Zende koyikaramo

Zende koyikaramo

Nombangi daJehova

Horowora eraka Rukwangali

Awo kwa ligeve vene—moMyanmar

Awo kwa ligeve vene—moMyanmar

BIBELI kutanta asi: “Muzangu munzi, nye varugani vasesu. Kanderereni nye Hompa gomuzangu, a tume varugani momuzangu gwendi.” (Ruk. 10:2) Nonkango odo ga uyungire Jesus nomvhura 2 000 da ka pita kulikida ukaro ou una kara moMyanmar. Amo kwa kara mo vazuvhisi 4 200 ava vana kuzuvhisira vantu mamiliyona 55.

Nampili ngoso, Jehova “Hompa gomuzangu”, kwa tumangeda vanavazinyetu wokoyirongo yapeke va ka zuvhisire kosirongo oso. Morwasinke va dirukilira ko? Yisinke ya va tumangeda va diruke? Matungiko musinke vana kuhafera? Tuzeni tu ka yi tare.

“WIZENI, TUNA HEPA VAZUVHISI”

Nomvhura da ka pita, uvera wosihegani ou ga kere nawo Kazuhiro muzuvhisi gokukarerera gomoYapani, tau sangumuka ta pwilire makura tava mu dukisire kosipangero. Ndokotora yipo ga mu nyokesere kusinga etuwa ure wonomvhura mbali. Eyi kwa mu tukukisire makura ta lipura asi: ‘Ngapi omu ngani hafera hena kuzuvhisa?’ Age kwa likwamberere kwaJehova a mu vatere a twikire nouzuvhisi wokukarerera.

Kazuhiro naMari

Kazuhiro kwa tanta asi: “Konyima zokwedi, kaume kange ogu ga kere muzuvhisi moMyanmar kwa zuvhire kuhamena udigu wange. Ta bela nge nokutantera nge asi: ‘MoMyanmar ose kuruganesa nombesa. Nsene ngo wiza kapi ngo ya hepa kuruganesa etuwa.’ Makura tani pura ndokotora nsene kuvhura ni ze koMyanmar. Ayo kwa tetukisire nge apa ga tanterere nge asi: ‘Ndokotora gouruvi gokoMyanmar kuna kuwiza. Ngani ya mu tantera kukuhamena. Ano nsene ngau ka sangumuka uvera woge nga ka ku vatera.’ Eyi ga tanterere nge ndokotora kwa monekere ngwendi Jehova ana limburura ekanderero lyange.”

Konyima tupu zosiruwo, Kazuhiro ta tumu mbilive koMberewa zomutayi moMyanmar asi nage namukadendi vana hara kuyazuvhisira mosirongo oso. Konyima zomazuva gatano, tava gwana elimbururo asi, “Wizeni, tuna hepa vazuvhisi.” Kazuhiro namukadendi Mari, tava randesa matuwa gawo nokugwana yidokumende yawo yokuzisa kosirongo oso. Awo ngesi kuna kuhafera kuvatera mombunga zoRupurupuru mositata saMandalay. Kazuhiro kwa tanta asi: “Ayo kwa nkondopeka epuro lyetu metumbwidiro eli lya kara mEpisarome 37:5 asi: ‘Ligava  kwaHOMPA, ove o huguvare mwendi, makura age nga ku kwafe.’”

JEHOVA KUPATURURA NZIRA

Momvhura 2014 Nombangi domoMyanmar kwa kere nosigongi sokulikarera. Vanavazinyetu wokoyirongo yapeke nawo kwa wizire kosigongi oso. Gumwe gwawo kuna kara Monique gonomvhura 34 ogu ga tunda koAmerika. Age kwa tanta asi: “Apa na tengwire kembo, ame kwa kanderere kwaJehova yipo ni dive eyi nani rugana. Ntani na zogerere hena novakondi vange kuhamena yitambo yange yopampepo. Nawo va yi kwatesere ko asi na hepa kutengura koMyanmar, nye komeho ni tokore ngani kanderere unene ntani ayo kwa gusire siruwo. Monique kwa faturura eyi ya gusilire siruwo.

Monique naLi

Age kwa tanta asi: “Jesus kwa korangedere varongwa vendi asi va hepa tanko ‘kuvarura.’ Yipo na lipulire asi: ‘Kuvhura ngayi tompoke nge kudiruka ndi? Ngani vhura kukalirera na hana yirugana ndi?’” Age kwa tanta asi: “Yipo na dimbwilire asi kapi na kere noyimaliwa yokugwanena po yipo ni diruke.” Ngapi ya mu tompokere mokudiruka?—Ruk. 14:28.

Monique kwa tanta asi: “Ezuva limwe muhona gwange ta zigida nge. Ame kwa kankamene morwa kwa gazarere asi ta ka tjida nge moyirugana. Nye age kwa pandwire nge koyirugana yange yoyiwa. Makura ta tantere nge asi ta gwederere ko koyimaliwa eyi ani tambura, ayo kwa ka sikire poyimaliwa eyi na hepere mokusikisa mo yihepwa yange.”

Monique kuzuvhisira moMyanmar kutundilira mwaSindimba 2014. Ngapi ana kulizuvha kuhamena kukazuvhisira oku kuna hepa vazuvhisi? Age kwa tanta asi: “Nina hafa kweyi nina kuzuvhisira omu. Ame kwa kara novarongwa vatatu woBibeli, ano gumwe nomvhura dendi 67. Nkenye apa age kumenyamenya nokulidingira nge. Age kwa lilire apa ga zuvhire asi edina lyaKarunga, Jehova. Age kwa uyungire ngesi asi: ‘Esi sikando sange sokuhova kuzuvha asi edina lyaKarunga yilyo Jehova. Ove simpe omunona kwange, nye wa ronga nge sininke somulyo esi na dira kuzuvha rumwe meparu lyange.’ Kutanta ko usili, name kwa lilire. Yihorokwa yangoso kututumangeda tu ka zuvhisire oku vana hepa vazuvhisi.” Monique ntani tupu ka ka tundire koSikora zoVazuvhisi woUhompa.

Vamwe kwa tokwere kukazuvhisira koMyanmar morwa yihorokwa eyi va resere mo 2013 Yearbook of Jehovah’s Witnesses kuhamena sirongo oso. Munazinyetu gomukadi Li gokupitakana ponomvhura 30 kwa tunga koMbindakano zaAsia. Age nga rugana, nye yihorokwa yomoYearbook kwa mu tumangedere a ka zuvhisire koMyanmar. Age kwa tanta asi: “Mo-2014 posigongi esi sa kere moYangon, ame kwa ka ligwene novalikwali ava ava vatere mombunga zoRutjina moMyanmar. Mokumona asi na diva kuuyunga Rutjina, yipo na tokwere kukavatera mbunga ozo. Ame kwa ka rugene kumwe naMonique makura tatu dirukire koMandalay. Jehova ga tu vaterere tu gwane yirugana yokuronga posure zimwe mazuva gongandi tupu ntani twa gwene nzugo pepi nosure ozo. Nampili ngomu kwa kara upyu nomaudigu gamwe, ame kuhafera kuzuvhisa. Vantu vamo ruhepo, nye awo vantu wovawa ntani awo kwa hara kupurakena kombudi zongwa. Ayo kuhafesa mokumona omu Jehova ana kugendesa sirugana sokuzuvhisa. Na yi pura asi Jehova ana hara ni twikire kuzuvhisira moomu.”

JEHOVA KUZUVHA MAKANDERERO

Wovanzi ava va dirukira oku vana hepa vazuvhisi va limonena mulyo gokukanderera. Jumpei gonomvhura 37 namukadendi Nao gonomvhura 35 va yi limonena oyo. Awo ngava vatere kambunga korupurupuru moYapani. Morwasinke va dirukira koMyanmar?  Jumpei kwa tanta asi: “Name namukadange kwa litulilire po sitambo sokukazuvhisira kosirongo sapeke. Munazinyetu gomugara gomombunga zetu zoRupurupuru kwa dirukilire koMyanmar. Nampili ngomu twa kere noyimaliwa yoyisesu, nose kwa ya dirukire mwaKudumonkuru 2010. Vanavazinyetu womosirongo oso kwa ka tu tambwire nomawoko gavali.” Ngapi a lizuvhu kweyi ana kuvatera kambunga oko? Age kwa tanta asi: “Wovanzi kulikida elituromo. Ayo kuvatetukisa apa atu va likida novidiyo domorupurupuru. Tuna hafa kweyi twa tulire po etokoro mokuyakarera Jehova oku.”

Nao naJumpei

Ngapi omu Jumpei naNao ayi va tompoka mokulirera vene? Jumpei kwa tanta asi: “Konyima zonomvhura ntatu yimaliwa yetu kwa pwire, ose kapi twa kere noyimaliwa yokuvhura kufutira nzugo zetu mvhura ezi za kweme ko. Name namukadange ngatu kanderere unene. Hararasi, tatu gwana mbilive koMberewa zomutayi mokutuzigida tu rugane uzuvhisi wosiruwo nasinye makwedi gongandi. Ose kwa huguvarere mwaJehova ntani twayi limonene asi kapi ga tu sigilira. Age kwa tu vatera yiruwo nayinye.” Jumpei naNao ntani tupu kava ka tundire koSikora zoVazuvhisi woUhompa.

JEHOVA KWA TUMANGEDA WOVANZI

Yisinke ya tumangedere Simone, gonomvhura 43 gokoItalia namukadendi Anna gonomvhura 37 gokoNew Zealand, va dirukire koMyanmar? Anna kwa tanta asi: “Aso kuna kara sihorokwa sokuhamena sirongo oso esi sa kara mo2013 Yearbook.” Simone kwa tanta asi: “Azo mpito zongwa mokuyatunga moMyanmar. Eparu lyako ureru ntani ame kuruganesa siruwo sosinzi mosirugana saJehova. Ayo kuhafesa omu Jehova a tu pakere mbili apa atu zuvhisire oku vana hepa vazuvhisi.” (Epis. 121:5) Anna kwa tanta asi: “Ame ngesi nina hafa unene kupitakana pwanare. Kapi twa weka yininke yoyinzi. Ame kukara nkenye apa namugara gwange ntani ngesi tuna lidiva unene. Ose hena twa gwana ko vakaume vamwe. Vantu woku kapi va nyenga Nombangi ntani awo kwa hara kupurakena kombudi zetu.” Mononkedi musinke?

Simone naAnna

Anna kwa tanta asi: “Ezuva limwe ame kwa zuvhisilire murongwa gokounivesiti, makura tatu tura po mawapaiko tu ka ligwane hena. Apa na tengwilire ko, age kwa ka simbire ko mukwawo. Ano sikando sauvali, ta ka simba ko hena vakwawo. Ano konyima yipo ga ka simbire ko hena wovanzi. Ngesi, ame kuna kulironga nanavenye moutano wawo.” Simone kwa tanta asi: “Vantu ava atu gwana mokuzuvhisa vawa ntani awo kwa hara kupurakena. Awo kulikida elituromo. Nye siruwo kwato sokuvatera vantu navenye.”

Sachio naMizuho

Yisinke no rugana yipo o dirukire koMyanmar? Mizuho gokoYapani kwa tanta asi: “Name namugara gwange Sachio, kwa here kukazuvhisira oku vana hepa  vazuvhisi nye kapi twa divire asi kupi. Konyima zokuresa yihorokwa yomoMyanmar mo2013 Yearbook, ayo kwa tu ninkisire tu gazadare ko nsene kuvhura tu ka zuvhisire koMyanmar.” Sachio kwa tanta asi: “Ose kwa tokwere kuza ure wosivike tu ka tare Yangon nkurusitata zaMyanmar. Eyi twa ka mwene kwa tu tumangedere tu dirukire ko.”

KUVHURA O KA ZUVHISIRE KO NDI?

Jane, Danica, Rodney naJordan

Rodney namukadendi Jane gonomvhura 52 wokoAustralia, namunwawo gomumati Jordan ntani gomukadona Danica, kuzuvhisira koMyanmar kutunda mo-2010. Rodney kwa tanta asi: “Ayo kwa tu tetukisire mokumona omu vantu va here kulironga. Kuna kukorangeda wopeke nawo va ya zuvhisire moMyanmar.” Morwasinke? “Kuyazuvhisira oku, kwa tu reta pepi naJehova. Vadinkantu wovanzi kuna kuhokwa tupu yirugana noselefoni nomatuwa ntani nayimwe ngoso. Nye vana vetu kuna kulironga eraka lyapeke yipo va ka zuvhisire ko wopeke. Awo kuliyomberesa omu nava ka vatera owo va dira kudiva Bibeli nomu nava ka limburura komapongo meraka lyomomukunda ogu twa dirukira, awo hena kulihameka moyirugana yapeke yopampepo.”

Oliver naAnna

Oliver gonomvhura 37 gokoAmerika kwa uyunga ko eyi ya karera nomulyo kuza oku vana hepa vazuvhisi. Age kwa tanta asi: “Kukarera Jehova oku na dira kuyika kwa retera nge matungiko. Ayo kwa vatera nge ni dire kukara nowoma ntani ni huguvare mwaJehova yi kare asi momaudigu musinke nina kupita. Kuzuvhisa kumwe novanavazinyetu ava na dira kuyika ava va kara nepuliro ngwendi lyange, kwa vatera nge ni mone asi Uhompa waKarunga mulyo kupitakana nkenye eyi.” Oliver namukadendi Anna, kuna kutwikira kuzuvhisira momukunda omu ava uyunga Rutjina.

Trazel

Trazel, munazinyetu gomukadi gonomvhura 52 gokoAustralia, kuzuvhisira moMyanmar kutundilira mo-2004. Age kwa tanta asi: “Tani korangeda ava nayi tompoka va ka zuvhisire oku vana hepa vazuvhisi. Ame na yi limonena asi nsene o lizambera mokukarera Jehova, age nga ku tungika. Kapi nayi gazara asi eparu lyange ngali ya fana ngesi. Ame ngesi nina hafa ntani kuna kugwana mauwa gomanzi.”

Ngano yihorokwa eyi yomoMyanmar yi ku vatere o gazadare ko kukazuvhisira oku vana hepa vazuvhisi. Ava ava zuvhisire oku vana hepa vazuvhisi kuna kutanta asi “Wizeni mu ya tu vatere omu moMyanmar.”