Zende koyikaramo

Zende koyikaramo

Nombangi daJehova

Horowora eraka Rukwangali

Wa yi diva ndi?

Wa yi diva ndi?

Vaisraeli ngava kwama nompango domoVeta zaMosesa mokukohona po nkenye udigu ndi?

NHI, poyiruwo yimwe. Tu tareni sihonena simwe mwaDeuteronomium 24:14, 15, kutanta asi: “Nokuninkilira mo si muhepwe ndi muruganenimfuto zemezuva, a kare Muisraeli mukweni ndi munayirongo ogu ga kara mositata seni . . . Nsene o dira kumupa mfuto zendi, ta kugu kwaHOMPA mwaroge, age makura ta ku tengeke morwanzo zoge.”

Sipako serova apa va tjenge elikwambero lyomurugani gomunandima

Etjangwa eli kwa liza nosihorokwa esi va tjenge nomvhura 700 komeho zokuwiza Jesus pevhu, va gwene pepi nositata saAsidodo. Esi va tjenge kuhamena murugani gemepya ogu ya vhulire kufuta ndi kutengwida rukokotwa, sihorokwa esi kwa si tjenge posipako serova nononkango edi asi: “Mukareli goge apa ga mene kupungura muzangu mazuva ga ka pita, Hoshayahu munaShobay kwa wizire a ya guse erwakani lyange. . . . Varugani vakwetu nawo va yi mwene kuvhura va kwatese nge ko asi eyi nina kuuyunga usili. Ame kutupu unzoni. . . . Nguuru nsene a lizuvha asi kapisi yige gokuyikohonona po, ayi rugane tupu mokufirange nkenda. Rugana ko yuma morwa mukareli goge va mu gusa erwakani lyendi.”

Munahistoli gumwe gedina Simon Schama kwa tanta asi: “Mukareli gwina kapi ga likwamberere tupu yipo va mu tengwidire erwakani lyendi. Nye ga divire noveta daMosesa unene po edi da kara mwaLevitikus naDeuteronomium edi da nyokesa kutekura nohepwere monkedi zonyanya.”