Zende koyikaramo

Zende koyikaramo

Nombangi daJehova

Horowora eraka Rukwangali

Vadinkantu, nkondopekeni epuro lyeni

Vadinkantu, nkondopekeni epuro lyeni

“Epuro . . . alyo undipo woyininke eyi atu dili kumona.”—HEB. 11:1.

MARUSUMO: 41, 69

1, 2. Sinka musinke nava vhura kukara naso vadinkantu, ntani ekorangedo musinke azi gava Bibeli?

MUNAZINYETUKADI gomoBritania kwa mu tanterere munasure mukwawo asi: “Ove muntu gonondunge kapi ya kuwapera kupura mwaKarunga.” Munazinyetugara gomoNdovesiranda kwa tjenge asi: “Vamitili vetu kugazara asi esito eli va tjanga moBibeli asi esimwititi tupu. Ntani kapi ava yi pakere mbili kweyi vadinkantu wovanzi va pura melisinto.” Munazinyetukadi gomoFransa kwa tanta asi: “Vamitili vetu kuvatetukisa pokumona asi koveli simpe vanona va pura moBibeli.”

2 Vantu vamwe kapi va pura asi Karunga yige ga tu sita. Nsene ove mudinkantu ogu o karere Jehova ndi kuna kulironga simpe kumuhamena, kuvhura o kare nosinka asi ngapi no fatwilira wopeke va pure asi Karunga yige Musiti. Bibeli kutuvatera tu gazadare ko nawa kweyi atu zuvhu ndi eyi atu resa yipo tu vhure kufaturura. Azo kuuyunga asi: ‘Mayere nonondunge ngayi ku gamena.’ Monkedi musinke? Nga yi kuvatera o nyokere po marongo goyimpempa ntani nga yi nkondopeka epuro lyoge.—Resa Yisewe 2:10-12.

3. Yisinke natu kakonakona mosirongwa esi?

3 Epuro lyosili kwa korera kediwo lyousili kuhamena Karunga. (1 Tim. 2:4) Ngomu ono kulironga Bibeli  noyimbapiratjangwa yetu, wa ha genderesa kuresa. Nye ruganesa nondunge doge yipo o ‘kwate nawa egano’ eyi ono kuresa. (Mat. 13:23) Tatu kakonakona omu kuruganesa nondunge nayi kuvatera o nkondopeke epuro lyoge mwaKarunga ngoMusiti ntani nomoBibeli omu mwa kara yirongwa eyi ya kara ‘noundipo’ ndi noumbangi wosili.—Heb 11:1.

OMU NO PAMEKA EPURO LYOGE

4. Monkedi musinke kupura mwaKarunga ndi melisinto ya korera mepuro ntani yisinke twa hepa kurugana tu gwane usili?

4 Wa zuvha ko gumwe ana kuuyunga asi age kwa pura melisinto morwa maumbangi govadiviunsitwe ano kapi ga pura mwaKarunga morwa kwato ogu ga mu mona? Vantu wovanzi yimo ava gazara ngoso. Nye ya wapa kudiva eyi asi: Yi kare asi muntu kwa pura mwaKarunga ndi melisinto, nayinye kwa korera mepuro. Monkedi musinke? Nagumwesi ga mona Karunga ndi asi a mone omu vana kusita sininke. (Joh. 1:18) Kwato muntu gumwe nampili vadiunsitwe ogu ga mona sininke omu sina kulisinta. Pasihonena, kwato ogu ga mona omu engwanza lina kulisinta li kare muntu. (Joba 38:1, 4) Yipo nye, natuvenye twa hepa kukonakona maumbangi nokuruganesa nondunge detu yipo tu gwane usili. Paurusa kwa tjenge kuhamena unsitwe asi: ‘Yeeyi nkareso zaKarunga ezi azi dili kumoneka, nononkondo dendi danarunye noukarunga wendi, ha wa twa uzuni kuyimonena moyirugana yendi, ngayi va limbe kulipopera.’—Rom. 1:20.

Pokuzogera nava wopeke ruganesa yiruganeso eyi ya kara meraka lyeni (Tara paragarafu 5)

5. Ngovantu vaKarunga, yisinke ayi tu vatere tu kwate egano kuhamena esito?

5 “Kukwata egano” kwa kwatera mo kudimburura sininke esi asi dili kumoneka. (Heb. 11:3) Yipo nye, vantu ava ava kwata egano yininke kuruganesa nondunge dawo kapisi meho nomatwi gelike. Mbunga zaJehova kwa wapaika yiruganeso eyi nayi tu vatera. Ayo kutuvatera tu ‘mone’ Musiti gwetu kupitira mepuro. (Heb. 11:27) Yiruganeso oyo kwa kwatera mo vidiyo The Wonders of Creation Reveal God’s Glory ntani yimbapiratjangwa eyi Was Life Created? ntani The Origin of Life—Five Questions Worth Asking ntani buke Is There a Creator Who Cares About  You? Ose hena kugwana mauzera gomawa moyifo yapeke. Ngwendi sifo Awake! kwa tura mo mapuragero gokuhamena vadiviunsitwe ntani navamwe ava va faturura eyi va ya pulira mwaKarunga. Yirongwa “Kwa si sita ndi?” kwa tura mo yihonena yokutetukisa kuhamena unsitwe. Vadiunsitwe kuhetekera ko kurugana yininke pokuhonena unsitwe.

6. Mauwa musinke ga kara mo pokuruganesa yiruganeso eyi va tu pa ntani ngapi wa gwanena mo uwa?

6 Kuhamena yimbapiratjangwa yivali eyi vana tumbura, munazinyetugara gomoAmerika gonomvhura 19 kwa uyunga ko asi: “Ayo kwa vatera nge unene. Ame kwa yi resa yikando yoyinzi.” Munazinyetukadi gomoFransa kwa tjenge asi: Yirongwa “Kwa si sita ndi?” kutetukisa nge sili. Ayo kulikida nge asi nampili ngomu vatungi ava hetekere ko kutemwinina unsitwe, awo simpe kapi ava yi sikisa mo.” Vakondi womoAfrika Mbindakano ava va kara nomunona gonomvhura 15 kwa uyunga asi: “Sirongwa somuhowo a resa moAwake! kuna kara ‘Epuragero.’” Ove ngapi? Ove kulitulira po siruwo yipo o rese yiruganeso eyi ndi? Ayo nga yi kuvatera o kare nepuro ngwendi sitji esi sa kara nonondandani dokupama. Monkedi ozo, epuro lyoge nga li kuvatera o nyokere po marongo goyimpempa.—Jer. 17:5-8.

EPURO LYOGE MOBIBELI

7. Morwasinke Karunga ana harere o ruganese nondunge doge?

7 Ayo epuko kupura mapuro kuhamena Bibeli ndi? Hawe. Jehova kuna hara o ruganese nondunge doge mokukwata egano ediwo lyousili lyomoBibeli. Age kapi ana hara tupu o pure yininke morwa yiyo va pura vamwe. Ruganesa nondunge doge yipo o kare nediwo lyosili. Ediwo olyo ngali vhura kunkondopeka epuro lyoge. (Resa Varoma 12:1, 2; 1 Timoteusa 2:4.) Nkedi zimwe omu no gwana ediwo olyo lyomoBibeli pokulironga yirongwa yimwe eyi va tumbura mo.

8, 9. (a) Yirongwa musinke vamwe ava hafere kulironga? (b) Ngapi omu vamwe va gwanena mo uwa kweyi ava lirongo?

8 Vamwe kwa horowora kulironga mauporofete gomoBibeli pokuhetakanesa neyi va uyunga ko vanahistoli novasimaguli ndi vadiviunsitwe. Uporofete umwe ou natu vhura kulironga kuna kara waGenesis 3:15. Velise ezi kutuvatera tu kwate egano omu Uhompa waKarunga ngau ka likida asi Karunga yige ga wapera kupangera nokukapongora edina lyendi. Ntani velise zoozo kwa ruganesa sifanekeso mokulikida omu Jehova nga ka gusa po ruhepo oru va ligwanekera naro vantu kutundilira moEdeni. Ngapi omu no vhura kulironga Genesis 3:15? Nkedi zimwe kuna kara pokutjanga elikwamo omu ya gendere yihorokwa va tumbura mouporofete owo. Kuvhura o didilike po matjangwa aga ga likida omu Karunga ga horowere vantu nomauzera aga va tumbura movelise ozo ntani aga ga likida asi uporofete owo ngau sika mo. Ngomu no mona omu gana kuliza matjangwa, ngo yi dimburura asi vatjangi woBibeli kwa va ‘gendesere mpepo zokupongoka.’—2 Pet. 1:21.

9 Munazinyetugara gomoNdovesiranda kwa tedere ko omu nkenye buke zomoBibeli za gava mauzera kuhamena Uhompa. Age kwa tente asi: “Azo kwa liza nampili ngomu Bibeli va zi tjenge vagara wokusika po-40. Ntani sinzi sawo kwa tungire komavango gokulisiga-siga ntani kapi va lidivire.” Munazinyetukadi gomoAustralia kwa mu gumine komutjima sirongwa somoRuhungu 15 Sindimba 2013 esi sa faturura kuhamena Paska. Silika oso kwa likwatakana naGenesis 3:15 ntani newizo  lyaMesiyasa. Age kwa tjenge asi: “Sirongwa oso sa vaterere nge ni nongonone asi Jehova muwa. Ayo ya tetukisire nge pokumona asi silika esi ga wapaikilire Vaisraeli kwa ya sikilire mo mwaJesus. Ntani ayo ya ninkisire nge ni gazadare ko unene omu wa ya sikilire mo uporofete woPaska.” Morwasinke munazinyetukadi ga lizuvhilire ngoso? Morwa age kwa gazadarere ko unene kweyi ga resere ‘nokuyikwata egano.’ Ayo ya mu vaterere a nkondopeke epuro lyendi ntani nokuhedera Jehova pepi.—Mat. 13:23.

10. Ngapi kuhungika kovagara ava va tjenge Bibeli aku nkondopeke epuro lyetu?

10 Sininke simwe hena asi nkondopeke epuro lyetu kuna kara uradi nokuhungika kovagara ava va tjenge Bibeli. Sinzi sovatjangi vanare womouzuni ngava tjanga tupu yininke yoyiwa kuhamena vapangeli vawo nonomuhoko dawo. Nye vaporofete vaJehova ngava uyunga nkenye apa usili. Awo ngava tjanga mapuko gomuhoko gwawo novahompa vawo. (2 Hist. 16:9, 10; 24:18-22) Ntani vatjangi kapi ngava horeke mapuko gavene naga govakareli vakwawo. (2 Sam. 12:1-14; Mar. 14:50) Mudinkantugara gomoBritania kwa tanta asi: “Kapisi ureru kugwana vantu vangoso wokuhungika. Eyi kupameka epuro lyetu asi Bibeli kwa tunda kwaJehova.”

11. Yisinke nava vhura kurugana vadinkantu va mone mulyo gonompango domoBibeli?

11 Apa vantu ava tura pasirugana mavyukiso gomoBibeli nokumona yitundwamo yoyiwa, ayo kuvaninkisa va pure asi azo kwa zi retesa po Karunga. (Resa Episarome 19:7-11.) Mudinkantukadi gomoYapani kwa tjenge asi: “Ose kwa kere noruhafo mepata apa ngatu tura pasirugana marongo goBibeli. Ose kwa kere mombili nomouumwe ntani ngatu likida eharo.” Nompango domoBibeli kutupopera komarongo goyimpempa ntani nomapuliro aga va tjira vantu wovanzi. (Epis. 115:3-8) Ngapi omu marongo aga aga uyunga asi Karunga kapi ga kara po aga kundama vantu? Marongo ngwendi elisinto kuninkisa vantu va karere unsitwe mevango lyokukarera Jehova. Ntani ava ava uyunga asi Karunga kapi ga kara po kulikida asi meho zetu kwa kara momawoko ganyamwetu. Nye awo kapi ava rongo kuhamena meho zongwa.—Epis. 146:3, 4.

RONGA WOPEKE

12, 13. Nkedi musinke zongwa no vhura kuzogera novanasure ndi vamitili ntani navamwe kuhamena esito ndi Bibeli?

12 Ngapi nayi kutompoka mokuronga vantu kuhamena esito ntani Bibeli? Pomuhowo, wa ha genderera kugazara asi wa diva eyi va pura wopeke. Vantu vamwe kutanta asi va pura melisinto, nye simpe awo kulizuvha asi Karunga yipo ga kara. Ntani hena asi Karunga kwa ruganesere elisinto a site yimwe hena. Ano vamwe kutanta asi va pura melisinto morwa kuyironga konosure. Vamwe kwa hageka kupura mwaKarunga morwa maukarelikarunga gawo kwa va dompesa mutjima. Yipo nye, komeho o zogere nagumwe kuhamena esito, ya wapa kumupura tanko mapuro. Diva eyi ga pura. Nsene o mu purakena nawa, kuvhura ngayi mu tumangede a ku purakene.—Tit. 3:2.

13 Nsene gumwe a rwanesa epuliro lyoge kuhamena esito, kuvhura o mu pure a faturure omu eparu lya wiza po apo pwa hana Musiti. Ntani kuvhura o uyunge asi nsene asi eparu kwa wiza po lyene, pwa hepere kukara po sinamwenyo yipo si livhare. Profesora gumwe kwa uyunga asi pwa hepa hena yininke yimwe ngwendi (1) sipapa sokupopera sinamwenyo oso, (2) sa hepa kugwana nonkondo nokuvhura kudiruganesa (3) pwa hepa mauzera omu nasi fana nomu nasi kura ntani (4) nononkondo  yipo si vhure kutwikira kuvhara ko yinamwenyo yokusifana. Age kwa tente hena asi: “Nampili si kare asi sinamwenyogona nye udigu kukwata egano omu va si foroma.”

14. Yisinke no vhura kurugana nsene udigu kuzogera kuhamena elisinto ndi esito?

14 Nsene udigu kuzogera novantu kuhamena elisinto ndi esito kuvhura o ruganese egano eli ga ruganesere Paurusa. Age kwa tjenge asi: “Nkenye embo muntu a li tungu, nye mutungi gwanayinye, yige Karunga.” (Heb. 3:4) Efatururo olyo ureru kulikwata egano. Yipo nye, nsene asi embo muntu ga li tunga, noyinamwenyo youdigu kukwata egano nayo kulikida asi ntudi pwa kara muntu gonondunge unene ogu ga yi sita. Kuvhura hena o ruganese simbapiratjangwa esi sa zogera kuhamena esito. Munazinyetukadi gumwe kwa ruganesere yimbapira yivali eyi tuna tumbura ketamekero lyosirongwa esi. Age kwa yi pere mumati ogu ga dilire kupura mwaKarunga nye kwa pulire melisinto. Konyima zosiruwo, mumati ogo kwa tente asi: “Ngesi nina pura mwaKarunga.” Makura ta ya tameke kulironga Bibeli ano ngesi mumati ogo kuna kara gumwe govanavazinyetu.

15, 16. Nkedi musinke no vhura kuruganesa nsene kuna kuzogera kuhamena Bibeli ntani sitambo musinke no kara naso?

15 Kuvhura hena o ruganese nkedi zokulifana nsene kuna kuzogera nomuntu ogu ga dira kupura nawa-nawa moBibeli. Diva eyi ga pura noyirongwa eyi ga hara. (Yis. 18:13) Nsene age kwa hara yirongwa younsitwe, kuvhura a hafere apa no tumbura yitwa eyi ayi likida asi Bibeli kwa vyuka paunsitwe. Vamwe kuvhura va hafere pokumona omu Bibeli za kara nomauporofete aga ga sika mo ntani omu za vyukilira. Ndi kuvhura omu likide nompango edi da gava mavyukiso gomawa edi va uyungire pEudiso lyopoNdundu.

16 Sitambo soge si kare sokuguma mutjima gomuntu, kapisi sokulipatanesa nendi. Yipo nye, purakena nawa nsene muntu ta uyunga. Pura mapuro gomawa, ntani uyunga monkedi zongwa zefumadeko nsene kuna kuzogera novakondi. Awo ngava vhura kufumadeka epuliro lyoge. Ntani ngava mona asi ove wa teda ko unene kweyi wa pura. Eyi yiyo va dira kurugana vadinkantu wovanzi. Ntani diworoka asi kapisi hepero o limburure vantu wonompata ndi ava vana hara tupu kukusindagura.—Yis. 26:4.

NKONDOPEKA EPURO LYOGE

17, 18. (a) Yisinke nga yi kuvatera o nkondopeke epuro lyoge? (b) Epuro musinke ngatu ka zogera mosirongwa sokukwama ko?

17 Mokunkondopeka epuro kapi tupu ya korera mokudiva madi goBibeli. Wa hepa kukonakona marongo gokonhiinhi gomoBibeli ngwendi muntu ogu ana kupapara emona eli va horeka. (Yis. 2:3-6) Ruganesa yiruganeso eyi ya kara meraka lyoge ngwendi BIBILIYOTEKA ZOKOINTERNETA ntani Indeksi zoRuhungu ndi Buke zepaparo zoNombangi daJehova. Ntani litulira po sitambo sokuresa Bibeli nazinye. Heteka kuziresa momvhura zimwe. Kuresa Bibeli yiyo ayi nkondopeke unene epuro lyetu. Pokudiworoka udinkantu wendi, mutareli gonombunga kwa tanta asi: “Pokuresa Bibeli nazinye yiyo ya vaterere nge ni yi pure asi azo sili Nonkango daKarunga. Masimwititi aga ngani lirongo apa na kere munona, konyima naya ga kwete egano. Oyo ya vaterere nge ni nkondopeke epuro lyange.”

18 Vakurona, mokuninka asi vana veni va nkondopeke epuro lyawo mwa hepa kuvavatera. Ngapi omu nomu va vatera va nkondopeke epuro lyawo? Ngatu ka yi zogera mosirongwa sokukwamako.