Zende koyikaramo

Zende koyikaramo

Nombangi daJehova

Horowora eraka Rukwangali

“Karunga va mu pandwire unongo woge”

“Karunga va mu pandwire unongo woge”

NDAFITA kwa uyungire nonkango odo mokupandadeka mukadi ogu ga ligwene nage. Edina lyendi Abigayili. Yisinke ya ninkisire Ndafita a mu pandadeke, ntani yisinke natu lirongera ko kosihonena sogo mukadi?

Ndafita kwa ligwene nomukadi ogo apa ga tjwayukire hompa Sauru. Mugara gwaAbigayili kwa kere Nabali ngawo zonene, awo kwa tungire mosirongo sonondundu saJuda. Ndafita novantu vendi ‘kwa gamenene’ vasita nosiunda saNabali. Makura Ndafita ta tumu vantu vendi kwaNabali va ka mu hundire a ‘gave eyi ana kuvhura’ ngwendi nondya. (1 Sam. 25:8, 15, 16) Kapi ya kere epuko kwaNdafita novantu vendi mokuhundira Nabali, morwa awo ngava takamesa emona lyendi.

Nabali edina lyendi kutanta asi “egova” ano nkareso zendi za yi likidire asi age mugova. Age kwa swawire nokunyoka kupa Ndafita eyi ga mu hundilire. Ndafita yipo ga katukire a ze a ka tengeke Nabali morwa nonkango donondona edi ga mu uyungilire. Morwa ugova wendi, Nabali nkare a hwedese epata lyendi.—1 Sam. 25:2-13, 21, 22.

Apa Abigayili ga zuvhire eyi ga tokwere kurugana Ndafita, yipo ga katukire a rugane ko yuma. Abigayili kwa likwamberere nefumadeko kwaNdafita pokumudiworokesa elikwatakano lyendi naJehova. Ntani age kwa pere Ndafita novantu vendi nondya dononzi. Makura Ndafita yipo ga dimbwilire asi Jehova yige ga tumine Abigayili mokumukondera a dire kutura nzo zedipago. Ndafita kwa tanterere Abigayili asi: “Karunga va mu pandwire unongo woge neyi ono rugana yokusilikisa nge kokutura nzo zedipago.”—1 Sam. 25:18, 19, 23-35.

Kapi tuna hara kukara ngwendi Nabali, pokudira kulikida rupandu koyininke yoyiwa eyi ava tu ruganene vakwetu. Ntani nsene tu mona yuma eyi yina dili kuwapa, twa hepa kurugana ko yuma yipo tu yi kohonone po usimbu. Ose kuvhura kutemwinina mutjangi gepisarome ogu ga tanterere Karunga asi: “Pe nge unongo nediwo.”—Epis. 119:66.

Vantu kuvhura va nongonone asi ose twa kara nounongo nediwo kupitira moyirugana yetu. Yi kare asi tava yi tu tantere ndi hawe, awo kuvhura va lizuvhe ngwendi Ndafita ogu ga uyungire asi: “Karunga va mu pandwire unongo woge.”