Zende koyikaramo

Zende koyikaramo

Nombangi daJehova

Horowora eraka Rukwangali

 SIRONGWA SELIRONGO 9

Eharo nouhungami mosiruwo soVaisraeli

Eharo nouhungami mosiruwo soVaisraeli

“HOMPA kwa hara eyi ya hungama, ayo yosili; eharo lyendi lyenene kwa zura uzuni naunye.”—EPIS. 33:5.

RUSUMO 3 Nonkondo nepuro nehuguvaro

ETWAROMO *

1-2. (a) Yisinke twa hara natuvenye? (b) Yisinke twa diva kuhamena Karunga?

NATUVENYE kwa hara va tu likide eharo. Ntani natuvenye kwa hara va tu tekure nawa. Nsene kapi vana kutulikida eharo, ose kulizuvha ngwendi kwato mulyo.

2 Jehova ga diva asi natuvenye kwa hara va tu likide eharo nouhungami. (Epis. 33:5) Twa yi diva asi Karunga ga tu hara unene ntani ana hara va tu tekure monkedi zongwa. Eyi kuyimonenena moVeta ezi Jehova ga geve koVaisraeli kupitira mwaMosesa. Nsene kuna kulizuvha asi wopeke kapi va kutekwire nare monkedi zongwa zeharo, ya wapa kukonakona omu Veta zaMosesa * azi likida omu Jehova ga hara vantu vendi.

3. (a) Ngomu va yi faturura moVaroma 13:8-10, yisinke atu ya dimburura apa atu lirongo Veta zaMosesa? (b) Mapuro musinke natu ka limburura mosirongwa esi?

3 Apa atu lirongo Veta zaMosesa, ose kuyadimburura omu Jehova ga tu hara. (Resa Varoma 13:8-10.) Mosirongwa esi tatu ka konakona noVeta dononsesu edi ga geve Jehova koVaisraeli ntani natu ka limburura mapuro aga: Morwasinke natu uyungira asi Veta kwa zi tatekera keharo? Ngapi omu Veta za korangedere vantu va rugane youhunga? Ngapi ava va kere noyitumbukira va sikisire mo Veta? Wolye za poperere Veta ezi? Malimbururo komapuro ogo kuhengagwida nokutupa ehuguvaro ntani  kutuvatera tu hedere pepi naGuhyetu geharo.—Yirug. 17:27; Rom. 15:4.

VETA ZAMOSESA KWA ZI TATEKERERE KEHARO

4. (a) Morwasinke natu uyungira asi Veta zaMosesa kwa zi tatekerere keharo? (b) Yipango musinke ga tumbwire Jesus eyi ya kara mwaMateusa 22:36-40?

4 Veta zaMosesa kwa zi tatekerere keharo, morwa eharo yilyo ali tumangeda Jehova mwanayinye eyi a rugana. (1 Joh. 4:8) Veta mudima kwa korera moyipango eyi yivali, kuhara Karunga ntani kuhara vakwetu. (Lev. 19:18; Deut. 6:5; resa Mateusa 22:36-40.) Yipo nye, Noveta nadinye 600 nadimwe hena kulikida omu Jehova ga tu hara. Tu tareni ko noveta dimwe.

5-6. Yisinke Jehova ana harere valikwali va rugane ntani yisinke ga diva? Gava sihonena.

5 Hara mulikwali goge, ntani pakera nawa mbili vana woge. Jehova kuna hara valikwali va lihare dogoro narunye. (Gen. 2:24; Mat. 19:3-6) Nsene mulikwali gumwe a hondera, ayo kukoresa unene mukwawo komutjima. Eyi yiyo nye sipango sauntambali moyipango murongo sa silikira kuhondera. (Deut. 5:18) Nsene tu yi rugana ngayi koresa valikwali vetu ntani ayo nzo “KwaKarunga.” (Gen. 39:7-9) Mulikwali ogu va zonena kuvhura ngayi mu korese siruwo sosire.

6 Jehova ga diva omu valikwali ava litekura. Age kwa here asi vakadi woVaisraeli vava tekure nawa. Mugara ogu nga fumadeke Veta nga likida eharo kwamukadendi ntani kapi nga mu zumbu pwa hana konda zomulyo. (Deut. 24:1-4; Mat. 19:3, 8) Ano nsene a tokora kuzumba mukadendi morwa udigu wounene, age ga hepere kutjanga mbapira zelizumbo. Mbapira ozo ngazi popere mukadi ogu va zumba nsene ana hara kukakwara hena. Komeho mugara a tjangere mukadendi mbapira zelizumbo, age ga hepere kuza tanko kovagendesi wositata. Monkedi zangoso, vagendesi wositata va kere nompito zokuvatera valikwali owo va kohonone po maudigu gomononkwara dawo. Apa mugara goMuisraeli nga tokora kuzumba mukadendi ga hana konda zomulyo, Jehova kapi nga mu kondere kupitira movangendesi ndi movaporofete. Nampili ngoso, age ngayi mu koresa apa nga mono vakadi kuna kuhepa.—Mara. 2:13-16.

(Tara paragarafu 7-8) *

7-8. (a) Yisinke Jehova ga pangerere vakurona va rugane? (Tara efano lyopontunda.) (b) Yisinke natu lirongera ko?

7 Veta kwa likidire hena asi Jehova kwa harera vanona va hafe ntani nokuvapakera mbili. Jehova kwa pangerere vareti va pakere mbili vana vawo nokuvavatera va kare nelikwatakano lyewa kumwe naJehova. Vakurona va hepere kuruganesa nkenye mpito mokuvatera vana vawo yipo va hare Jehova nokukwama Veta zendi. (Deut. 6:6-9; 7:13) Jehova kwa futisire Vaisraeli morwa ngava tekura vana vawo monkedi zondona. (Jer. 7:31, 33) Vakurona va hepere kutara vana vawo ngouhwi wokutunda kwaJehova.—Epis. 127:3.

8 Eyi natu lirongera ko: Jehova kumona omu valikwali ava litekura. Age kwa harera vakurona va hare vana vawo ano nsene va dira kuyirugana age nga va pangura.

9-11. Morwasinke Jehova ga silikire Vaisraeli va dire kudovaukira emona lyovakwawo?

9 Walye o dovaukire. Mosipango sokuhulilira moyipango murongo, Jehova  kwa silikire Vaisraeli va dire kudovaukira yininke yovakwawo. (Deut. 5:21; Rom. 7:7) Jehova kwa geve veta ozo mokuronga vantu vendi yipo va takamese mutjima gwawo nomagazaro gawo ntani nomalizuvho gawo. Age ga diva asi magazaro nomamalizuvho gomadona kutwaredesa koyirugana yoyidona. (Yis. 4:23) Apa Muisraeli nga pulisire magazaro gomadona ga kure momutjima gwendi, ngayi mu twaredesa a tekure vakwawo momudona. Eyi yiyo ya horokerere Hompa ndafita. Age kwa kere muntu gomuwa. Nye ezuva limwe age kwa dowokerere mukadi govantu. Edowo lyendi kwa mu twaredesere a ka ture nzo. (Jak. 1:14, 15) Ndafita kwa honderere ntani kwa kumbagerere mugara gwaBateseba nokumudipaga.—2 Sam. 11:2-4; 12:7-11.

10 Jehova nga mono nkenye Muisraeli ogu nga dowokere emona lyamukwawo morwa age kumona eyi ya kara komutjima. (1 Hist. 28:9) Veta ezi kwa diworokesere Vaisraeli va nyokere po magazaro gomadona aga aga twaredesa koyirugana yoyidona. Eyi kulikida asi Jehova kwa kara neharo nonondunge.

11 Eyi natu lirongera ko: Jehova kapi tupu a mono emoneko lyokontunda. Age kumona eyi ya kara komutjima. (1 Sam. 16:7) Age ga diva magazaro noyirugana yetu. Age kunomena yikara yoyiwa mwetu ntani ana hara tu twikire kukara nayo. Nye ana hara tu dimburure magazaro getu gomadona nokugapangera komeho ga tu ninkise tu ka rugane yininke yoyidona.—2 Hist. 16:9; Mat. 5:27-30.

VETA EZI ZA KORANGEDERE UHUNGAMI

12. Yisinke hena azi tu rongo Veta zaMosesa?

12 Veta zaMosesa kuturonga hena asi Jehova kwa hara uhungami. (Epis. 37:28; Jes. 61:8) Age kwa tu tulira po sihonena omu natu tekura wopeke monkedi zongwa. Jehova kwa tungikire Vaisraeli apa ngava limburukwa Veta zendi. Nye apa ngava dili kusikisa mo nompango daJehova awo ngava hepa. Tu tareni hena noVeta mbali edi da kara moyipango murongo.

13-14. Yipango musinke yivali yokuhova va hepere kusikisa mo Vaisraeli ntani mauwa musinke va gwanenene mo?

13 Karera Jehova gelike. Yipango yivali yokuhova moyipango murongo kwa rondwere Vaisraeli va karere Jehova gelike ntani va nyokere po kukarera yikarunga yoyipempa. (Ex. 20:3-6) Pokulimburukwa yipango oyo, Vaisraeli kwa gwanenene mo mauwa. Apa ngava limburukwa Jehova, age kwa va tungikire. Nye apa ngava karere yikarunga yokonomuhoko dapeke, awo ngava hepa.

14 Gazadara ko kuhamena Vakanani. Awo ngava karere yikarunga yoyipempa mevango lyokukarera Karunga gosili. Eyi kwa va ninkisire va hepe. (Epis. 115:4-8) Moukarelikarunga wawo kwa hamenene mo yirugana yoruhonda nokuzamba vana vawo. Mokulifana, apa Vaisraeli ngava karere yikarunga yoyipempa, awo ngava hepa kumwe nomapata gawo. (2 Hist. 28:1-4) Ava va kere noyitumbukira kapi ngava kwama nompango daJehova kuhamena uhungami. Awo ngava ruganesa nonkondo dawo momudona nokuhepeka vakwawo. (Hes. 34:1-4) Jehova kwa rondwere Vaisraeli asi age nga pangura vantu ava ava tekura momudona vakadi novanona. (Deut. 10:17, 18; 27:19) Mokulisiga, Jehova kwa tungikire vantu vendi apa ngava mu limburukwa  nokutekura vakwawo monaruwa.—1 Vah. 10:4-9.

Jehova kwa tu hara ntani kutumona apa atu ligwanekere nomaudigu (Tara paragarafu 15)

15. Sirongwa musinke tuna lirongere ko kuhamena Jehova?

15 Eyi natu lirongera ko: Kapisi tu pe Jehova usima nsene vantu va dira kukwama nompango dendi nokututekura momudona. Jehova kwa tu hara ntani kutumona apa atu ligwanekere nomaudigu. Age kwa kara neharo lyenene kwetu kupitakana eli zinya a likida munwendi. (Jes. 49:15) Nampili ngomu a dili kurugana ko yuma usimbu, age nga pangura nkenye ogu a tekura vantu vendi momudona.

NGAPI OMU VETA NGAVA ZI RUGANESA?

16-18. Yisinke ya hamenene mo moVeta zaMosesa ntani yisinke natu lirongera ko?

16 Veta zaMosesa kwa hamenene mo yininke yoyinzi, yipo nye vagendesi va hepere kupangura vantu vaKarunga pauhunga. Awo ngava vatere muhoko goVaisraeli pampepo ntani nokukohonona po madiro kulizuvha noukorokotji. Tu tareni yihonena yina kukwama ko.

17 Apa Muisraeli nga dipaga mukwawo, age kapi ngava mu dipaga nage poopo. Vagendesi wositata va hepere kukonakona udigu owo yipo va dive nsene asi nage ana fire kumudipaga. (Deut. 19:2-7, 11-13) Vagendesi ngava pangura hena maudigu gankenye ezuva ngwendi nomutangu dokuhamena koyiweka nomadiro kulizuvha gomononkwara. (Ex. 21:35; Deut. 22:13-19) Apa vagendesi ngava pangura nawa napa Vaisraeli ngava kwama Veta, navenye kwa gwanenene mo uwa ntani awo kwa hafesere Jehova.—Lev. 20:7, 8; Jes. 48:17, 18.

18 Eyi natu lirongera ko: Nayinye eyi atu rugana meparu, mulyo kwaJehova. Age ana hara tu tekure wopeke monkedi zongwa zeharo. Age kumona nkenye eyi atu uyunga ndi eyi atu rugana nampili nyoselike tuna kara.—Heb. 4:13.

19-21. (a) Ngapi omu vagendesi novapanguli ngava tekura vantu vaKarunga? (b) Noveta musinke ga tulire po Jehova ntani yisinke natu lirongera ko?

19 Jehova kwa here kupopera vantu vendi va dire kuhonena nkareso zondona zonomuhoko edi da va kundurukidire. Yipo nye, age kwa tulire po vagendesi novapanguli yipo va gendese nawa Veta. Nye age kwa here va pangure vantu vendi monkedi zongwa ntani zeharo.—Deut. 1:13-17; 16:18-20.

20 Jehova kwa hara vantu vendi, eyi yiyo ga tulilire po noveta mokuvapopera yipo va dire kuvatekura momudona. Pasihonena, Veta ngazi poperere muntu va dire kumurundira asi ana rugana ukorokotji. Muntu ogu ngava rundire age nga diva asi yilye ogu ana mu rundire.  (Deut. 19:16-19; 25:1) Komeho zokumugwana unzoni, pwa hepere kukara nombangi mbali edi dina kuyikwatesa ko. (Deut. 17:6; 19:15) Nye ngapi kuhamena Muisraeli ogu ga tulire nzo ezi ga mwene muntu gumwe tupu? Ga ha gazara asi kapi ngava mu tengeka. Morwa Jehova ga mwene eyi ga rugene. Mepata, vanturagumbo kwa kere nononkondo dokuyereka. Nsene mepata muna kara udigu, vagendesi yiwo ngava tura po etokoro lyokuhulilira.—Deut. 21:18-21.

21 Eyi natu lirongera ko: Jehova kwa tura po sihonena sosiwa, age kurugana nayinye pauhunga. (Epis. 89:14) Age kutungika ava ava limburukwa nompango dendi, nye ava ava ruganesa nonkondo dawo monkedi zepuko age nga va pangura. (2 Sam. 22:21-23; Hes. 9:9, 10) Vamwe kuvhura va rugane yininke yoyidona nokugazara asi kwato ogu ana kuvamona, nye siruwo ngasi wiza apa Jehova nga tokora kuvapangura. (Yis. 28:13) Ntani nsene va dira kulitezurura, awo ngava ya dimburura asi alyo “ehudi lyenene lyokugwira momawoko gaKarunga gomunamwenyo!”—Heb. 10:30, 31.

WOLYE ZA POPERERE VETA?

Vagendesi va hepere kuhonena eharo lyaJehova apa ngava pangura wopeke (Tara paragarafu 22) *

22-24. (a) Wolye za poperere veta ntani yisinke yina kuturonga kuhamena Jehova? (b) Erondoro musinke lyakara mwaExodus 22:22-24?

22 Veta ngazi popere vantu ava ngava dili kuvhura kulipopera vene ngwendi nonsigwe, vafisavayawo ntani vanayirongo. Vapanguli womoIsraeli kwa va  tanterere asi: “Nokudinisira si vanayirongo nononsigwe eyi va va pulisira, ndi asi o guse mufisayendi sikoverero sendi mevega lyeyi wa mu heheda.” (Deut. 24:17) Jehova kwa likidire nkenda vantu vangoso ava ngava tara monomukunda asi kwato mulyo. Ntani age nga tengeke vantu ava ngava tekura vantu owo momudona.—Resa Exodus 22:22-24.

23 Veta kwa poperere hena mapata pokusilika vantu va dire kulikwarera mekoro. (Lev. 18:6-30) Mokulisiga nonomuhoko edi ngadi pulisire yirugana eyi yoyidona, Vaisraeli va hepere kunyenga yirugana oyo ngwendi moomu ga yi nyenga Jehova.

24 Eyi natu lirongera ko: Jehova kuna hara ava va kara noyitumbukira va kare nonkareso zongwa kwanavenye. Age kwa nyenga ruhonda, ntani ana hara kupopera vantu navenye, unene po nonsigwe novafisavayawo ntani vanayirongo.

VETA “MUNDUNDUMBA TUPU GOUWA WOKOMEHO”

25-26. (a) Morwasinke natu uyungira asi kapi tatu vhuru kukara neharo nsene kapi twa hara uhungami? (b) Yisinke ngatu ka zogera mosirongwa sokukwama ko moyirongwa eyi yine?

25 Kapi tatu vhuru kukara neharo nsene asi kapi twa hara uhungami. Apa atu nongonona asi Jehova kututekura pauhungami, eharo lyetu kwendi kunkondopara. Nsene tu hara Jehova nonompango dendi ayo ngayi tu tumangeda tu hare wopeke nokuvatekura mouhunga ndi monaruwa.

26 Veta zaMosesa kwa vaterere Vaisraeli va kare nelikwatakano lyewa naJehova. Konyima zapa Jesus ga hagekesere po Veta zaMosesa, vantu vaJehova kapi va hepere hena kukwama Veta ozo. (Rom. 10:4) Mupositoli Paurusa kwa tente asi Veta ezi kwa kere “mundundumba tupu gouwa wokomeho.” (Heb. 10:1) Sirongwa sokukwama ko moyirongwa eyi yine, ngasi ka zogera mauwa gamwe nomu ya kara nomulyo kulikida eharo nouhungami mombungakriste.

RUSUMO 109 Hara nomutjima nagunye

^ para. 5 Esi kuna kara sirongwa sokuhova moyirongwa yine eyi ayi likida asi Jehova kwa tu hara. Yirongwa yitatu yokukwama ko ngayi moneka moRuhungu rwaKudumonkuru 2019. Yiparatjangwa yoyirongwa oyo kuna kara “Omu mbungakriste azi likida eharo nouhungami,” “Kulikida eharo nouhungami moyiruwo eyi youdigu,” ntani “Omu natu hengagwida ava va tekura momudona.”

^ para. 2 EFATURURO LYONKANGO: Noveta 600 nadimwe hena edi ga geve Jehova koVaisraeli kupitira mwaMosesa kuditumbura asi “Veta” ndi “Veta zaMosesa” ntani “yipango.” Nobuke ntano dokuhova domoBibeli (Genesis dogoro Deuteronomium) ado kuditumbura asi Veta. Poyiruwo yimwe nkango ozo kwa zi ruganesa mokutamba koMatjangwa goRuhebeli nagenye.

^ para. 60 EFANO LYOPONTUNDA: Jehova kwa here vanona va hafe ntani vakurona vawo vava pakere mbili nokuvaronga

EFANO: Zinya goMuisraeli kuna kuzogera kumwe novana vendi ngomu vana kuwapaika nondya. Ano guhya kuna kudeura munwendi omu na pakera mbili nonzwi.

^ para. 64 EFANO: Vagendesi wositata kuna kuvatera mufisayendi namunwendi ava ana fukilire murandesi.