, vanamwenyo va diva asi ngava fa, nye vafe kutupu eyi va diva. . . . O rugane unene paapa wa hulira, yeeyi mosirongo sovafe omu ngo za, mutupu magazaro ndi unongo ndi ediwo.”—Muud. 9:4, 5, 10.

13. Ukarelikarunga nonompo musinke doVagereka va tambwire Vajuda?

13 Jehova kwa tanterere Vajuda usili  kuhamena vafe. Nye apa vapangeli woVagereka va pangerere Juda naSiliya, awo kwa hetekerere ko kuninkisa vantu va tambure ukarelikarunga nonompo doVagereka. Ngoyitundwamo, Vajuda yipo va tamekere kupura asi momuntu mwa kara sininke esi asi paruka ponomfa ntani asi sininke oso kuza kosirongo sapeke ndi kukapya momundiro. Vagereka kapisi yiwo muhowo kupura asi sininke oso sokudira kumoneka kukahepa, morwa buke The Religion of Babylonia and Assyria kwa tanta asi Vababironi kwa pulire asi pwa kara sirongo sapeke oku kwa kara yikarunga yononkondo nonompepo donondona dokuhepeka vantu. Vababironi kwa pulire momwenyo gwa ha fu.

14. Yisinke ga divire Joba naAbirahamu kuhamena vafe nevhumbuko?

14 Nampili ngomu Joba ga dilire kukara noBibeli, ga divire usili kuhamena vafe. Ga divire hena asi nsene nga fa, Karunga gwendi geharo, Jehova, nga yi hafera kumuvhumbura. (Joba 14:13-15) Abirahamu nage kwa pulire mevhumbuko. (Resa Vahebeli 11:17-19.) Mokumona asi nokuvhura si kuvhumbura muntu ogu ana dili kufa, vagara owo kapi va pulire momwenyo gwa ha fu. Mpepo zaKarunga kwa vaterere Joba naAbirahamu va pure mevhumbuko. Usili ou nawo kuna kara ruha roupingwa wetu.

TWA HEPA ‘SIZOWESESO’

15, 16. Ngapi omu va tu zowora konzo nokonomfa?

15 Ose tuna hafa asi Karunga ga tu tantera omu ga tu zowora konomfa nokonzo ezi twa pinga kwaAdamu. (Rom. 5:12) Twa yi diva asi Jesus kapi ga ‘wizira asi va ya mu kerere, age  kwa wizira a ya kerere vantu, a ya gave mwenyo gwendi, gu kare sizoweseso sovanzi.’ (Mar. 10:45) Ee, ruhafo musi mokudiva asi ‘Jesus Kristusa ga ya tu zowora!’—Rom. 3:22-24.

16 Vajuda noVapagani va hepere kulitezurura nokulikida epuro monzambo zaJesus zosizoweseso yipo va va dongwenene po. Nose twa hepa kurugana yokulifana. (Joh. 3:16, 36) Nsene muntu a kwaterera komarongo goyimpempa ngwendi lyaKarunga mutatu-gumwe ntani nomwenyo gwa ha fu, age kapi ta gwanenene mo uwa mosizoweseso. Nye ose kuvhura tu gwanene mo uwa. Morwa twa diva usili kuhamena MunwaKarunga asi: “Yige ga tu zowora, kuninka asi nonzo detu ga di dongonona po.”—Koros. 1:13, 14.

TWIKIRA KUKARERA JEHOVA!

17, 18. Kupi natu lironga kuhamena Nombangi daJehova, ntani morwasinke ya wapera tu lironge yininke oyo?

17 Upingwa wetu wopampepo kwa kwatera mo yininke yimwe eyi ga tu ronga Karunga nomu ga tu vatera nokututungika. NoYearbook detu kututantera omu vantu vaJehova ava twikire kumukarera mouzuni mudima. Kuvhura tu lironge ehistoli lyetu monovidiyo Faith in Action, Ruha 1 noru 2, ntani nomoyimbapiratjangwa ngwendi Jehovah’s Witnesses—Proclaimers of God’s Kingdom. Ruhungu ntani Awake! narunye kututantera eyi va ligwanekera nayo vanavazinyetu.

18 Ose kugwanena mo uwa pokulironga ehistoli lyetu, ngwendi moomu va gwanenene mo uwa Vaisraeli pokulironga kuhamena omu ga va vaterere Karunga. (Ex. 12:26, 27) Apa ga kurupire Mosesa, age kwa tanterere Vaisraeli asi: “Tedeni yanare, yosiruwo sa ka pita, pureni oguhyeni, va mu tantere, eyi ya horokere. Pureni vakurupe, va mu sansekere yanare.” (Deut. 32:7) Natuvenye kuhamberera Karunga noruhafo nokutantera ko wopeke eyi ga rugana. (Epis. 79:13) Eyi atu lirongere ko kehistoli lyetu ngoNombangi daJehova ngayi tu vatera tu twikire kumukarera.

19. Mokumona asi twa diva usili, yisinke twa hepa kurugana?

19 Mouzuni ou woudona, ose tuna hafa asi twa diva usili kuhamena Karunga. (Yis. 4:18, 19) Tu twikireni kulironga Nonkango daKarunga nokutantera ko wopeke. Makura ngatu lizuvha ngwendi muepisarome ogu ga tente asi: “Ngani udisa uhungami woge, woge ko nyovelike Nyove wa ronga nge kutunda kounona wange, nelyezuva simpe ani sanseke yirugana yoge yoyitetu. Ano ntaantani ame na kurupa, nohuki dange vau, wa ha zumba nge, Karunga! Kara pwange apa ngani udisa nonkondo noupenda woge kwava ngava ka kara ko.”—Epis. 71:16-18.

20. Yisinke ayi likida apa atu limburukwa Jehova, ntani ngapi atu lizuvhu kuhamena upangeli waJehova noukareli wetu kwendi?

20 Apa atu limburukwa Jehova ayo kulikida asi ose twa yi pura asi age yige ga kara nononkondo dokutupangera ntani ya mu fira kumukarera. (Ehor. 4:11) Jehova kutupa mpepo zendi zi tu vatere tu tantere ko wopeke mbudi zongwa nokuvapa ehengagwido nehuguvaro. (Jes. 61:1, 2) Satana kapi ngava mu pulisira a pangere vantu vaKarunga. Upingwa wetu wopampepo ngau tu nkondopeka tu hedere pepi naJehova nokumukarera ngesi dogoro narunye.—Resa Episarome 26:11; 86:12.