Zende koyikaramo

Zende koyikaramo

Nombangi daJehova

Horowora eraka Rukwangali

Omu natu lipopera nyamwetu kosiraha saSatana

Omu natu lipopera nyamwetu kosiraha saSatana

KOMEHO Vaisraeli va rute mukuro gwaJorodana nokuza mosirongo esi ga va tumbwidilire Karunga, vantu vamwe kwa wizire va ya va dingure. Vantu owo kwa kere vakadi wovanayirongo. Awo kwa zigidire vagara woVaisraeli kosipito. Esi kwa monekere ngwendi siruwo sosiwa sokutulisa po vakaume ntani nokudana nokulya kumwe. Nampili ngomu nompango nonompo dovakadi owo wovanayirongo da lisigire nedi doVaisraeli, vagara owo nampo kwa gazarere asi ‘kapi nava tu tjindja. Na tu ka takamesa.’

 Yisinke ya horokere? Bibeli kutanta asi: “Vagara ngava lirara-rara novakadi woVamowaba.” Vakadi owo kwa here Vaisraeli va karere yikarunga yawo yoyimpempa. Ano eyi yiyo va rugene. Eyi kwa ninkisire Jehova a va “handukire.”—Num. 25:1-3.

Vaisraeli owo kwa tezere po Veta zaKarunga mononkedi mbali: Awo kwa karerere yikarunga yoyimpempa ntani kwa honderere. Sinzi sawo kwa fire morwa kapi va limburukwire Karunga. (Ex. 20:4, 5, 14; Deut. 13:6-9) Morwasinke sihorokwa sawo sa karerere sosidona? Awo kwa kere pepi-pepi nokuza moSirongo sEtumbwidiro. Ngano vagara vena kapi va tezere po Veta zaKarunga, sinzi soVaisraeli ngano va tagurukire mukuro gwaJorodana nokuza moSirongo sEtumbwidiro.—Num. 25:5, 9.

Mupositoli Paurusa kwa uyungire kuhamena sihorokwa esi asi: “Ano yininke nayinye eyi kwa va horokerere yi kare erondoro lyava wokomeho, nye ayo kwa yi tjangera yi kare erondoro lyetu, ose tuna ya karere pouhura wouzuni ou.” (1 Kol. 10:7-11) Satana kwa mu hafesere kweyi Vaisraeli vamwe va zonene nokudira kuza moSirongo sEtumbwidiro. Ya kara nomulyo tu lirongere ko kweyi ya va horokerere morwa Satana nga hafa nsene tu dira kukahwilira mouzuni woupe.

SIRAHA SOSIPONGA UNENE

Satana ana hara kukwata Vakriste ntani age kuruganesa nonkedi edi ga diva nedi da mu tompoka kovantu wovanzi. Ngomu tuna yi lirongo, age kwa ruganesere siraha soruhonda posiruwo soVaisraeli. Siraha oso kuna kara simpe siponga unene momazuva getu. Siraha esi kuvhura nose kutukwata naina kupitira mokutarera mafano goruhonda.

Naina muntu kuvhura a tarere mafano goruhonda va hana kuyidiva wopeke. Mosiruwo sanare, nsene muntu ana hara kutarera mafano goruhonda ngazi komavango oku ngava likida nomuvi doruhonda ndi koyitora oku ngava randesa nobuke domafano goruhonda. Vantu wovanzi kapi ngava zi komavango ogo, morwa ngava tjira asi vantu tava va mono. Nye naina, muntu ogu ga kara noIntaneta kuvhura kutara mafano goruhonda pwagelike koyirugana ndi metuwa. Ano moyirongo yoyinzi, mukadi ndi mugara kuvhura kutarera mafano goruhonda nampili membo ana kara.

Naina, yikwakonentu kuninkisa vantu va gwane mafano goruhonda noureru. Pasihonena, muntu kuvhura a tarere mafano goruhonda kupitira koserefoni ngomu ana kugenda mositarata, mombesa ndi mehina lyorutenda.

Sinzi sovantu naina kutarera mafano goruhonda kupitakana pwanare morwa ureru kugagwana ntani wopeke kuvhura va dire kuyidimburura. Vantu ava ava tarere mafano goruhonda kuzonagura nonkwara dawo nezwi lyawo lyokomutjima. Nye unene po, awo kutura elikwatakano lyawo naKarunga mosiponga. Mafano goruhonda kukundama vantu momudona, ntani yitundwamo yoyidona eyi ava li gwanekere nayo vantu kuvakundama siruwo sosire ano poyiruwo yimwe kapi ayi tundu po.

Nye twa hepa kudiworoka asi Jehova kuvhura kutupopera kosiraha esi. Mokulisiga novagara woVaisraeli ava va dilire kulimburukwa Jehova, nsene tuna hara Jehova a tu popere twa hepa ‘kumupurakena.’ (Ex. 19:5) Twa hepa kuyidiva asi Jehova kwa nyenga mafano goruhonda. Morwasinke?

NGWENDI JEHOVA, NYENGA MAFANO GORUHONDA

Gazadara ko omu noveta daKarunga edi ga pere Vaisraeli da lisigire nonoveta donomuhoko dapeke. Noveta edi Jehova ga pere Vaisraeli kwa va poperere kovantu wokonomuhoko dapeke ntani koyirugana yoyidona eyi ngadi rugana. (Deut. 4:6-8) Noveta odo kwa likidire nawa-nawa asi Jehova kwa nyenga ruhonda.

 Konyima zokutumbura yirugana yoyidona yonomuhoko dapeke, Jehova kwa tanterere Vaisraeli asi: “Nokukwama si yirugana . . . yombunga zomosirongo saKanani, oku nina kumutwara ntaantani. Yirugana yawo yina nyatekesa sirongo. HOMPA yipo ana kusifutisira.” Karunga gokupongoka goVaisraeli kwa tere yirugana yoVakanani asi kwa nyatekere sirongo.—Lev. 18:3, 25.

Nampili ngomu Jehova ga tengekere Vakanani, vantu vamwe kwa twikilire simpe kulihameka moruhonda. Konyima zonomvhura 1 500, Paurusa kwa fatwilire kuhamena nomuhoko doposiruwo sendi asi: “Nonomuga da va pira, yiyo va lizumbilira moruhonda nemedowo lyokurugana nayinye eyi ya nyata.” (Efe. 4:17-19) Naina, sinzi sovantu kwa lizumbilira unene moruhonda. Eyi yiyo ya karera nomulyo koVakriste va nyokere po kutarera yirugana yoruhonda yovantu womouzuni ou.

Mafano goruhonda kuswaukisa Karunga. Age kwa sitire vantu yipo va mu fane moyikara. Age kwa tu sita nevhuliko lyokudiva asi eyi yiwa ndi eyi yidona. Karunga kwa kara nokonda zongwa zeyi ga tulisira po noveta dokuhamena eligwanekero panyama. Age kwa yi rugene eyi morwa kwa here valikwali va hafere kukara kumwe. (Gen. 1:26-28; Yis. 5:18, 19) Nye yisinke ava rugana vantu ava ava tjingisa ndi ava ava pwagesa mafano goruhonda? Awo kapi ava kwama nompango daKarunga. Yosili, vantu ava ava tjingisa mafano goruhonda kapi ava likida efumadeko kwaJehova. Karunga nga pangura vantu ava ava ncenuna nompango dendi pokutjingisa ndi kurugana mafano goruhonda.—Rom. 1:24-27.

Ngapi kuhamena vantu ava va hara kuresa ndi kutarera mafano goruhonda? Vamwe kuvhura va lizuvhe asi mafano goruhonda kwato siponga. Nye awo kuna kukwatesa ko vantu ava ava ncenuna nompango daJehova. Nampo kapisi yiso sitambo va kere naso apa va tamekere kutarera mafano goruhonda. Nye Bibeli kulikida nawa-nawa asi vantu ava ava karere Karunga va hepa kunyenga mafano goruhonda. Azo kutanta asi: “HOMPA kwa hara ava va nyenga udona.”—Epis. 97:10.

Vamwe ava va hara kuhageka kutarera mafano goruhonda kuvadigopera kuyirugana. Mokumona asi kapi twa sikilira mo, ose kukondja yipo tu nyokere po madowo goruhonda. Ntani mutjima gwetu  kuvhura gu tu tantere asi kapi ya kara epuko kutarera mafano goruhonda. (Jer. 17:9) Nye sinzi sovantu ava vana kara ngesi Vakriste ya va tompoka mokuganyokera po. Eyi kulikida asi nove kuvhura yi ku tompoke. Koneka omu Nonkango daKarunga adi tu vatere tu nyokere po siraha esi saSatana.

NYOKERA PO MAGAZARO GORUHONDA

Ngomu tuna yi tumbura nare, sinzi soVaisraeli kwa pulisilire magazaro gomadona ga kure monomutjima dawo, ano eyi kwava ninkisire va ya rugane yininke yoyidona. Nose kuvhura yi tu horokere naina. Jakopo mumbyaJesus kwa fatwilire omu ayi horoka. Age kwa tente asi: “Nkenye ogu kumuzeda edowo lyendi lyedona, eli ali mu koko tali mu kumbagere. Edowo lyedona ntene lina kuru, tali tulisa muntu nzo.” (Jak. 1:14, 15) Nsene muntu a twikira kugazara kuhamena yininke yoruhonda, konyima zosiruwo age kuvhura a ture nzo. Yipo nye, twa hepa kunyokera po magazaro goruhonda.

Nsene ove kuna kutwikira kugazara yininke yoruhonda, wa hepa kurugana ko yuma usimbu. Jesus kwa tente asi: “Nsenesi kuwoko koge ndi mpadi zoge tazi ku twaredesere konzo, zi kamuna ko, o zi zugumine kwina, zi ku lipore. . . . Ndi li kare eho lyoge, ntene tali ku twaredesere konzo, li korora mo, o lizugumine kwina li ku lipore.” (Mat. 18:8, 9) Jesus kapi ga tembe asi twa hepa kukoresa rutu rwetu. Age kwa ruganesere sifanekeso esi mokutuvatera tu kwate egano yininke eyi ayi tu ninkisa tu kare nomagazaro gomadona neyi twa hepa kurugana yipo tu ga nyokere po. Kuliza nepukururo olyo, yisinke natu rugana nsene tu mona efano lyoruhonda?

Nsene o mona efano lyoruhonda, wa ha gazara asi ‘kapi nayi pundukisa nge.’ Nye tara kwapeke usimbu-simbu nokudimisa Tivi ndi sikwakonentu soge usimbu-simbu nokugazara kweyi yokukuhuka. Nsene o yi rugana eyi, ayo ngayi ku vatera o nyokere po magazaro gomadona.

NGAPI NSENE KAPI ONO KUDIVARA MAFANO GORUHONDA AGA WA TARERERE NARE?

Ngapi nsene wa hageka kutarera mafano goruhonda nye kuna kukudigopera kugadivara? Mafano goruhonda kugusa siruwo sosire komeho  muntu a ka ga divare. Ago kuvhura kuwiza momagazaro gomuntu ga hana kuyindindira. Nsene yi horoka oyo, ayo kuvhura kuninkisa muntu a tameke kulidanesa koyilyo yonomuga. Mokumona asi magazaro ogo kuvhura kuwiza twa hana kuyindindira, twa hepa kukara tuna liwapaikire yipo tu ga rwanese po.

Tokomena kugazara nokurugana eyi ga hara Karunga. Honena mupositoli Paurusa ogu ga tente asi: “Ame kuyomberesa rutu rwange ru zire mo.” (1 Kol. 9:27) Wa ha pulisira madowo gomadona ga ku pangere. “Sigeni Karunga a rundurure magazaro geni, mu situnuke nawa-nawa. Ntani mu diva kukoneka mpango zaKarunga neyi yoyiwa ya mu wapera ayo ya sikilira mo.” (Rom. 12:2) Diworoka asi kukwama madowo goruhonda kureta ruguwo nye nsene tu paruka kuliza nomu ga yi harera Karunga, ayo ngayi tu hafesa.

Kukwama madowo goruhonda kureta ruguwo nye nsene tu paruka kuliza nomu ga tu harera Karunga ayo ngayi tu hafesa

Hetekera ko kukwata momutwe novelise dimwe domoBibeli. Makura gazara kuhamena novelise edi apa ngaga ku gwana magazaro goruhonda. Novelise odo dimwe kuna kara Episarome 119:37; Jesaya 52:11; Mateusa 5:28; Vaefeso 5:3; Vakorosi 3:5; ntani 1 Vatesaronika 4:4-8. Ado ngadi ku vatera o tare mafano goruhonda monkedi ezi aga tara Jehova nokurugana eyi ga hara.

Nye yisinke no rugana nsene simpe kuna kukudigopera kuhageka kugazara ndi kutarera mafano goruhonda? Honena eyi ga rugene Jesus. (1 Pet. 2:21) Konyima zapa Jesus ga gwene ekuho, Satana kwa twikilire kumuheteka. Yisinke ga rugene Jesus? Age kwa twikilire kunyokera po maheteko ogo. Jesus kwa nyokerere po maheteko ogo pokuruganesa Matjangwa. Age kwa tente asi: “Zende kwina, Satana,” makura Satana ta mu sigi. Ngwendi moomu tupu Jesus ga twikilire kurwanesa Muzonaguli, nove wa hepa kurugana yokulifana. (Mat. 4:1-11) Satana nouzuni wendi ngava twikira kukuninkisa o twikire kugazara yininke yoruhonda nye wa hepa kutwikira kuyinyokera po. Kuvhura yi ku tompoke kunyokera po mafano goruhonda. Jehova nga ku vatera yipo yi ku tompoke.

KANDERERA KWAJEHOVA NOKUMULIMBURUKWA

Twikira kukanderera kwaJehova nokumupura evatero. Paurusa kwa tente asi: “Nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Fil. 4:6, 7) Mbili zaKarunga ngazi tu vatera tu nyokere po yirugana yoyidona. Nsene o hedera Jehova pepi ‘nage nga ku hedera pepi.’—Jak. 4:8.

Nsene tu twikira kukara nelikwatakano lyewa naKarunga, ose ngayi tu tompoka kunyokera po yiraha nayinye yaSatana. Jesus kwa tente asi: “Mupangeli gouzuni ta wiza, nye age nayimwe si kwange.” (Joh. 14:30) Morwasinke Jesus ga karerere nehuguvaro lyangoso? Sikando simwe age kwa tente asi: “Ogu ga tuma nge, kumwe nendi twa kara. Age kapi ga siga nge nyamelike, yeeyi ame kurugana nkenye apa eyi ga hara.” (Joh. 8:29) Nsene o twikira kurugana eyi ayi hafesa Jehova, age kapi nga ku sigilira. Nsene o nyokera po kutarera mafano goruhonda, Satana kapi nga vhura kukupukisa.