Zende koyikaramo

Zende koyikaramo

Nombangi daJehova

Horowora eraka Rukwangali

Tu dwareni muntu gomupe noyikara yendi

Tu dwareni muntu gomupe noyikara yendi

‘Dwareni muntu gomupe.’—KOROS. 3:10.

MARUSUMO: 43, 106

1, 2. (a) Morwasinke nayi tu tompokera kudwara muntu gomupe? (b) Yikara musinke ya hamena mo mokukara muntu gomupe va tjanga moVakorosi 3:10-14?

MOBIBELI kwa tumbura mo ntanto ‘muntu gomupe.’ (Efe. 4:24; Koros. 3:10) Azo kwa tamba komuntu “ogu va unga a kare sihwi saKarunga.” Ayo kuvhura kututompoka kudwara muntu gomupe. Morwasinke? Morwa Jehova kwa tu unga tu mu fane, yipo nye ayi tu tompokere kuhonena yikara yendi.—Gen. 1:26, 27; Efe. 5:1, 2.

2 Natuvenye kukara nomadowo gomadona morwa kapi twa sikilira mo. Ntani pamwe morwa nkareso zovantu ava atu kara nawo. Nye nevatero lyaJehova, kuvhura yi tu tompoke mokukara vantu ava ga tu harera. Mokutuvatera tu sikise mo oyo, tatu ka konakona yikara eyi ya hamena mo mokukara muntu gomupe. (Resa Vakorosi 3:10-14.) Tatu ka konakona hena omu natu likida yikara eyi mokuzuvhisa.

‘NAMUVENYE VAMWE TUPU’

3. Sikara musinke sa hamena mo mokukara muntu gomupe?

3 Apa Paurusa ga mene kugava ekorangedo lyokudwara muntu  gomupe, ga uyungire hena asi kudira mpongo kuna kara sikara somuntu gomupe. Age kwa tente asi: “Kutupu hena Mugereka ndi Mujuda, gogu va rugana yovamba, ogu ga dira kulironga ndi ebotwa, mupika ndi mumanguruki.” * Morwasinke natu dilira kukara nelitondororo parudi ndi lyonomuhoko mombungakriste? Morwa vasikuli vaKristusa wousili ‘navenye vamwe tupu.’—Koros. 3:11; Gar. 3:28.

4. (a) Ngapi omu vakareli vaJehova nava tekura wopeke? (b) Ukaro musinke nau vhura kuzonagwisa po uumwe woVakriste?

4 Ava va dwara muntu gomupe kutekura vapuli vakwawo ndi wopeke nefumadeko yi kare asi kupi oku va tunda ndi awo rudi musinke. (Rom. 2:11) Eyi kuvhura yi kare udigu moyirongo yimwe. Pasihonena, pwanare epangero lyomoAfrika Mbindakano kwa hangwire vantu monomukunda kuliza nomarudi gawo. Nampili naina, Nombangi daJehova ntani nava wopeke simpe kwa tunga monomukunda odo. Mokukorangeda vanavazinyetu va ‘litambure-tambure,’ Mbungagendesi yipo nye za tulire po mawapaiko mwaSikukutu 2013 mokuvatera vanavazinyetu wokomarudi gokulisiga-siga va lidive nawa. (2 Kol. 6:13) Yisinke ya hamenene mo?

5, 6. (a) Mokunkondopeka uumwe wovantu vaKarunga, ewapaiko musinke va tura po mosirongo simwe? (Tara efano pepenuno 22.) (b) Yitundwamo musinke ya kara?

5 Mawapaiko aga va tulire po kwa kere asi vanavazinyetu womonombungakriste mbali domaraka ndi domarudi gokulisiga va ponge kumwe moyikondovike yimwe. Vanavazinyetu owo kwa zuvhisire kumwe nokuponga kumwe ntani awo kwa litambwire-tambwire momambo gawo. Nombungakriste dononzi kwa kwatesere ko ewapaiko olyo ntani mberewa zomutayi kwa gwene marapoto gomawa kovanavazinyetu ntani nokovantu wokulikarera. Pasihonena, mupitisili goukarelikarunga umwe kwa tente asi: “Ame kapisi Mbangi, nye one mwa diva sili kugendesa yirugana yeni yokuzuvhisa ntani one kwato elitondororo.” Ngapi ewapaiko olyo lya kundamene Nombangi daJehova?

6 Munazinyetukadi gedina Noma goMuxhosa, pomuhowo kwa tjilire kuzigida kembo lyendi vanavazinyetu woyirumbu wokombunga zoRuhingilisa. Nye konyima zokuzuvhisa kumwe nawo nokumuzigida komambo gawo, age kwa tente asi: “Awo vantu tupu ngwendi nyose.” Apa rwa kere rufo rombungakriste zoRuxhosa mokuzigida womombunga zoRuhingilisa, yipo ga terekere nokuzigida ko vamwe. Gumwe govagenda ava ga zigidire kwa kere mukuronambunga gosirumbu. Noma kwa tanta asi: “Ayo kwa tetukisire nge apa ga hingilire posikarate.” Vanavazinyetu wovanzi va ya kara vakaume ntani awo vana tokomene kulitambura-tambura morwa ewapaiko olyo.

“KARENI NONKENDA NOMBILI”

7. Morwasinke twa hepera kutwikira kulikida nkenda?

7 Ose ngatu twikira kuligwanekera nomaudigu dogoro uzuni waSatana ngava u zonagure po. Ose kulididimikira maudigu ngwendi epiro yirugana, mauvera gomanene, mahepeko, yimpagwa, ukorokotji ntani maudigu gamwe hena. Mokukwafa vakwetetu twa hepa kukara nonkenda zonene. Kukara nonkenda zonene ngayi tu  tumangeda tu kare nombili novakwetetu. (Efe. 4:32) Yikara oyo ngayi tu vatera tu honene Karunga ntani tu kwafe ndi tu hengagwide wopeke.—2 Kol. 1:3, 4.

8. Yitundwamo musinke ayi kara apa atu kara nombili nonkenda kwanavenye womombungakriste? Gava sihonena.

8 Ngapi natu likida nkenda kovanayirongo ndi kovanaruhepo mombungakriste? Twa hepa kutulisa po ukaume nawo ntani tu va ninke va lizuvhe asi awo mulyo mombungakriste. (1 Kol. 12:22, 25) Tu tarurureni eyi ya horokerere Dannykarl ogu ga tundire koPhilippines a ze koYapani. Age ngava mu tekura momudona koyirugana yawo morwa munayirongo. Makura ezuva limwe ta zi kepongo lyoNombangi daJehova. Age kwa tanta asi: “Sinzi sawo kwa kere Vayapani, nye awo kwa tambwire nge nawa ngwendi mundambo.” Nkenda ezi va mu likidire, za mu vaterere a ture po ezokomeho. Age ga ya gwene ekuho ano ngesi kuna kara mukuronambunga. Vakuronambunga vakwawo kulizuvha asi Dannykarl namukadendi kuvatera sili mbungakriste. Vakuronambunga kwa uyunga asi: “Awo kwa rerupika eparu lyawo ngovazuvhisi wokukarerera ntani awo sihonena sosiwa morwa kwa tura muhowo Uhompa.”—Ruk. 12:31.

9, 10. Gava yihonena ayi tundu mokulikida nkenda moyirugana yokuzuvhisa.

9 Apa atu zuvhisa mbudi zoUhompa, ose kugwana mpito zokuruganena “navenye uwa.” (Gar. 6:10) Sinzi soNombangi daJehova kufira nkenda vanayirongo pokuhetekera ko kulironga eraka lyawo. (1 Kol. 9:23) Eyi kwa reta mauwa gomanzi. Pasihonena, Tiffany gomoAustralia ogu a rugana uzuvhisi wokukarerera kwa lironga Ruswahili yipo a vatere mbungakriste zeraka olyo mositata saBrisbane. Nampili ngomu ya kere udigu kulironga eraka olyo, age ga gwanena mo ruhafo. Age kwa tanta asi: “Nsene ono hara kuhafera sirugana sokuzuvhisa, dirukira kombungakriste zemeraka lyapeke. Ove ngo lizuvha ngwendi kosirongo sapeke ono kara. Ove ngo limonena uumwe womombunga zetu.”

Yisinke ayi tumangeda Vakriste wousili va vatere vanayirongo? (Tara paragarafu 10)

10 Tu tareni sihonena sepata lyomoYapani. Munwawo gomukadona Sakiko kwa tanta asi: “Momvhura 1990 yikandwise, ose ngatu gwana vantu moyirugana yokuzuvhisa wokutunda koBrasilia. Apa ngatu va likida moBibeli zawo zoRuputu matjangwa ngwendi Ehororo 21:3, 4 ndi Episarome 37: 10, 11, 29, awo ngava purakene nawa ntani pamwe ngava lili.” Epata olyo simpe lya twikilire kulikida nkenda. Sakiko kwa tanta hena asi: “Apa twa mwene asi va kere neharo lyokulironga Bibeli, yipo twa tamekere kulironga Ruputu.” Konyima, epata olyo kwa vaterere mokutulisa po mbungakriste zoRuputu. Mwaza nomvhura epata olyo kwa vatera vanayirongo wovanzi va ya kare vakareli vaJehova. Sakiko kwa tente hena asi: “Kapi ya kere ureru kulironga Ruputu, nye twa gwanena mo mauwa. Ose kupandura Jehova kweyi ga tu vatera.”—Resa Yirugana 10:34, 35.

‘KARENI NELINUNUPIKO’

11, 12. (a) Mokudwara muntu gomupe, sitambo musinke natu kara naso? (b) Yisinke nayi tu vatera tu twikire kukara vantu wokulinunupika?

11 Sitambo seyi natu dwarera muntu gomupe kuna kara mokufumadekesa ko Jehova nye kapisi tu lipaparere mfumwa kovantu. Diworokeni asi muengeli gokusikilira mo kwa zonene morwa kwa linenepekere. (Hetakanesa Hesekiyeli 28:17.) Yipo nye ose vantu kutudigopera kunyokera po elinenepeko morwa kapi twa sikilira mo. Nampili ngoso, ose kuvhura tu kare nosikara selinunupiko. Yisinke ngayi tu vatera?

12 Mokutwikira kukara vantu wokulinunupika, twa hepa kulitulira po siruwo sokuteda ko nkenye ezuva eyi atu resa moNonkango daKarunga. (Deut. 17:18-20) Unene po, kuteda ko kweyi nga rongo Jesus nosihonena esi ga tulire po sokulinunupika. (Mat. 20:28) Age kwa kuhwire nompadi dovapositoli vendi. (Joh. 13:12-17) Ntani twa hepa kuhundira Karunga a tu pe ko mpepo zendi zokupongoka yipo tu nyokere po nkareso zokulizuvha asi twa pita wopeke mekuto.—Gar. 6:3, 4; Fil. 2:3.

13. Mauwa musinke ngatu gwanena mo nsene tu linunupika?

13 Resa Yisewe 22:4. Ayo mulyo unene kovakareli vaJehova mokulinunupika ntani ayo kureta mauwa. Kulinunupika kureta mbili nouumwe mombungakriste. Nsene tu linunupika, Jehova ngatu fira nkenda. Mupositoli Peturusa kwa tente asi: “One hena namuvenye momalikaro geni omu linunupike, yeeyi ‘Karunga kwa nyenga valinenepeki, nye valinunupiki age kuvafira nkenda.’”—1 Pet. 5:5.

‘KARENI NOUGOMOKI NTANI NEDIDIMIKO’

14. Yilye ga tura po sihonena sosiwa sougomoki nelididimiko?

14 Mouzuni ou, vantu wokugomoka ntani wokulididimika kuvatara asi vagova. Nye owo kapisi usili. Yikara oyo yiyo ga kara nayo Karunga Munankondo nadinye. Age sihonena sosiwa po sougomoki nelididimiko. Gazadara ko omu Jehova ga limbwilire Abirahamu naRoto kupitira movaengeli vendi. (Gen. 18:22-33; 19:18-21) Ntani hena, age kwa lididimikilire nonzo doVaisraeli ure wonomvhura 1 500.—Hes. 33:11.

15. Ngapi ga tulire po Jesus sihonena selididimiko nougomoki?

15 Jesus kwa kere muntu ‘gomugomoki.’ (Mat. 11:29) Age kwa lididimikire mapuko govasikuli vendi. Apa nga zuvhisa, ngava mu swaura vampitisili womaukarelikarunga. Nye, ga twikilire kulididimika nokukara mugomoki dogoro konomfa dendi. Apa va mu pamparere, age kwa kanderere koGuhwe va gusire po vantu ava va mu twaredesere va ka mu dipage. Age kwa  tente asi: “Yeeyi kapi vana diva eyi vana kurugana.” (Ruk. 23:34) Nampili ngomu ga pitire momaudigu, Jesus kwa tulire po sihonena sosiwa selididimiko nougomoki.—Resa 1 Peturusa 2:21-23.

16. Monkedi musinke natu likida ugomoki nelididimiko?

16 Ngapi omu natu likida ugomoki nelididimiko? Paurusa kwa tumbwire ko nkedi zimwe apa ga tjangerere Vakriste vakwawo asi: “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.” (Koros. 3:13) Yosili, pwa hepa ugomoki nelididimiko mokusikisa mo epukururo olyo. Nsene tu ligusira-gusira po ose ngatu retesa po uumwe mombungakriste.

17. Morwasinke ugomoki nelididimiko ya karera nomulyo?

17 Vakriste va hepa kukara nonkareso zougomoki nelididimiko. Yikara oyo mulyo kwetu yipo ngatu ka gwane mwenyo gwanarunye. (Mat. 5:5; Jak. 1:21) Unene po yikara eyi kutuvatera tu yererepeke Jehova nokuvatera wopeke va kwame nompango domoBibeli.—Gar. 6:1; 2 Tim. 2:24, 25.

“KARENI NEHARO ELI LYA KWATA NAYINYE KUMWE”

18. Ngapi omu eharo nokudira mpongo ya li kwatakana?

18 Yikara nayinye eyi tuna zogere kwa likwatakana nosikara seharo. Pasihonena, Jakopo kwa geve mavyukiso kovapuli vakwawo ava va here unene nongawo kupitakana nohepwe. Age kwa va likidire asi nkareso ozo kapi za lizire nompango ezi asi: “O hare mukweni moomu wa lihara nyamoge.” Age kwa tente hena asi: “Nye nsene mu za noyikara yovantu, tomu tura nzo.” (Jak. 2:8, 9) Nye eharo ngali tu tumangeda tu nyokere po elitondororo. Twa ha lininkisa asi ose kwato mpongo, nye twa hepa kuyilikida monkareso zetu.

19. Morwasinke twa hepera kukara neharo?

19 Eharo kwa kwata “nedidimiko nounambili” ntani “kapi ali litumbu.” (1 Kol. 13:4) Mokutwikira kuzuvhisa mbudi zoUhompa, twa hepa kukara vantu wokulididimika, wokulinunupika ntani wombili. (Mat. 28:19) Yikara eyi hena kutuvatera tu ruganene kumwe novanavazinyetu navenye mombungakriste. Yitundwamo musinke ayi kara pokuruganena kumwe? Nombungakriste kukara mouumwe nokureta eyererepeko kwaJehova ntani kukoka wopeke va wize kombunga zendi. Yipo nye, Bibeli kwa hulisa mokusingonona muntu gomupe asi: “Mwanayinye kareni neharo eli lya kwata nayinye kumwe, nomalikwata-kano gene-gene.”—Koros. 3:14.

‘SITUNUKENI MU KARE WOVAPE’

20. (a) Mapuro musinke natu lipura ntani morwasinke? (b) Meho musinke zongwa tuna kundindira?

20 Natuvenye twa hepa kulipura asi: ‘Yisinke nani vhura kurugana yipo ni huture muntu gomukuru-kuru noyikara yendi?’ Twa hepa kulitura mo unene mokukanderera nokukondja unene tu nyokere po nkareso zondona ezi ngazi tu kondera tu dire kukapinga Uhompa waKarunga. (Gar. 5:19-21) Twa hepa hena kulipura asi: ‘Ame kutwikira kusintununa mutjima nomagazaro gange ga kare gomape ndi?’ (Efe. 4:23, 24) Vakriste va hepa kudwara muntu gomupe noyikara yendi. Gazara omu eparu ngali ka wapa apa nkenye gumwe nga ka sikilira mo.

^ para. 3 Mosiruwo sanare, vantu wokudira kulironga ngava va va tara asi kwato mulyo.