Zende koyikaramo

Zende koyikaramo

Nombangi daJehova

Horowora eraka Rukwangali

Kupi ono nwike meho goge?

Kupi ono nwike meho goge?

“Koge na tara, ove ogu o pangerere meguru.”​—EPIS. 123:1.

MARUSUMO: 143, 124

1, 2. Yisinke ayi tanta kutara ndi kunwika kwaJehova?

OSE KUNA kuparuka ‘poyiruwo yoyidigu,’ ano eparu ngali twikira kudigopa dogoro apa Jehova nga ya zonagura po uzuni ou nokureta mbili. (2 Tim. 3:1) Yipo nye, twa hepa kulipura asi, ‘Kwalye ani papara evatero nomavyukiso?’ Nsene asi ose kupapara mavyukiso kwaJehova, oso kuna kara sininke sosiwa.

2 Yisinke ayi tanta kutara ndi kunwika kwaJehova? Ntani ngapi natu twikira kunwika kwaJehova ngomu tuna kupita momaudigu gomanene? Mutjangi gEpisarome kwa likidire asi ayo mulyo kwetu mokunwika kwaJehova a tu vatere momaudigu getu. (Resa Episarome 123:1-4.) Age kwa tente asi twa hepa kunwika kwaJehova ngwendi moomu mukareli a tara mwahekurwendi. Yisinke ga tembe? Mukareli kapi tupu a korere mwahekurwendi a mu pe nondya ndi a mu popere nye ga hepa hena kudivilisa nkenye apa asi yisinke ana mu harere hekurwendi a rugane ntani nokuyirugana. Mokulifana,  twa hepa kukonakona Nonkango daKarunga yipo tu dive mpango zendi nokuzisikisa mo. Nsene tu yi rugana oyo, kuvhura tu kare nehuguvaro asi Jehova nga tu vatera.—Efe. 5:17.

3. Yisinke nayi tu ninkisa tu dire kunwika kwaJehova?

3 Nampili ngomu twa diva mulyo gokunwika kwaJehova, yininke yimwe kuvhura kutudonganesa poyiruwo yimwe. Oyo yiyo ya horokerere Malita kaume kaJesus. Age kwa ‘viyaukire a wapaike nayinye.’ (Ruk. 10:40-42) Nsene asi oyo ya horokerere muntu ogu nga kara-kara naJesus, nose kuvhura yi tu horokere. Yisinke nayi tu ninkisa tu dire kunwika kwaJehova? Mosirongwa esi, tatu ka konakona omu mapuko gava wopeke naga tu ninkisa tu dire kunwika kwaJehova. Tatu ka lironga hena omu natu twikira kunwika kwaJehova.

MUGARA GOMULIMBURUKWI KWA ZUMBANESERE MPITO

4. Morwasinke nayi tu tetukisira asi Mosesa ga zumbanesere mpito zokuza moSirongo sEtumbwidiro?

4 Mosesa nga papara mavyukiso kwaJehova. Age “kwa kere nouradi ngwendi gogu ana kutara Karunga ogu ga ha moneka.” (Resa Vahebeli 11:24-27.) Bibeli kutanta asi: “MoIsraeli kapi mwa horokere hena muporofete ngwendi Mosesa, ogu ga lidivire naHOMPA kosipara nosipara.” (Deut. 34:10) Nye nampili ngomu ga kere nelikwatakano lyewa naJehova, age simpe kwa zumbanesere mpito zokuza moSirongo sEtumbwidiro. (Num. 20:12) Yisinke ya horokere?

5-7. Udigu musinke wa horokere apa Vaisraeli va tundire moEgipite, ntani yisinke ga rugene Mosesa?

5 Konyima tupu zokwedi kumwe noharufa apa Vaisraeli va tundire moEgipite, awo kwa ligwanekerere nomaudigu komeho va ka sike poNdundu zaSinayi. Vantu kwa sivanene morwa kapi pwa kere mema. Awo makura tava tameke kutangwisa Mosesa, ukaro owo kwa didire makura age ta kanderere kwaJehova asi: “Omu nani va rugana ava vantu ngapi? Awo pepi nokuhara kudipaga nge nomamanya vana kerere.” (Ex. 17:4) Jehova yipo ga mu pere mavyukiso. Age kwa mu tanterere a ka guse mpango zendi a ka zi toone pemanya lyopoNdundu zaSinayi, yipo mema ga ka tunde mo. Bibeli kutanta asi: “Makura ta yi rugana moyitarameho yovangendesi wo Vaisraeli.” Vaisraeli kwa nwine dogoro tava kumwa, makura udigu tau kohonoka po.—Ex. 17:5, 6.

6 Bibeli kwa tanta hena asi Mosesa kwa rukire evega olyo asi: “Masa naMeliba morwa Vaisraeli kwa tangwine, tava heteke Hompa pokupura asi: ‘Enye Hompa pweli pwetu ndi patupu?’” (Ex. 17:7) Madina ogo ga waperere poukaro wina wa horokere morwa ago kutanta asi “Kuheteka” ntani “Kutanguna.”

7 Ngapi omu ga lizuvhire Jehova kweyi ya horokere poMeliba? Age kwa lizuvhire asi Vaisraeli kapisi Mosesa va rwanesere nye upangeli wendi. (Resa Episarome 95:8, 9.) Vaisraeli kwa tulire epuko lyenene. Posiruwo oso, Mosesa kwa nwikire kwaJehova pokulimburukwa komavyukiso gendi.

8. Yisinke ya ya horokere konyima zonomvhura 40 apa Vaisraeli va kere pepi noSirongo sEtumbwidiro?

8 Yisinke ya horokere apa sa ya horokere sihorokwa sokulifana konyima zonomvhura 40 pepi noSirongo sEtumbwidiro?  Vaisraeli kwa ka sikire pevango eli lya kere pepi naKadesi, pepi nomurudi gokuhwilira moSirongo sEtumbwidiro. Evega eli nalyo kwa ya li tumbwire asi Meliba. * Morwasinke? Morwa Vaisraeli kwa sivanene hena asi kutupu mema. (Num. 20:1-5) Nye posiruwo esi, Mosesa kwa tulire epuko lyenene.

9. Yisinke Jehova ga tanterere Mosesa, nye yisinke ga rugene? (Tara efano pepenuno 12.)

9 Yisinke ga rugene Mosesa apa va tangwine vantu? Age simpe kwa nwikire kwaJehova yipo a gwane mavyukiso. Nye posikando esi Jehova kapi ga mu tanterere a toone memanya. Age kwa mu tanterere a pongeke mbunga nazinye komeho zemumanya, makura a li tantere li va pe mema. (Num. 20:6-8) Nampili ngoso, Mosesa kapi ga uyungisire emumanya olyo. Nye age kwa tugumukilire vantu ava va kere po asi: “Purakeneni vanandjorongani one! Makura kuvhura nye tu mu gusire mema memanya eli ndi?” Makura ta toona pemanya ruvali.—Num. 20:10, 11.

10. Ngapi omu mapuko gaMosesa ga kundamene Jehova?

10 Jehova kwa handukilire unene Mosesa. (Deut. 1:37; 3:26) Morwasinke? Pwa kere nokonda dokulisiga-siga deyi nampo ga handukilire. Konda zimwe kuna kara asi nampo yeeyi Mosesa ga dilire kukwama mavyukiso aga ga mu pere.

11. Morwasinke nampo Vaisraeli va gazarere asi kapi sa kere sitetu apa Mosesa ga toonene pemanya?

11 Pwa kara hena konda zimwe zeyi nampo Jehova ga handukilire Mosesa. Mamanya aga ga kere poMeliba zokuhova kwa kere udigu, ano amo kapi ngamu tundu mema nampili muntu kuna toona po. Nye mamanya aga ga kere poMeliba zauvali kwa kere ureru kubomoka ntani mema ngaga hege konhi zomamanya ogo. Nsene muntu a sima momamanya ogo age nga gwana mo mema. Apa Mosesa ga toonene po yikando yivali mevango lyokuliuuyungisa, Vaisraeli nampo kwa gazarere asi ago kwa tundire mo gene nye kapisi sitetu sokutunda kwaJehova. * Kapi tuna diva nawa-nawa.

OMU GA ZONENE MOSESA

12. Konda musinke hena zimwe zeyi nampo Jehova ga handukilire Mosesa?

12 Pwa kara konda zimwe hena zeyi Jehova ga handukilire Mosesa naArona. Koneka eyi Mosesa ga tanterere vantu asi: ‘Makura kuvhura nye tu mu gusire mema memanya eli ndi?’ Pokuruganesa nkango “tu mu,” age nampo kwa tembe kwamwene naArona. Yi kare asi yisinke ga tembe, age kapi ga likidire efumadeko kwaJehova ogu ga rugene sitetu sina. Episarome 106:32, 33 kutanta asi: ‘Vantu vaHOMPA kwa mu handukisire pomema gaMeliba, Mosesa ta kara moudigu mwarwawo. Awo kwa koresere unene Mosesa, makura ta uyunga eyi ga dira kufira kuuyunga.’ * (Num. 27:14) Age kapi ga fumadekere Jehova. Makura Jehova yipo ga  va tanterere kumwe naArona asi: “One mu vavali kwa nyokere mpango zange.” (Num. 20:24) Olyo kwa kere epuko lyenene sili.

13. Morwasinke ya karerere uhunga kwaJehova mokusilika Mosesa a dire kuza moSirongo sEtumbwidiro?

13 Ngovapitisili wovantu vaKarunga, Mosesa naArona va hepere kukara nosinka sosinene mokulimburukwa Jehova. (Ruk. 12:48) Apa Vaisraeli va rwanesere Jehova, age kapi ga va pulisilire va ze mosirongo saKanani. (Num. 14:26-30, 34) Yipo nye, ayo kwa kere uhunga kwaJehova mokusilika Mosesa a dire kuza moSirongo sEtumbwidiro morwa nage kwa rwanesere.

EYI YA RETESERE PO UDIGU

14, 15. Yisinke ya ninkisire Mosesa a handukise Jehova?

14 Yisinke ya ninkisire Mosesa a kare nonkareso zourwanesi? Koneka hena Episarome 106:32, 33 asi: ‘Vantu vaHOMPA kwa mu handukisire pomema gaMeliba, Mosesa ta kara moudigu mwarwawo. Awo kwa koresere unene Mosesa, makura ta uyunga eyi ga dira kufira kuuyunga.’ Nampili ngomu Vaisraeli va rwanesere Jehova, Mosesa ya mu handukisire. Morwa kudira kulipangera, ayo kwa mu ninkisire a uyunge ga hana kugazadara ko koyitundwamo.

15 Mosesa kwa pulisilire mapuko gava wopeke ga mu ninkise a dire kunwika kwaJehova. Sikando sokuhova apa vantu va sivanene kuhamena mema, Mosesa ga rugene youhunga. (Ex. 7:6) Mosesa kwa handukire nampo yeeyi Vaisraeli ngava mu sivanene nomvhura dononzi. Age nampo kwa demenene po omu ngava mu handukisa Vaisraeli mevango lyokufumadeka Jehova.

16. Morwasinke twa hepera kugazadara ko kepuko eli ga rugene Mosesa?

16 Nsene asi Mosesa muporofete gomulimburukwi ga tulire epuko, nose kuvhura yi tu horokere. Ngwendi Mosesa, nose ntaantani tu ka hwilire mouzuni woupe ou ga tu tumbwidira Jehova. (2 Pet. 3:13) Kwato gumwe gwetu ogu ana hara kuzumbanesa mpito ozo. Mokuninka asi ngayi ka tu tompoke, twa hepa kunwika kwaJehova pokusikisa mo mpango zendi nkenye apa. (1 Joh. 2:17) Yisinke natu lirongera ko kepuko lyaMosesa?

WA HA PULISIRA EYI AVA RUGANA VAKWENI YI KU DONGANESE

17. Yisinke ngayi tu vatera tu dire kuhanduka usimbu?

17 Wa ha handuka usimbu. Poyiruwo yimwe kuvhura tu ligwanekere noudigu wokulifana yikando yoyinzi, nye Bibeli kutukorangeda asi: “Walye atu rorokeni kurugana uwa, yeeyi nsene tu dira kudwapa, ngano ngatu ka sika ko komuzangu.” (Gar. 6:9; 2 Tes. 3:13) Apa yikara yoyidona yava wopeke ndi maukaro gamwe aga tu handukisa, ose kulipangera nyamwetu komeho tu uyunge ndi? (Yis. 10:19; 17:27; Mat. 5:22) Nsene vana tu handukisa wopeke, twa hepa ‘kusigira ehandu lyaKarunga evega.’ (Resa Varoma 12:17-21.) Nsene tu nwika kwaJehova, mevango lyokuhanduka ose nga tu ndindira kwendi a kohonone po udigu wetu posiruwo souhunga. Mokulisiga, nsene tu tengwida kuwoko ngayi likida asi kapi twa fumadeka Jehova.

18. Yisinke natu rugana nsene tuna gwana mavyukiso gomape?

 18 Kwama mavyukiso gomape. Ose kukwama mavyukiso gomape aga a tu pe Jehova ndi? Nsene tu yi rugana oyo, kapi ngatu demenena kurugana yininke moomu twayi yika kuyirugana. Nye, ngayi tu rerupira kukwama mavyukiso gomape aga atu pe Jehova kupitira mombunga zendi. (Heb. 13:17) Ayo hena ngayi tu vatera tu dire ‘kupitakanesa pweyi va tjanga.’ (1 Kol. 4:6) Nsene tu yi rugana oyo, ngayi tu vatera tu nwike kwendi.

Yisinke natu lirongera ko kweyi ga rugene Mosesa apa vantu va tulire mapuko? (Tara paragarafu 19)

19. Ngapi natu dira kupulisira mapuko gava wopeke ga tezese po elikwatakano lyetu naJehova?

19 Wa ha pulisira mapuko gava wopeke ga tezese po elikwatakano lyoge naJehova. Nsene tu nwika kwaJehova, kapi ngatu pulisira mapuko gava wopeke ga tezese po elikwatakano lyetu naJehova. Ngwendi Mosesa, ayo mulyo kwetu, unene po nsene twa kara noyitumbukira mombunga zaJehova. Nkenye gumwe gwetu ga hepa ‘kuruganena eparu lyendi noutjirwe nekankamo,’ nampili ngomu Jehova a dili kundindira ko kwetu eyi natu dira kuvhura kusikisa mo. (Fil. 2:12) Nye Jehova kundindira ko kwetu tu kare nosinka sosinene sokumulimburukwa unene po nsene twa kara noyitumbukira. (Ruk. 12:48) Nye, nsene twa hara Jehova, kwato eyi ngayi tu pundukisa ndi yi tu guse mo meharo lyendi.—Epis. 119:165; Rom. 8:37-39.

20. Yisinke natu tokomena kurugana?

20 Momazuva aga gopouhura, ngano tu twikireni kunwika ‘kogu a pangere meguru,’yipo tu sikise mo mpango zendi. Twa ha pulisira mapuko gava wopeke ga tezese po elikwatakano lyetu naJehova. Eyi ya horokerere Mosesa kuturonga sirongwa somulyo. Mevango lyokuhanduka nsene wopeke vana tu handukisa, ngano tu demenene ‘kutara kwaKarunga gwetu, dogoro noku nga tu fira nkenda.’—Epis. 123:1, 2.

^ para. 8 Evango eli Meliba kwa lisigire neli lyopomuhowo eli va gwene pepi naRafidimu eli ngava tumbura hena asi Masa. Nye nampili ngoso mavango nagenye ogo kwa ga tumbwire asi Meliba morwa Vaisraeli yipo va tangwinine.—Tara mauzera po karata moruha 7 mombapira Mauzera gomoNonkango daKarunga.

^ para. 11 Murongi gumwe goBibeli kwa tanta asi: “Kuliza nompo zoVajuda; varwanesi kwa tanta asi esi kapi sa kere sitetu morwa Mosesa ga yi divire asi memanya olyo kwa kere mo mema. Awo kwa here a yi rugane hena pemanya lyapeke mokulikida nsene sili asi aso sitetu.” Azo mpo tupu.

^ para. 12 Tara Ruhungu 15 Sikukutu 1987 “Mapuro gokutunda kovaresi,” moRuhingilisa.