Zende koyikaramo

Zende koyikaramo

Nombangi daJehova

Horowora eraka Rukwangali

 ESIMWITITI

Kulimburukwa Jehova kureta mauwa

Kulimburukwa Jehova kureta mauwa

Konyima zokutupa situmbukira, name namugara gwange kumwe namukurwange namukadendi yipo twa uyungire asi: “Ngatu si rugana.” Morwasinke twa si tambwilire ntani ngapi omu Jehova ga tu tungika? Nye pomuhowo, na hara kumusimwitira ko ntundiliro zange.

AME kwa hampuruka nge mo-1923 modoropa Hemsworth moIngiranda. Ame kwa kere namukurwange gomugara Bob. Apa na kere nonomvhura ntane, otate yipo va gwene nobuke edi da tulire poruzera uyilipaki womaukarelikarunga goyimpempa. Awo ngava hafere eyi ngava resa. Konyima zonomvhura dongandi, ose kwa purakenene kosiuyungwa samunazinyetu Rutherford kongaramafona ezi ga simbire munazinyetu Bob Atkinson. Yipo twa dimbwilire asi siuyungwa kwa tundilire kovantu ava ngava pwagesa nobuke edi ngava resa otate. Vakondi vange yipo va kere negano lyokumuzigida kembo lyetu nkenye ngurova yipo aya limburure mapuro getu kuhamena Bibeli. Yipo twa tamekere kuza komapongo aga ngava ruganene membo lyamunazinyetu gumwe. Konyima tava ya toto po mbungakriste moHemsworth. Ose ngatu gava mararo kovatareli wonombunga ntani ngatu zigida vazuvhisi wokukarerera tu ya lye kumwe nawo. Vanavazinyetu owo kwa korangedere nge sili.

Epata lyetu kwa tamekere kurugana ngesefa, nye otate yipo va tanterere mukurwange asi: “Nsene ono hara kurugana uzuvhisi wokukarerera, tatu zi hageke ngesefa.” Bob ga yi kwatesere ko, apa ga kere nonomvhura 21 ta tundu mo membo nokukarugana uzuvhisi wokukarerera. Ano konyima zonomvhura mbali apa na kere nonomvhura 16, tani tameke uzuvhisi wokukarerera. Rorunzi ngani zuvhisa nyamelike pokuruganesa kakarata koumbangi nongaramafona. Nye Jehova ga tungikire nge pokupa nge murongwa ogu ga tulire po ezokomeho. Sinzi sava vemepata lyawo kwa ya tambwire usili. Mvhura ezi za kweme ko, tani tameke uzuvhisi wosiruwo nasinye kumwe naMary Henshall. Ose kwatu tumine momukunda gumwe gomosirongo saCheshire.

Poyita yauvali youzuni, vakadi nawo kwa va tanterere va lihameke moyita. Vampitisili womaukarelikarunga kapi va va pulire va lihameke moyita. Yipo nye twa gazarere asi nose kapi tava tu pura. Nye mpanguro kapi za yi kwatesere ko, makura tava tomenene nge modorongo kwedi kumwe. Mvhura za kweme ko apa naya kere nonomvhura 19, kwa zire kompanguro yikando yivali morwa kapi na here  kukwatesa ko yita. Nye yikando nayinye oyo na zire kompanguro tava tokora kusiga nge. Apa na pitire moukaro owo, na yi divire asi mpepo zokupongoka kwa vaterere nge ntani na lizuvhire asi Jehova name ana kara.—Jes. 41:10, 13.

TANI GWANA KAUME

Momvhura 1946, yipo naya lidivire naArthur Matthews. Age kwa kere modorongo makwedi gatatu morwa kudira kulihameka moyita. Apa ga pwege mo, ta tameke uzuvhisi wosiruwo nasinye namukurwendi Dennis modoropa, Hemsworth. Guhyawo kwa va rongere kuhamena Jehova kutunda unona wawo ntani kwava kuhwire awo vadinkantu. Konyima Dennis tava ya mu tumu a ka zuvhisire koIliranda. Nkareso zaArthur zongwa kwa hafesere vakondi vange yipo va mu zigidire aya tunge kumwe nawo. Apa ngani ya dingura vakondi vange, name naArthur ngatu kuhu yiyaha konyima zokulya. Konyima tatu ya tameke kulitjangera nombilive. Mo-1948, Arthur tava ya mu tomene hena makwedi gatatu modorongo. MwaMurongagona 1949, name naArthur tatu likwara ntani sitambo setu kwa kere sokurugana uzuvhisi wosiruwo nasinye. Ose ngatu ruganesa siruwo setu sepwizumuko pokuvatera mosikunino tu nyange enyango yipo tu gwane ko yimaliwa yokulireresa. Nevatero lyaJehova, twa twikilire sirugana setu sokuzuvhisa.

Konyima zononkwara detu moHemsworth mo-1949

Konyima zomvhura, tava tu tumu tu ka zuvhisire konodoropa dimwe domoIliranda oku va kere Vakatolika wovanzi. Vantu womonodoropa odo kapi va here maukarelikarunga gapeke, yipo nye twa hepere kuruganesa nondunge pokuvazuvhisira. Ose ngatu pongere membo lyamunazinyetu namukadendi eli lya kere ure wonokilometa 16 noku twa tungire. Vantu wokusika tupu pontantatu ngava zi kepongo. Poyiruwo yimwe kapi ngatu tengura kembo. Ose ngava tu zarere pevhu ntani ngatu hafere mulihako. Ayo kuhafesa nge pokudiva asi naina pana kara nombangi dononzi monodoropa odo.

“NGATU SI RUGANA”

Mukurwange kumwe namukadendi Lottie kwa kere vazuvhisi wosiruwo nasinye korwamuzogo gwaIliranda. Mo-1952, natuvenye moune wetu kwa zire kosigongi esi sa karerere monkurusitata, Belfast. Munazinyetu gumwe tatu pe mararo kumwe naPryce Hughes ogu ga kere mutareli gomberewa zomutayi moBritania. Ngurova zimwe tatu zogere kuhamena epwageso lyobuke God’s Way Is Love ezi va wapaikilire vantu womoIliranda. Munazinyetu Pryce tatu fatwilire udigu ou ava ligwanekere nawo apa ava zuvhisire Vakatolika womoIliranda. Age kwa uyungire hena asi vanavazinyetu ngava va tjida mo momambo gawo ntani varuti ngava tumu vantu va ka homokere vanavazinyetu. Pryce yipo ga tu tanterere asi: “Tuna hepa vanavazinyetu womatuwa yipo va lihameke mo mosirugana sokuhanesa buke ozo mosirongo nasinye.” * Makura tatu mu limburura asi: “Ngatu si rugana.”

Kumwe novazuvhisi vakwetu pomoto

 Apa vazuvhisi wokukarerera ngava zi nkenye apa kositata Dublin, awo ngava gwana mararo kwamunazinyetukadi Ma Rutland. Konyima zokurandesa yiweka yetu nokukara pembo lyendi, makura tatu zi nomoto tu ka rande etuwa. Yipo twa ka gwene lyombiliha makura tatu pura murandesi ali tu retere morwa natuvenye kapi twa divire kusinga. Kongurova, Arthur ta gazadara ko omu ava singi nokutjindja nogera detuwa. Ezuva eli lya kweme ko, Arthur ta zi mongarase a ka heteke po kusinga, posiruwo sooso, Mildred Willett ogu ga kere mutumwa ta wiza (konyima age kwa ya likwere naJohn Barr). Age ga yi divire kusinga yipo ga tu rongere nose. Eyi kwa tu vaterere tu twikire norugendo rwetu.

Karafana netuwa lyetu

Apa twa ka sikire, tatu papara mararo. Vanavazinyetu kwa tu rondwere mokudira kurara monokarafana morwa varwanesi kuvhura va tu hwikilire mo. Yipo twa paparere embo nye kapi ya tompokere. Masiku ogo natuvenye kwa rere metuwa. Ezuva eli lya kweme ko tatu gwana karafana ezi za kere nonombete dokulironda. Yimo ngatu rara moomo. Kapi ngatu ligwanekere nomaudigu apa ngatu sigi karafana pomavango govanafarama. Ose ngatu zuvhisire konomukunda edi da likere ure noku twa tungire. Pokutengura ose ngatu zuvhisire vantu ava va kere ponofarama edi ngatu sigi karafana zetu.

Ose ngatu zuvhisire mambo nagenye nokuhanesa nobuke dokupitakana po-20 000 korwambindakano rwaIliranda pwa hana marwaneso. Ano madina gava va here kulironga Bibeli kwa ga geve komberewa zomutayi zaBritania. Yosili, ayo kuhafesa morwa pana kara Nombangi dononzi moIIiranda.

TATU ZI KOINGIRANDA ANO KONYIMA KOSIKOTORANDA

Konyima, tava tu tumu tu ka zuvhisire monkurusitata zaIngiranda. Apa pwa pitire yivike yongandi, Arthur tava mu tantere a tameke sirugana soutumwa. Konyima zokutudeura, tatu zi koSikotoranda. Arthur kapi ga gwene siruwo sokuliwapaikira nye ya hafesere nge pokumona omu ga litulire mo mokusikisa mo situmbukira sendi nampili ngomu sa kere udigu. Twa haferere sili sirugana soutumwa. Ose kwa rugene sirugana oso nomvhura dononzi ntani twa haferere kurugana kumwe novanavazinyetu.

Momvhura 1962, Arthur tava mu zigida kosikora zaGiliyata ezi za gusire makwedi murongo. Ose twa hepere kutokora nsene asi kuvhura a ze, konyima twa ya tokwere asi kuvhura tupu a ze kosikora zina. Kapi hena na kere nogu nani zuvhisa nendi, yipo na tengwire koHemsworth ni ka rugane uzuvhisi wosiruwo nasinye. Konyima zomvhura Arthur ta ka tengura, makura tava tu tumu tu ka zuvhisire koSikotoranda nokorwamuzogo gwaIngiranda ntani korwamuzogo gwaIIiranda.

TATU GWANA SITUMBUKIRA SOSIPE MOILIRANDA

Momvhura 1964, Arthur tava mu pe situmbukira sokukara mutareli gomberewa zomutayi moIIiranda. Pomuhowo kapi na here kuza koBeteli  morwa ngani hafere sirugana sokudingura nombungakriste. Ame ngesi kulizuvha ruhafo kweyi na ka rugene koBeteli. Na ya dimburura asi nsene o tambura situmbukira esi wa dira kunyanyukira, konyima Jehova nga ku tungika. KoBeteli ame ngani rugana momberewa, kurongera yimbapiratjangwa, kutereka ntani nokuzeresa. Ano poyiruwo yimwe ngava tu tumu tu ka dingure nombungakriste ntani ayo ya tu vaterere tu lidive novanavazinyetu. Pokumona omu varongwa vetu woBibeli ngava tura po ezokomeho, ya nkondopekere uumwe wetu novanavazinyetu womoIIiranda. Ee, etungiko musi kouwa!

SILIKA SOMULYO SONOMBANGI DAJEHOVA MOILIRANDA

Sigongi sokuhova moIliranda kwa karerere moDublin mo-1965. * Nampili ngomu pwa kere marwaneso, sigongi sa gendere po nawa. Posigongi oso kwa kere po vantu wokusika po 3 948, ano 65 kwa va kuhwire. Vagenda wokusika po-3 500 kwa gwene mararo momambo govantu womoDublin. Ano nkenye ogu ga geve mararo kwa gwene mbilive zorupandu. Vandambo nawo kwa haferere nkareso zovagenda owo. Yosili, silika oso kwa kere somulyo.

Arthur kuna kumorora munazinyetu Nathan Knorr ogu ga ka kere posigongi mo-1965

Arthur ta pwagesa Buke zange zomasimwititi goBibeli meraka lyoRugaelic mo-1983

Momvhura 1966, ruha rokomuzogo noru rokombindakano zaIIiranda kwa kere megendeso lyomberewa zomutayi zomoDublin. Eyi ya lisigire neyi ngayi horoka moIIiranda omu mwa kere vantu ava va dilire kulihara morwa upolitika ndi ukarelikarunga. Ayo ya tu hafesere pokumona Vakatolika vamwe kuna ku tambura usili nokuyalipakerera kumwe novanavazinyetu ava kere nare Vaporotestande.

TAPA HOROKA MARUNDURUKO

Momvhura 2011, mberewa zomutayi zaBritania nezi zaIIiranda kwa di pakerere kumwe, makura tava tu tumu koBeteli moLondon. Apa twa gwene mbudi ozo, ame opo kuna kuveda mugara gwange ogu va kwatekere uvera woParkinson wokukankama morutu. Momazuva 20 Kudumonkuru 2015, yipo ga ya dogorokere ose opo tuna kara mononkwara nomvhura 66.

Kutunda apa ga dogoroka mugara gwange, ayo kwa retera nge ruguwo sili rorunene. Age nkenye apa nga vatere nge, nye ame ngesi kuna kumurongora sili. Nsene o pita momaudigu gangoso ngayi kuvatera o hedere pepi naJehova. Ayo kuhafesa nge pokumona omu mugara gwange va mu here vantu. Ame kwa gwana nombilive dokutunda kovapuli vakwetu womoIliranda, Britania ntani womoAmerika. Na gwene hena makorangedo aga ga vaterere nge kwaDennis mumbya mugara gwange namukadendi Mavis ntani kwaRuth naJudy vana vamukurwange.

Jesaya 30:18 kwa korangedere nge unene. Alyo kwa tanta asi: “HOMPA kuna kundindira a mu fire nkenda. Age ana liwapaikire kumuzaverera, morwa age nkenye apa kurugana eyi ya hungama. Verago vaava ava huguvara mwaHOMPA.” Ayo ya hengagwidire nge pokudiva asi Jehova kuna kundindira mokukagusa po maudigu nagenye nokukatupa yitumbukira yoyiwa mouzuni woupe.

Pokudiworoka nomvhura nadinye edi twa ruganena Jehova, na ya dimburura omu ga tungika sirugana sokuzuvhisa moIIiranda. Ame kulizuvha ruhafo kweyi na lihamekere mosirugana oso. Yosili, nsene tu limburukwa Jehova, ayo kureta mauwa.

^ para. 12 Tara 1988 Yearbook of Jehovah’s Witnesses pepenuno 101-102.

^ para. 22 Tara 1988 Yearbook of Jehovah’s Witnesses pepenuno 109-112.