Zende koyikaramo

Zende koyikaramo

Nombangi daJehova

Horowora eraka Rukwangali

 ESIMWITITI

Jehova kwa tungika etokoro lyange

Jehova kwa tungika etokoro lyange

Momvhura 1939, ose kwa pindukire pokatji komasiku tu ze kositata Joplin moAmerika. Apa twa ka sikire yipo twa tamekere kutura yitratate pomambo govantu awo ha va rarera. Tupu twa mene tatu tengura usimbu tu ka gwane vakwetetu. Nampo kuvhura o lipure asi morwasinke twa menekerere mokuzuvhisa, nokulivinduka kutunda mo. Nani yi simwitira tupu konyima.

AME kwa hampuruka nge mo-1934. Posiruwo oso, vakondi vange Fred naEdna awo vana kara Valirongi woBibeli (Nombangi daJehova) ure wonomvhura 20. Nina hafa kweyi va ronga nge ni hare Jehova. Ose kwa tungire modoropa zaParsons momukunda gwaKansas. Sinzi sovanavazinyetu womombungakriste zetu kwa kere vagwavekwa. Ose ngatu hafere kuza komapongo nokuzuvhisira wopeke usili womoBibeli. Nkenye Mapeu kositenguko ngatu zuvhisire moyitarata. Poyiruwo yimwe ngatu roroka unene, nye nkenye apa ngatu mana, otate ngava tu randere noice cream.

Mbungakriste zetu kwa zi pere mukunda gomunene gokuzuvhisira omu mwa kere nodoropagona ntani nofarama dononzi. Apa ngatu gavere yimbapiratjangwa kovanafarama vamwe mevango lyokutupa yimaliwa, awo ngava tu pe yikwahidi nomauta ndi yinhunhwa. Nondya edi ngava tupe ngatu di li po morwa otate ngava lihowo kugava yimaliwa koyimbapiratjangwa ngoyigava.

EZUVHISO LYOKULIKARERA

Vakurona vange kwa kere nongaramafona ezi ngava ruganesa mosirugana sokuzuvhisa. Kapi na divire kuziruganesa morwa posiruwo oso ame kwa kere munona, nye ngani hafere kuvatera otate nonane ngomu ngava dana yiuyungwa yamunazinyetu Rutherford komatengwiro ko gawo nokovarongwa woBibeli.

Name notate ntani onane petuwa lyetu lyomambako

Momvhura 1936, otate kwa tulire embako lyenene petuwa lyetu. Alyo ngali tu vatere unene mokuhanesa mbudi zoUhompa. Pomuhowo, ngatu tura po nomusika yipo yi koke vantu ano konyima ngatu dana siuyungwa somoBibeli. Apa nga si pu siuyungwa, ose ngatu gava yimbapiratjangwa kwava va kere nelituromo.

Modoropa zaCherryvale moKansas, vaporosi kwa tanterere otate asi etuwa lyetu kwa lipulisilire tupu ponze nye kapisi mevango omu ngava pwizumukire vantu moSondaha. Otate yipo va twere etuwa mositarata sa kere pepi nevango olyo yipo simpe vantu va vhure kuzuvha nawa mbudi. Poyiruwo oyo ngani hafere nkenye apa kukara kumwe notate namukurwange Jerry.

 Momvhura 1930 yiwandwise, ngatu lihameke mehaneso lyokulikarera yipo tu mane usimbu kuzuvhisira monomukunda omu mwa kere marwaneso gomanzi. Ose ngatu pinduka momasasiku (ngomu twa yi rugene moJoplin) nokutura yitratate ndi nombapira pwankenye evero lyembo. Ano konyima ngatu zi ponze zositata mokukadivilisa nsene kweli gumwe gwetu vana kwata vaporosi.

Ose hena ngatu hafere kuzuvhisa nomapurakate. Ngatu ga likulike nokugendagura mositata tu divise Uhompa. Tani diworoka ezuva limwe vanavazinyetu kwa wizire modoropa zetu, awo kuna dwara mapurakate aga va tjenge asi, “Ukarelikarunga awo siraha nokunyokoma yimaliwa yovantu.” Awo kwa gendere modoropa ure wonokilometa 1,6 makura tava ka tengura membo lyetu. Vanavazinyetu kapi va ligwanekerere nomakwama-kwamo ntani awo kwa gwene vantu ava va here kupurakena.

KOYIGONGI YOKUHOVA NA ZIRE

Ame ngani zi nkenye apa nepata lyetu koyigongi ngayi karere momukunda gwaTexas moAmerika. Otate ngava rugana kokampani zorutenda, yipo nye ose ngatu rondo mawoko-woko pokuza koyigongi ntani pokukadingura vekoro. Mukurwa gonane Fred Wismar namukadendi Eulalie, kwa tungire mositata Temple esi sa kara moTexas. Kutunda mo-1900 yikandwise, hekurwange Fred yipo ga lirongere usili nokugwana ekuho age opo simpe mudinkantu. Yipo ga tanterere ko vekoro lyetu kukwatera mo onane. Vanavazinyetu womoTexas va mu divire nawa hekurwange morwa age kwa kere mutareli gonombunga. Age kwa kere muntu gonkenda ntani goruhafo. Age hena kwa kere upampi ntani sihonena sendi sosiwa kwa vaterere nge.

Momvhura 1941, name nepata lyetu kwa zire kosigongi esi sa karerere mositata, St Louis, moMissouri. Vanona navenye kwava tanterere va hingire pepi nositantara va purakene ngomu munazinyetu Rutherford ga geve siuyungwa sosiparatjangwa asi, “Vanona vaHompa.” Apa sa pwire siuyungwa, munazinyetu Rutherford novavateli vendi kwa gaverere buke zompe Children kwetu natuvenye vanona. Sivaro setu ose twa gwene buke ozo kwa ka sikire po-15 000. Ayo kwa tu tetukisire sili.

MwaKudumogona 1943 ose kwa kere nosigongi sosiparatjangwa asi: “Tu litureni mo” esi sa kere moCoffeyville moKansas. Posigongi oso yipo va divisire sikora zompe, Sikora zoUkareli ezi ngava rugana monombungakriste. Yipo hena va pwagesere buke zoyirongwa 52 zokuruganesa mosikora ezi. Momvhura zoozo yipo na geve siuyungwa sange sokuhova. Yosili, kapi ngani divara sigongi oso morwa yipo na gwene ekuho kumwe novakwetetu mondama pepi nofarama, mema kwa kere utenda sili.

 SITAMBO SANGE SOKUZA KOBETELI

Ame kwa mene sure mo-1951, ntani na hepere kutokora eyi ngani rugana meparu. Ame kwa here kuza koBeteli oku nga rugana mukurwange Jerry, makura tani tumu foroma zange koBeteli zomoBrooklyn. Etokoro olyo na tulire po kwa ya vaterere nge ni kure pampepo. Mo-10 Nsinano 1952, yipo na tamekere kurugana koBeteli.

Ame kwa here kukarugana mokundurukira yifo noyimbapiratjangwa yetu. Nampili ngoso, ame kwa pere nge sirugana sokugavera nondya ano konyima tani ya rugana mokombisa. Ngani hafere yirugana eyi ntani na lirongerere ko yoyinzi sili. Kapi na gwene mpito zokuruganena mokundurukira, nye kurugana mokombisa ngayi pe nge siruwo ni rugane elirongo lyange lyoBibeli moBibiliyoteka zomoBeteli. Ayo kwa vaterere nge ni kure pampepo nokupameka epuro lyange. Ntani ya vaterere nge hena ni tokomene kukarera Jehova moBeteli siruwo sosire. Mo-1949 yipo ga tundire Jerry moBeteli nokukalikwara naPatricia, nye awo kwa tungire pepi noBeteli. Awo ngava kwafa nge nokukorangeda nge nkenye apa morwa ame kwa kere simpe mupe moBeteli.

Konyima tupu zokukasika moBeteli, vanavazinyetu tava papara Vabeteli ava va kere noudivi wokuuyunga. Vanavazinyetu ava ngava horowora ngava va tumu konombungakriste edi da kere ure wonokilometa 322 naBrooklyn yipo va ka gave yiuyungwa nokukalihameka mosirugana sokuzuvhisa nava womombungakriste. Name kwa horowere nge. Ame kwa kankamene apa na tamekere kugava siuyungwa sange sokuhova ntani posiruwo sina yiuyungwa ngayi gusa vili nazinye. Ngani rondo mehina lyorutenda apa ngani zi ni ka dingure nombungakriste. Tani diworoka mo-1954, Sondaha zimwe kositenguko, ame kwa rondere mehina lyorutenda ni tengure koNew York, ako kwa kere ko mufu ntani na hepere kukasika kongurova zezuva lyoolyo. Nye monzira zokutengura emumpepo tali tu gwana, ntani kwa kere ko materengenze. Makura indjini zorutenda tazi dimi. Nye nampili ngoso ose kwa ka sikire moBrooklyn ezuva lyokukwama ko moMandaha koyiha yovili zau-5 kongura-ngura. Kutunda opo tani piti monzira zehina lyorutenda ni vyukilire koyirugana yange yomokombisa nampili ngomu na rorokere unene. Ruhafo oru na gwana mokuvatera nombungakriste nokulidiva novanavazinyetu wovanzi kwa pitakana malizambero aga na tulire po.

Kuna kuliwapaikira mositudiyo soradio WBBR

Monomvhura dange dokuhova koBeteli, name kwa tamekere kulihameka melikwamo lyelirongo lyoBibeli eli ngava saya nkenye sivike kositasi soradio zetu WBBR. Monzugo zauvali zokulirondanga metungo 124 Columbia Heights yimo mwa kere nostudiyo. Munazinyetu A. H. Macmillan, ogu ga kere moBeteli siruwo sosire, nga lihameke mo nkenye apa momalikwamo gokoradiyo. Ngatu mu zidiga asi munazinyetu Mac. Age kwa tu tulilire po sihonena sosiwa morwa age nga lididimikire nkenye maudigu.

Yimbapira eyi twa ruganesere mokudivisa sitasi WBBR

Momvhura 1958 yipo na tamekere kurugana kumwe nava ngava zi koSikora zaGiliyata. Sirugana sange kwa kere sokukwafa vanasikora va gwane nombapira pulisiro nokuvawapaikira rugendo rwawo. Wovasesu tupu ngava gendere monondira morwa ado kwa kere ndiro. Sinzi sava ngava tumu va ze koAfrika ntani koAsiya ngava gendere moyikepa. Konyima zonomvhura apa mukoso gonondira gwa ya gurumukire, sinzi sovatumwa yimo ngava gendere.

Kuna kuwapaika nonzapo doVagiliyata

TANI DINGURA YIGONGI

Momvhura 1960, sirugana sange ta si ya ligwederere. Ame ngani wapaike ugendero womondira ou ngava gendere vanavazinyetu kutunda koAmerika va ze koEuropa koyigongi yoyinene eyi ya kere mo-1961. Sikando simwe name kwa zire kosigongi esi sa kere moHamburg, moNdovesiranda. Apa sa pwire sigongi  makura tatu hira etuwa kumwe novakwetetu vatatu womoBeteli tu ze koItalia nokukadingura mberewa zomutayi. Kutunda opo tatu zi koFransa nokupita monondundu daPyrenees, makura tatu ya kavere moSipanye, omu va silikire sirugana setu sokuzuvhisa. Ose kwa geve yimbapiratjangwa kovanavazinyetu womoBarcelona, ntani ayo kwa yi dingire kumwe yipo yimoneke ngwendi mauhwi. Twa hefe sili mokukara kumwe nawo. Kutunda opo yipo twa zire koAmsterdam nokukaronda ndira tu tengure koNew York.

Mvhura ezi za kweme ko, yipo na gwene hena sirugana sokuwapaikira ugendero vanavazinyetu 583 ava va horowere yipo va ze kosigongi sosinene esi sa kere uzuni mudima. Siparatjangwa kwa kere asi: “Mbudi zongwa zanarunye.” Awo kwa zire koyigongi eyi ya kere moEuropa, moAsiya, koMbindakano zaPacific, koHonolulu moHawaii ntani koPasadena moKalifoniya. Awo kwa ka dingwire hena Libanoni ntani Jorodana yirongo eyi va tumbura moBibeli. Departemende zetu nga zi wapaike hena maugendero gomondira nonohotera ntani nokugwanena vanavazinyetu nombapira pulisiro.

TANI GWANA KO MULIKWALI

Mvhura 1963 kwa kere nomulyo kwange. Mo-29 Pembagona yipo twa likwere naLila Rogers gomoMissouri, ogu ga tamekere kurugana koBeteli mo-1960. Konyima zosivike simwe apa twa li kwere, ose kwa zire novakwetu vamwe tu ka dingure Gereka naEgipite ntani Libanoni. Kutunda opo tatu rondo ndira tu ze koJorodana. Nye yirugana yoNombangi daJehova mosirongo oso kwa yi silikire ntani kapi ngava di pe nombapira pulisiro. Ose kwa kere nosinka kuhamena eyi ngayi ka tu horokera apa ngatu ka sika. Nye apa twa ka sikire pokapare ose kwa tetukire pokumona vanavazinyetu vana kwaterere epurakate eli va tjenge asi, “Tuna mu tambura Nombangi daJehova”! Ose kwa dingwire mavango oku va tungire oAbirahamu naIsaka naJakopo noku nga zuvhisire Jesus novapositoli vendi ntani oku wa tamekere Ukriste u lihanene dogoro kooku wa ka hura uzuni.—Yirugana 13:47

Ure wonomvhura 55, Lila nkenye apa nga kwatesa nge mwankenye sirugana ngava tu pe. Poyikando yimwe ose ngatu dingura Sipanye ntani Portugal omu va silikire yirugana yetu. Ose ngatu korangeda vanavazinyetu nokuvatwarera ko yimbapiratjanga ntani yininke yimwe eyi va hepere. Ose hena ngatu dingura vanavazinyetu ava va kere modorongo zaCádiz moSipanye. Ame kwa hefe sili unene morwa na gwene mpito zokuvapa siuyungwa somoBibeli.

Kumwe naPatricia ntani Jerry Molohan morugendo rwetu rokuza kosigongi sosiparatjangwa “Mbili pevhu” mo-1969

Kutundilira mo-1963, ngani wapaike marugendo govanavazinyetu ava ngava zi koyigongi moAfrika nomoAustralia, nokombindakano zaAmerika nokoEuropa nokoAsiya nokoHawaii nokoNew Zealand ntani koPuerto Rico.  Ose kwa hafera yigongi eyi ngatu dira kudivara namukadange, kukwatera mo esi sa kere moWarsaw moPoranda momvhura 1989. Sinzi sovanavazinyetu moRusia kwa kere sikando sawo sokuhova kukara posigongi oso. Vanavazinyetu vamwe ava twa kere nawo posigongi oso, kwa ka tundire monodorongo morwa epuro lyawo.

Sininke simwe na hafera unene kuna kara pokudingura nomberewa domutayi novatumwa mouzuni mudima. Ose hena kwa kere novanavazinyetu novanadorongo 50 womoSuwon apa twa kere medinguro lyetu lyokuhulilira komberewa zomutayi moKoreya Mbindakano. Awo kwa likidire nkareso zongwa noku ndindira va va pwagese yipo vakarere Jehova hena. Ose kwa gwene ekorangedo pokukara kumwe nawo.—Rom. 1:11, 12.

KURETA RUHAFO APA VAZUVHISI AVA LIGWEDERERE

Ame kwa limonena omu Jehova ga tungika vantu vendi monomvhura nadinye edi. Apa na gwene ekuho mo-1943, vazuvhisi kwa kere tupu konyara 100 000 nye ngesi kuna pitakana mamiliyona 8 ntani kuna kukarera Jehova moyirongo 240. Vanavazinyetu ava ngava tundu koSikora zaGiliyata kwa gwederera kekuro eli morwa ngava lihameke unene mosirugana sokuzuvhisa. Eeh! omu tupu ngayi hafesa nge mokuruganena kumwe nawo nomvhura dononzi ntani kuvakwafa vaka sike koyirongo ngava va tumu ngovatumwa.

Ayo kuhafesa nge unene kweyi na tulire mo ehundiro lyokuza koBeteli ame simpe mudinkantu. Jehova kwa tungika nge momunene. Kugusa ko yirugana yomoBeteli, name naLila kwa hafera kuzuvhisa kumwe nonombungakriste domoBrooklyn, omu twa ya tulisa po vakaume wovanzi.

Lila simpe kuna kuvatera nge nkenye ezuva ni twikire noyirugana yomoBeteli. Nampili ngomu nina kara nonomvhura 84, ame simpe kuna hafera yirugana yokutjanga nokutuma nombilive.

Name naLila mosiruwo esi

Eeh, ruhafo musi mokukara mombunga zaJehova nokumona omu va lisiga ava ava mu kerere nava ava dili kumukarera! Kuvhura tu kwate egano nawa-nawa nonkango dakara mwaMarakiya 3:18 edi adi tanta asi: “Vantu vange ngava mona hena malisigo pokatji keyi ngayi horokera vahungami novadinikarunga, pokatji kogu a kerere nge nogu a dili kukerera nge.” Nkenye ezuva ose kumona omu uzuni waSatana una kutwikira kudonapa ntani wovanzi kapi vana kara nehuguvaro ndi ruhafo rosili meparu. Nye owo va hara Jehova nokumukarera awo kuhafa meparu nampili momazuva aga goudigu nokukara nehuguvaro lyokomeho. Ee, mfumwa musi twa kara nazo zokudivisa mbudi zongwa zoUhompa! (Mat. 24:14) Natuvenye kuna kundindira noruhafo Uhompa waKarunga ou ngau ya gusa po uzuni ou woudona nokuya ninka evhu eli li ya kare paradisa. Makura vakereli vaJehova wovalimburukwa ngava hafera eparu narunye!