Zende koyikaramo

Zende koyikaramo

Nombangi daJehova

Horowora eraka Rukwangali

Mapuro gokutunda kovaresi

Mapuro gokutunda kovaresi

Morwasinke ya lisigira yihorokwa yeparu lyaJesus mobuke zaMateusa nezi zaRukasa?

Yihorokwa yaJesus mobuke zaMateusa nezi zaRukasa kwa lisiga morwa vatjangi kwa demenena kovantu vavali wokulisiga.

Buke zaMateusa kwa demenena kwaJosefa. Azo kwa tumbura omu ga lizuvhire apa Mariya ga kere nomarutu gavali nonzodi omu muengeli ga mu fatwilire ukaro owo ntani nomu ga tambwire eyi ga mu tanterere muengeli. (Mat. 1:19-25) Mateusa kwa tumbwire hena nzodi zaJosefa omu muengeli ga mu tanterere a tjwayukire koEgipite kumwe nepata lyendi ntani nomu muengeli ga mu tanterere monzodi a tengure kosirongo saIsraeli ntani etokoro lyendi lyokukatunga moNasareta. (Mat. 2:13, 14, 19-23) Momagaununo gavali gokuhova mEvangeli lyaMateusa, edina lyaJosefa kwa litumbura mo yikando ntantatu ano lyaMariya yikando yine tupu.

Buke zaRukasa kwa demenena kwaMariya. Azo kwa tumbura omu muengeli Ngabiliyera ga ka mu dingwire, nomu Mariya ga ka dingwire Elisabeta ntani nomu ga hamberere Jehova. (Ruk. 1:26-56) Rukasa kwa tumbura nonkango daSimiyoni edi ga tanterere Mariya kuhamena maudigu aga ga ya ligwanekerere nago Jesus. Nampili apa Josefa ga zire nepata lyendi kontembeli age Jesus nomvhura dendi 12, Rukasa kwa tumbura tupu nonkango daMariya nye kapisi daJosefa. Rukasa kwa tanta hena asi Mariya kwa mu kundamene yihorokwa oyo. (Ruk. 2:19, 34, 35, 48, 51) Momagaununo gavali gokuhova mEvangeli lyaRukasa, edina lyaMariya kwa litumbura mo yikando 12 ano lyaJosefa yikando 3 tupu. Yipo nye, Mateusa kwa simwitira unene kuhamena Josefa ano Rukasa kwa simwitira unene kuhamena Mariya.

Elikwamo lyezimo lyaJesus kwa li tumbura monkedi zokulisiga moMavangeli aga gavali. Mateusa kwa tumbura elikwamo lyezimo lyaJosefa ntani kwa likida asi Jesus age ga waperere kupinga uhompa waNdafita. Morwasinke? Morwa Josefa kwa tundilire mezimo lyahompa Ndafita kupitira mwamunwendi Saromo. (Mat. 1:6, 16) Nye, Rukasa kwa tumbura elikwamo lyezimo lyaMariya ntani kwa likida asi Jesus “pasiuntu” ga waperere kupinga uhompa waNdafita. (Rom. 1:3) Morwasinke? Morwa Mariya kwa tundilire mezimo lyahompa Ndafita kupitira mwamunwendi Natani. (Ruk. 3:31) Nye morwasinke Rukasa ga dililire kutumbura Mariya melikwamo lyezimo lyoguhwe Eli? Morwa momalikwamo gomazimo ngava ga varura kupitira movagara. Yipo nye, apa Rukasa ga tumbwire Josefa asi munwaEli melikwamo lyezimo, age kwa tembe asi Josefa kwa kere tamweyi zaEli.—Ruk. 3:23.

Malikwamo gezimo lyaJesus va tumbura mwaMateusa ntani mwaRukasa kulikida asi age kwa kere Mesiyasa getumbwidiro. Nampili Vafalisayi noVasadukayi va divire kuhamena elikwamo lyezimo lyaJesus. Elikwamo lyezimo lyaJesus eli va tumbura mwaMateusa naRukasa kupameka epuro lyetu ntani kutupa ehuguvaro momatumbwidiro gaKarunga.