Zende koyikaramo

Zende koyikaramo

Nombangi daJehova

Horowora eraka Rukwangali

Zuvhisa mbudi zongwa zonkenda zaKarunga

Zuvhisa mbudi zongwa zonkenda zaKarunga

‘Sanseka mbudi zongwa zonkenda zaKarunga.’ —YIRUG. 20:24.

MARUSUMO: 101, 84

1, 2. Ngapi mupositoli Paurusa ga likidire rupandu konkenda zaKarunga?

MUPOSITOLI Paurusa kwa uyungire kuhamena Karunga asi: “Nkenda zendi kwange kapisi zomawoko-woko.” (Resa 1 Vakolinte 15:9, 10.) Paurusa kwa yi divire asi nkenda zaKarunga kapi za mu fililire morwa nare nga hepeke Vakriste.

2 Komeho a ka fe, Paurusa kwa tjangerere Timoteusa asi: “Ame tani pandura Jesus Kristusa, Hompa gwetu, ogu ga pa nge nonkondo ni sikise mo yirugana yange. Tani mu pandura morwa ga huguvara nge, yiyo ga tura nge asi ni mu kerere.” (1 Tim. 1:12-14) Sirugana musinke oso? Paurusa kwa tanterere vakuronambunga womoEfeso eyi ya hamenene mo mosirugana oso pokutanta asi: “Nye ame nombili si zayo ndi asi ni ruve mwenyo gwange. Sinene tani sikisa mo nehafo rugendo rwange nosirugana esi ga pa nge Hompa Jesus asi ani sanseke Mbudi zoNgwa zonkenda zaKarunga.”Yirug. 20:24.

3. Sirugana musinke va mu pere Paurusa? (Tara efano pepenuno 26.)

 3 ‘Mbudi zongwa’ musinke Paurusa ga sansekere ezi za nkondopekere nkenda zaJehova? Age kwa tanterere Vakriste womoEfeso asi: “Amesi mwa zuvha asi Karunga kwa huguvarera nge nkenda zendi, ni zi mu divisire.” (Efe. 3:1, 2) Paurusa kwa mu pere sirugana sokusanseka mbudi zongwa kovapagani asi nawo kuvhura kukapangera naKristusa meguru. (Resa Vaefeso 3:5-8.) Paurusa kwa tulire po sihonena sosiwa koVakriste vanaina kuhamena upampi ou ga kere nawo mokuzuvhisa ntani ga likidire asi nkenda ezi ga mu likidire Karunga kapisi “zomawoko-woko.”

NKENDA ZAKARUNGA KUKUTUMANGEDA NDI?

4, 5. Morwasinke ‘mbudi zongwa zoUhompa’ za karera hena “mbudi zongwa zonkenda zaKarunga”?

4 Pomazuva gopouhura, vantu vaJehova kwa va pa sirugana sokuzuvhisa ‘mbudi zongwa zoUhompa waKarunga mwa za uzuni mudima, zi kare umbangi konomuhoko nadinye.’ (Mat. 24:14) Mbudi ezi atu zuvhisa yizo hena “mbudi zongwa zonkenda zaKarunga” morwa mauwa nagenye aga tuna kundindira mepangero lyoUhompa ngatu ka ga gwana morwa nkenda zaJehova ezi ga tu likida kupitira mwaKristusa. (Efe. 1:3) Ose kuna kuhonena Paurusa pokulikida rupandu konkenda zaJehova pokulitura mo unene mokuzuvhisa ndi?—Resa Varoma 1:14-16.

5 Katu lirongere mosirongwa pita asi morwa nkenda zaJehova ose vananzo kuna kugwanena mo mauwa gomanzi. Yipo nye twa karera nositumbukira sokutantera vantu navenye omu Jehova ga tu likida eharo ntani nomu nava gwanena mo mauwa. Momaruha musinke omu Karunga ga tu likida nkenda aga natu vhura kutantera ko wopeke?

ZUVHISA MBUDI ZONGWA KUHAMENA SIZOWESESO

6, 7. Apa atu fatwilire vantu sizoweseso, ngapi hena atu sanseke nkenda zaKarunga?

6 Mouzuni ou woudona, vantu wovanzi kapi ava mono nzo asi sininke sosidona, ntani kapi va yi dimburura asi va hepa kuvazowora. Nye sinzi sawo va yi dimburura asi kurugana yininke yoyidona kapi ayi reta ruhafo. Apa ava lirongo noNombangi daJehova, wovanzi kuyakwata egano asi yisinke nzo nomu za tu kundama ntani eyi natu rugana yipo va tu zowore kononzo. Vantu wonomutjima donongwa kuhafa apa ava lirongo asi morwa eharo lyenene nonkenda zendi, Jehova kwa tumine Munwendi pevhu a ya tu zowore konzo nokonomfa.—1 Joh. 4:9, 10.

7 Paurusa kwa tjenge kuhamena MunwaJehova asi: “MwaKristusa yimo twa zowokera morwahonde zendi, makura nonzo detu yiyo va di dongonona po. Nkenda zaKarunga nzi unene.” (Efe. 1:7) Nzambo zosizoweseso kulikida omu Karunga ga tu hara unene ntani hena kulikida nkenda zendi zonene kwetu. Ose kuhafa pokudiva asi nsene tu pura mosizoweseso saJesus, nonzo detu ngava di tu dongwenena po ntani ngatu kara nezwi lyewa lyokomutjima. (Heb. 9:14) Ezi kuna kara mbudi zongwa natu vhura kutantera ko wopeke.

 VATERA VANTU VA TUNGE PO UKAUME NAKARUNGA

8. Morwasinke vantu va hepera kuvakwatakanesa naKarunga?

8 Ose kwa kara nositumbukira sokutantera vantu asi awo kuvhura kutunga po ukaume noMusiti gwawo. Komeho vantu va tunge po epuro monzambo zaJesus, Karunga kuvatara ngononkore dendi. Mupositoli Johanesa kwa tjenge asi: “Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo, age ehandu lyaKarunga ali mu kerere.” (Joh. 3:36) Nzambo zaKristusa kupa vantu mpito zokuvakwatakanesa naKarunga. Paurusa kwa tente asi: “Pwanare none kwa kere koure naKarunga. One kwa kere nonkore dendi mokurugana nomokugazadara yoyidona. Nye ntaantani Karunga ana mu kwatakanesesa nendi konomfa dorutu rwaMunwendi.”—Koros. 1:21, 22.

9, 10. (a) Sirugana musinke Kristusa ga pere vamumbya vendi wovagwavekwa? (b) Ngapi omu ‘nonzwi dapeke’ adi vatere vagwavekwa?

9 Kristusa kwa pa vamumbya vendi wovagwavekwa ava vana kara pevhu sirugana esi ga tumbwire Paurusa asi ‘sirugana sokukwatakanesa.’ Paurusa kwa yi fatwilire oyo pokutjangera Vakriste wovagwavekwa asi: ‘Nayinye eyi Karunga ga yi rugana, ogu ga tu kwatakanesa namwene mwaKristusa, yiyo ga tu pa sirugana sokuninka vamwe hena asi, nawo va likwatakanese nendi mwaKristusa. Karunga kwa kwatakanesa mwaKristusa uzuni namwene, age kapi hena ga va varwililire nonzo. Age yiyo ga tu huguvarera Mbudi zekwatakaneso asi tu zi sanseke. Ose nyose vatumwa vaKristusa, Karunga mwene mwetu a mu korangedere. Tatu mu kanderere medina lyaKristusa asi: sigeni a mu kwatakanese naKarunga.’—2 Kol. 5:18-20.

10 ‘Nonzwi dapeke’ kulizuvha mfumwa kuvatera vagwavekwa mosirugana oso. (Joh. 10:16) Ado kulitura mo unene mokuronga vantu usili womoBibeli nokuvavatera va tunge po ukaume naJehova. Oro kuna kara ruha romulyo rombudi zongwa zonkenda zaKarunga ezi atu zuvhisa.

ZUVHISA MBUDI ZONGWA ASI KARUNGA KUZUVHA MAKANDERERO

11, 12. Morwasinke zina karere mbudi zongwa kovantu va lironge asi kuvhura va kanderere kwaJehova?

11 Vantu wovanzi kukanderera morwa kuvaninkisa va lizuvhe nawa, nye kapi va yi pura asi Karunga kuzuvha makanderero. Nye va hepa kudiva asi Jehova “kuzuvha makanderero.” Ndafita kwa tjenge asi: “Yeeyi ove kuzuvha makanderero. Vantu mudima ngava wiza koge mokonda zononzo dawo. Mausima getu ga tu toona, nye ove kugadongonona po.”—Epis. 65:2, 3.

12 Jesus kwa tanterere varongwa vendi asi: “Nsene ngomu hundilira yuma medina lyange, ngani yi rugana.” (Joh. 14:14) “Yuma” oyo kwa tamba koyininke nayinye eyi ya liza nompango zaJehova. Johanesa kwa tente asi: “Yipo nye twa kerera nemanguruko kombinga zaKarunga, asi ta tu zuvhu ntene tu mu hundira eyi yokuliza nompango zendi.” (1 Joh. 5:14) Ayo ya wapa mokuronga vantu asi ekanderero kapisi sininke tupu sokuvaninkisa va lizuvhe nawa, nye alyo kuna kara nkedi ezi atu hedere “kosipundi souhompa saKarunga gonkenda.” (Heb. 4:16) Pokuvaronga va kanderere monkedi zouhunga ntani kwaKarunga gosili ntani yokuliza nompango zendi, ngatu va vatera va tulise po ukaume naJehova ntani va gwane ehengagwido poyiruwo yoyidigu.—Epis. 4:1; 145:18.

 NKENDA ZAKARUNGA MOUZUNI WOUPE

13, 14. (a) Situmbukira sosinene ngava ka gwana vagwavekwa? (b) Yisinke vagwavekwa ngava ka ruganena vantu?

13 Nampili konyima zokuzonagura uzuni ou woudona, Jehova simpe nga tu likida nkenda. Paurusa kwa tjenge kuhamena situmbukira sosinene esi Karunga ga pa vagwavekwa, ava ngava ka pangera kumwe naKristusa moUhompa wemeguru asi: “Morwa ufenkenda waKarunga unene unene, neharo lyendi eli ga tu hara enene unene, yiyo ga tu tura mwenyo kumwe naKristusa, apa twa kere vafe pampepo morwamazonaguro getu. Monkenda zaKarunga yimo mwa parukira. Age kwa tu pindura koufe kumwe naKristusa, tu pangere nendi meguru. Age kwa yi rugana eyi, asi a likide nomoyiruwo yokomeho unzi wonkenda zendi neharo lyendi eli ga tu hara mokutupa Jesus Kristusa.”—Efe. 2:4-7.

14 Jehova kwa wapaikira vagwavekwa mauwa gomanzi gokutetukisa apa ngava ka pangera kumwe naKristusa meguru. (Ruk. 22:28-30; Fil. 3:20, 21; 1 Joh. 3:2) Jehova nga ka va likida “unzi wonkenda zendi.” Awo ngava kara “Jerusarema zompe” mufuko gwaKristusa. (Ehor. 3:12; 17:14; 21:2, 9, 10) Awo ngava ka lihameka naJesus ‘mokuverura yirongo’ pokumangurura vantu kononzo ntani monomfa dogoro ngava ka sikilire mo.—Resa Ehororo 22:1, 2, 17.

15, 16. Ngapi omu Jehova nga ka likida nkenda zendi ‘kononzwi dapeke’?

15 MoVaefeso 2:7 kutanta asi Jehova simpe nga ka likida nkenda zendi “moyiruwo yokomeho.” Vakareli vaJehova ngava ka limonena “unzi wonkenda zendi.” (Ruk. 18:29, 30) Age nga ka likida nkenda zendi zonene apa nga ka vhumbura vafe “mosirongo sovafe” ndi monontoko. (Joba 14:13-15; Joh. 5:28, 29) Vagara novakadi wovalimburukwi ava va fire komeho Kristusa a gave nzambo zendi ntani ‘nonzwi dapeke’ ava vana kufa noulimburukwi momazuva gopouhura ngava ka va vhumbura va ka karere Jehova.

16 Mamiliyona govantu ava va fa va hana kudiva Karunga, nawo ngava ka va vhumbura. Awo ngava va pa mpito zokulimburukwa koupangeli waJehova. Johanesa kwa tjenge asi: “Ame makura tani mono vafe wovakurona nava wovanona, awo kuna sikama komeho zosipundi souhompa. Makura tava penuna nobuke, pomuhowo buke zomwenyo. Vafe makura tava va pangwisisa koyirugana yawo, moomu va yi tjanga monobuke. Efuta makura tali gava vafe ava va kere mo. Nomfa nosirongo sovafe nayo tayi gava vafe ava va kere mo. Awo navenye tava va pangura, nkenye ogu mokuliza noyirugana yendi.” (Ehor. 20:12, 13) Ava ngava ka vhumbuka ngava hepa kukalironga omu nava tura pasirugana nompango domoBibeli. Ntani ngava ka hepa kukakwama mapukururo ‘gomonobuke’ donompe edi nga di ka likida eyi ana va harere Jehova va rugane mokuparuka mouzuni woupe. Nkedi zimwe hena ezi nga ka likida Jehova nkenda  zendi, kuna kara apa nga ka tu horwera eyi ya kara monobuke odo.

TWIKIRA KUZUVHISA MBUDI ZONGWA

17. Yisinke natu diworoka apa atu zuvhisire vantu?

17 Ngomu uhura una kuhedera pepi, sirugana setu kuna kara sokuzuvhisa unene mbudi zongwa zoUhompa. (Mar. 13:10) Mbudi zongwa kunkondopeka nkenda zaJehova. Twa hepa kuyidiworoka oyo apa atu zuvhisa. Sitambo setu apa atu zuvhisa kuna kara sokufumadeka Jehova. Ose kuyirugana oyo pokutantera vantu asi mauwa nagenye ngatu ka gwana mauwa mouzuni woupe kuna kara morwa nkenda zaJehova.

Zuvhiseni nomupampi “ngovagendesi wovawa wonkenda zaKarunga zonzi-zonzi.” —1 Pet. 4:10 (Tara paragarafu 17-19)

18, 19. Ngapi omu atu yererepeke nkenda zaJehova?

18 Ose kuvhura kutantera vantu apa atu va zuvhisire asi mepangero lyaKristusa ngatu ka gwana mauwa nagenye gosizoweseso ntani ngatu ka sikilira mo. Bibeli kutanta asi: “Unsitwe ngava u zowora mo moupika wezonauko, ngau ze mezowoko lyouyerere wovana vaKarunga.” (Rom. 8:21) Oyo ngayi ka sika mo, morwa nkenda zaJehova zonene.

19 Ose twa kara nosirugana sokutantera vantu kuhamena etumbwidiro lyemEhororo 21:4, 5 asi: “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.” Ano Jehova ogu ga hingilire kosipundi souhompa, ta tanta asi: “Tara, nayinye tani yi ninki yi kare yoyipe.” Age ta tanta hena asi: “Tjanga, yeeyi nonkango edi dosili dokuvhura kuhuguvara.” Apa atu zuvhisire vantu mbudi zongwa noupampi, ose kuyererepeka nkenda zaJehova.