Zende koyikaramo

Zende koyikaramo

Nombangi daJehova

Horowora eraka Rukwangali

Kuliwapaikira sirugana sezigido kureta yitundwamo yoyiwa

Kuliwapaikira sirugana sezigido kureta yitundwamo yoyiwa

María Isabel kuna kara muzuvhisi gomudinkantu gomupampi gomositata saSan Bernardo koMbindakano zaAmerika mosirongo saTjili. Age nava vepata lyawo, navenye Vamapuche. Epata nalinye kwa kwatesere ko elituromo lyokutulisa po mbungakriste zompe zemeraka lyawo lyoRumapudungun.

Apa va geve madiviso asi Murarero gwaHompa ngagu karera moRumapudungun ntani asi yimbapira yezigido yokusika po-2000 vana yi nduruka meraka olyo, ayo kwa ninkisire María Isabel a gazadare ko unene. Yisinke ga rugene mokuvatera? Age kwa diworokere yihonena yovadinkantu vamwe woNombangi ava ya tompoka kuzuvhisira vanasure vakwaawo novarongi vawo. Age kwa yi tanterere vakurona vendi, makura awo yipo va tokwere asi María Isabel a heteke egano lyendi lyokugavera yimbapira yezigido kosure. Egano musinke ga kere nalyo?

Pomuhowo, María Isabel kwa pulire epulisiro posure lyokurameka simbapira sezigido poheka zosure. Age kwa mu pere epulisiro ntani kwa mu kangangerere morwa upampi wendi. Ezuva limwe kongurangura, mukuronasure kwa geve madiviso kembako kuhamena simbapira oso sezigido!

Makura María Isabel ta pura nsene kuvhura a dingure nkenye nkondwarongero. Konyima zokugwana epulisiro kovarongi, age kwa pulire nkenye monkondwarongero nsene mwa kara varongwa woVamapuche. Age kwa tanta asi: “Ame kwa gazarere asi nampo posure nazinye kwa kara po tupu varongwa 10 ndi 15 woVamapuche, nani awo vanzi va kere po, ame kwa gaverere yimbapira yezigido yokusika po-150!”

“KWA GAZARARERERE MUNTU GOMUKONDI”

Mukadi gumwe ogu ga resere simpapira sezigido esi va ramekere poheka zosure kwa pulire asi kwalye na gwana mauzera nagenye kuhamena silika esi. Mukadi ogo kwa tetukire apa va mu twere komukadona gonomvhura murongo! María Isabel kwa tanta asi mukadi ogo “kwa gazararerere muntu gomukondi.” Konyima zokugava komukadi ogo simbapira sezigido nokumufatwilira pausupi, María Isabel kwa pulire oku ga tunga ogo mukadi yipo nage novakurona vendi ngava ka mu dingure va ka mu tantere ko yoyinzi kuhamena Uhompa waKarunga. Vazuvhisi 20 womombungakriste zoRumapudungun kwa hafere unene apa va mwene mukadi ogo navamwe ava va likidire eharo wokusika po-26 worudi roVamapuche poMurarero gwaHompa. Ngesi azo mbungakriste ezi zina kukura unene!

Yi kare asi epupi lyoge musinke, kuvhura o rugane yokulifana pokuzigida vanasure vakweni ndi varugani vakweni koMurarero gwaHompa nokosiuyungwa sanavenye ndi kosigongi somazuva gatatu ndi? Kuvhura kurugana mapaparo moyimbapiratjangwa yetu yipo o gwane yihonena yavamwe eyi nayi ku vatera yi ku tompoke mosirugana esi. Ntani kanderera kwaJehova a ku pe mpepo zendi zokupongoka zi ku vatere o kare nomupampi o uyunge kumuhamena. (Ruk. 11:13) Nsene o yi rugana, nove ngayi ku tetukisa nokukukorangeda yitundwamo yokuliwapaikira sirugana sezigido.