Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SELIRONGO 23

“Omu takamese, walye ava mu diinine po”

“Omu takamese, walye ava mu diinine po”

“Omu takamese, walye ava mu diinine po vantu nounongo nomasanseko goyimpempa aga ga tunda konompo dovantu.”—KOROS. 2:8.

RUSUMO 96 Buke zaKarunga, emona

ETWAROMO *

1. Kuliza noVakorosi 2:4, 8, ngapi Satana a hetekere ko kupukisa magano getu?

SATANA ana hara tu hageke kukarera Jehova. Age kuyirugana eyi pokuhetekera ko kupukisa magano getu nokutuninkisa tu gazare monkedi omu ga yi harera. Age kuhetekera ko kutupukisa pokuruganesa yininke eyi twa hara.—Resa Vakorosi 2:4, 8.

2-3. (a) Morwasinke nonkango domoVakorosi 2:8 dina karere nomulyo kwetu naina? (b) Yisinke natu ka zogera mosirongwa esi?

2 Kuvhura a tu pukise Satana nose naina ndi? Nhi. Diworokeni asi Paurusa kapi ga tjangerere nonkango domoVakorosi 2:8 kovahapuli. Age kwa di tjangerere Vakriste ava va gwavekere nompepo zokupongoka. (Koros. 1:2, 5) Vakriste owo kwa kere mosiponga, nye naina ose kuna kara mosiponga sosinene. (1 Kol. 10:12) Morwasinke? Morwa Satana ngesi va mu zugumina pevhu ntani age kuna kukondja paapa ga hulira yipo a pukise vakareli vaKarunga. (Ehor. 12:9, 12, 17) Ntani ose kuna kuparuka posiruwo esi vadinikarunga novakumbageli ‘udona wawo una vhuka.’—2 Tim. 3:1, 13.

3 Mosirongwa esi tatu ka zogera omu Satana a ruganesa “masanseko goyimpempa” yipo a pukise magano getu. Tatu ka zogera “makoto” gendi gatatu goumbudi aga a ruganesa. (Efe. 6:11) Sirongwa sokukwama ko, ngasi ka zogera eyi nayi tu vatera tu rundurure magazaro getu aga ga pukisa Satana. Pomuhowo, tanko tu zogereni eyi natu lirongera ko monkedi omu Satana ga pukisire Vaisraeli, apa va kere moSirongo sEtumbwidiro.

VAISRAELI KWAVA PUKISIRE VA KARERE YIKARUNGA YOYIMPEMPA

4-6. Kuliza naDeuteronomium 11:10-15, nkedi musinke zompe zokulima va lirongere Vaisraeli apa va ka sikire moSirongo sEtumbwidiro?

4 Satana kwa pukisire Vaisraeli va tameke kukarera yikarunga yoyimpempa. Ngapi ga yi rugene? Age ga yi divire asi Vaisraeli va hepere nondya, makura yipo ga ruganesere eyi va here yipo va karere yikarunga yoyimpempa. Apa va ka sikire moSirongo sEtumbwidiro, awo va hepere kulironga nkedi zompe omu nava lima. Apa va kere moEgipite, awo ngava ruganesa mema gomomukuro gwaNili yipo va tekere momapya gawo. Nye moSirongo sEtumbwidiro, vantu kapi ngava ruganesa mema gomomukuro yipo va tekere momapya gawo, nye awo ngava ndindire mvhura ntani eme. (Resa Deuteronomium 11:10-15; Jes. 18:4, 5) Yipo nye, awo va hepere kulironga nonkedi donompe omu nava lima mapya gawo. Eyi kapi ya kere ureru kwawo, morwa sinzi sovantu ava va kere noudivi wokulima kwa fililire momburundu.

Ngapi Satana ga pukisire magazaro goVaisraeli ava ngava limi? (Tara paragarafu 4-6) *

5 Jehova kwa tanterere vantu vendi asi ukaro wawo una litjindji. Ntani age kwa va rondwere asi: “Nokulisigilira si nyamweni va mu pukise, asi mu zumbe HOMPA, mu tongamene oku tomu kerere vakarunga peke.” (Deut. 11:16, 17) Mokumona asi Jehova kwa tanterere vantu vendi kuhamena omu nava lima, morwasinke nye ga va rondwerere kuhamena kukarera yikarunga yoyimpempa?

6 Jehova ga yi divire asi Vaisraeli ngava hara kuhonena nonkedi dokulima konomuhoko dovapagani edi da va kundurukidire. Nampili ngomu nomuhoko odo da kere noudivi wokulima ou va hepere Vaisraeli, ayo kwa kere siponga kuhonena  nomuhoko odo. Vakanani ngava karere sikarunga sedina Bara. Awo kwa pulire asi Bara yige ga sita eguru ntani yige a rokesa mvhura. Jehova kapi ga here vantu vendi vava pukise noyimpempa yangoso. Nampili ngoso, yikando yoyinzi Vaisraeli kwa tokwere kukarera Bara. (Num. 25:3, 5; Vap. 2:13; 1 Vah. 18:18) Koneka omu Satana ga pukisire magazaro goVaisraeli.

NONKEDI NTATU EDI GA RUGANESERE SATANA YIPO A PUKISE VAISRAELI

7. Eheteko musinke va ligwanekerere nalyo Vaisraeli apa va ka sikire moSirongo sEtumbwidiro?

7 Mokumona asi Vaisraeli kwa here mvhura zi roke, Satana pomuhowo kwa ruganesere eyi va here mokuvapukisa. Kutundilira mwaKudumogona dogoro mwaSitarara, moSirongo sEtumbwidiro kapi ngamu roko mvhura zonzi. Vaisraeli ngava ndindire mvhura ezi ngazi tameke kuroka mwaSikukutu, yipo va gwane muzangu. Satana kwa kumbagerere Vaisraeli va gazare asi mokuparuka ntudi va hepa kuhonena eyi ngadi rugana nomuhoko dovapagani edi dava kundurukidire. Nomuhoko odo kwa pulire asi mokuninka asi zi roke mvhura, ntudi va ruganene yikarunga yawo yininke yokulisiga-siga. Vaisraeli ava va dilire kukara nepuro mwaJehova nawo kwa tamekere kukarera Bara, yipo ru dire kuvagwana rukukutu.

8. Nkedi musinke zauvali ga ruganesere Satana mokupukisa Vaisraeli? Faturura.

8 Nkedi zauvali ezi Satana ga ruganesere mokupukisa Vaisraeli kuna kara ruhonda. Nomuhoko dovapagani ngadi karere yikarunga yawo pokurugana yirugana yoruhonda. Pasihonena, vagara novakadi ngava honderere pomavega gawo gosipagani. Awo ngava pulisire hena vagara wokulirara novagara ndi vakadi wokulirara novakadi. (Deut. 23:17, 18; 1 Vah. 14:24) Nomuhoko odo kwa gazarere asi yirugana oyo ngayi ninkisa yikarunga yawo yi tungike evhu lyawo yipo li gave nondya. Sinzi soVaisraeli nawo ngava honene yirugana oyo yoruhonda, ntani ya va ninkisire va tameke kukarera yikarunga yoyimpempa. Yosili, Satana ya mu tompokere kupukisa magano gawo.

9. Kuliza naHoseya 2:16, 17, ngapi Satana ga pukisire Vaisraeli va divare Jehova?

9 Nkedi zautatu ezi ga ruganesere Satana mokupukisa Vaisraeli kuna kara pokuvaninka va divare Jehova. Mosiruwo somuporofete Jeremiya, Jehova kwa tente asi vaporofete woyimpempa kwa ninkisire vantu vendi va divare edina lyendi ‘nokutengwira kwaBara.’ (Jer. 23:27) Vantu vaKarunga kwa hagekere kuruganesa edina Jehova nokupinganesera po edina Bara, eli ali tanta asi “muhona.” Eyi kwa ninkisire Vaisraeli va dire kumona elisigo pokatji kaJehova naBara. Ntani eyi kwa va ninkisire va karere Jehova ntani naBara.—Resa Hoseya 2:16, 17.

NONKEDI EDI A RUGANESA SATANA NAINA MOKUPUKISA VANTU

10. Nonkedi musinke a ruganesa Satana naina mokupukisa vantu?

10 Satana kuna kuruganesa hena nonkedi dokulifana naina. Age kupukisa vantu pokuruganesa eyi va hara ntani kupitira moruhonda ntani pokuvaninka va divare Jehova. Pomuhowo, tu zogereni omu Satana a ninkisa vantu va divare Jehova.

11. Ngapi omu Satana ga ninkisa vantu va divare Jehova?

11 Satana kuninkisa vantu va divare Jehova. Konyima zonomfa dovapositoli, vantu ava ngava lininkisa asi Vakriste kwa tamekere kuhanesa marongo goyimpempa.  (Yirug. 20:29, 30; 2 Tes. 2:3) Varwanesi owo kwa ninkisire vantu va divare Karunga gousili. Pasihonena, awo kwa hagekere kuruganesa edina lyaKarunga moNobibeli dawo nokupinganesera po “Hompa” ndi yitumbwisiso yimwe hena. Apa va gusire mo edina lyaKarunga moNobibeli nokupinganesera po “Hompa,” eyi kwa ninkisire varesi woBibeli va dire kudimburura asi Jehova ga lisiga “nohompa” ava va tumbura moMatjangwa. (1 Kol. 8:5) Awo kwa ruganesere “Hompa” mokutamba kwaJehova naJesus, ano eyi kwa ninkisa vantu va dire kudiva asi Jehova naMunwendi va lisiga. (Joh. 17:3) Epiyagano lyangesi kwa retesere po erongo lyaKarunga mutatu gumwe, eli lya dira kukara moNonkango daKarunga. Eyi kwa ninkisa vantu wovanzi va pure asi kapi tatu vhuru kudiva Karunga. Yimpempa musi koudona!—Yirug. 17:27.

Ngapi omu Satana ga ruganesa ukarelikarunga woyimpempa mokukorangeda ruhonda? (Tara paragarafu 12) *

12. Yisinke au korangeda ukarelikarunga woyimpempa ntani kuliza noVaroma 1:28-31, yitundwamo musinke ya reta?

12 Satana kuruganesa ruhonda. Posiruwo soVaisraeli, Satana kwa ruganesere ukarelikarunga woyimpempa mokukorangeda ruhonda. Age kuna kurugana yokulifana naina. Ukareli woyimpempa naina kupulisira ruhonda ntani poyiruwo yimwe awo kuninkisa ruhonda ru moneke ngwendi kapisi sininke sosidona. Eyi kwa ninkisa vantu ava ava gazara asi kwa kukarera Karunga va dire kukwama nompango dendi. Mombilive zaPaurusa ezi ga tjangerere Varoma, age kwa tumbwire eyi ava rugana vantu owo. (Resa Varoma 1:28-31.) Yininke eyi ga tumbwire Paurusa “eyi ya dira kuzira mo,” kwa kwatera mo ruhonda ntani kulikwara mugara nomugara ndi mukadi nomukadi. (Rom. 1:24-27, 32; Ehor. 2:20) Eyi yiyo ya karera nomulyo kwetu tu kwame eyi azi rongo Bibeli.

13. Nkedi musinke hena a ruganesa Satana mokupukisa vantu?

13 Satana kuruganesa eyi twa hara. Natuvenye kwa hara kukara noudivi ou ngau tu vatera yipo tu vhure kukalirera nomapata getu. (1 Tim. 5:8) Ose kugwana udivi owo unene po pokuza kosure ntani nsene tu litura mo unene. Nye twa hepa kutakamesa. Moyirongo yoyinzi, varongwa kapi tupu ava lirongo udivi nye hena kuvaronga unongo womouzuni ou.  Awo hena kuvakorangeda va dire kupura moBibeli ndi asi Karunga yipo ga kara. Ntani awo kuvaronga hena asi vantu wonondunge kwa pura asi eparu kwa wiza po tupu kupitira melisinto. (Rom. 1:21-23) Marongo gokufana ngoso kurwanesa ‘unongo waKarunga.’—1 Kol. 1:19-21; 3:18-20.

14. Yisinke ayi horokere vantu ava ava kwama unongo womouzuni?

14 Unongo wovantu kuninkisa muntu a rwanese ndi a ncenune nompango daJehova. Unongo owo kuninkisa vantu va kondjere “yirugana yorutu” mevango lyokukondjera yiyimwa yompepo. (Gar. 5:19-23) Unongo owo kuninkisa vantu va linenepeke ntani va ‘lihare tupu vene.’ (2 Tim. 3:2-4) Yikara eyi, ya lisiga nosikara selinunupiko esi Karunga ga harera vakareli vendi. (2 Sam. 22:28) Vakriste vamwe ava va za kounivesiti kwa tameka kukara nonkareso ngwendi zovantu womouzuni mevango lyokuparuka ngwendi moomu ga yi harera Karunga. Tu tareni sihonena simwe eyi ya karera siponga.

Ngapi omu unongo wouzuni au kundama nkareso zetu? (Tara paragarafu 14-16) *

15-16. Yisinke ono lirongere ko kweyi ya horokerere munazinyetukadi ogu vana tumbura?

15 Munazinyetukadi ogu ga kara mosirugana sosiruwo nasinye nomvhura dokupitakana 15 kwa tanta asi: “Ame ngani resa kuhamena siponga sokuza kounivesiti, nye kapi ngani yi pakere mbili. Ame ngani gazara ame mapukururo ogo kapi ga tembe nge.” Udigu musinke ga ligwanekerere nawo konyima? Age kwa tanta asi: “Apa na kere kounivesiti, ame kapi ngani gwana siruwo sokukanderera kwaJehova, ame hena kapi ngani hafere kulironga Bibeli novakwetu ntani kapi ngani liwapaikire  nawa komapongo, morwa ngani lizuvhu eroroko nkenye apa. Nye konyima apa na dimbwilire asi univesiti kuna kukundama elikwatakano lyange naJehova, yipo na tokwere kuhageka.”

16 Ngapi omu univesiti za kundamene nkareso zendi? Age kwa tanta asi: “Ame kuna kulizuvha udona, morwa kounivesiti ame kwa ka lirongere nkareso zokupangura wopeke unene po vanavazinyetu. Ame ngani va ndindire va sikilire mo ntani ngani ligusa ko kwawo. Ayo kwa gusire nge siruwo sosire mokutjindja nkareso zange. Eyi ya horokerere nge, kwa ronga nge asi ayo siponga kuncenuna marondoro aga atu gwana kwaJehova kupitira mombunga zendi. Jehova ga divire nge kupitakana omu na lidivire nyamwange. Ngano na purakenene, ngano kapi nina kulivera!”

17. (a) Yisinke twa hepa kutokomena kurugana? (b) Yisinke ngatu ka zogera mosirongwa sokukwama ko?

17 Tokomena kunyokera po “unongo nomasanseko goyimpempa” gomouzuni waSatana. Takamesa nkenye apa nonkedi edi a ruganesa Satana mokupukisa vantu. (1 Kol. 3:18; 2 Kol. 2:11) Wa ha mu pulisira a ku ninkise o divare Jehova. Twikira kuparuka kuliza nonompango daJehova. Kapisi o pulisire Satana a ku ninkise o ncenune mapukururo gaJehova. Nye yisinke no rugana nsene ono dimburura asi wa kara nonkareso zovantu womouzuni ou? Sirongwa sokukwama ko ngasi ka tu likida omu Nonkango daKarunga nadi tu vatera tu hanagure po “nohotepopero dovantu” momagazaro nomparukiso zetu.—2 Kol. 10:4, 5.

RUSUMO 49 Hafesa mutjima gwaJehova

^ para. 5 Satana ga diva kukumbagera vantu. Nampili ngomu ga kara mupangeli gouzuni ou, age kwa kumbagera vantu wovanzi va lizuvhe asi awo va manguruka. Sirongwa esi tasi ka zogera nonkedi dimwe edi a ruganesa Satana mokukumbagera vantu.

^ para. 48 EFANO: Vaisraeli kuna kuzogera kumwe noVakanani ntani kuna kuligwanekera neheteko lyokukarera Bara nokulihameka moruhonda.

^ para. 51 EFANO: Efano kuna kulikida ngereka ezi azi pulisire nonkwara pokatji komugara nomugara ndi mukadi nomukadi.

^ para. 53 EFANO: Munazinyetukadi kuna kara kounivesiti. Nage kumwe novarongwa vakwawo kuna kuvaronga asi yikwakonentu noudiviunsitwe kuvhura kugusa po maudigu govantu nagenye. Konyima age kuna kara mepongo, nye kuna kuncenuna eyi yina kupitira mo ntani kapi ana hafa.