Zende koyikaramo

Zende koyikaramo

Nombangi daJehova

Horowora eraka Rukwangali

Twikira kukura pampepo

Twikira kukura pampepo

“Omu sige Mpepo zaKarunga zi mu pitisire.”—GAR. 5:16.

MARUSUMO: 22, 75

1, 2. Yisinke ga dimbwilire munazinyetu gumwe ntani yisinke ga rugene ko?

ROBERT kwa gwene ekuho poudinkantu, nye kapi ga here nawa usili. Age kwa tanta asi: “Ame kapi ngani rugana yininke yoyidona, nye kapi na litulire mo mokukarera Jehova. Ngani moneka ngwendi muntu ga kura pampepo morwa ngani zi komapongo nkenye apa ntani ngani rugana uzuvhisi wokuvatera makwedi gongandi momvhura. Nye koyili simpe ngani dili kurugana.”

2 Age kwa ya yi divire tupu konyima zononkwara dendi. Nage namukadendi ngava ruganesa siruwo sawo sokupwizumuka mokudana maudano gomoBibeli. Mukadendi ngayi mu rerupire kudiworoka yihorokwa yomoBibeli morwa ga kura pampepo. Nye Robert ngali fu nomuga nkenye apa morwa kapi ga divire nawa yihorokwa yomoBibeli. Age kwa tanta asi: “Ayo kwa monekere ngwendi kwato eyi na divire. Yipo na gazarere asi, ‘Na hepa kurugana ko yuma morwa nyame mupangeli gwamukadange.’” Yipo ga rugene ko yuma. Age kwa tanta asi: “Na ya tamekere kulironga Bibeli nokutwikira ngorooro, ano mwaza siruwo na ya divire yihorokwa yomoBibeli. Na ya tamekere kuyikwata egano nye unene po ya vaterere nge ni kare nelikwatakano lyewa naJehova.”

3. (a) Yisinke natu lirongera ko kosihorokwa saRobert? (b) Mapuro musinke natu ka limburura mosirongwa esi?

 3 Kuvhura tu lirongere ko kosihorokwa saRobert. Kukara nediwo lyomoBibeli nokuza nkenye apa komapongo, kapi ayi tanta asi twa kura pampepo. Ndi nampo ose twa tura po ezokomeho, nye pokulikonakona nyamwetu kuyadimburura asi simpe twa hepa kuwapukurura. (Fil. 3:16) Mosirongwa esi tatu ka gwana malimbururo komapuro gatatu gomulyo mokutuvatera tu ture po ezokomeho: (1) Yisinke ngayi tu vatera tu dive nsene asi twa kura pampepo? (2) Yisinke ngayi tu vatera tu kure pampepo nokutwikira ngorooro? (3) Ngapi kukura pampepo ngayi tu vatera meparu?

LIKONAKONA NYAMOGE

4. Kwalye lya tamba epukururo lyomoVaefeso 4:23, 24?

4 Apa twa tamekere kukarera Jehova, ose kwa rundwilire nkareso zetu. Ano konyima zekuho, ose kwa twikira kuyirugana. Bibeli kutanta asi twa hepa kutwikira ‘kusitununa nomutjima detu nonompepo detu di kare nompe.’ (Efe. 4:23, 24) Twa hepa kutwikira kutura po marunduruko morwa kapi twa sikilira mo. Nampili ava va karera Jehova nomvhura dononzi nawo va hepa simpe kunkondopeka elikwatakano lyawo nage.—Fil. 3:12, 13.

5. Mapuro musinke naga tu vatera tu likonakone nyamwetu?

5 Mokuwapukurura elikwatakano lyetu naJehova, twa hepa kulikonakona nawa. Yi kare asi tuvanona ndi tuvakondi ya wapa kulipura asi: ‘Ame kuna kumona marunduruko monkareso zange aga gana kulikida asi kuna kukura pampepo ndi? Ame kuna kuhonena Kristusa ndi? Nkareso musinke ani likida komapongo ntani yisinke azi likida kuhamena elikwatakano lyange naJehova? Yisinke adi likida nonzogera dange kuhamena yitambo yange? Yisinke ali horora elirongo lyange lyoBibeli nondwareso zange ntani monkedi omu ani tambura mapukururo kuhamena nge? Yisinke ani rugana nsene kuna kuzeda nge? Na sika moukurona wene-wene wokukara Mukriste ndi?’ (Efe. 4:13) Mapuro ogo ngaga tu vatera tu dive nsene kuna kukura pampepo.

6. Yisinke hena nayi tu vatera tu dive nsene kuna kukura pampepo?

6 Pamwe twa hepa evatero lyovakwetetu yipo tu divilise nsene asi kuna kukura pampepo. Paurusa kwa tente asi muntu ga dira kukura pampepo kapi ayi kwata egano asi mparukiso zendi kuguvisa Karunga. Nye mokulisiga, muntu ga kura pampepo kukwata egano omu a tara Karunga yininke. Ntani hena ga diva asi Jehova kapi a hafere nkareso zovantu va dira kukura pampepo. (1 Kol. 2:14-16; 3:1-3) Vakuronambunga ava va kara nomatedo gaKristusa kudimburura usimbu nsene a tengura gumwe monyima. Apa ava hetekere ko kutuvatera, ose kutambura mapukururo ogo nokuhetekera ko kutura po marunduruko ndi? Nsene tu yi rugana ngoso, ngatu likida asi tuna hara kukura pampepo.—Muud. 7:5, 9.

NKONDOPEKA ELIKWATAKANO LYOGE NAJEHOVA

7. Ayo ya gwanena po tupu kudiva Bibeli yipo tu kure pampepo ndi?

7 Diworoka asi kapi ya gwanena po tupu kudiva Bibeli yipo tu kure pampepo. Hompa Saromo nage ga divire yoyinzi kuhamena Jehova. Ntani hena nonkango dendi dounongo kwa di tjanga moBibeli. Nye konyima, ga ya zumbanesere elikwatakano lyendi naJehova morwa kuhageka kulimburukwa kwendi. (1 Vah. 4:29, 30; 11:4-6) Yipo nye, yisinke twa hepa kurugana mokugwederera ko kediwo lyetu lyoBibeli? Twa hepa kutwikira kutura po  ezokomeho. (Koros. 2:6, 7) Nye ngapi natu yi rugana oyo?

8, 9. (a) Yisinke ngayi tu vatera mokunkondopeka epuro lyetu? (b) Sitambo musinke natu kara naso pokulironga nopokuteda? (Tara efano pepenuno 23.)

8 Paurusa kwa tumangedere Vakriste womosiruwo sovapositoli va ‘kondjere’ kukura pampepo. (Heb. 6:1) Ngapi natu kwama epukururo olyo? Nkedi zimwe kuna kara pokulironga buke Omu kare meharo lyaKarunga.” Pokumana kulironga buke ozo ngayi kuvatera o dive omu no ruganesa nompango doBibeli meparu lyoge. Nsene wa mana kuzilironga, pwa kara yimbapiratjangwa yimwe eyi no vhura kulironga mokukondopeka epuro lyoge. (Koros. 1:23) Ayo mulyo tu tede ko kweyi tuna kulironga nokuhundira Jehova a tu vatere tu dive omu natu yi tura pasirugana.

9 Apa atu lirongo nokuteda ko, twa hepa kuyirugana nositambo sokutunga po eharo eli nali tu vatera tu hafesa Jehova. (Epis. 40:8; 119:97) Ntani twa hepa kukondja mokunyokera po nayinye eyi nayi tu donganesa tu dire kukura pampepo.—Tit. 2:11, 12.

10. Ngapi vadinkantu nava nkondopeka elikwatakano lyawo naJehova?

10 Nsene ove mudinkantu, wa kara noyitambo yopampepo ndi? Munazinyetu gomugara ogu a rugana koBeteli apa azi koyigongi, age kuzogera novagwani ekuho komeho li tameke elikwamo. Sinzi sava ava gwana ekuho vadinkantu. Munazinyetu ogo kuvapura kuhamena yitambo yawo yopampepo. Malimbururo aga ava gava vadinkantu wovanzi kulikida asi va diva eyi vana hara kurugana mokukarera Jehova. Vamwe kwa litulira po yitambo yokulihameka mosirugana sosiruwo nasinye ndi kukazuvhisira oku kuna hepa vazuvhisi. Ano vamwe kapi ava vhuru kulimburura apa ani va pura. Oyo ngoso kutanta asi kapi va gazadara ko koyitambo yopampepo ndi? Ngomudinkantu, lipura asi: ‘Ame kuza tupu mokuzuvhisa morwa vakurona vange yiyo va harera nge ni rugane ndi? Ame kuna kuhedera pepi naKarunga pokutulisa po elikwatakano nendi ndi?’ Epukururo lyokukondjera yitambo yopampepo kapi lya tamba tupu kovadinkantu, nye kovakareli vaJehova navenye. Yitambo oyo ngayi nkondopeka elikwatakano lyetu naJehova.—Muud. 12:1, 13.

11. (a) Yisinke twa hepa kurugana tu kure pampepo? (b) Sihonena musinke somoBibeli twa hepa kuhonena?

11 Nsene tuna dimburura asi koyili twa hepa kurundurura monkareso zetu, twa hepa kuyirugana. Ayo mulyo unene tu yi rugane morwa kwa hamena eparu lyetu. (Rom. 8:6-8) Nampili ngoso, kukura pampepo kapi ayi tanta asi twa hepa kusikilira mo. Mpepo zaJehova kuvhura kutuvatera tu ture po marunduruko. Nye simpe, twa hepa kulitura mo. Munazinyetu John Barr ogu ga kere gumwe gomoMbungagendesi kwa kumbwilire ketjangwa lya kara mwaRukasa 13:24 pokutanta asi: “Wovanzi kapi ayi va tompoka morwa kapi ava litura mo unene.” Ngano tu kare ngwendi Jakopo ogu ga likondjesere nomuengeli dogoro aya gwane etungiko. (Gen. 32:26-28) Nampili ngomu atu hafere kulironga Bibeli, kapisi tu zi hetakanese kobuke zonongano ezi va tjangera mokulihafesa. Twa hepa kuzilironga tu gwane ugawo ou ngau tu vatera.

12, 13. (a) Yisinke ngayi tu vatera tu sikise mo 1 Vakolinte 2:16? (b) Yisinke natu lirongera ko kosihonena saPeturusa? (c) Yisinke natu rugana tu twikire kukura pampepo? (Tara kakende “ Eyi no rugana mokutwikira kukura pampepo.”)

12 Apa atu kondjo tu kure pampepo, mpepo zokupongoka kutuvatera tu rundurure magazaro getu. Nevatero lyompepo ozo, ose kuyatameka kugazara ngamoomu nga gazara Jesus. (1 Kol. 2:16) Ntani hena, azo ngazi tu  vatera tu tunge po yikara eyi ngayi hafesa Karunga nokunyokera po madowo gomadona. (Gar. 5:16, 22, 23) Nsene tu tameka kukara nomagazaro gomadona, kapisi tu lisigilire. Twa hepa kutwikira kuhundira Jehova mpepo zokupongoka yipo tu demenene koyininke youhunga. (Ruk. 11:13) Diworoka mupositoli Peturusa. Poyiruwo yimwe nage nga zono. (Mat. 16:22, 23; Ruk. 22:34, 54-62; Gar. 2:11-14) Nye kapi ga lisigilire. Jehova ga mu vaterere, ano mwaza siruwo ga ya tamekere kugazara ngwendi Kristusa. Nose ngano tu rugane yokulifana.

13 Peturusa ga ya tumbwire yikara yimwe eyi nayi tu vatera. (Resa 2 Peturusa 1:5-8.) Nsene tu ‘kondjera’ kutunga po yikara ngwendi elipangero nedidimiko ntani eharo lyosiumumbya, ngayi tu vatera tu twikire kukura pampepo. Ayo ya wapa kulipura nkenye ezuva asi, ‘Yisinke nani rugana yipo ni twikire kukura pampepo?’

KUTURA PASIRUGANA NOMPANGO DOMOBIBELI

14. Ngapi kukura pampepo nga ku kundama eparu lyetu?

14 Kugazara ngwendi Kristusa kukundama nkareso zetu koyirugana ndi kosure ndi nonkango detu ntani matokoro aga atu tura po nkenye ezuva. Matokoro ogo nga ga likida nsene asi ose kuna kuhonena Kristusa. Ngovantu ava va kura pampepo, kapi tuna hara nkenye eyi yi zonagwise po elikwatakano lyetu naGuhyetu gemeguru. Nsene va tu zeda tu rugane yoyidona, nkareso zetu zongwa ngazi tu vatera tu yi nyokere po. Komeho tu ture po matokoro, twa hepa kuteda ko komapuro aga: ‘Nompango musinke domoBibeli nadi vatera nge ni tokore nawa? Ngano Kristusa, ngano yisinke na rugana moukaro wangesi? Etokoro musinke nali hafesa Jehova?’ Mokuliyomberesa kugazara monkedi ozo, tu tareni maukaro gamwe omu natu yi rugana. Mwakenye ukaro, tatu ka tara ko etjangwa eli nali tu vatera tu ture po etokoro lyewa.

15, 16. Ngapi kugazara ngwendi Kristusa nayi tu vatera pokuhorowora (a) mulikwali? (b) vakaume?

15 Kuhorowora mulikwali. Etjangwa lya likwatakana nononkango odo kuna kara 2 Vakolinte 6:14, 15. (Resa.) Nonkango daPaurusa da yi zeresa nawa-nawa asi muntu ga kura pampepo kwa lisiga nogu ga dira kukura pampepo. Awo kapi ava tara yininke monkedi zokulifana. Ngapi nali ku vatera etjangwa olyo pokuhorowora mulikwali?

16 Kuhorowora vakaume. Koneka etjangwa lyomo-1 Vakolinte 15:33. (Resa.) Muntu ga kura pampepo kapi a kara novantu ava nava tura elikwatakano lyendi naJehova mosiponga. Gazadara ko omu no ruganesa etjangwa eli momaukaro gokulisiga-siga. Pasihonena, ngapi nali ku vatera pokuruganesa Intaneta? Ndi ngapi nsene gumwe a ku tantera mu dane maudano koIntaneta novantu wa dira kudiva?

Matokoro gange ngaga vatera nge ni kure pampepo ndi? (Tara paragarafu 17)

17-19. Ngapi omu kukura pampepo ngayi ku vatera (a) o nyokere po yirugana ya pira sikwafo? (b) o kondjere yitambo yopampepo? (c) o kohonone po madiro kulizuvha?

17 Eyi nayi tura elikwatakano lyetu naJehova mosiponga. Paurusa kwa tjangerere  Vakriste nonkango derondoro. (Resa Vahebeli 6:1.) Yirugana musinke eyi ‘ya pira sikwafo’ natu nyokera po? Eyi kuna kara yirugana eyi ayi dili kutuvatera tu kure pampepo. Etjangwa olyo kutuvatera tu limburure mapuro aga: ‘Sirugana esi sa kara nomulyo ndi? Kuvhura ni lihameke momatjingiso gonongesefa ndi? Morwasinke nani dilira kulihameka mombunga ezi zina hara kutulisa po mbili mouzuni?’

Matokoro gange ngaga vatera nge ni ture po yitambo yopampepo ndi? (Tara paragarafu 18)

18 Yitambo yopampepo. Eyi ga uyungire Jesus pEudiso lyoPondundu, kuturonga yitambo yomulyo eyi twa hepa kukondjera. (Mat. 6:33) Muntu ga kura pampepo kutura Uhompa muhowo meparu lyendi. Mpango ezi kutuvatera tu limburure mapuro aga: ‘Kuvhura ni ze kelirongo lyokuzeruka ndi? Kuvhura ni tambure sirugana songandi ndi?’

Matokoro gange ngaga vatera nge ni kare nombili ndi? (Tara paragarafu 19)

19 Madiro kulizuvha. Epukururo eli ga geve Paurusa kombungakriste zomoRoma kutuvatera apa atu dili kulizuvha novakwetu. (Rom. 12:18) Ngovarongwa vaJesus, ose kuhetekera ko kukara “nombili kovantu navenye.” Yisinke atu rugana nsene kapi tuna kulizuvha novakwetu? Ose kwa hara kutulisa po “mbili” ndi kutudigopera kutambura magano gava wopeke ndi?—Jak. 3:18.

20. Morwasinke ono harere kutwikira kukura pampepo?

20 Yihonena eyi kutuvatera tu ruganese nompango doBibeli mokutura po matokoro aga ga liza neyi ga hepa kurugana ogu ga kura pampepo. Nsene tu kura pampepo ngatu kara noruhafo meparu ntani ngayi tu gwanena po. Robert ogu tuna tumbura ketameko, kwa tanta asi: “Ame ngesi nturagumbo gomuwa ntani guhya gomuwa morwa na tulisa po elikwatakano lyewa naJehova. Ame nina hafa ntani ya gwanena nge po.” Nsene tu twikira kukura pampepo nose ngatu gwana mauwa gomanzi. Ose ngatu hafa mouzuni ou ntani ngatu ka gwana “mwenyo gwanarunye” komeho.—1 Tim. 6:19.