Zende koyikaramo

Zende koyikaramo

Nombangi daJehova

Horowora eraka Rukwangali

Papara eyi ya pitakana ngorodo

Papara eyi ya pitakana ngorodo

Wa gwana rumwe sitetwa songorodo? Vantu wovasesu tupu va si gwana. Nye mamiliyona govantu kwa gwana yuma yomulyo kupitakana oyo. Ayo kuna kara unongo waKarunga, ano “kapi ava u randa nongorodo zene-zene.”—Joba 28:12, 15.

AVA va hara kulironga Bibeli kwa fana ngwendi vantu ava ava papara ngorodo. Awo va hepa kulitura mo unene nokupapara moMatjangwa va gwane unongo wene-wene. Pokulironga Bibeli, yisinke natu vhura kulirongera ko pokukonakona nonkedi ntatu omu ava gwana ngorodo?

TO GWANA SITETWA

Tu ninke asi ove kuna kugenda konontere domukuro, to mono sininke sina kuvembera. To nyongama makura to dimburura asi ono gwana sitetwa songorodo. Aso sinunu kupitakana mutwe gositji sokaparu ntani udigu kusigwana ngwendi diamande zondiro. Nye simpe to tara-tara nsene no gwana yitetwa yimwe.

Mokulifana, ezuva limwe nampo Nombangi daJehova da ku wizilire nokuyazogera nove mbudi zomoBibeli. Nampo to diworoka apa wa gwene usili ou wa fana ngwendi sitetwa songorodo. Ove nampo wa lirongere moBibeli edina lyaKarunga, Jehova. (Epis. 83:18, NW) Ndi nampo wa lirongere asi kuvhura o kare kaume kaJehova. (Jak. 2:23) Ano wa dimbwilire asi ono gwana eyi ya pitakana ngorodo. Makura ya kutumangedere o hare kudiva ko yoyinzi.

TO GWANA YOYINZI

Yitetwa yongorodo pamwe kuyigwana komukuro. Owo ava yi papara kuvhura kugwana komukuro yitetwa yongorodo yomulyo gokusika komayovi gomanzi goyimaliwa.

Apa wa tamekere kulironga Bibeli noNombangi daJehova, nampo wa lizuvhire ngwendi muntu ana kupapara ngorodo. Pokuteda konovelise domoBibeli kwa gwederere kediwo lyoge. Apa wa litulire mo unene mokukonakona mausili gomoBibeli, wa lirongere omu no vhura kuhedera pepi naJehova nokukara meharo lyendi eli ngali kutwaredesa komwenyo gwanarunye.—Jak. 4:8; Juda 20, 21.

Ngwendi moomu muntu a litura mo mokupapara ngorodo, nove kulitura mo unene mokulironga ugawo womoBibeli ndi?

Ngwendi moomu muntu a litura mo mokupapara yitetwa yongorodo, nove nampo wa litura  mo unene mokupapara ugawo womoBibeli. Apa wa divire madi gomoBibeli, ayo nampo ya kutumangedere o ligave kwaKarunga nokugwana ekuho.—Mat. 28:19, 20.

TWIKIRA KUPAPARA!

Muntu kuvhura a gwane yitetwa yongorodo momamanya. Mamanya gamwe kwa kara mo ngorodo zene-zene mokurugana yivera ntani kuvhura kugabamuna mokugusa mo ngorodo. Kapisi ureru kumona ngorodo momanya. Morwasinke? Morwa mamanya ogo kuvhura kugwana mo tupu ngorodo zonunu zonograma 10. Nampili ngoso, owo ava zi papara kulitura mo unene morwa mulyo gwazo.

Nsene ono piti “petameko lyerongo lyaKristusa” wa hepa kulitura mo unene. (Heb. 6:1, 2) Wa hepa kulitura mo unene melirongo lyoge lyoBibeli o lironge yitwa yoyipe ntani nokuyitura pasirugana. Yisinke no vhura kurugana o gwanene mo uwa melirongo lyoge lyoBibeli nampili nare wa gusa kulironga?

Kara neharo lyokulironga. Litura mo mokukoneka yitwa yomulyo. Twikira kulitura mo unene ano ngo gwana ediwo lyaKarunga lyomoBibeli ntani nomavyukiso gendi. (Rom. 11:33) Mokugwederera kediwo lyoge, ruganesa yimbapiratjangwa ntani nayimwe eyi ya kara meraka lyeni. Papara mavyukiso ntani malimbururo komapuro aga o lipura kuhamena Bibeli. Pura wopeke matjangwa noyirongwa eyi ya va vatera nokuvakorangeda. Tantera ko wopeke eyi wa lironga melirongo lyoge lyoBibeli.

Nye wa ha kara tupu nositambo sokukara nediwo lyenzi. Morwa mupositoli Paurusa kwa rondwere asi ‘ediwo kunenepekesa muntu.’ (1 Kol. 8:1) Yipo nye, kondja mokulinunupika nokupameka epuro lyoge. Kukara nkenye apa noukareli wepata ntani nelirongo lyoBibeli lyanyamoge ngayi ku vatera o sikise mo nompango daJehova ntani nga yi kutumangeda o vatere wopeke. Nye unene po ngo hafa morwa wa gwana eyi ya pitakana ngorodo.—Yis. 3:13, 14.