Zende koyikaramo

Zende koyikaramo

Nombangi daJehova

Horowora eraka Rukwangali

Likida epuro momatumbwidiro gaJehova

Likida epuro momatumbwidiro gaJehova

‘Epuro yilyo undipo woyininke eyi atu dili kumona.’—HEB. 11:1.

MARUSUMO: 54, 125

1. Ngapi natu tara epuro lyoSikriste?

EPURO lyoSikriste kuna kara sikara somulyo unene. Ntani alyo kapisi lyankara muntu. (2 Tes. 3:2) Nye Jehova kwa pa nkenye mukareli gwendi ‘epuro paheteko.’ (Rom. 12:3) Navenye owo va kara nepuro va hepa kulikida rupandu rorunene.

2, 3. (a) Mauwa musinke na gwana muntu ogu a likida epuro? (b) Mapuro musinke natu ka konakona?

2 Jesus Kristusa kwa uyungire asi oGuhwe vemeguru kukoka vantu kupitira mwendi. (Joh. 6:44, 65) Pokutura epuro mwaJesus kugava mpito komuntu va mu dongwenene po nonzo dendi. Ano mpito ozo kutwaredesa muntu a kare nehuguvaro lyokukahafera elikwatakano lyanarunye naJehova. (Rom. 6:23) Yisinke twa rugana yipo tu gwane uwa owo? Ngovananzo, ose ngano kwa fira tupu kufa. (Epis. 103:10) Nye Jehova kwa tu mwene asi ose mulyo. Morwa nkenda zendi, ga tu pa mpito tu zuvhe mbudi zongwa. Ose twa tameka kutura epuro mwaJesus  nehuguvaro lyokukagwana mwenyo gwanarunye.—Resa 1 Johanesa 4:9, 10.

3 Nye yisinke epuro? Alyo kutanta asi kukwata tupu egano mauwa aga ga tumbwidira Karunga ndi? Ntani mononkedi musinke natu likida epuro?

‘KUPURA MOMUTJIMA GOGE’

4. Yisinke ya hamena mo mokulikida epuro?

4 Kulikida epuro kapi tupu ya hamena mo kukwata egano sitambo saKarunga. Epuro kuna kara nonkondo edi adi tumangeda muntu a rugane kuliza nompango zaKarunga. Kulikida epuro mwaJesus ogu ga ruganesa Karunga mokutuparura kutumangeda mupuli a tantere ko wopeke mbudi zongwa. Mupositoli Paurusa kwa uyungire asi: “Nsene o tongonona Hompa Jesus nokana, ove hena o pure momutjima goge asi, Karunga kwa mu pindura koufe, Karunga ngano nga ku parura. Yeeyi muntu age kupura momutjima gwendi, makura tava mu hungameke, age kugava undipo weyi nokana kendi, makura tava mu parura.”—Rom. 10:9, 10; 2 Kol. 4:13.

5. Morwasinke epuro lya karera nomulyo ntani ngapi natu twikira kulinkondopeka? Gava sihonena.

5 Ehuguvaro lyetu lyokukahafera mwenyo gwanarunye mouzuni woupe kwa korera mokulikida epuro nokulinkondopeka. Mulyo gokunkondopeka epuro kuvhura kugufanekesa ngwendi moomu simeno sa hepa mema. Simeno kulitjindja, nsene kutupu mema aso kusuva ndi kukukuta. Ano nsene kusitekera nkenye apa tasi hokere. Nampili ngoso, kuvhura si fe nsene kapi sina kugwana mema gokugwanena po. Ayo ya lifana nepuro lyetu. Nsene tu dira kulinkondopeka tali sesupa makura tali fu. (Ruk. 22:32; Heb. 3:12) Nye nsene tu li nkondopeka, alyo ngali ‘kura’ unene ntani ose ngatu ‘kora mepuro.’—2 Tes. 1:3; Tit. 2:2.

OMU BIBELI ZA SINGONONA EPURO

6. Mononkedi musinke mbali epuro va li singonona moVahebeli 11:1?

6 Epuro kwa li singonona moBibeli moVahebeli 11:1. (Resa.) Epuro kwa demenena koyininke yivali eyi atu dili kumona: (1) “Ehuguvaro lya pama lyoyininke eyi twa ndindira,” kuvhura kukwatera mo yihorokwa yokomeho eyi va tumbwidira ya dira kuhoroka simpe ngwendi ezonaguro lyovadinikarunga ntani uzuni woupe ou tuna kundindira. (2) “Undipo woyininke eyi atu dili kumona,” kwa kwatera mo yininke atu dili kumona nomeho getu ngwendi Jehova Karunga naMunwendi novaengeli ndi Uhompa ou una kupangera ngesi meguru. (Heb. 11:3) Ngapi natu likida asi ehuguvaro lyetu lya pama ntani twa pura moyininke eyi atu dili kumona eyi ya kara moNonkango daKarunga? Kupitira mononkango detu nomoyirugana yetu, morwa pwa hana oyo kapi tapa kara epuro.

7. Ngapi sihonena saNowa nasi tu vatera tu kwate egano eyi ayi tanta kulikida epuro? (Tara efano pepenuno 26.)

7 MoVahebeli 11:7 kwa tumbura mo epuro lyaNawo ogu ga ‘limburukwire komakorangedo gaKarunga gokuhamena yokomeho eyi ya dilire kumoneka siruwo sina. Age kwa limburukwire Karunga, makura ta tungu emuwato omu ga parukilire nembo lyendi.’ Nowa kwa likidire epuro pokutunga emuwato. Vantu va mu pulire eyi ga tungilire emutungo lina lyemunene. Ngoso Nowa kapi ga va limbwilire nokuvatantera asi va mu sige ndi? Hawe. Epuro lyendi lya mu tumangedere a va zuvhisire nouradi nokuvarondora kuhamena mpanguro ezi ga ya va  reterere Karunga. Nowa ga tanterere vantu nonkango edi Jehova ga mu tanterere asi: “Na tokora tani hulisa po vantu navenye. Tani va zonagura po nuunu, yeeyi uzuni mudima kuna zura yirugana yawo yoyidona . . . Tani hanzesa ruhanzo pevhu ni zonagure yinamwenyo nayinye. Yininke nayinye yepevhu nga yi fa.” Ntani Nowa ga fatwilire hena vantu eyi va hepere kurugana yipo va paruke, pokuvatantera mpangera zaKarunga asi: ‘Ngo mu perame memuwato.’ Monkedi zangoso, Nowa kwa likidire hena epuro lyendi ‘pokuudisa uhungami.’—Gen. 6:13, 17, 18; 2 Pet. 2:5.

8. Yisinke ga fatwilire Jakopo eyi ali tanta epuro lyosili lyoSikriste?

8 Jakopo nampo kwa tjenge mbilive zendi konyima tupu apa mupositoli Paurusa ga tjenge efatururo kuhamena epuro. Ngwendi Paurusa, Jakopo nage kwa fatwilire asi epuro lyosili lyoSikriste kapi tupu lya kwatera mo kupura nye lya hepa kulitura pasirugana. Jakopo kwa tjenge asi: “Likida nge epuro lyoge lya pira yirugana, ame name ni ku likidise epuro lyange koyirugana.” (Jak. 2:18) Jakopo kwa likidire hena elisigo pokatji kokukara tupu nepuro ntani kutura pasirugana  epuro. Nompepo donondona nado da yi pura asi Karunga yipo ga kara nye kapi da kara nepuro lyosili. Ado kurwanesa sitambo saKarunga asi si dire kusika mo. (Jak. 2:19, 20) Mokulisiga noyo, Jakopo kwa tumbwire kuhamena mugara ogu ga kere nepuro pokupura asi: “Nani Abirahamu, zinyakurwetu, kapi va mu hungamekesesere koyirugana, apa ga tulire munwendi Isaka posizambero asi a mu zambere? Ono yi mono sa asi, epuro kwa rugene kumwe noyirugana yendi, makura epuro yiyo lya sikilire mo koyirugana?” Mokunkondopeka sitwa asi epuro lya hepa kulitura pasirugana, Jakopo kwa tente hena asi: “Moomu tupu rwa kara rutu, nsene ru pira mwenyo, runa fu, nepuro nalyo nsene li pira yirugana lya fa.”—Jak. 2:21-23, 26.

9, 10. Ngapi nonkango domupositoli Johanesa adi tu vatere tu kwate egano mulyo gokulikida epuro?

9 Konyima zonomvhura 30, mupositoli Johanesa kwa tjenge Evangeli lyendi nonombilive ntatu. Nage ga kwete egano mulyo gweyi va tjenge vatjangi vakwawo woBibeli kuhamena epuro lyosili lyoSikriste ndi? Kovatjangi navenye woBibeli, Johanesa yige ga ruganesere nkangorugano zoRugereka ezi ava toroka pamwe asi “kulikida epuro.”

10 Pasihonena, Johanesa kwa fatwilire asi: “Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo, age ehandu lyaKarunga ali mu kerere.” (Joh. 3:36) Epuro lyoSikriste kwa kwatera mo kulikida ulimburukwi konompangera daJesus. Johanesa kwa temwinine hena nonkango daJesus edi da likidire hepero zokutwikira kulikida epuro.—Joh. 3:16; 6:29, 40; 11:25, 26; 14:1, 12.

11. Ngapi natu likida rupandu kweyi twa kwata egano usili?

11 Tu pandureni Jehova kweyi ga ruganesa mpepo zendi zokupongoka mokutuvatera tu kwate egano usili nokutupa mpito tu likide epuro mombudi zongwa. (Resa Rukasa 10:21.) Twa hepa kutwikira kupandura Jehova kweyi ga tu kokera kwendi kupitira mwaMunwendi, ‘ogu ga li tamekere epuro nokulisikisa mo.’ (Heb. 12:2) Mokulikida rupandu rwetu konkenda zaKarunga, twa hepa kunkondopeka epuro lyetu pokukanderera nokulironga Nonkango dendi.—Efe. 6:18; 1 Pet. 2:2.

Likida epuro pokuzuvhisa mbudi zongwa pwankenye mpito (Tara paragarafu 12)

12. Mononkedi musinke natu likida epuro?

12 Twa hepa kutwikira kulikida epuro lyetu momatumbwidiro gaJehova. Unene po tu yi ture pasirugana yipo vantu va yi mone. Pasihonena, tu twikireni kuzuvhisa kuhamena Uhompa waKarunga nokutulisa po varongwa. Ntani tu ‘ruganeneni navenye uwa, unene po vapuli vakwetetu.’ (Gar. 6:10) Ntani hena tu kondjeni unene ‘tu huture muntu gomukuru-kuru noyikara yendi eyi ga yika,’ nananyinye eyi nayi tura elikwatakano lyetu naJehova mosiponga.—Koros. 3:5, 8-10.

EPURO MWAKARUNGA KUNA KARA RUHA RWETATEKO LYETU

13. Morwasinke ya karera nomulyo kukara ‘nepuro mwaKarunga’ ntani kosinke va li hetakanesa?

13 Bibeli kwa uyunga asi: “Nsene o pira epuro, nokuza si Karunga komutjima, yeeyi ogu a zi kwaKarunga, a pure ntani asi Karunga kweli, age hena asi yige a futu ava ava mu papara.” (Heb. 11:6) Nonkango daKarunga kwa singonona asi ‘epuro mwaKarunga’ kuna kara ruha ‘rwetateko’ yipo muntu a kare ngorooro Mukriste gousili. (Heb. 6:1)  Petateko olyo, Vakriste va hepa ‘kugwederera ko kepuro lyawo’ yikara yimwe hena yomulyo yipo ‘va kare meharo lyaKarunga.’—Resa 2 Peturusa 1:5-7; Juda 20, 21.

14, 15. Morwasinke ya karera nomulyo kukara neharo kupitakana tupu kukara nepuro?

14 Vatjangi woMatjangwa goRugereka goSikriste kwa fatwilire mulyo gosikara sepuro pokusitumbura yikando mafere. Epuro yiso sikara va tumbura po unene moBibeli. Eyi kutanta nye asi epuro yiso sikara somulyo po unene ndi?

15 Pokuhetakanesa epuro neharo, Paurusa kwa tjenge asi: “Nampili ni kare nepuro lyokusikilira mo, ni vhure kudirura nondundu, nye ame eharo kutupu, opo ame nayimwe si.” (1 Kol. 13:2) Jesus kwa nkondopekere sikara somulyo po sokuhara Karunga apa ga limbwilire epuro eli asi: “Sipango esi sa pitakana po yikwawo moVeta zaKarunga nani sipi so po?” (Mat. 22:35-40) Eharo kwa kwatakanesa yikara nayinye yoSikriste kukwatera mo epuro. Bibeli kuuyunga asi: ‘Eharo kwa pura nayinye.’ Alyo kwa pura moyininke eyi Karunga ga uyunga moNonkango dendi.—1 Kol. 13:4, 7.

16, 17. Ngapi omu sikara sepuro neharo va yi nkondopeka kumwe moMatjangwa, nye sipiso po sosinene po ntani morwasinke?

16 Morwa epuro neharo kwa kara nomulyo, vatjangi woBibeli woVakriste kwa nkondopeka yikara eyi kumwe yikando yoyinzi. Paurusa kwa korangedere vapuli vakwawo va ture ‘epuro neharo yi kare silikandwiso sawo.’ (1 Tes. 5:8) Peturusa kwa tjenge asi: ‘One kwa hara [Jesus], nampili ngomu mwa dira kumunona. One kwa mu pura, nampili ngomu muna kudira kumumona.’ (1 Pet. 1:8) Jakopo kwa pulire vagwavekwa vakwawo asi: “Karunga nani kapi ga horowora vahepwe wouzuni ou, va kare nongawo demepuro novapingi wosirongo esi ga tumbwidira ava va mu hara?” (Jak. 2:5) Johanesa kwa tjenge asi: ‘Sipango saKarunga sesi asi, tu pure Munwendi Jesus Kristusa, ose hena tu lihara-hare.’1 Joh. 3:23.

17 Nampili ngomu epuro lya kara nomulyo, sikara esi nga si ka haga po apa matumbwidiro gaKarunga aga tuna kundindira nga ga ka sika mo. Nye eharo lyokuhara Karunga novakwetetu kapi ngali haga. Yiyo Paurusa ga tjenge asi: “Ano eyi ya kererera po yeyi, epuro nehuguvaro neharo – eyi yitatu, nye sosinene po pweyi eharo.”—1 Kol. 13:13.

UMBANGI WOUNENE WEPURO

18, 19. Umbangi musinke wounene wepuro tuna kumona naina ntani yilye ga u retesa po?

18 Momazuva getu, vantu vaJehova kuna kulikida epuro moUhompa waKarunga. Ano oyo kwa ninkisa vantu wokupitakana mamiliyona ntantatu va kare mombili nomouumwe. Uumwe owo kwa va ninkisa va tunge po yiyimwa yompepo zaKarunga. (Gar. 5:22, 23) Owo kuna kara umbangi wounene au likida asi awo kwa kara nepuro lyosili lyoSikriste neharo.

19 Uumwe owo kapisi muntu ga u retesa po nye Karunga. Sirugana oso sokureta vantu mouumwe kuna ‘kufumbura edina lyaKarunga, aso sidiviso sanarunye esi ngava dira kudongonona.’ (Jes. 55:13) Awo “uhwi waKarunga” ou ga tu pa asi ngatu ‘paruke, morwepuro.’ (Efe. 2:8) Ose ngatu twikira kukara mouumwe dogoro evhu nalinye ngali zure vantu wokusikilira mo wovahungami ntani woruhafo ava ngava ka hamberera narunye edina lyaJehova. Ngano tu twikireni nye kulikida epuro momatumbwidiro gaJehova.