Zende koyikaramo

Zende koyikaramo

Nombangi daJehova

Horowora eraka Rukwangali

“Wa ha tjira, ame tani ku kwafa”

“Wa ha tjira, ame tani ku kwafa”

GAZARA ASI ove kuna kugenda masiku. Hararasi to zuvhu muntu ana kukukwama. Apa no hageka kugenda, nage ta hageke. Nye apa no genderera nage ta genderere. Makura to dukire kembo lyamukweni. Apa mukweni na kuzegurura, mutjima goge tagu tengwire mo.

Nampo kapi ya ku horokera rumwe oyo, nye pwa kara yimwe meparu eyi nayi ku retera sinka. Pasihonena, wa kara nonkareso ezi wa hara kusiga nye kukudigopera ndi? Nare wa gusa kupapara yirugana nye kapi o yi gwana ndi? Ono kara nosinka soukurupe nomaudigu aga au reta ndi? Koyili yimwe yina kukuretera sinka ndi?

Yi kare asi udigu musinke ono kara nawo, ove no hara kugwana muntu ogu no tantera yinka yoge ntani ogu na vhura kukuvatera. Wa kara nakaume gwangoso ndi? Nhi, Jehova kaume gomuwa. Ngwendi moomu va yi likida mwaJesaya 41:8-13, Jehova kwa kere kaume kaAbirahamu. Movelise 10 ntani 13, Jehova kuna kutantera vakareli vendi asi: “Wa ha tjira – ame noge na kara! Ame nyame Karunga goge – patupu yokukutjilisa! Ngani ku nkondopeka tani ku kwafa; ngani ku popera tani ku parura. Nyame HOMPA Karunga goge; ogu ani ku nkondopeke nina kutanta asi: ‘Wa ha tjira, ame tani ku kwafa.’”

“NGANI KU POPERA”

Ngapi ono kulizuvha kuhamena nonkango odo? Gazadara asi Jehova ngwendi kuna kugonyonona kuwoko kwendi yipo a ku vatere moudigu ou ono kara. Apa ana kuyirugana oyo, ta ku hengagwida asi: “Wa ha tjira, ame tani ku kwafa.”

Ove kulizuvha asi Jehova Guhya geharo ntani age Kaume ogu nga ku vatera momaudigu ndi? Age kukupakera mbili ntani ana hara kukuvatera. Nsene ono kara nomaudigu, Jehova ana hara o lizuvhe asi ta ku gamene morwa ga ku hara unene. Age ‘kwa liwapaikira nkenye apa a kukwafe moudigu.’—Epis. 46:1.

 KULIZUVHA UNZONI

Vamwe kulizuvha unzoni kweyi va rugene ntani kugazara asi Karunga kapi ta va gusire po. Nsene yimo o lizuvhu, gazadara kuhamena Joba gomulimburukwi ogu ga tambwire nonzo edi ga ‘rugene mounona wendi.’ (Joba 13:26) Ndafita nage kwa lizuvhire unzoni makura ta likwambere kwaJehova asi: “Dongwenena nge po nonzo nomausima gange gopoudinkantu.” (Epis. 25:7) Morwa kudira kusikilira mo, natuvenye ‘kwa zona, makura uyerere waKarunga yiyo twa u pira.’—Rom. 3:23.

Nonkango daJesaya egaununo 41 kwa tembe koVaisraeli. Awo kwa zonene unene dogoro Jehova ta tokora kuvagava momawoko goVababironi va va tware kounkwate. (Jes. 39:6, 7) Nye Karunga kwa gazarere komeho zosiruwo mokukazowora owo va litezwilire nokutengura kwendi. (Jes. 41:8, 9; 49:8) Jehova simpe kufira nkenda owo vana hara kulitezurura kutundilira komutjima.—Epis. 51:1.

Tu tareni sihorokwa saTakuya, * ogu ga here kusiga nkareso zokutarera mafano goruhonda ntani kulidanesa koyilyo yonomuga. Nye nkenye apa ngayi mu sumpire. Ngapi ga lizuvhire? Age kwa tanta asi: “Ame kwa lizuvhire asi kwato mulyo, nye apa na likwamberere kwaJehova a gusire nge po, ame kwa lizuvhire ngwendi kuna kukatura nge.” Ngapi ga yi rugene Jehova? Vakuronambunga womombungakriste zawo kwa mu tanterere asi nkenye apa na gwira monkareso zendi ga hepa kuvadivisa. Age kwa tanta asi: “Kapi ya kere ureru kuvadivisa, nye apa ngani va tantere, na gwene nonkondo.” Makura apa ga wizire mutareli gonombunga, vakuronambunga tava mu tantere a ka dingure Takuya. Mutareli gonombunga ta tantere Takuya asi: “Kapi na wiza tupu. Nye vakuronambunga yiwo vana tumu nge koge. Awo kuna hara ni ku korangede.” Takuya kwa tanta asi: “Ame nyame ngani zono, nye Jehova kupitira movakuronambunga ga liwapaikilire kuvatera nge.” Takuya kwa tulire po marunduruko ta ya kara muzuvhisi gokukarera ano ngesi kuna kurugana koBeteli. Ngwendi Takuya, Karunga nga ku katura moudigu woge.

SINKA SOYIKWEPARU

Wovanzi kuna kara nosinka morwa kupira yirugana. Vamwe kwa zumbanesa yirugana yawo ntani kuna kuvadigopera kugwana ko yimwe. Ngapi no lizuvha nsene asi nkenye oku ono kupapara kapi vana kukukuta? Moukaro wangoso, vamwe kulizuvha asi awo kwato mulyo. Ngapi Jehova na vhura kukuvatera? Age kuvhura a dire kukupa poopo yirugana, nye kuvhura a ku vatere o diworoke nonkango dahompa Ndafita asi: “Ntaantani nina kurupa, na kere ni mumati, nye simpe kapi na mona rumwe muhungami asi va mu zumbe, ndi asi vana vendi va hehere nondya.” (Epis. 37:25) Ove mulyo kwaJehova ntani nga “ku parura,” nokukuvatera o gwane eyi ono hepa yipo o twikire kumukarera.

Ngapi Jehova na vhura kukuvatera nsene o zumbanesa yirugana yoge?

 Sara gomosirongo saColombia ga gwene evatero lyaJehova. Yirugana eyi nga rugana ngayi mu futu nawa nye kapi ngayi mu pe siruwo. Age kwa here kuruganena Jehova unene, makura ta hageke yirugana yendi a kare muzuvhisi gokukarerera. Nye kapi ga gwene yirugana yonovili dononsesu. Ta paturura ngesefa nye kapi ga gwene mo nawa yimaliwa makura ta zi pata. Age kwa tanta asi: “Nevatero lyaJehova ame na lididimikilire nomvhura ntatu na hana yirugana.” Sara ga lirongere kudira kurandanga yininke eyi ga dilire kuhepa ntani kudira kulipakera sinka seyi yomungura. (Mat. 6:33, 34) Konyima, muhona gwendi gwanare kwa here kumupa yirugana yendi yanare. Nye Sara kwa tente asi nsene va mu pulisira kurugana novili dononsesu ta yi tambura. Nampili ngomu ana kudira kutambura yimaliwa yoyinzi, age simpe kuna kara muzuvhisi gokukarerera. Mwanayinye eyi ga pita, Sara kwa tanta asi: “Jehova kwa vatera nge.”

SINKA SOUKURUPE

Sinka simwe vana kulipakera vantu kuna kara ukurupe. Apa vantu wovanzi ava siki ponomvhura dokuhageka yirugana, awo kukara nosinka nsene asi ngava kara noyimaliwa yokugwanene po mokulirera vene. Awo hena kukara nosinka kuhamena mauvera aga au reta ukurupe. Ndafita kwa likwamberere kwaJehova asi: “Wa ha nyengera nge ukurupe wange; wa ha zumbira nge asi morwa nonkondo dina pili nge!”—Epis. 71:9, 18.

Yisinke nayi vatera vakareli vaJehova va lizuvhe asi nga va kwafa apa ngava kurupa? Va hepa kutunga epuro mwaKarunga asi nga va pa eyi va hepa. Nsene asi awo kwa parukire eparu lyondiro, va hepa kurerupika eparu lyawo. Awo kuvhura ngava dimburure asi kuvhura va kare va kangure pokulya “yikwahidi” kupitakana “nyama zongwa.” (Yis. 15:17) Nsene o litura mo unene kuhafesa Jehova, age nga ku pakera mbili apa ngo kurupa.

José naRose kumwe naTony ntani Wendy

Tu tareni sihonena saJosé naRose ava va karera Jehova siruwo nasinye ure wonomvhura 65. Monomvhura odo, va hepere kupakera mbili oguhwe vaRose, ava va hepere evatero nkenye apa. Ntani José kwa mu gwene uvera wokankera. Jehova ga vaterere valikwali ava ndi? Nhi. Monkedi musinke? Tony naWendy, valikwali womombungakriste zawo kwa va pere nzugo. Awo kwa here kuvatera vazuvhisi wosiruwo nasinye pokudira kuvafutisa mararo. Apa Tony nga dimbi sure nga mono José naRose kuna kuza nkenye apa mokuzuvhisa. Age kwa va here morwa upampi wawo ntani sihonena sawo kwa mu gumine komutjima. Pokudimburura asi vakurupe owo kwa ruganena Jehova siruwo sosire, ayo kwa tumangedere Tony naWendy va va pakere mbili. Awo kwa va pakera mbili ure wonomvhura 15. José naRose ngesi kuna kara koyiha yonomvhura 85. Awo kulizuvha asi Jehova kwa va pakera mbili pokuruganesa Tony naWendy.

Karunga kuna kugonyonona kuwoko kwendi a ‘ku popere nokukuparura.’ Ove ngo tambura evatero lyaJehova ogu ga tumbwidira asi: “Wa ha tjira, ame tani ku kwafa” ndi?

^ para. 11 Madina gamwe kwa ga rundumuna.