Zende koyikaramo

Zende koyikaramo

Nombangi daJehova

Horowora eraka Rukwangali

Kara kaume gosili nampili ukaume weni moudigu una kara

Kara kaume gosili nampili ukaume weni moudigu una kara

Gianni naMaurizio kwa kara vakaume nomvhura 50. Nye siruwo simwe ukaume wawo kwa kere moudigu. Maurizio kwa uyunga asi: “Ame kwa tulire epuko lyenene eli lya ninkisire ukaume wetu u hage po.” Gianni kwa uyunga asi: “Maurizio yige ga rongere nge Bibeli. Age kwa kere sihonena sosiwa kwange. Makura kapi na yi pulire eyi ga rugene. Ame kwa kere ngwendi nina zumbana morwa nayi divire asi ukaume wetu tau haga po. Ame kwa lizuvhire asi ana sigilire nge.”

VAKAUME wovawa mulyo unene ntani ukaume wokukarerera kapi au wiza po tupu hararasi. Yisinke wa hepa kurugana nsene ukaume weni moudigu una kara? Kuvhura tu lirongere ko kwa vamwe ava va tumbura moBibeli ava va kere vakaume wovanene nye konyima ukaume wawo kwa ya kere moudigu.

NSENE KAUME KOGE ANA TURA MAPUKO

Hompa Ndafita kwa kere novakaume wovawa. Gumwe gwawo kuna kara Jonatana. (1 Sam. 18:1) Nye Ndafita ga kere hena novakaume vamwe ngwendi muporofete Natana. Bibeli kapi za uyunga apa wa tamekere ukaume wawo. Hompa Ndafita ga pulire magano kwaNatana ngwendi moomu no pura magano kaume koge. Ndafita kwa here kutungira Jehova nzugo. Age kwa here kuzuvha ko magano gaNatana ogu ga kere kaume kendi ntani muporofete gwaJehova.—2 Sam. 7:2, 3.

Nampili ngoso, koyili eyi ya horokere eyi ya tulire ukaume wawo moudigu. Hompa Ndafita kwa honderere naBateseba ano konyima ta dipagesa mugara gwendi Uliya. (2 Sam. 11:2-21) Nomvhura dononzi, Ndafita nga limburukwa kwaJehova nokurugana  youhunga. Nye konyima ga ya tulire nzo zonene. Yisinke ya ninkisire hompa gomuwa a rugane yininke yangoso? Ngoso kapi ga divire yitundwamo ndi? Age ngoso kwa gazarere asi Karunga kapi ta yi diva?

Yisinke ga rugene Natana? Age ga ndindilire asi muntu gwapeke yige na ka uyungisa hompa kweyi ga rugene ndi? Mokumona asi koveli vamwe va divire eyi ga rugene Ndafita mokukadipagesa Uliya, ya kere hepero kwaNatana a ka uyungise Ndafita dogoro yi ka zonagwise po ukaume wawo ndi? Ayo ngano ya tu lire eparu lyaNatana mosiponga. Morwa Ndafita ga dipagesere Uliya muntu ga hana unzoni.

Natana kwa kere muporofete gwaKarunga. Age ga yi divire asi nsene a dira kurugana ko yuma, ukaume wawo naNdafita ngau haga po ntani ezwi lyendi lyokomutjima ngali mu zogerera. Kaume kendi Ndafita kwa rugene eyi ya dilire kuhafesa Jehova. Hompa Ndafita ga hepere evatero mokutengwidira po elikwatakano lyendi naJehova. Ndafita ga hepere kaume gosili ogu na vhura kumuvatera. Ano Natana kwa kere kaume gwangoso. Apa Natana ga ka uyungisire Ndafita age kwa ruganesere sifanekeso esi sa mu gumine komutjima. Monkedi omu Natana ga tanterere Ndafita mbudi zokutunda kwaKarunga ya mu vaterere a dimburure unene wonzo zendi nokumutumangeda a rugane ko yuma.—2 Sam. 12:1-14.

Yisinke no rugana nsene mukweni ana tura epuko lyenene ndi nzo zonene? Kuvhura o lizuvhe asi nsene o vyukilira ku mu tantera tayi zonagwisa po ukaume weni. Ndi kuvhura o lizuvhe asi nsene o yi tantera vakuronambunga ava nava vhura ku mu vatera ove ngoso kapisi kaume gosili. Yisinke no rugana?

Gianni, ogu tuna tumbura nare kwa tanta asi: “Ame na dimbwilire asi ukaume wetu kapi una kugenda po nawa. Maurizio kapi ga mangurukilire nge ngwendi mwanare. Yipo na tokwere kumuhedera nampili ngomu ya kere udigu unene kwange. Na lipulire asi: ‘Yisinke nani ka mu tantera eyi ga dira kudiva? Nampo kuvhura a ka handuke.’ Nye apa na diworokere asi yige ga rongere nge Bibeli, tani gwana nonkondo dokuuyunga nage. Maurizio nage nga vatere nge apa na kere nomaudigu. Kapi na here ukaume wetu u hage po, na here kumuvatera morwa na kere nosinka kwendi.”

Maurizio kwa uyunga asi: “Gianni ga vyukilire kutantera nge ntani mouhunga ga kere. Na yi divire asi yitundwamo yetokoro lyange lyedona kapisi epuko lyendi ndi asi usima waJehova. Yipo na tambwire episuro eli va pere nge ntani mwa za siruwo na tengwidilire po elikwatakano lyange naJehova.”

NSENE KAUME KOGE MOUDIGU ANA KARA

Ndafita ga kere novakaume vamwe ava va mu kwatesere ko apa ga mu gwene maudigu. Gumwe gwawo kwa kere Husayi, ogu za tumbura Bibeli asi “mukwawo zaNdafita.” (2 Sam. 16:16; 1 Hist. 27:33) Age nampo kwa kere erenga lyomombara ogu ngava tantere yininke yemehora mo.

Apa Abisaromo ga here kugusa uhompa woguhwe Ndafita, Vaisraeli wovanzi kwa mu kwatesere ko, nye Husayi kapi ga yi rugene. Apa Ndafita ga tjwayukire, Husayi kwa zire nendi. Ndafita kwa lizuvhire sili kukora komutjima kweyi ga mu regene munwendi ntani navamwe ava ga huguvarere. Nampili ngoso, Husayi kwa kwatesere ko Ndafita nokulizambera mwene a sikise mo sirugana sendi mokuhagekesa po urwanesi wina. Husayi kapi ga yi rugene asi, morwa yeeyi kwa kere situmbukira sendi ngerenga lyomombara. Nye age kwa kere kaume gosili gwaNdafita.—2 Sam. 15:13-17, 32-37; 16:15–17:16.

Ayo kuhafesa pokumona omu vanavazinyetu va kara mouumwe morwa malikwatakano aga va kara nago nye kapi ava yi  ruganene morwa situmbukira tupu. Awo kuyiruganena morwa kumona vanavazinyawo asi vakaume vawo ntani mulyo kwawo.

Oyo yiyo ga limonenene munazinyetu gedina Federico. Kaume kendi Antonio yige ga mu vaterere a pite moudigu ou wa mu gwene. Federico kwa tanta asi: “Apa Antonio ga dirukilire kombungakriste zetu, tatu ya kara vakaume. Ose kwa kere vakwafimbunga ntani ngatu hafere kuruganena kumwe. Konyima tupu, Antonio ta kara mukuronambunga. Age kapi tupu ga kere kaume kange nye ga tulire po sihonena sosiwa kwange.” Mwaza siruwo, Federico taya tura epuko. Ta hedere vakuronambunga va mu vatere, nye ga zumbanesere situmbukira sendi souzuvhisi wokukarerera nesi soukwafimbunga. Ngapi ga lizuvhire Antonio?

Apa Federico ga kere moudigu, kaume kendi Antonio ga mu purakenene nokumukorangeda

Federico ta uyunga asi: “Na dimbwilire asi Antonio ga lizuvhire kukora. Age ga hetekerere ko kukorangeda nge. Age kwa here ni tengwidire po elikwatakano lyange naJehova ntani kapi ga sigilire nge. Antonio kwa korangedere nge ni liture mo unene nye kapisi ni fe unye.” Antonio kwa uyunga asi: “ Ame kwa litulilire po siruwo sokukara unene naFederico. Ame kwa here a lizuvhe asi kuvhura a manguruke kutantera nge nkenye eyi ya mu kere komutjima.” Mwaza siruwo, Federico ta ya nkondopara hena pampepo, ta gwana situmbukira sendi souzuvhisi wokukarerera nesi soukwafimbunga. Antonio kwa tanta asi: “Nampili ngomu tuna kara monombungakriste dokulisiga, ose simpe vakaume wovanene.”

NGO LIZUVHA ASI VANA KUSIGILIRE NDI?

Ngapi no lizuvha nsene kaume koge gomunene a ku sigilira ove ono kara moudigu? Ayo kuvhura yi kukoresa komutjima pokugazadara ko asi: Ngani vhura kumugusira po ndi? Ukaume wetu ngau nkondopara ngwendi pwanare ndi?

Gazadara eyi ya horokerere Jesus mazuva gendi gokuhulilira pevhu. Age nga kara kumwe novapositoli vendi wovalimburukwi ntani va kere nomalikwatakano gomanene.  Jesus yiyo ga va tumbwire asi vakaume vendi. (Joh. 15:15) Nye yisinke ya horokere apa va mu kwete? Vapositoli kwa dukire. Komeho yi ka horoke oyo, Peturusa ga uyungire asi age kapi nga siga Jesus, nye momasiku gena, age kwa patanene asi kapi ga diva Jesus.—Mat. 26:31-33, 56, 69-75.

Jesus ga yi divire asi ga hepa kuyapita momaudigu pwagelike. Nye ga kere nokonda zokulizuvha asi vana mu sigilire. Apa va mu vhumbwire kapi ga handukilire varongwa vendi. Age kapi ga va diworokesere mapuko aga va rugene kukwatera mo apa va dukire va mu sige.

Jesus kwa korangedere Peturusa novapositoli vakwawo. Age kwa likidire asi ga va huguvarere pokuvapa mavyukiso omu nava sikisa mo sirugana somulyo sokuzuvhisa. Age kwa va tere asi awo simpe vakaume vendi. Eharo eli ga va likidire lyava tumangedere. Awo va hetekerere ko kukwatesa ko Jesus. Awo va sikisire mo situmbukira esi ga va sigilire.—Yirug. 1:8; Koros. 1:23.

Munazinyetukadi Elvira kwa simwitira eyi ya horokere apa va dilire kulizuvha nakaume kendi Giuliana. Elvira kwa uyunga asi: “Ame kwa lizuvhire udona apa Giuliana ga tanterere nge asi ya mu zuvhisire kukora komutjima eyi na rugene. Age ga kere nokonda zokuhanduka. Nye eyi ya tetukisire nge kuna kara asi age unene po kwa kere nosinka kwange noyitundwamo yonkareso zange. Age kapi ga demenenene kokukora oku na mu reterere, nye kwa kere nosinka kuhamena nge. Ame kuna kupandura Jehova mokupa nge kaume ogu a pakere unene sinka malizuvho gange.”

Yisinke na rugana kaume gomuwa nsene ukaume wawo moudigu una kara? Age nga vyukilira kuuyungisa kaume kendi nye monkedi zongwa. Kaume ogo nga kara ngwendi Natana naHusayi, ava va kwatesere ko kaume kawo momaudigu ntani nga kara ngwendi Jesus ogu ga gusilire po vakwawo. Ove kaume gwangoso ndi?