Zende koyikaramo

Zende koyikaramo

Nombangi daJehova

Horowora eraka Rukwangali

Ekuho​—Sihepwa mokukara Mukriste

Ekuho​—Sihepwa mokukara Mukriste

‘Ekuho eli lina kumuparura ntaantani.’—1 PET. 3:21.

MARUSUMO: 52, 41

1, 2. (a) Ngapi ava lizuvhu vakurona vamwe apa vana vawo ava tokora kugwana ekuho? (b) Morwasinke vagwani ekuho ava va pulire nsene asi va ligava kwaJehova? (Tara efano.)

MUKADONA gonomvhura ntane gedina Maria kwa katukire novagwani ekuho vamwe. Age kwa limbwilire nezwi lyokudameka mapuro gavali aga ga pulire mugavi siuyungwa. Konyima zoyo, tava mu kuhu.

2 Ayo kwa hafesere vakurona vaMaria apa ga tokwere kuligava kwaJehova nokumukuhwa. Nampili ngoso, komeho va ya mu kuhwe, ozina kwa kere nomasinganyeko. Awo kwa lipulire asi: ‘Maria ana fire kumukuhwa pepupi olyo ndi? Ga kwata egano mulyo gokugwana ekuho ndi? Kuvhura a kure ko tanko ntani nga gwana ekuho ndi?’ Vakurona wovanzi kulipura mapuro ogo apa vana vawo ava tokora kugwana ekuho. (Muud. 5:5) Kuligava nokugwana ekuho kuna kara yininke yomulyo po mokukara Mukriste.—Tara kakende “ Wa ligava kwaJehova ndi?

3, 4. (a) Ngapi omu mupositoli Peturusa ga yi likidire asi ekuho mulyo? (b) Morwasinke natu fanekesera ekuho kemuwato eli ga tungire Nowa?

 3 Mupositoli Peturusa kwa hetakanesere ekuho kemuwato eli ga tungire Nowa. Age kwa tjenge asi: “Ogo mema sifanekeso sekuhwo eli lina kumuparura ntaantani.” (Resa 1 Peturusa 3:20, 21.) Pokutunga emuwato lina, Nowa kwa likidire asi age kwa tokomenene kurugana mpango zaKarunga. Age kwa sikisire mo sirugana esi ga mu pere Jehova. Nowa nepata lyendi kwa parukire poRuhanzo morwa epuro. Sitwa musinke ga here kupwagesa Peturusa?

4 Ngwendi moomu kutunga emuwato kwa geve umbangi asi Nowa kwa kere nepuro, kugwana ekuho moyitarameho yovantu kugava umbangi asi Mukriste ga ligava kwaJehova kuliza nonzambo zaKristusa. Varongwa ava va ligava kwaKarunga kuhonena Nowa pokutokomena kusikisa mo sirugana esi gava pa Karunga. Ngwendi Nowa ogu va parwire poRuhanzo, ava ava kuhu nokutwikira kulimburukwa Jehova, nawo ngava va parura apa ngava zonagura po uzuni ou woudona. (Mar. 13:10; Ehor. 7:9, 10) Eyi yiyo ya karera nomulyo kuligava nokugwana ekuho. Muntu ogu a likatakata kugwana ekuho kutura eparu lyendi mosiponga. Ayo ngayi mu ninkisa a dire kukagwana mwenyo gwanarunye.

5. Yisinke natu ka konakona mosirongwa esi?

5 Mokumona asi ekuho sininke somulyo unene, tatu ka konakona mapuro gatatu. Yisinke za uyunga ko Bibeli kuhamena ekuho? Yisinke na rugana muntu komeho va mu kuhwe? Morwasinke varongi woBibeli nava karera nositambo sokutantera varongwa vawo kuhamena mulyo gokugwana ekuho?

 EKUHO MOSIRUWO SANARE

6, 7. (a) Morwasinke ekuho eli nga rugana Johanesa lya karerere nomulyo? (b) Ekuho musinke lyomulyo po ga rugene Johanesa?

6 Ekuho lyokuhova eli va tumbura moBibeli kuna kara eli ga rugene Johanesa mukuhwi. (Mat. 3:1-6) Vantu ava nga kuhu Johanesa kwa likidire asi vana litezurura kononzo dawo nokukwama Veta zaMosesa. Nampili ngoso, ekuho lyomulyo po eli ga rugene Johanesa kapi mwa hamenene elitezururo. Johanesa kwa gwene situmbukira sosinene sokukuhwa Jesus, MunwaKarunga gokusikilira mo. (Mat. 3:13-17) Jesus kapi ga hepere kulitezurura morwa kapi ga tulire nzo. (1 Pet. 2:22) Ekuho lyendi kwa likidire asi age ga liwapaikilire mokusikisa mo mpango zaKarunga.—Heb. 10:7.

7 Apa Jesus ga tamekere sirugana sendi sokuzuvhisa, varongwa vendi nawo ngava kuhu vantu. (Joh. 3:22; 4:1, 2) Vantu ava ngava kuhu nawo kwa likidire asi vana litezurura nokukwama Veta zaMosesa. Nye konyima zonomfa daJesus nevhumbuko lyendi, yinzi ya ya hamenene mo mokugwana ekuho.

8. (a) Mpangera musinke ga geve Jesus kovarongwa vendi konyima zevhumbuko lyendi? (b) Faturura eyi ya karera nomulyo koVakriste mokuvakuhwa.

8 Momvhura 33, Jesus ogu va vhumbwire kwa monekerere vantu wokupitakana po-500 vagara novakadi ntani nampo novanona. Posiruwo oso nampo yipo ga geve mpangera ezi asi: “Yipo nye nomu zira konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyoMpepo zoKupongoka. Ka di rongeni, di ka limburukwire nayinye eyi na mu rekera.” (Mat. 28:19, 20; 1 Kol. 15:6) Ayo kumoneka asi sinzi sovarongwa vendi yipo va kere apa Jesus ga geve mpangera zokutulisa po varongwa. Jesus kwa likidire asi ekuho kuna kara sihepwa kwava ava tambura ndjoko zendi mokuyakara Vakriste. (Mat. 11:29, 30) Nkenye ogu ga here kukarera Karunga ga hepere kudiva nokutambura situmbukira esi ga kara naso Jesus mokusikisa mo sitambo saJehova. Konyima zoyo, muntu ogo ga waperere kumukuhwa. Ekuho lyangesi lyomomema yilyo tupu a hafere Karunga. Yihonena yomoBibeli kugava umbangi asi varongwa wovape mosiruwo sanare va kwete egano mulyo gekuho. Ntani awo kapi va likatakatere mokuvakuhwa.—Yirug. 2:41; 9:18; 16:14, 15, 32, 33.

WA HA LI KATAKATA

9, 10. Yisinke natu lirongera ko kerenga lyomoEtiyopiya ntani kwaPaurusa kuhamena ekuho?

9 Resa Yirugana 8:35, 36. Koneka sihorokwa serenga lyomoEtiyopiya eli lya ka tengwire koJerusarema oku lya zire mokuka karera Karunga. Muengeli gwaJehova kwa gendesere Filipusa a ‘udisire erenga lina mbudi zongwa zokuhamena Jesus.’ Yisinke lya rugene erenga apa lya zuvhire mbudi zongwa? Eyi lya rugene kwa likidire asi lya kwete egano eyi lya lirongere. Alyo kwa tokomenene kulimburukwa Jehova, makura tava li kuhu lya hana kulikatakata.

10 Sihonena sauvali kuna kara somugara goMujuda ogu nga hepeke Vakriste. Age kwa kere gomomuhoko ogu ga horowere Karunga. Nye, konyima muhoko ogo kwa ya zumbanesere elikwatakano lyago naJehova. Mugara ogo kwa here unene marongo  goVajuda, nye konyima ga ya li rongere sininke somulyo. Jesus Kristusa kwa monekerere mugara ogo. Yisinke ga rugene mugara ogo? Age kwa lirongere usili komurongwa Ananiyasa. Bibeli kwa tanta kuhamena mugara ogo asi: “Makura ta katuka va mu kuhwe.” (Yirug. 9:17, 18, Gar. 1:14) Mugara ogo goMujuda kwa ya divikwa asi mupositoli Paurusa. Apa ga ya divire situmbukira esi ga kara naso Jesus mokusikisa mo sitambo saJehova, makura ta gwana ekuho ga hana kulikatakata.—Resa Yirugana 22:12-16.

11. (a) Yisinke ayi tumangeda varongwa woBibeli va va kuhwe? (b) Ngapi atu lizuvhu apa varongwa woBibeli ava va kuhu?

11 Naina, vakurona novanona nawo kulitulira po sitambo sokuvakuhwa. Ava va kara nepuro nokutambura eyi ava lirongo moBibeli kutokomena mokuligava nokuvakuhwa. Siuyungwa sekuho esi ava gava pwa nkenye sigongi mulyo, unene po kovagwani ekuho. Nombangi daJehova kuyihafera apa gumwe a tambura usili nokutura po ezokomeho dogoro a ka gwane ekuho. Vakurona kuhafa unene apa ava mono vana vawo kuna kuvakuhwa. Mo-2017, vantu wokupitakana po-284 000 “ava gwa tumbukira mwenyo gwanarunye” kwa ligeve kwaJehova nokuvakuhwa. (Yirug. 13:48) Yosili, varongwa owo wovape va yi kwata egano asi ekuho kuna kara sihepwa mokukara Mukriste. Yisinke va rugene komeho va ka va kuhwe?

12. Yisinke na rugana murongwa goBibeli komeho va mu kuhwe?

12 Komeho murongwa va mu kuhwe, ga hepa kutunga po epuro eli va tatekera kediwo lyousili kuhamena Karunga, kositambo sendi, ntani kewapaiko lyendi lyokukaparura vantu. (1 Tim. 2:3-6) Epuro olyo kumuvatera a nyokere po kuguvisa Karunga yipo a limburukwe konompango daJehova. (Yirug. 3:19) Muntu kapi ta vhuru kuligava nawa-nawa kwaKarunga nsene asi age kuna kutwikira nonkareso zondona ezi nga zi mu kondera mokukapinga Uhompa waKarunga. (1 Kol. 6:9, 10) Yinzi ya hamena mo kupitakana tupu kukwama nompango daJehova. Muntu ogu a kwama nompango daJehova ga hepa hena kuwiza komapongo nokulihameka mosirugana sokuzuvhisa nokutulisa po varongwa. Jesus kwa tente asi sirugana oso ngava si rugana varongwa vendi wousili. (Yirug. 1:8) Nsene murongwa a sikisa mo oyo, age kuvhura a ligave kwaJehova kupitira mekanderero nokumukuhwa moyitarameho yovantu.

SITAMBO SOVARONGWA WOBIBELI

Ove kugazadara ko eyi ya karera nomulyo kugwana ekuho, nokutantera ko murongwa goge ndi? (Tara paragarafu 13)

13. Morwasinke varongi woBibeli nava diworokera asi ekuho kuna kara sihepwa mokukara Mukriste?

13 Ngomu tuna kuvatera vana vetu ntani varongwa vetu woBibeli va litulire po yitambo yomulyo, twa hepa kudiworoka asi kukara murongwa kwa hamena mo ekuho. Nsene tu tura sitwa oso momagano getu, ngatu yi zogera kumwe novarongwa vetu. Ose ngatu papara nompito mokutantera varongwa vetu mulyo gokuligava nokugwana ekuho. Tuna hara vana vetu novarongwa vetu va ture po ezokomeho yipo va gwane ekuho.

14. Morwasinke natu dilira kusininika varongwa vetu va gwane ekuho?

14 Vakurona novarongi woBibeli ndi womombungakriste kapisi va sininike varongwa vawo va gwane ekuho. Jehova kapisi yimo ga yi harera ngoso. (1 Joh. 4:8) Nye, ngomu tuna kuvaronga, twa hepa kuvatantera mulyo gokutunga po elikwatakano naKarunga.  Eharo eli ga kara nalyo murongwa koNonkango daKarunga yilyo ngali mu tumangeda a gwane ekuho.—2 Kol. 5:14, 15.

15, 16. (a) Pwa kara nomvhura dongandi edi murongwa ga hepa kugwana ekuho ndi? Faturura. (b) Morwasinke murongwa goBibeli ga hepera kugwana ekuho nampili ngomu va mu kuhwa moukareli wendi wanare?

15 Kugwana ekuho kapi ya korera konomvhura dongandi. Ezokomeho eli ava tura po varongwa lya lisiga. Vamwe kukwata egano yininke usimbu nokutura po marunduruko. Wovanzi kuvakuhwa pounona ntani kutwikira kukarera Jehova noulimburukwi. Ano varongwa vamwe kuyadimburura mulyo gokugwana ekuho moukurupe.

16 Murongwa gumwe goBibeli kwa pulire murongi gwendi nsene hepero va mu kuhwe, morwa kwa mu kuhwire nare moukareli wawo wanare. Makura tava konakona kumwe Matjangwa. Murongwa ogo ga ya kwete egano eyi azi rongo Bibeli makura ta gwana ekuho. Nampili ngomu ga kere koyiha yonomvhura 76 yikandwise, kapi ga lizuvhire asi kapisi hepero va mu kuhwe. Yosili, komeho muntu va ka mu kuhwe ga hepa kukara nediwo lyosili kuhamena mpango zaJehova. Yipo nye, varongwa woBibeli va hepa simpe kuvakuhwa nampili ngomu va va kuhwire moukarelikarunga wawo wanare.—Resa Yirugana 19:3-5.

17. Yisinke ga hepa kugazadara ko murongwa pezuva lyekuho lyendi?

17 Ezuva eli murongwa goBibeli a gwana ekuho kuna kara siruwo soruhafo rorunene. Ntani aso siruwo esi ga hepa kugazadara ko kuhamena eparu lyendi. Pwa hepa elituromo lyenene mokutwikira kusikisa mo eyi wa tumbwidira Karunga apa wa ligeve. Eyi yiyo kukara murongwa gwaJesus ya karera ngwendi kulikambeka ndjoko. Varongwa vaJesus “kapisi va kerere po hena mwavene, nye va kerere po googu ga fa, yiyo ga vhumbuka mwarwawo.”—2 Kol. 5:15; Mat. 16:24.

18. Mapuro musinke ngatu ka tarurura mosirongwa sokukwama ko?

18 Ozina vaMaria kwa gazadarere ko eyi ga hepa kusikisa mo murongwa mokugwana ekuho apa va lipulire mapuro aga tuna tumbura ketameko. Ngomukurona, nampo wa lipura asi: ‘Munwange sili ana wapere kugwana ekuho ndi? Ga kara nediwo lyokugwanena po mokuligava kwaKarunga ndi? Ngapi omu a tara elirongo lyokuzeruka ntani yirugana yokufuta nawa? Ngapi nsene munwange va mu kuhwa nye konyima a ka ture nzo zonene?’ Mosirongwa sokukwama ko, ngatu ka gwana malimbururo komapuro ogo nokukakonakona omu vakurona nava kara nomutaro gokuhetakana kekuho.