Zende koyikaramo

Zende koyikaramo

Nombangi daJehova

Horowora eraka Rukwangali

 ESIMWITITI

Kulididimikira mahepeko kureta matungiko

Kulididimikira mahepeko kureta matungiko

MUPOROSI kwa harukilire nge asi: “Ove guhya gomudona. Wa siga mukadoge gomarutu gavali namunoge gomukeke gomukadona. Yilye ngava rera? Siga epuliro lyoge makura tu ku mangurure.” Ame tani mu limburura asi: “Kapi na siga epata lyange. Nyone mwa kwata nge. Kwato eyi na zona.” Muporosi ta uyunga asi: “Kwato nzo ezi za pitakana kukara Mbangi.”

Oyo kwa horokere momvhura 1959 apa na kere modorongo mositata simwe moRusia. Name namukadange kwa tu ‘hepekere morwa uhungami,’ nye twa gwanenene mo matungiko. Nina hara kumusimwitira omu ya horokere.—1 Pet. 3:13, 14.

Ame kwa hampurukire nge mo-1933 moUkraine. Mo-1937, onanegona namugara gwawo ava va kere Nombangi daJehova, kwa tundire koFransa va ya tu dingure. Awo kwa ya tu pere nobuke Government ntani Deliverance edi ngazi nduruka Watch Tower Society. Apa ngava di resa otate, va ya kere nepuro lyenene mwaKarunga. Nye ehudi, mo-1939 tau va kwata uvera wounene. Komeho va dogoroke, awo kwa tanterere oyina asi: “Ou yiwo usili, ngo u ronge vana vetu.”

TATU KA ZUVHISIRA KOSIBERIA

MwaKudumogona mo-1951, epangero lyaUkraine kwa twere kounkwate Nombangi daJehova koSiberia mosirongo saRusia. Name nonane namumbyange Grigory nose kwa tu tjidire mo. Ose kwa genderere momahina gorutenda sinano sokupita ponokilometa 6 000, ntani twa ka sikire moSiberia. Konyima zoyivike yivali, mukurwange Bogdan ta ya siki moSiberia mokamba zapeke. Age kwa mu tomenene nomvhura 25 modorongo a rugane yirugana youdigu.

Name nonane naGrigory ngatu zuvhisire monomukunda edi da kere pepi noku twa tungire. Nye twa hepere kutakamesa. Pasihonena, ose ngatu pura vantu asi: “Pweli ogu ana kurandesa ngombe ndi?” Apa ngatu gwana ogu ana kurandesa, ngatu mu tantere kuhamena omu va zi sita monkedi zokutetukisa. Ayo ngayi tu twaredesa tu zogere kuhamena Musiti. Sikando simwe, mosaitunga kwa tjenge mo kuhamena Nombangi daJehova asi awo kupura kuhamena nongombe nye sitambo sawo kuna kupapara nonzwi. Twa ya gwene vantu ngwendi nonzwi ava va here kulironga Bibeli. Ose ngatu hafere kulironga Bibeli novantu wovawa wokulinunupika. Naina, momukunda ogu twa tungire kuna kara mo mbungakriste zovazuvhisi wokupitakana po-100.

 OMU VA HETEKERE EPURO LYAMARIA

Mukadange Maria kwa gwene usili moUkraine posiruwo soyita yauvali youzuni. Apa ga kere nonomvhura 18, muporosi gumwe kwa here a ligwanekere nendi panyama. Nye ga nyokere. Ezuva limwe apa ga ya sikire membo, ta ya mu gwana ana rara pombete zendi. Makura Maria ta duka. Muporosi ta yi mu handukisa ta mu tjilisa asi nga mu tura modorongo morwa kukara Mbangi. Mo-1952 Maria kwa mu tomenene nomvhura murongo modorongo. Age kwa lizuvhire ngwendi Josefa ogu va tulire modorongo morwa ulimburukwi wendi. (Gen. 39:12, 20) Muporosi ogu ga mu twere kodorongo kwa mu tanterere asi: “Wa ha tjira. Vantu wovanzi apa ava va pwagesa modorongo kulizuvha simpe mfumwa.” Nonkango odo da mu korangedere.

Momvhura 1952 dogoro 1956, Maria kwa mu tulire mokamba zimwe pepi nositata simwe moRusia. Age kwa mu pere sirugana sokuteta yitji, nampili pokufu. Ano konyima taya vera-vera. Nye mo-1956 tava mu mangurura.

URE NAMUKADANGE NOVANA VANGE

Apa munazinyetugara ga tanterere nge asi kweli munazinyetukadi ana kuwiza momukunda gwetu, yipo na zire nombasikora oku adi sikamene nombesa ni ka mu simbise ko nomurongero dendi. Apa tupu na mwene Maria, tani mu hara. Na hepere kukondja yipo ni mu kongwe po. Mo-1957, yipo twa likwere. Konyima zomvhura, mukadange ta hampuruka mbeli zetu Irina. Nye kapi na kere nawa-nawa namunwange. Mo-1959 ta va kwata nge morwa kunduruka yimbapiratjangwa yoBibeli. Ame kwa kere modorongo monkondwa zanyamelike makwedi ntazimwe. Mokudira kudompa mutjima, ngani kanderere nokudimba nonsumo doUhompa ntani ngani gazadara omu ngani ka zuvhisa nsene ngava mangurura nge.

Apa na ka kere mokamba mo-1962

Ezuva limwe, muporosi ta tugumukire nge asi: “Ntaantani ngatu mu dimise po mosirongo setu.” Tani mu limburura asi: “Jesus kwa tente asi mbudi zongwa zoUhompa ngava zi zuvhisa mwa za uzuni ntani kwato ogu ngazi kondera.” Ngomu nina yi tumbura ketameko, muporosi kwa paparere nonkedi dapeke a zede nge ni sige epuro lyange. Apa ya mu sumpilire, tava dirwire nge kokamba zapeke ni ka rugane yirugana youdigu ure wonomvhura ntambali. Monzira zange, yipo na zuvhire asi mukadange ana hampuruka sikwamambeli gwetu, Olga. Nampili ngomu na kere ure namukadange novana vange, na gwene ehengagwido pokudiva asi name naMaria kuna kutwikira kulimburukwa Jehova.

Maria novana vetu Olga naIrina mo-1965

Rumwe momvhura, Maria nga ya dingura nge. Rugendo ngaru mu gusa mazuva 12 kuza nokutengura momahina gorutenda. Nkenye mvhura nga pitwire nge nonkaku donompe. Mononkaku odo, nga horeke mo yifo yoRuhungu. Ano mvhura zimwe apa ga ya dingwire nge, kwa pitwire vana vetu vavali wovakadona. Gazadareni ko tupu ruhafo oru na lizuvhire apa naya va mwene.

MAUDIGU GAMWE HENA

Momvhura 1966, tava mangurura nge. Makura tani dirukire nepata lyange kositata esi sa kara  pepi nEfuta lyEsovagani. Oko yiko va ka va hampurukilire vana vetu wovamati, Yaroslav naPavel.

Kapi pwa pitire siruwo, vaporosi yipo va tamekere kuhomokere embo lyetu va papare yifo yoBibeli. Awo ngava papara nampili omu ngadi lire nongombe. Ezuva limwe apa va paparere tava tjimpuka ntani yidwaro yawo tayi nyata. Mukadange ta va fire nkenda, morwa awo kwa yi rugene mokukwama tupu veta. Makura tava pe ko yokunwa nosiyaha somema nosikehe yipo va likokote. Apa ga wizire mukondi gwawo, tava mu simwitire monkedi omu va va tekwire. Apa va katukire, mukondi gwawo ta menyuna nokuturekera. Ose kwa hefe pokumona yitundwamo ‘yokufundisa udona kouwa.’—Rom. 12:21.

Nampili ngomu ngava tu homokere vaporosi, ose kwa twikilire kuzuvhisa moArmavir. Ntani ngatu vatere vazuvhisi ava va kere modoropa zaKurganinsk. Ayo kuhafesa nge pokuzuvha asi moArmavir muna kara nombungakriste ntanzimwe ano moKurganinsk ne.

Poyiruwo yimwe ngatu dompo mutjima. Nye Jehova kwa ruganesere vapuli vakwetu wovalimburukwi va tu korangede nokutuvatera tu kare tuna pama mepuro. (Epis. 130:3) Kapi hena ya kere ureru kwetu, morwa monombungakriste mwa kere vaporosi ava ngava lininkisa asi nawo Nombangi. Awo kwa kere upampi mokuzuvhisa. Ano vamwe va gwene yitumbukira mombunga. Nye mwaza siruwo tatu ya va dimburura.

Momvhura 1978, Maria ta kara nomarutu gavali age nomvhura dendi 45. Morwa age nga vere mutjima, vandokotora kwa kere nowoma asi ta fu ntudi ga hepa kuligusa ezimo. Age ta nyoka. Vandokotora vamwe tava mu kwama-kwamene mosipangero asi va mu vendwe yipo ezimo li tunde po. Morwa oyo, Maria yipo ga tjwayukire mo mosipangero.

Vaporosi tava tu tjida mo momukunda. Makura tatu dirukire momukunda gumwe gomoEstonia. Oko yiko Maria ga ka hampurukilire munwetu Vitaly.

Konyima tatu dirukire hena komukunda gumwe moRusia. Ose ngatu zuvhisire monodoropa edi ngava ya dingura vantu edi da kere pepi nomukunda gwetu. Awo ngava wiza kouhaku, nye apa ngava tengura va kere nehuguvaro lyokukagwana mwenyo gwanarunye.

KURONGA VANA VETU VA HARE JEHOVA

Ose ngatu rongo vana vetu va hare Jehova nokumukarera. Ngatu zigida kembo lyetu vanavazinyetu ava va kere nosihonena sosiwa. Ogu nga tu dingira nkenye apa kuna kara mumbyange Grigory ogu ga kere mutareli gonomukunda kutundilira mo-1970 dogoro mo-1995. Natuvenye ngatu hafere edinguro lyendi morwa age kwa kere muntu goruhafo ntani gokuzoresa. Apa ngatu kara novagenda, ngatu dana maudano gomoBibeli, ngoyitundwamo vana vetu va ya here yihorokwa yomoBibeli.

Vana vetu wovagara novakadi vawo.

Kutundilira korumoho dogoro korulyo konyima: Yaroslav naPavel ntani Vitaly

Komeho: Alyona naRaya ntani Svetlana

Momvhura 1987, munwetu Yaroslav ta dirukire kositata saRiga moLatvia omu nga zuvhisire nemanguruko. Nye apa ga nyokere kukara  mukwayita, tava mu tomene mvhura zimwe noharufa modorongo ntani age kwa kere monodorongo ntane dokulisiga-siga. Eyi na mu tanterere kuhamena apa na kere modorongo ya mu vaterere a lididimike. Konyima ta ya kara muzuvhisi gokukarerera. Mo-1990, munwetu Pavel, apa ga kere nonomvhura 19, kwa here kukarugana uzuvhisi wokukarerera posirudi simwe moYapani. Pomuhowo, kapi twa mu harere a ze ko. Morwa posirudi oso kwa kere po tupu vazuvhisi 20 ntani ose kwa li kere naso ure wonokilometa 9 000. Nye konyima tatu kwatesa ko etokoro lyendi. Vantu woposirudi sina ngava purakene nawa kombudi zoUhompa. Konyima zonomvhura dongandi, ta pa ya kara nombungakriste ntantatu. Pavel kwa kere posirudi oso dogoro mo-1995. Ose kwa tungire tupu nonsiraura zetu, Vitaly. Kutunda unona wendi age kwa here kuresa Bibeli. Apa ga kere nonomvhura 14, yipo ga tamekere nouzuvhisi wokukarerera ano name na mu kwatesere ko nomvhura mbali. Aso kwa kere siruwo sili sosiwa. Apa ga kere nonomvhura 19, ta tundu mo membo a ka rugane uzuvhisi wosiruwo nasinye.

Momvhura 1952, muporosi kwa tanterere Maria asi: “Siga epuro lyoge ndi tatu kutura modorongo nomvhura murongo. Ano apa ngo ka pwaga mo, ono kurupa ntani ngo kara nyovelike.” Nye kapisi yimo ya ya horokere. Ose twa limonene eharo lyokutunda kwaJehova nokovana vetu ntani navamwe ava twa vaterere va tambure usili. Name naMaria twa haferere kudingura mavango oku ava ruganene vana vetu. Ntani ya tu hafesere pokumona vantu ava vana vetu va vatera va karere Jehova.

RUPANDU KOUWA WAJEHOVA

Momvhura 1991, yirugana yoNombangi daJehova kwa yi pulisilire hena. Etokoro olyo kwa tumangedere vazuvhisi va liture mo unene. Mbungakriste zetu kwa rende mbesa yipo tu vhure kukazuvhisira konomukunda dapeke nkenye sikondovike.

Name namukadange mo-2011

Ame nina hafa morwa Yaroslav namukadendi Alyona ntani Pavel namukadendi Raya kurugana koBeteli. Ano Vitaly namukadendi Svetlana, kudingura nombungakriste. Mbeli zetu Irina kwa tunga moNdovesiranda nepata lyendi. Mugara gwendi Vladimir novana vawo vatatu awo vakuronambunga. Ano sikwamambeli gwetu, Olga kwa tunga moEstonia, age kubela nge nkenye apa. Nye ehudi, mukadange kwa dogorokere mo-2014. Ame kuna kundindira kukamumona pevhumbuko. Ngesi ame kwa tunga mositata saBelgorod ano vanavazinyetu kuvatera nge sili unene.

Nomvhura nadinye edi na karera Jehova na ya dimburura asi kapi ya kara ureru kukwaterera koulimburukwi, nye mbili zomomutjima ezi a gava Jehova mulyo unene. Matungiko aga twa gwana namukadange morwa ulimburukwi wetu, manzi unene. Komeho zomvhura 1991, moyirongo eyi nga pangere Rusia kwa kere mo tupu vazuvhisi wokupitakana po-40 000. Ano naina muna kara vazuvhisi wokupitakana po-400 000. Ngesi nomvhura dange 83 ntani ame mukuronambunga. Jehova kwa vatera nge ni vhure kulididimikira. Yosili, Jehova ga tungika nge unene.—Epis. 13:5, 6.