Zende koyikaramo

Zende koyikaramo

Nombangi daJehova

Horowora eraka Rukwangali

Morwasinke natu ‘vangararera’?

Morwasinke natu ‘vangararera’?

“Kapi mwa diva asi Hompa gweni ezuvake nga wiza.”—MAT. 24:42.

MARUSUMO: 136, 129

1. Fanekesa eyi ya karera nomulyo mokunomena siruwo ntani neyi yina kuhoroka. (Tara efano pepenuno 13.)

KOSIGONGI apa atu mono nominute kuna kulivarura kotivi kutulikida asi siruwo sina siki tu hingire nokupurakena musika. Twa hepa ngano kuhingira teete tu purakene komusika yipo tu wapaike magano nonomutjima detu koyiuyungwa nava ka gava. Ngapi nsene vamwe simpe kuna kusimwitira novakwawo ndi kuna kurugana tupu yapeke va hana kudiva asi elikwamo lina tameke? Kulikida asi awo kapi vana nomene siruwo ntani kapi vana mono asi munasipundi ana hingire positantara ano musika kuna kudimba ntani vantu vana hingire. Sihorokwa oso kuvhura kutuvatera tu kare tuna vangarara kosihorokwa sosinene esi sina kara pepi. Sihorokwa musinke oso?

2. Morwasinke Jesus ga tantererere varongwa vendi asi “vangarareni”?

2 Apa ga uyungire kuhamena ‘uhura wouzuni,’ Jesus Kristusa kwa tumangedere varongwa vendi asi: “Rungarareni, one mu  vangarare, yeeyi kapi mwa diva apa ngasi sika mo siruwo.” Konyima tava tumangeda hena asi: “Vangarareni.” (Mat. 24:3; resa Marukusa 13:32-37.) MwaMateusa kulikida hena asi Jesus ga rondwere vasikuli vendi asi: “Rungarareni, yeeyi kapi mwa diva asi Hompa gweni ezuvake nga wiza. . . . Yipo nye nomu liwapaikilira none, yeeyi MunwaMuntu nga wiza movili zohararasi.” Ta tanta hena asi: “Yipo nye nomu rungararera, yeeyi mwa dira kudiva ezuva novili.”—Mat. 24:42-44; 25:13.

3. Morwasinke erondoro lyaJesus lya karera nomulyo unene kwetu?

3 Erondoro lyaJesus mulyo unene kwetu ose Nombangi daJehova. Ose twa diva asi kuna kuparuka “pehagero lyouzuni” ntani asi siruwo sina hupu ko sisupi komeho “udigu wounene” ngau tameke. (Ndan. 12:4; Mat. 24:21) Ose kuna kumona mouzuni mudima yita noudona noudinikarunga nomaukareli goyimpempa nonzara nomauvera ntani makankamo gevhu. Ntani ose kuna kumona vantu vaJehova kuna kudivisa mbudi zoUhompa nakunye. (Mat. 24:7, 11, 12, 14; Ruk. 21:11) Ose kuna kundindira nononkondo eyi ngayi horoka apa nga wiza Hompa ntani apa ngasi sika mo sitambo saKarunga.—Mar. 13:26, 27.

SIRUWO KUNA KUHEDERA PEPI

4. (a) Morwasinke natu uyungira asi Jesus ngesi ana diva apa ngazi wiza Harumagedoni? (b) Nampili ngomu twa dira kudiva siruwo esi ngau wiza udigu wounene, nye yisinke twa hepa kudiva?

4 Ose twa yi diva asi nkenye ruha posigongi kwa kara nosiruwo sokutameka. Nye ose kapi twa diva mvhura nezuva nosiruwo apa ngau tameka udigu wounene. Apa Jesus ga kere pevhu, kwa tente asi: “Nagumwe si ga diva asi ezuva nosiruwo apa ngasi sika mo, novaengeli si vemeguru noMuna si, ntudi Guhya ntani.” (Mar. 13:32) Nye ngesi Kristusa va mu pa nonkondo meguru nga ya rwise uzuni waSatana. (Ehor. 19:11-16) Eyi kulikida asi Jesus ngesi ana diva apa ngazi wiza Harumagedoni. Nye ose kapi twa yi diva. Yiyo ya karera nomulyo asi tu vangarare dogoro udigu wounene ngau wize. Jehova ga diva siruwo apa ngau wiza udigu owo. Ntani ga tokora siruwo esi ngau wiza uhura wouzuni. Udigu wounene kapi ngau ‘liranga,’ ga diva nawa-nawa apa ngau tameka. (Resa Habakuku 2:1-3.) Ngapi tuna yi diva asi ngayi horoka?

5. Gava sihonena sina kulikida asi mauporofete gaJehova nkenye apa kusika mo kuliza nosiruwo esi ga tokora.

5 Mauporofete gaJehova nkenye apa kusika mo kuliza nosiruwo sendi. Koneka apa ga mangwilire Vaisraeli moEgipite. Kombinga zoNisani 14, nomvhura 1 513 komeho Jesus a wize pevhu, Mosesa kwa tente asi: “Ano eyi da pwa odo nomvhura mafere gane nonomurongo ntatu, mezuva lyoolyo yimo da tundire mo nombunga dovakwayita nadinye daHOMPA mosirongo saEgipite.” (Ex. 12:40-42) “Nomvhura mafere gane nonomurongo ntatu” kwa tamekere apa egwanekero ga tulire po Jehova naAbirahamu lya ya sikire mo pasirugana nomvhura 1 943 komeho Jesus a wize pevhu. (Gar. 3:17, 18) Konyima, Jehova kwa ya tanterere Abirahamu asi: “Ruvharo roge ngaru kara vanayirongo mosirongo peke; ngava ka kara mo vapika, tava va rugana momudona nomvhura mafere gane.” (Gen. 15:13; Yirug. 7:6) “Nomvhura mafere gane” kwa tamekere nomvhura 1 913 komeho Jesus a wize pevhu, apa Isimayeli ga ninkagwire Isaka posiruwo esi va mu hagekesere kuzamwa ntani kwa ya hege  apa va tundire Vaisraeli moEgipite nomvhura 1 513 komeho Jesus a wize pevhu. (Gen. 21:8-10; Gar. 4:22-29) Jehova ga tokwere asi konyima zonomvhura mafere gane ta ya zowora vantu vendi.

6. Morwasinke natu karera nehuguvaro asi Jehova nga tu zowora?

6 Josuwa, ogu nage ga ka tundire moEgipite, kwa diworokesere Vaisraeli asi: “Nkenye ogu ana diva momutjima gwendi nomomwenyo gwendi asi, HOMPA Karunga gweni ana mu pe yininke nayinye yoyiwa, eyi ga mu tumbwidira. Matumbwidiro nagenye gana siki mo. Nalimwe si lya hupa ko.” (Jos. 23:2, 14) Kuvhura tu huguvare metumbwidiro lyaJehova asi nga tu zowora poudigu wounene, nsene tu twikira kuvangarara.

MOKUKAPARUKA TWA HEPA KUVANGARARA

7, 8. (a) Situmbukira musinke ga kere naso munomeni, ntani yisinke natu lirongera ko? (b) Gava sihonena kweyi ya horokere apa vanomeni va rere.

7 Kuvhura tu lirongere ko koVaisraeli kuhamena mulyo gokuvangarara. Poyiruwo yanare, yitata yoyinzi ngwendi Jerusarema kwa yi kundurukidire makuma gomare. Makuma nomaruhungu ogo ngaga va popere nokuvavatera va nomene nonkore dawo. Mutenya nomasiku, komakuma ogo kwa kere ko vanomeni. Awo kwa kere nositumbukira somulyo sokudivisa vatungimo kuhamena nkenye siponga sina kuwiza. (Jes. 62:6) Vanomeni va hepere kuvangarara morwa eparu lyovantu kwa kere momawoko gawo.—Hes. 33:6.

8 Munahistoli goMujuda Josephus kwa simwitilire asi momvhura 70, vakwayita woVaroma kwa homwene ruhungu rwekuma rwaAntonia oru rwa livyukire nekuma lyaJerusarema morwa vanomeni kwa rere. Makura Varoma tava hwilire montembeli nokuzihwika, ano Jerusarema kwa zi zonagwire po.

9. Yisinke va dira kudiva vantu wovanzi?

9 Naina sinzi soyirongo kuna kara novanomeni ponomururani, ngwendi vaporosi ntani novakwayita. Awo kunomena nkenye ogu ana hara kuwiza momukunda gwawo ndi vanankore ava vana kuhara kudonganesa mpora zosirongo sawo. Nampili ngoso vanomeni owo kumona tupu matjiliso gokutunda ko mapangero govantu. Nye kapi va diva kuhamena epangero lyaKarunga lyemeguru eli ana kupangera Kristusa ntani eyi ngali ka rugana mokukapangura vantu. (Jes. 9:6, 7; 56:10; Ndan. 2:44) Nsene tu vangarara, ose ngatu kara tuna liwapaikire apa ngali sika mo ezuva olyo.—Epis. 130:6.

TAKAMESA YA HA KU DONGANESA YUMA

10, 11. (a) Kosinke twa hepa kutakamesa, ntani morwasinke? (b) Yisinke yina kukunkisa o pure asi Muzonaguli ga pukisa vantu va nyoke kutambura mauporofete gomoBibeli?

10 Gazara kuhamena munomeni ogu ana vangarara masiku mudima. Monongura kuvhura a tameke kukumauka morwa ana roroka unene. Mokulifana, ngomu uhura una kuhedera pepi kuna kutudigopera kuvangarara. Nsene tu dira kuvangarara, eparu lyetu ngali kara mosiponga! Tatu  ka konakona yininke yitatu eyi nayi vhura kutudonganesa mokudira kuvangarara nsene kapi tuna kutakamesa.

11 Muzonaguli kupukisa vantu va dire kupakera sinka mauporofete gomoBibeli. Komeho zonomfa dendi, Jesus kwa rondwere varongwa vendi yikando yitatu kuhamena “mupangeli gouzuni ou.” (Joh. 12:31; 14:30; 16:11) Jesus ga yi divire asi Muzonaguli nga ninkisa vantu va dire kupakera sinka mauporofete gaKarunga kuhamena uhura wouzuni. (Sef. 1:14) Satana kwa zonagura nondunge dovantu kupitira momaukareli goyimpempa. Apa o uyunga novantu, wa dimburura asi Satana “ga zonagura nondunge dava va dira kupura” kuhamena uhura wouzuni ntani asi Kristusa ga tameka kupangera moUhompa waKarunga ndi? (2 Kol. 4:3-6) Rungapi o ligwanekere novantu ava ava nyoka kutambura eyi ono kuvazuvhisira? Sinzi sawo kapi ava yi tambura asi uhura pepi una kara.

12. Morwasinke natu dilira kupulisira Muzonaguli a tu pukise?

12 Wa ha pulisira nkareso zovantu zi ku dompese mutjima ndi zi ku ninkise o dire kuvangarara. Ove wa diva yoyinzi. Paurusa kwa tjangerere vapuli vakwaawo asi: “Nyonevene mwa diva nawa-nawa asi ezuva lyaHompa ngali wiza. Moomu a wiza muwidi masiku.” (Resa 1 Vatesaronika 5:1-6.) Jesus kwa rondwere asi: “Omu liwapaike, morwa MunwaMuntu nga wiza vili ezi mwa dira kudiva.” (Ruk. 12:39, 40) Satana ntaantani nga pukise vantu va pure asi pana kara ‘mpora kutupu upyakadi.’ Nga ninkisa vantu va gazare asi nayinye kuna kugenda po nawa mouzuni. Ose ngapi? Nsene tu ‘vangarara, tu kare vandjewa-ndjewa,’ ezuva lyompanguro kapi ngali ya tu ‘kondekedera pamuwidi.’ Yiyo twa hepera kuresa Nonkango daJehova Karunga nkenye ezuva nokugazadara ko eyi ana kututantera.

13. Ngapi mpepo zouzuni zina kundama vantu, ntani ngapi natu zi nyokera po?

13 Mpepo zouzuni ou kuna kuninkisa vantu va rare pampepo. Vantu wovanzi kuna litura mo unene moyinka yeparu yankenye ezuva kapi vana kara nosiruwo ‘sokuzuvha nonkango daKarunga.’ (Ruk. 11:28) Awo kuna kuhokwa  tupu yininke yomouzuni eyi ayi tumangeda “edowo lyorutu nedowo lyomeho.” (1 Joh. 2:16) Ntani uzuni kuna kuninkisa vantu va liture mo unene ‘momahafo goparutu,’ ntani mazedo kuna kuligwederera nkenye mvhura. (2 Tim. 3:4) Paurusa yiyo ga tantererere Vakriste asi: “Walye omu twara seke marutu geni asi madowo gago ga ga pwe,” morwa oyo kuninkisa muntu a rare pampepo.—Rom. 13:11-14.

14. Yisinke vana kuturondora mwaRukasa 21:34, 35?

14 Mevango lyokutambura mpepo zouzuni, ose kupulisira mpepo zaJehova Karunga zi tu pitisire yipo tu kwate egano yihorokwa yokomeho. [1] (1 Kol. 2:12) Nye twa yi dimburura hena asi nsene tu litura mo unene moyinka yeparu ngayi tu ninkisa tu rare pampepo. (Resa Rukasa 21:34, 35.) Vantu kuvhura va tu swaure morwa kuna kuvangarara. (2 Pet. 3:3-7) Nye ose twa hepa kutwikira kulikwatakana novapuli vakwetu pokuza komapongo omu mwa kara mpepo zaKarunga.

Ove kuna kuvangarara pampepo ndi? (Tara paragarafu 11-16)

15. Yisinke ya horokerere Peturusa naJakopo naJohanesa, ntani ngapi nose nayi vhura kutuhorokera?

15 Kudira kusikilira mo kuvhura kutuninkisa tu dire kuvangarara. Jesus ga yi divire asi vantu wokudira kusikilira mo ureru kugwira momadowo gorutu. Tu tareni eyi ya horokere momasiku komeho Jesus va ka mu dipage. Age ga hepere kuhundira oGuhwe va mu vatere a gwane nonkondo dokukara mulimburukwi. Age kwa tanterere Peturusa naJakopo naJohanesa va ‘vangarare’ siruwo esi ana kukanderera. Nye awo kapi va kwete egano eyi ya ya horokere komeho. Mevango lyokuvangarara va tarere Jesus, awo kwa rere. Jesus nampili ngomu ga rorokere, age kwa vangararere pokukanderera koGuhwe. Yiyo ngano va rugene vena varongwa vendi.—Mar. 14:32-41.

16. Yisinke ga uyungire Jesus twa hepa kurugana yipo tu ‘vangarare’ kuliza naRukasa 21:36?

16 Yinzi ya hamena mo ‘mokuvangarara.’ Mazuva gongandi komeho zonomfa dendi, Jesus kwa tanterere varongwa vena va kanderere kwaJehova. (Resa Rukasa 21:36.) Yipo nye, mokuvangarara pampepo nose twa hepa kulitura mo mokukanderera.—1 Pet. 4:7.

LIWAPAIKIRENI

17. Ngapi omu natu liwapaikira kweyi yina kuwiza komeho?

17 Mokumona asi Jesus ga uyungire asi uhura ngau wiza “movili zohararasi,” esi kapisi yiso siruwo sokukondjera malihafeso aga a gava Satana nouzuni wendi ntani nokugwira momadowo gorutu. (Mat. 24:44) Karunga naKristusa kuna kututantera kupitira moBibeli eyi ngayi horoka komeho ntani eyi natu rugana yipo tu vangarare. Twa hepa ngesi kunkondopeka elikwatakano lyetu naJehova nokutura muhowo meparu lyetu yirugana yoUhompa. Twa hepa kukoneka siruwo esi tuna kuparuka noyihorokwa eyi yina kuhoroka yipo tu liwapaikire kweyi yina kuwiza. (Ehor. 22:20) Eparu lyetu kuna hamene mo.

^ [1] (paragarafu 14) Tara egaununo 21 mobuke Uhompa waKarunga kuna kupangera!