Zende koyikaramo

Zende koyikaramo

Nombangi daJehova

Horowora eraka Rukwangali

Yisinke natu lirongera ko komamoneko gaSakaliya?

Yisinke natu lirongera ko komamoneko gaSakaliya?

“Tengwireni kwange, name ni tengwire kweni.”—SAK. 1:3.

MARUSUMO: 120, 117

1-3. (a) Moukaro musinke va kere Vaisraeli apa Sakaliya ga tamekere sirugana sendi souporofete? (b) Morwasinke Jehova ga tanterere Vaisraeli va ‘tengure’ kwendi?

MOBUKE zaSakaliya kwa tumbura mo mamoneko. Ago kuna kara bukegango zina kutuka, mukadi vana swikilire mosimbamba ntani vakadi vavali vana kutuka nomavava gononkondo ngwendi sidira samunkoma. (Sak. 5:1, 7-9) Morwasinke Jehova ga likidilire Sakaliya mamoneko ogo? Moukaro musinke va kere Vaisraeli posiruwo sina? Yisinke natu lirongera ko komamoneko ogo?

2 Nomvhura 537 komeho zokuwiza Jesus pevhu, vantu vaKarunga kwa hefe sili unene. Awo kwa ka tengwire kounkwate waBabironi oku va ka kere ure wonomvhura 70. Awo kwa hefe pokutengura koJerusarema mokukatungurura ntembeli yipo va karere Jehova. Mvhura ezi za kweme ko tava  tameke kutunga ntembeli. Posiruwo oso vantu “kwa zigurukire kuzigira unene, mazwi gawo kwa ga zuvhilire ure.” (Esir. 3:10-13) Nye vantu tava ya tameke kuvarwanesa unene. Vaisraeli tayi va dompesa makura tava hageke kutunga ntembeli. Ngoyitundwamo, awo kwa demenene kokudika mambo nokulima mapya gawo. Konyima zonomvhura ronantazimwe, ntembeli kapi simpe za pwire kutunga. Vaisraeli va hepere kuvadiworokesa va tengure kwaJehova nokuhageka kuhokwa yinka yawo. Jehova kwa here va mu karere nomutjima nagunye.

3 Nomvhura 520 komeho zokuwiza Jesus pevhu, Karunga kwa tumine muporofete Sakaliya mokukadiworokesa Vaisraeli konda zeyi ga va mangwilire mo mounkwate waBabironi. Edina Sakaliya eli ali tanta asi: “Jehova kudiworoka,” kwa ya horwere usili asi nampili ngomu vantu vendi va divarere yininke nayinye ga va ruganena, age simpe gava diworokere. (Resa Sakaliya 1:3, 4.) Jehova kwa va tumbwidilire asi nga tengwidira po ukareli wousili. Nye hena ga va rondwere asi kapi nga tambura ukareli wawo nsene kapisi wokutundilira komutjima. Tu tareni omu Jehova ga va tumangedere kupitira memoneko lyaSakaliya lyauntazimwe neli lyauntambali ntani neyi natu lirongera ko.

JEHOVA NGA ZONAGURA PO VAWIDI

4. Yisinke ga mwene Sakaliya memoneko lyauntazimwe ntani morwasinke mbudi ozo va zi tjangerere komaruha nagenye? (Tara efano 1 pepenuno 21.)

4 MwaSakaliya egaununo lyautano kwa simwitira mo emoneko lyokutetukisa. (Resa Sakaliya 5:1, 2.) Age kwa mwene bukegango zina kutuka mompepo; monaure wazo nometa ntano-nane, ano monompatji nometa ne noharufa. Azo kwa zi gangwinine ntani amo kwa kere mo mbudi zompanguro. Mbudi ozo kwa zi tjenge komaruha nagenye. (Sak. 5:3) Pwanare, mbudi ngava zi tjangere koruha rumwe robukegango, nye morwa mbudi ozo kwa kere nomulyo unene yiyo va zi tjangerere komaruha nagenye.

Jehova kwa nyenga vantu wowidi (Tara paragarafu 5-7)

5, 6. Ngapi omu Jehova a tara widi?

5 Resa Sakaliya 5:3, 4Vantu navenye ngava ka zeresa yirugana yawo kwaJehova nye unene po vakareli vendi. Ava va hara Jehova Karunga va yi dimburura asi kuvaka kumuretera ‘eswau.’ (Yis. 30:8, 9) Vantu vamwe kugazara asi kapisi epuko kuvaka nsene kuna kuyiruganena nokonda zongandi. Nye yi kare asi konda musinke, muntu ogu a vaka kugazara asi nokonda dendi mulyo unene kupitakana Jehova nonompango dendi.

6 MwaSakaliya 5:3, 4 kwa tanta asi ‘efingiliro ngali hwilira mwankenye embo lyomuwidi. Alyo ngali kara momambo gawo dogoro taga zunguruka po.’ Eyi kulikida asi kwato yokuvhura kukondera Jehova mokuhorora udona mokatji kovakareli vendi. Muntu kuvhura a horekere udona epangero ndi varugani vakwawo ndi vakuronambunga ndi vakurona. Nye kapi ta vhuru kuuhorekera Jehova morwa age kumona nayinye. (Heb. 4:13) Ayo kutuhafesa mokukara novantu ava ava ‘hungike mwanayinye.’—Heb. 13:18.

7. Yisinke nayi tu vatera yipo ngava dire kutuzonagura po?

7 Jehova kwa nyenga vantu wowidi. Ose kwa hara kulimburukwa nompango daJehova  yipo tu dire kumuswaukisa. Eyi ngayi tu vatera yipo Jehova nga dire kukatuzonagura po kumwe nava ava zonene mowina.

SIKISA MO MUGANO GOGE “NKENYE EZUVA”

8-10. (a) Yisinke ya kwatera mo momugano? (b) Mugano musinke ga dilire kusikisa mo Sedekiya?

8 Mbudi ezi va tjenge mobukegango kwa rondora nkenye ogu ‘a tanta yimpempa a gane’ medina lyaKarunga. (Sak. 5:4) Mugano kwa kwatera mo kupameka sininke songandi asi usili ndi kutumbwidira asi ngo rugana yuma yongandi ndi hawe.

9 Nsene tu gana asi ngatu ruganena Jehova yuma yongandi, twa hepa kuyisikisa mo. Eyi yiyo ga hepere kurugana Sedekiya hompa gokuhulilira moJerusarema. Age kwa gene asi nga limburukwa kwahompa gwaBabironi, nye kapi ga yi sikisire mo. Eyi kwa handukisire Jehova, yipo ga tente asi: “Yosili moomu na kara Karunga goMunamwenyo, [Sedekiya] . . . nga ka fira koBabironiya, yeeyi ana teza po mugano netumbwidiro eli ga ninka kumwe nahompa gwaBabironiya, ogu ga mu tulire mouhompa.”—Hes. 17:15.

10 Hompa Sedekiya ga hepere kusikisa mo mugano gwendi kwaJehova. (2 Hist. 36:13) Mevango lyokurugana oyo, age kwa pulire evatero koVaegipite. Nye awo kapi va mu vaterere.—Hes. 17:11-15, 17, 18.

11, 12. (a) Mugano musinke gomulyo po atu tura po? (b) Ngapi omu natu sikisa mo mugano gwetu nkenye ezuva?

11 Jehova ga diva eyi atu mu tumbwidire. Age kundindira ko kwetu tu yi sikise mo yipo a tu hafere. (Epis. 76:11) Mugano gomulyo ogu atu tura po kuna kara apa atu  ligava kwaJehova. Apa atu ligava kwendi ose kutumbwidira asi nga tu mu karera yi kare asi moukaro musinke tuna kara.

12 Ngapi natu sikisa mo mugano ogu twa tulire po apa twa ligeve kwaJehova? Ose kuvhura kuyirugana oyo pokusikisa mo mugano gwetu “nkenye ezuva” nampili kuna kuligwanekera nomaheteko. (Epis. 61:8) Pasihonena, nsene gumwe gokosure ndi gokoyirugana yetu kuna kutulihoresa, twa hepa kuruganesa mpito ozo mokulikida asi twa “hara Veta” zaJehova. (Epis. 119:113) Nsene mepata lyetu mwa kara vamwe ava va hamena komaukarelikarunga gapeke, ose kuhundira Jehova a tu vatere tu kare nonkareso zongwa ndi? Ose kupandura Jehova nkenye ezuva kweyi ga tu hara nokutureta komombunga zendi ndi? Ose kulitulira po siruwo sokuresa Bibeli nkenye ezuva ndi? Ose kwa tumbwidira mokusikisa mo nayinye oyo. Apa atu limburukwa kwaJehova ayo kulikida asi twa mu hara ntani twa ligava kwendi. Twa hepa kuyilikida asi ose vakareli vendi nkenye ezuva. Nsene tu limburukwa Jehova ngatu ka gwana mwenyo gwanarunye.—Deut. 10:12, 13.

13. Yisinke tuna lirongere ko kemoneko lyaSakaliya lyauntazimwe?

13 Tuna lirongere ko kemoneko lyaSakaliya lyauntazimwe asi vakareli vaJehova va hepa kunyokera po kuvaka ndi kutura po nomugano doyimpempa. Ntani hena tuna lirongo asi Jehova kapi ga sigilire Vaisraeli nampili ngomu va tulire mapuko. Age kwa yi kwete egano asi awo kwa va rwanesere nonkore dawo. Jehova kwa tu tulira po sihonena sosiwa pokusikisa mo matumbwidiro gendi. Ntani, nose ngatu vatera tu sikise mo matumbwidiro getu. Age kwa tu tumbwidira asi nga ka hagekesa po udona naunye. Ano emoneko lyaSakaliya lyountambali kwa likida omu nga ka yi rugana.

UDINIKARUNGA TAVA U HAGESA PO

14, 15. (a) Yisinke Sakaliya ga mwene memoneko lyendi lyauntambali? (Tara efano 2 pepenuno 21.) (b) Yisinke ga karerere po mukadi ntani morwasinke va mu tengwidilire mosimbamba nokumbandwira ko nswiko?

14 Konyima apa Sakaliya ga mwene bukegango zina kutuka, muengeli ta mu tantere a ‘kankuke.’ Yisinke ga mwene memoneko olyo? Age kwa mwene “simbamba.” (Resa Sakaliya 5:5-8.) Aso kwa kere “nonswiko zorota.” Apa va kudumwine ko nswiko, Sakaliya ta mono “mukadi ana hingire mo!” Muengeli makura ta mu fatwilire asi mukadi ogo kuna kerere po “udinikarunga.” Eyi nampo kwa tukukisire Sakaliya apa mukadi ogo ga here kupwaga mo. Nye muengeli ta mu tengwidire mo usimbu mosimbamba nokumbandwira ko nswiko. Yisinke yina kutanta eyi?

15 Emoneko olyo kuturonga asi, Jehova kapi nga tarerera udinikarunga u twikire kukara mombunga zendi. Age nga rugana ko yuma usimbu mokuuhagesa po. (1 Kol. 5:13) Ano eyi kwa yi likida memoneko apa muengeli ga mbandwilire ko nswiko kosimbamba.

Jehova kwa tengwidilire po ukareli wousili (Tara paragarafu 16-18)

16. (a) Yisinke hena ga mwene Sakaliya eyi ya horokerere simbamba? (Tara efano 3 pepenuno 21.) (b) Kupi va si twere simbamba oso?

16 Memoneko olyo kwa tumbura mo hena vakadi vavali womavava gononkondo ngwendi samunkoma. (Resa Sakaliya 5:9-11.) Vakadi owo vavali kwa lisiga nomukadi gwina gomosimbamba. Awo kwa ya damwine simbamba omu mwa kere “udinikarunga”  va tuke naso. Kupi va twere simbamba oso? Awo kwa si twere ko “Babironiya.” Morwasinke va si twarere ko?

17, 18. (a) Morwasinke udinikarunga vau twarerere koBabironiya? (b) Yisinke natu tokomena kurugana?

17 Vaisraeli womomazuva gaSakaliya va kwete egano eyi udinikarunga vau twarerere koBabironiya. Awo va yi divire asi aso kwa kere sitata esi sa vhukire udona noukarelikarunga woyimpempa. Sakaliya novakwawo ava va ka tungire mositata oso, va hepere kukondja mokunyokera po mapukiso gokutunda kovapagani. Emoneko olyo kwa va pere ehuguvaro asi Jehova nga tengwidira po ukarelikarunga wousili.

18 Nye hena emoneko olyo kwava diworokesere mulyo gokupopera ukareli wousili. Ntani hena asi udinikarunga kapi ngava u pulisira mombunga zaJehova. Mokumona asi Jehova kwa tu reta kombunga zendi, natuvenye twa kara nositumbukira sokupopera ukareli wousili. Twa ha pulisireni udona u kare mokatji kovantu vaJehova.

VAKARELI VAJEHOVA WOUSILI KUMUFUMADEKA

19. Mauwa musinke atu gwanene mo momamoneko gaSakaliya?

19 Emoneko lyaSakaliya lyauntazimwe neli lyauntambali kugava erondoro kwava ava rugana udona. Ntani ago kutudiworokesa asi Jehova kapi nga tarerera udona u twikire kukara mombunga zendi. Ano vakareli vendi wousili va hepa kunyenga udona kutundilira komutjima. Mamoneko ogo kutupa ehuguvaro asi nsene tu kondja mokulimburukwa Guhyetu kapi nga tu fingilira, nye nga tu popera. Nampili yi tu digopere kulimburukwa Jehova, nye nevatero lyendi ngayi tu tompoka. Ngapi natu diva asi ukareli wousili ngau twikira kukara po mouzuni ou woudona? Ehuguvaro musinke twa kara nalyo asi Jehova nga twikira kupopera mbunga zendi ngomu udigu wounene una kuhedera pepi? Sirongwa sokukwama ko ngasi ka zogera malimbururo komapuro ogo.