Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SELIRONGO 10

Yinke hena nayi limba po kukuhwa nge?

Yinke hena nayi limba po kukuhwa nge?

“Filipusa nerenga tava humburuka va ze momema, makura Filipusa ta kuhu erenga.”—YIRUG. 8:38.

RUSUMO 52 Eligawo lyoVakriste

ETWAROMO *

1. Yisinke va zumbanesere oAdamu naEva ntani yitundwamo musinke ya kere?

YILYE ga wapera kututantera asi eyi yiwa ndi yidona? Apa oAdamu naEva va lire kositji seyi yoyiwa neyi yoyidona awo kwa yi likidire asi kapi va here kukwama Jehova nonompango dendi. Nye awo kwa here kutokora vene. (Gen. 3:22) Mokuyirugana ngoso, awo kwa zumbanesere yininke yomulyo, ngwendi elikwatakano lyawo naJehova nokuparuka narunye ntani vana vawo vaya pingire nonzo nonomfa. (Rom. 5:12) Etokoro lyawo kwa retere yitundwamo yoyidona.

Erenga lyomoEtiyopiya kwa here kugwana ekuho konyima zapa Filipusa ga li zuvhisilire (Tara paragarafu 2-3)

2-3. (a) Yisinke lya rugene erenga lyomoEtiyopiya apa Filipusa ga li zuvhisilire? (b) Matungiko musinke atu gwana nsene tu gwana ekuho ntani mapuro musinke natu ka kona-kona?

2 Koneka elisigo lya kara po pokatji koAdamu naEva ntani neyi lya rugene Erenga lyomoEtiyopiya apa Filipusa ga li zuvhisilire. Erenga kwa gwene ekuho morwa kwa kere norupandu kweyi ga rugana Jehova naJesus. (Yirug. 8:34-38) Ngwendi erenga lyomoEtiyopiya, apa atu ligava nokugwana ekuho, ose kulikida rupandu kweyi ga tu ruganena Jehova naJesus. Ose kulikida hena asi twa huguvara Jehova ntani asi yige ga wapera kututantera yoyiwa neyi yoyidona.

3 Gazadara ko matungiko aga atu gwana apa atu karere Jehova! Ose ngatu ka gwana matungiko nagenye aga va zumbanesere oAdamu naEva kukwatera mo eparu lyanarunye. Jehova kutugusira po nokutuninka tu kare nezwi lyewa lyokomutjima morwa kutura epuro mwaJesus. (Mat. 20:28 Yirug. 10:43) Ose kuhama  hena kepata lyaJehova nokundindira meho zongwa. (Joh. 10:14-16 Rom. 8:20, 21) Nampili ngomu twa diva mauwa ogo, nye simpe vamwe kapi ava kwama sihonena serenga lyomoEtiyopiya. Yisinke ayi va ninkisa va dire kugwana ekuho? Ntani ngapi omu nava funda po yininke oyo?

YININKE EYI AYI NINKISA VAMWE VA DIRE KUGWANA EKUHO?

Maudigu aga ava ligwanekere nago vamwe komeho va gwane ekuho

Kukara nowoma (Tara paragarafu 4-5) *

4-5. Maudigu musinke ga ligwanekerere nago Avery naHannah?

4 Kukara nowoma. Avery kuna kara mudinkantu ogu ga kara novakondi woNombangi. Oguhwe vakuronambunga ntani awo kwa kara noyikara yoyiwa. Nye Avery kapi ga here kugwana ekuho. Morwasinke? Age kwa tanta asi: “Ame kwa gazarere asi kapi ngani vhura kukara ngwendi otate.” Ntani ga kere nowoma asi kapi nga vhura kusikisa mo yitumbukira eyi ngava vhura ku mu pa komeho. Age kwa tanta hena asi: “Ame kwa kere nowoma asi ngava pura nge ni kanderere mombunga nokugava yiuyungwa ndi ni pitisire mapongo gomoyirugana yokuzuvhisa.”

5 Hannah gonomvhura 18 nage kwa kere nowoma. Nampili ngomu va mu rera vakondi ava ava karere Jehova, age kwa kere nowoma asi kapi nga vhura kusikisa mo nompango daJehova. Morwasinke? Age nga lizuvhu asi age kwato mulyo. Poyiruwo yimwe apa nga guwu, age nga liremeke nye ayo ngayi gwederere tupu koudigu wendi. Age kwa tanta asi: “Ame kapi na tanterere vakondi vange kuhamena eyi na rugene ntani ame kwa gazarere asi Jehova kapi nga hafera nge morwa ame kwato mulyo.”

Makondjeso govakaume (Tara paragarafu 6) *

6. Yisinke ya ninkisire Vanessa a dire kugwana ekuho?

6 Makondjeso govakaume. Vanessa gonomvhura 22 kwa tanta asi: “Ame kwa kere nakaume gomuwa ure wonomvhura 10.” Nye kaume gwendi ogo kapi nga mu vatere a ture po sitambo sokugwana ekuho. Eyi kwa guvisire Vanessa ntani age kwa tanta asi: “Ame ngayi digopere nge kugwana vakaume ntani na kere nosinka asi nsene ni hagekesa po ukaume wetu, kapi hena ngani gwana ko kaume gumwe.”

Kukara nowoma wokutura epuko (Tara paragarafu 7) *

7. Morwasinke Makayla ga karerere nowoma wokugwana ekuho?

7 Kukara nowoma wokutura epuko. Makayla kwa kere nonomvhura ntano apa mukurwendi gomugara va mu gusire mombunga. Apa ga kulire age ga mwene omu vakondi vendi ya va guvisire eyi ga  rugene mukurwendi. Makayla kwa tanta asi: “Ame kwa kere nowoma asi nsene ni gwana ekuho, ngani tura epuko ntani ngava gusa nge mombunga ano eyi ngayi guvisa unene vakondi vange.”

Kutjira marwaneso (Tara paragarafu 8) *

8. Yisinke ya tjilisire mudinkantu gedina Miles?

8 Kutjira marwaneso: Oguhwe vaMiles nozina wositumbwena kukarera Jehova. Nye ozina wokumureta kapi ava karere Jehova. Age kwa tanta asi: “Ame kwa tungire noyina nomvhura 18 ntani na kere nowoma kuvatantera asi nina hara kugwana ekuho morwa na mwene omu va tekwire otate apa va tokwere kukara Mbangi. Ame kwa kere nowoma asi name ngava tekura nge momudona.”

NGAPI OMU NO FUNDA PO MAUDIGU OGO?

9. Yisinke ngayi horoka nsene o lironga kuhamena omu Jehova a likida eharo nelididimiko?

9 Adamu naEva kapi ya va tompokere kulimburukwa Jehova morwa kapi va rugene ko yuma yipo va hare unene Jehova. Nampili ngoso Jehova ga va pulisilire va twikire kuparuka nokureta vana ntani nokutokora vene omu nava rera vana vawo. Eyi ya horokere konyima kwa likidire asi awo kwa rugene ugova apa va tokwere kusiga Jehova va kwame yavene. Munwawo gombeli kwa dipagere mumbyendi ntani konyima zosiruwo udona kwa ya vhukire pevhu. (Gen. 4:8; 6:11-13) Nampili ngoso, Jehova kwa tulire po ewapaiko mokuzowora vana vaAdamu naEva ava vana hara kumukarera. (Joh. 6:38-40, 57, 58) Moomu ono kulironga kuhamena elididimiko neharo eli ga kara nalyo Jehova, ayo ngayi ku vatera o mu hare unene. Makura ayo ngayi kuninkisa o dire kukwama eyi va rugene oAdamu naEva ntani o ligave kwaJehova.

Omu no funda po maudigu ogo

(Tara paragarafu 9-10) *

10. Ngapi omu kuteda ketjangwa lyomoEpisarome 19:7 ngali ku vatera?

10 Twikira kulironga kuhamena Jehova. Nsene o twikira kulironga kuhamena Jehova, ayo ngayi ku vatera yipo o vhure kumukarera wa hana woma. Avery  ogu tuna tumbura nare kwa tanta asi: “Ame na ya fundire po woma pokuresa nokuteda ketumbwidiro eli lya kara mEpisarome 19:7.” (Resa.) Apa Avery ga dimbwilire asi Jehova ana sikisa mo etumbwidiro olyo, age ga ya here unene Jehova. Eharo kapi tupu a li tu vatere tu funde po woma nye hena kutuvatera tu demenene kwaJehova neyi ga hara. Hannah ogu tuna tumbura nare kwa tanta asi: “Kupitira mereso nelirongo lyange lyoBibeli, ame na dimbwilire asi apa ani liremeke nyamwange ayo kukoresa Jehova.” (1 Pet. 5:7) Hannah kwa ya kere ‘musikisimo goNonkango’ daKarunga. (Jak. 1:22) Uwa musinke ga gwanenene mo? Age kwa tanta asi: “Apa na dimbwilire asi kulimburukwa Jehova kuna kuretera nge mauwa, ayo kwa ninkisire nge ni mu hare unene. Ngesi nina kara nehuguvaro asi Jehova nga twikira kupitisira nge poyiruwo apa ngani hepa evatero.” Hannah kapi hena a liremeke. Age ga ligava kwaJehova ntani ga gwana ekuho.

(Tara paragarafu 11) *

11. Yisinke ga rugene Vanessa yipo a tulise po vakaume wovawa ntani yisinke natu lirongera ko?

11 Hororora nawa vakaume woge. Vanessa ogu tuna tumbura, ga ya dimbwilire asi kaume kendi kapi ga mu vaterere a karere Jehova. Makura yipo ga hagekesere po ukaume wawo. Ntani ga rugene ko yuma yipo a tulise po vakaume mombungakriste. Sihonena sepata lyaNowa kwa mu vatera, age kwa tanta asi: “Awo kwa va kundurukidire vantu ava ngava dili kukarera Jehova nye awo kwa kere vakaume ngepata.” Konyima zokugwana ekuho, Vanessa kwa tamekere uzuvhisi wokukarerera. Ngesi age kwa tanta asi: “Eyi kwa vatera nge ni tulise po vakaume wovawa kukwatera mo nava wokonombungakriste dapeke.” Nove kuvhura o gwane vakaume wovawa nsene o litura mo unene mosirugana esi ga tu pa Jehova.—Mat. 24:14.

(Tara paragarafu 12-15) *

12. Utjirwe musinke va dilire kukara nawo oAdamu naEva ntani yitundwamo musinke ya kere?

12 Kara noutjirwe. Utjirwe umwe uwa. Pasihonena, twa hepa kutjira kuguvisa  Jehova. (Epis. 111:10) Ngano Adamu naEva va kere noutjirwe wangoso, awo ngano kapi va rwanesere Jehova. Konyima zokurwanesa Jehova, awo kwa gwene nondunge, makura tava dimburura asi vana tura nzo. Awo kwa reterere vana vawo nonzo nonomfa. Apa va kwete egano asi kapi vana limburukwa Jehova, tava lizuvhu nomuga nokulimona nyamwawo asi muherehere vana kara makura tava tungu yihako va livive.—Gen. 3:7, 21.

13-14. (a) Kuliza na-1 Peturusa 3:21, morwasinke natu dilira kutjira unene nomfa? (b) Nokonda musinke deyi natu harera Jehova?

13 Twa hepa kutjira Jehova, nye kapisi hepero tu tjire unene nomfa. Jehova ga tura po ewapaiko yipo tu ka gwane mwenyo gwanarunye. Nsene tu litezurura kononzo detu, Jehova nga tu gusira po. Age nga tu dongwenena po morwa twa tura epuro monzambo zaJesus zosizoweseso. Nkedi zimwe zomulyo omu atu likida epuro kuna kara apa atu ligava kwaJehova nokugwana ekuho.—Resa 1 Peturusa 3:21.

14 Twa kara nonokonda dononzi deyi natu harera Jehova. Age ku tu pa yininke yoyiwa nkenye ezuva ntani kuturonga usili wokumuhamena ntani nositambo sendi. (Joh. 8:31, 32) Age kwa tu tulira po mapongo aga aga tu vatere. Age kutuvatera tu lididimikire maudigu naina ntani ga tu tumbwidira ku ka tu pa eparu lyanarunye mouzuni woupe. (Epis. 68:19; Ehor. 21:3, 4) Nsene tu teda ko kweyi ga tu ruganena Jehova nomu ga tu likida eharo, ose ngatu mu hara unene. Ano nsene tu hara unene Jehova, ose ngatu tjira kumuguvisa.

15. Yisinke ya vaterere Makayla a funde po woma ou ga kere nawo?

15 Makayla ogu tuna tumbura, apa ga ya kwete egano asi Jehova kugusira po, age ga ya fundire po woma ou ga kere nawo pomuhowo. Age kwa tanta asi: “Ame kwa ya dimbwilire asi natuvenye kapi twa sikilira mo ntani kutura mapuko. Nye na ya kwete hena egano asi Jehova kwa tu hara ntani nga tu gusira po morwa nzambo ezi ga tu pa zosizoweseso.” Morwa age kwa hara Jehova, ayo ya mu tumangedere a ligave kwaJehova nokugwana ekuho.

(Tara paragarafu 16) *

16. Ngapi omu Miles va mu vaterere yipo a funde po woma ou ga kere nawo?

16 Miles ogu ga tjilire asi ozina ngava mu rwanesa nsene a gwana ekuho, kwa gwene evatero komutareli gonombunga. Age kwa tanta asi: “Apa mutareli ogo ga kere munona, gumwe govakondi vendi kapi ga kere Mbangi. Age kwa vaterere nge yipo ni ka tantere oyina asi, nyamwange na tulire po etokoro lyokugwana ekuho, kapisi otate.” Ozina va Miles kapi va yi haferere eyi ga va tanterere. Konyima  zosiruwo, age kwa tundire mo membo ntani simpe kwa demenenene kositambo sendi. Age kwa tanta asi: “Ayo kwa gumine nge komutjima apa na lirongere yininke eyi ga ruganena nge Jehova. Apa na gazadarere kuhamena sizoweseso, ame kwa dimbwilire asi Jehova kwa hara nge unene. Ano eyi kwa tumangedere nge ni ligave kwaJehova nokugwana ekuho.”

DEMENENA KOSITAMBO SOGE

Kuvhura tu yi likide asi twa kara norupandu koyininke nayinye ga tu ruganena Jehova (Tara paragarafu 17)

17. Mpito musinke twa kara nazo natuvenye?

17 Apa Eva ga lire enyango lyokositji somosikunino saEdeni, age kwa nyokere kukwama oGuhwe. Apa Adamu ga mu kwatesere ko, age kwa likidire asi kapi ga kere norupandu koyinke nayinye yoyiwa ga mu ruganenene Jehova. Naina natuvenye twa kara nompito zokuyilikida nsene ose kukwatesa ko etokoro lyaAdamu naEva ndi hawe. Apa atu gwana ekuho ose kuyilikida asi Jehova yige ga wapera kutuntantera yoyiwa neyi yoyidona. Ntani ayo hena kulikida asi twa hara Jehova nokumuhuguvara.

18. Ngapi omu nayi kutompoka kukarera Jehova?

18 Konyima zekuho, twa hepa kutwikira kurugana eyi ga hara Jehova kapisi eyi twa hara nyamwetu. Mamiliyona govakareli vaJehova nawo yiyo ava rugana. Nove kuvhura yikutompoke nsene o twikira kulironga Bibeli, nokukara kumwe novanavazinyetu nokutantera ko vakweni yininke yoyiwa eyi o lirongo kuhamena Jehova. (Heb. 10:24, 25) Nsene kuna kutura po matokoro, kwama mapukururo gaJehova aga a tu pe kupitira moBibeli nomombunga zendi. (Jes. 30:21) Makura nayinye eyi ngo rugana nga yi kutompoka.—Yis. 16:3, 20.

19. Yisinke wa hepa kudimburura ntani morwasinke?

19 Apa o ya dimburura mauwa aga wa gwanena mo momavyukiso gaJehova ayo ngayi kuninkisa o hare unene Jehova nonompango dendi. Nsene o yi rugana, kwato eyi nga rugana Satana mokukugusa ko kwaJehova. Konyima zonomvhura eyovi, ove ngo ka hafa pokudiva asi etokoro eli wa tulire po mokugwana ekuho kuna kara etokoro lyewa.

RUSUMO 28 Tulisa po ukaume naJehova

^ para. 5 Kugwana ekuho kuna kara etokoro lyomulyo unene wa hepa kutura po meparu. Morwasinke? Natu ka gwana elimbururo mosirongwa esi. Nasi ka vatera hena ava vana hara kugwana ekuho va funde po yininke eyi ayi va tjilisa mokugwana ekuho.

^ para. 56 EFANO: Woma: Mudinkantu kuna kutjira kugava elimbururo.

^ para. 58 EFANO: Vakaume: Mudinkantu goMbangi ogu ana kara nakaume gomudona kuna kulifa nomuga pokumona vakwawo kuna kuzuvhisa.

^ para. 60 EFANO: Woma wokutura epuko: Mukadona ana kara nowoma asi kuvhura ngava mu guse mombunga apa ana kumona mukurwendi ogu va gusa mombunga kuna kutunda mo membo.

^ para. 62 EFANO: Marwaneso: Mumati kuna kutjira kukanderera komeho zozina wovahapuli.

^ para. 65 EFANO: Woma: Mudinkantu kuna kurugana elirongo lyendi lyoBibeli.

^ para. 67 EFANO: Vakaume: Mudinkantu goMbangi ngesi kapi ana kara hena nowoma.

^ para. 69 EFANO: Woma wokutura epuko: Mukadona kuna kugwana ekuho konyima.

^ para. 71 EFANO: Marwaneso: Mumati kuna kufatwilira ozina wovahapuli eyi ga pura.